بلطجه عيني عينك

[skoda1996]

السلام عليكم
النهارده كنت في كافتريا مع اصحابي حصل موقف في منتهي الرخامه
راجل كبير كان راكن عربيته و هيمشي لقينا واحد بيقوله هات فلوس عشان انا بسترزق من الركنه في الشارع ده و استغل ان الراجل معاه مراته و عيال صغيرين و بيعلي صوته عشان الراجل يتحرج و يديله
و لما الراجل رفض ... الواد ده بيقوله هاخد الفلوس بلطجه
قومت انا و اتنين اصحابي عشان نربيه و نعلمه الادب ... لقيناه بيقول الشارع بتاعي و انا اخد فلوس علي مزاجي
اضطرينا اسفين للشتيمة ... الخلاصه يعني بعد رغي كتير
صاحب العربية مشي من غير ما يدفع فلوس و الواد بيحسبن علينا و علي ظلمنا للفقرا
بس الناس دي حلها اية ؟
هل شرطه النجده هتتعامل معاه و لا هتيجي تصالحنا علي بعض و تمشي ؟؟؟؟؟

مع العلم انه حتي مش ماسك فوطه يلمع العربيات ... ده بياخد اتاوة رسمي كده

[amr011111]

أحييك على تصرفك وللأسف الشرطه اصلا مش هترد على التليفون
لو ردت مش هيحصل تصالح
انت هتقول ان السايس شتمك وهوه هيقول انك قطعتله قميصه وشتمته
فاللى هيحصل انكم هتروحوا القسم وتباتوا تانى يوم علشان مفيش نيابه

[bestlove2]

لسة حالا حاصل نفس الموقف معايا كنت فى فرح وراكن جنب الرصيف فوجئت بواحد جاى بيقولى بارك قلت له دا شارع وسيبته ومشيت ولما رجعت اخد العربية لاقيت الواد فوق دماغى وانا طالع بيقول يااستاذ المهم اديته خمسة جنيه زوقيا منى فوجئت الواد بيقول 10 قلت له انا مديك الخمسة منى ذوقيا مش فرده عليا يقولى دا مكانى وبسترزق منه قولته مش عجباك هاتها فوق اتخرس ومتكلمش ومشيت وبعد ما مشيت الاقيه يقولى حرام عليكوا قلت انزله لاقيت المدام بتقولى امشى عشان هتوقف الطريق وسيبك منه بس مشيت وانا قرفان انى منزلتش اضربه

[احمد المصرى]

انت واصحابك رجاله بس الموضوع دا اتكرر كتير ولازم حل جوهري ليه

[mahmoud_ali]

مشكله فعلا مقرفه ولازم ليها حل. انا حصل بقا موقف شبه ده وكان عايز ياخد فلوس وانا بركن قولتله مش دافع قالى هتدفع قولتله ربنا يسهل وسبت العربيه ولما رجعت لقيته مغرقها تراب وفضلت ادور عليه ملقتوش ابن التييت

[HOSSAM99]

النجده هاتيجي تصالحكم ....هههههههههههههههههههههههه








يا فاندم النجده ما بتردش علي حد
و البلطجية دول مش هايتشالو و لا الباعة الجائلين (تشلهم من مكان ينطو في مكان تاني) هي بلدنا دي كده و هاتفضل كده و مش ها تتغير إلا أن يشاء الله لها
ملاحظة: بلاش خناق مع الفئة دي نهائي و متسبش عربيتك في ركنة شديت مع عيل من العيال دي بسببها ..
ربنا يرحمنا و يتوب علينا

[Omar Mahmoud]

انت و اصحابك رجالة
بس للأسف الموضوع ده من زمان في وسط البلد (سنة2008-2009) عايزين نركن لقينا واحد قاللنا خمسة جنيه قلنا ماشي لف لفة طويلة و هو اللي ساق العربية سواقة زي الزفت لحد ما ركنا صف تاني و احنا واقفين جنب العربية نلاقي واحد بيقولنا هاتوا المفتاح و الفلوس(بيسهبل) و فرجنا عليه الشارع و مشي يقول بتركنوا بفلوسنا و مخدش حاجة.

[omar312eg]

الصنف ده فى كل شوارع مسر تقريبا
ويا ويلك لو ما دفعتش الاتاوه

[Ahmed Saad]

جدعان وانا لو معاكو بدهر ايدي وعلي وشه دي اشكال عايزه فلوس من غير ماتشتغل وتتعب فمتستاهلش عطف معاهم

[skoda1996]

شكرا علي ردودكم اللي حسستني اني عملت حاجه ليها قيمه
بس لو النجده مش هترد ... مين اللي يحمي الناس في الشوارع ؟
طب لو بنت هي اللي في موقف زي ده هيحصلها اية لو لوحدها
هي باظت و لا اية ؟؟؟؟؟؟؟؟؟؟

[Mohab.Nabil]

شكرا علي ردودكم اللي حسستني اني عملت حاجه ليها قيمه
بس لو النجده مش هترد ... مين اللي يحمي الناس في الشوارع ؟
طب لو بنت هي اللي في موقف زي ده هيحصلها اية لو لوحدها
هي باظت و لا اية ؟؟؟؟؟؟؟؟؟؟

هى باظت فعلا للاسف

حضرتك جرب تروح فى الدقى او عند جامعة القاهرة الصبح بدرى فى اوقات الدراسة و العمل .. الركنة بـ 10 حنيه و الدفع فورى بعد ما تركن مش قبل ما تطلع و البلطجية دول واقفين بحماية الشرطة و الشرطة بتاخد نصيبها من الحب برضه ما هو بيزنس كبير و فلوس بتيجى من الهوا !

[abdulkhaleq]

حللهم ايه
مممم
القتل
وعلى فكره مش بهزر
عشان في فصيل هيخلص عالتاني. ياهما يا احنا!
وانت بتتكلم على ناس واقفه؟؟
الموضوع وصل لأن ممكن عيل سيس يكون ماشي في الشارع صدفه يشوف بنت بتركن ينط يقولها ايوه ارجعي ولفي عشان ياخد فلوس, يعني ياريته واقف اصلا

[Mido Casper]

النجده مش هترد عليك :d

[elpasha1]

انتظروا ثورة الجياع
الشرطة مش فاضية غير لمخالفات الرادار والكماين بسسسسسسسسسس
وبأكد على بسسسس دى
انما اقسام الشرطة فى الطراوة
واللى مش مصدقنى يروح يعمل محضر فى اى حاجة وشوف رد الضباط اية مش صف الضباط زى زمان
دلوقتى الضباط نفسهم

[egyptiandiver]

أنا قبل كدة كلمة الشرطة و راً للنهاية و محدش بردو رد. في إيه يا جدعان دي الطوارئ يعني جريمة قتل أو ما شابة يعني حاجة خطيرة. ربنا يستر.