من المتسبب الحقيقي في فوضي الشارع المصري ؟؟

[Mohd_Adel_Amin]

إذا كنت تمتلك محل للذهب
أول شئ تفعله هو تأمينه ضد السرقات

فكما يوجد في الشارع المحترمين و الأمناء

يوجد الكثير ممن ليس لديهم ضمير و مستعدون للسرقة

لذلك تقفل المحل جيدا عند المغادرة و تؤمن البضاعة داخله بأقصى الإمكانيات المتاحة لك

هذا هو حال الشارع
تركت الشرطة الناس تفعل ما يحلوا لها
فغاب الرقيب
فأصبحت شوارعنا هرجلة و فوضى
و الناس في مصر مش بتيجي غير بالضرب على الدماغ
شوف لما بيكون فيه لجنة على الدائري أو رادار
الكل ماشي محترم
مش علشان هما محترمين
لاءة
علشان خايفين ........... و الجُبن سيد الأخلاق

لذلك الحل في مصر هو العقوبات الرادعة

و بالنسبة لمسببات المشكلة
كل ما سبق طبعا
بس بييجي قبلهم

عدم وجود نظام لإمتحان السائقين
غياب العقاب


----------------
95 % من السائقين في مصر لا يعرفون معنى العلامات التي على الطريق أو حتى فائدة الخطوط المرسومة عليه
و كله بطيخ في بطيخ

يبقى الأساس هو المشكلة ......... كينفعش تبني بيت بدون أساس ........ و إلا هايسقط مع أول زلزال خفيف أو هزة أرضية من بلدورز معدي من جنبه

النظام المصري في كل شئ تقريبا ........... فاشل
يجب على الحكومة اتباع الدول التي سبقتنا في النظم الادارية
أصل المشكلة مش مشكلة مرور فقط
دي مشكلة نظام اداري فاشل

و عليكم السلام و رحمة الله و بركاته

تحليل منظم وواضح ولا يحتمل الزيادة .. كلامك زي الفل يا باشا

[youssefmustang]

90% من المشاكل الشعب 10% الحكومة ومن الصح (ده رأى انا ) انهم لو فعلا عايزين ينظمو الطرق ويحلو مشاكل المواصلات يبقى الاتى:
اقل مخالفة تبقى 5000 جنيه
حبس 3سنين
اذا تكررت المخالفة ياخدو عربيتو ويصادروها
شكرا

[hesham_tawfiq]

اسمحولى اختلف مع معظم الناس اللى بتلوم رجال المرور فى المشكله
اعتقد المشكله فى اللى سايق لانو المفروض عارف واجباته قبل حقوقه فالطريق ودا للاسف غايب تماما عن الناس وبعدين الحكومه مش هتوقف عسكرى ولاامين ولا حتى ظابط على كل ناصيه عشان يظبط المرور واذا كانو هما اغلبهم حراميه فاحنا اللى بنديهم فلوس برضانا محدش بيغصب علينا.
وكمان في معظم الدول الغربيه والمحترمه الشوارع داخل المدن اتجاهين بدون اى فواصل بينهم ومع ذلك مبيحصلش التهريج اللى عندنا
انا عن نفسى اخترت ان سبب المشكله هو اسلوب قائدى السيارات فى القياده خصوصا الشباب الاهبل والمستهتر اللى مبيتعبش فى فلوس العربيه او معتمد ان التأمين هيغطى اى حادثه
وصدقونى او متصدقونيش انا بحمد ربنا جدا على ازحمه اللى فوسط البلد والشوارع اللى واقفه دايما لان لو كانت شوارعنا منتظمه وواسعه فى ظل وجود النوعيه دى من قائدى السيارات ربنا وحده هو اللى يعلم كان ممكن تحصل كوارث اد ايه واللى مش ملاحظ يشوف الحوادث كل يوم على الظرق السريعه زى طريق الواحات واكتوبر والمحور ومعظم الحوادث دى السبب فيها مش المكروباصات للاسف
اسف للاطاله وشكرا على الموضوع المهم اخيرا فالمنتدى

