ماحدث مع كمين الشرطه

[hugan]

كان عندي شغل في مول الامير في خلوصي
خلصت علي 6 مساء واخدت شارع شبرا في اتجاه المظلات
وفجاءه وجد كمين مرور 2 امناء شرطه وضابط كان امين شرطه ملازم اول
امين الشرطه عدي الشارع وجالي كنت علي الشمال
رخصك
اتفضل
مخالفه فيميه
دعامه اماميه
قولت له الفاميه موجود
بص في الرخصه تمام تمام
اتفضل انزل من العربيه علشان الدعامه
نزلت
راح علي الضابط راجل كبير في السن وقاعد علي الكرسي
دعامه ياباشا
الباشا غرامه ياسحب
قولت له ادفع
لقيت الامين بيقولي 100 جنيه
نعم ليه ياعم انا دافع قبل كده 60 في اشاره الخلفاوي يعني تبعكم
انا دفعت ال 100 واخدت الوصلين مش وصل واحد
هنا تنبهت
ايه ده هو مش المفترض ان الغرامه ثابته بحكم القانون علي نوعيه المخالفه
روحت راجع للضابط
قولت له هي مش الغرامه ثابته
قالي لاء
اصل الجيزه 40 وهنا في شبرا 100
مش عاجبك هاسحب الرخصه وتخش فحص
قولت مفيش الكلام
القانون بيقول ياما تصالح ياما سحب وانا عايز اتصالح
بس انا دافع قبل كده 60 ومش هادفع ال 100
ومش من حقك تسحب الرخصه
قالي اي ضابط ممكن يسحب الرخصه
قولت له اي ضابط لو رفض التصالح هاروح اشتكيه
ابتدا الصوت يرتفع
لقيت المعلم جاب ورا
وقال للامين معلش رجع وصل وخليه يدفع وصل
لقيت الامين نط زي عفريت العلبه وقاله ياباشا
انا هاتحمل ال100 جنيه بس اسحب الرخصه
قاله باقولك رجع وصل وخليه يدفع وصل
قولت له بتهكم مش لقولك رجع الوصل وخليه يدفع وصل
راح دافع 50 وهو يكاد يتميز من الغيظ

بس كده الموضوع مريب وفيه شبهه تلاعب منهم
ولا ايه

[demonarundo]

ولاد الحرامية شغالين اليومين دول على ودنه يلمو فلوس من الشعب
عاملين كماين فى كل حتة وعمالين يلموا فلون بالعبيط وبيتلككوا فى أى حاجة
زى ما العسكرى قالك فيميه , هو حافظ من غير ما يبص حتى فى الرخصة
دى التعليمات اللى جياله

[م أحمد]

كمية الكلابشات فى وسط البلد بقت حاجة غير عادية
و سحب الفلوس وقتى

[besso]

هو يعنى الحكومه الرشيده دى مصدر دخلها ايه غير من الكلام ده
وده العادى فى بلدنا

[فتح الباب]

انا دايما بروح الخلفاوى من الكورنيش الى شارع شفيق ثم فى نهاية شفيق شارع جسر البحر بعد كده بدخل شمال حوالى ١٠٠ ولا ٢٠٠ متر بكون فى ميدان الخلفاوى وده اللى الكل متعود عليه لافاجئ انا وسبع تمن سيارات بكمين اتحط مخصوص لعمل فخ ومش اى فخ ده سير عكس الاتجاه اخر لخبطه وكان عايز ١٠٠ جنيه وبعد عذاب اخد خمسين بالعافيه وبما انى عامل فاهم شويه ههههه قلتله كلنا بناخد الوصله دى دايما ايه اللى اتغير ثم ان حضرتك عامل لنا فخ وليس كمين بدليل ان ما فيش اى لافتة تحذير تخيلو كان كان عامل ايه كان حاطط فعلا لافته بتقول اتجاه واحد ومش عايز اقول انه كان قاعد تحتها علشان مبقاش مبالغ اوى انما كانت بعيده عنه بعشره متر ولا حاجه تقريبا كده والله اعلم ان الشرطه اخدت على الاسلوب الردئ ده من المعامله ده احنا باين كده سنينا طويله اوى معاهم ربنا يلطف بينا

[احمد فهمى]

تصرف فى الظاهر شجاعه بس الباطن كوارث الامين افندي ده هياخد رقم عربية حضرتك ويعمل حفله هو واصحابو عليها مخالفات للصبح نصيحه استبدل لوحات ﻷى سبب

[amr011111]

تابع على موقع وزارة الداخليه المخالفات بتاعتك ولو لقيت حاجه نزلتلك روح بلغ فى الامين ده انه بيديك مخالفات نتيجة انك هددته انك هتشتكيه لو مطبقش القانون صح

[ahmed.Elashy]

بالرغم انهم حراميه بس اللي بيعملوه مش غلط... يعني متمشيش عكسي ولا فاميه ولا ماشي ع سرعه .. ونرجع نشتكي من المرور وانهم حراميه .. متحطش نفسك من الاول تحت ضرسهم

[bassemali]

بالرغم انهم حراميه بس اللي بيعملوه مش غلط... يعني متمشيش عكسي ولا فاميه ولا ماشي ع سرعه .. ونرجع نشتكي من المرور وانهم حراميه .. متحطش نفسك من الاول تحت ضرسهم

أؤيدك بشده..

[Ghamrawy]

هو يعنى ايه دعامة امامية ؟؟

[monamize4]

هو عنوان الموضوع اتغير ؟

[shiko206]

بس تركيب دعامة امامية مفيهوش غرامة اساسا يعني المفروض تدخل فحص فني بعد ازالة المخالفة وتستلم رخصتك بعد الفحص ،،،، حظك انك