[محمد ابراهيم 1]

انا أتفق مع tutankhamoun فى كل شىء ذكره لكن لى تعليق بسيط

تركت الشرطة الناس تفعل ما يحلوا لها
فغاب الرقيب
فأصبحت شوارعنا هرجلة و فوضى
و الناس في مصر مش بتيجي غير بالضرب على الدماغ

الناس فى العالم كله كده

لذلك الحل في مصر هو العقوبات الرادعة

لأ الحل فى تطبيق القانون وليس العقوبات الرادعه لأن العقوبات الرادعه إذا لم تطبق فلا قيمة لها
يبقى المهم التطبيق وأؤكد لك إنك لو طبقت غرامه 20 جنيه بس حتلاقى الناس تلتزم إلا قليلا من الناس اللى مش فارقه معاهم الفلوس

[Ahmad]

سلام عليكم,

الحقيقة أنا شايف أن المسئول الأول عن المشكلة دي هي وزارة التربية و التعليم !!
هي مشكلة تربية و أخلاق و دين و ضمير في المقام الأول. لأن لو الحاجات دي مزروعة صح في كل واحد مننا كانت الدنيا بقت غير الدنيا.

ربنا يصلح الحال.

[pop3]

السلام عليكم ورحمة الله و بركاته

زارني من فترة قريب ليا مقيم اقامه كاملة في كندا و كنا نازلين القاهرة لأني مقيم في السويس طبعا اول ملحوظه ليه كانت عربيات النقل التقيل و الي محملة ظلط سن و الي كان بيرشق فينا طول الطريق لدرجة انه مكنش قاعد على بعضه في العربية, ودخلنا القاهرة تحديدا عند سيتي ستارز و أقعدت نص ساعة بدور على ركنة أركن فيها العربية لدرجة اني اتمنيت اني ابعها وانا واقف بس اخلص, خلصنا مشورنا ونزلنا وسط البلد وطبعا انتوا ادرى مني بالمنظر و الزحمة وفجأت بالتعليق إلي قالوا ليا و انا سايق في وسط الزحمة بسرعة النملة قالي " عندنا الي بيسوق مخمور بيتحاكم و بيتسجن لكن واضح ان مصر كلها بتشرب و هي سايقه "

*شوارع مكسرة و بلعات في وسط الطريق و مطبات هوا ولا مراجيح سيدي المراكبي

*عربيات نقل بمقطورة شايلة سن و بترشق في الي رايح و الي جاي الي اصلا اتلغي التعامل بيها في اوغندا من 20 سنه

* سواقين تاكسي يستحقوا اشارة طيران حربي عن جدارة

* رجال مرور انقسموا الي : جزء بيعمل الي عليه بحكم اكل العيش و ان ده دوره و الحوارات دي يعني / جزء تفرغ لفرض الإتاوات على سائقي الميكروباص و التاكسي / و جزء تفرغ لتفييم عربياته اسود سوبر بلاك لأن البيه من الآخر vip وطبعا مش فاضين غير للـ TRS وربنا يمسيك بالخير يا احمد يا حلمي

* مسئولين عن المرور في مصر معندهومش اي ابداع او حتي تفكير منظقي يقدروا بيه ايجاد حلول للزحام الشديد في مصر

* كل مسئول عايش لوحده في جزيرة في وسط البلد وده طبعا خلي مفيش اي تنسيق مابين الجهات المسئولة في البلد يعني مثلا طريق رئيسى عليه ضغط كبير ماينفعش اعمل رصيف عريض في الوسط , طيب ماهو من الأولى اني اوسع الطريق و أحط مكانه رصيف رفيع زي شارع الكورنيش في الاسكندريه مثلا


يا جماعة لازم تعرفوا ان دي منظومة كاملة تبدي من البيت مرورا بأجهزة الدولة المختلفة الى ان تنتهي في الشارع

[ahmedfouad]

بالنسبة للاستطلاع
كل ما سبق صحيح

[shanodaa]

اغلب الختيارات صحيحه

[M.Mokhtar]

ناقص اختيار واحد انت نستيه وهو :-
( كل ما سبق )...!
كل اللى انت ذكرته واكتر كمان مش حاجه واحده بس.
علشان كده مش هختار حاجه بل اختار الكل ....

+1000000000000

[mahamedaraby]

انت متدخلش تصلح حاجه وسايب حاجات تانيه

هى منظومه هتتصلح من اسفل الهرم حتى قمته

يعنى احنا فى مصر محتاجين اداره صح مفهوم اداره حديث مش لحد دلوقتى ماشين بقواعد على ما اعتقد ان مفيش حد فى العالم ماشى بيها

يجماعه اكيد طبعا كلنا اتعملنا مع مصالح حكوميه وشوفنا اللى بيحصل

فا انا بقول اننا لازم نصلح المنظومه كلها علشان تتصلح حال المرور

بص على منظر العام للدول من شوارع الى نظام وانت هتعرف حاله البلد دى ايه وشعبها عايش ازاى

[sh23]

* كل الأختيارات اللي أنت كاتبها في الإستطلاع هي السبب ؛ يعني الموضوع كوكتيل أسباب مش فئة واحدة هي اللي تشيل الليله.
* الكوكتيل السابق نتج عنة_ حاجة أسوء من شربة زيت الخروع_ ما يسمي بثقافة الفوضي والعشوائية .
* يا تري ممكن نغير ثقافة شعب مصر ( إزاي / وأمتي / للأفضل / أم للأسواء )ياريت لو حد عندة إجابة يقولها .
* لكن علي ما يبدو أن سعد زغلول كان سابق عصرة..... ما فيش فايدة

[El Prince]

كل مـــــــــــــــــــــــــــــــــــــــا سبق

[M.Osman]

هو يعنى الأمريكان و الأوروبيين مش بشر زيينا ؟؟

لأ بشر و كانوا عايشين فى كوكب الأرض مش جايين من المريخ يعنى عشان نقول ان اللى بيسوق هو السبب !!!

بحمل كل المسئولية لنظام المرور و رجل المرور و الشرطة و عدم تطبيق القانون .... للأسف !!

لو كان القانون بيطبق على الكل سواسية كان الوضع هيكون افضل من اوروبا كمان ...بس مفيش فايدة ..!!

[MedaSam]

ناقص اختيار واحد انت نستيه وهو :-
( كل ما سبق )...!
كل اللى انت ذكرته واكتر كمان مش حاجه واحده بس.
علشان كده مش هختار حاجه بل اختار الكل ....

كنت هقول كده بالظبط ......... كل ما سبق و زياده اسباب اخرى:
- أسلوب القياده الانتحاري لمعظم سواقين الميكروباص و الاتوبيس و طبعا الجمعيه التعاونيه للقضاء على الأدميه
- يا توت باشا ....... انا معاك طبعا ان مفيش وعي للعلامات اللي في الشوارع ........ بس فين العلامات اصلا!!!!!!!
- توصيل الرخص للمنازل ...... و كله بتمنه
- بصراحه ......... الناس اخلاقها بقت صعبه قوي ....... سواء سائق أو ماشي
- ..........

كفايه كده ........ انا تعبت

[Ahmosality]

ناقص اختيار واحد انت نستيه وهو :-
( كل ما سبق )...!
كل اللى انت ذكرته واكتر كمان مش حاجه واحده بس.
علشان كده مش هختار حاجه بل اختار الكل ....

هو ده الي كنت عاوز اختاره
بس اضيف عليه سبب اخر و هو سبب كل مشاكلنا العامة مش المرور بس
الشعب المصري كله محتاج اعاده تربية لان اخلاقنا كلنا بقت فعلا لا تطاق و تعاملنا مع بعضنا بقى سئ للغاية
كمان مصر كلها بتعاني من ازمة غياب الضمير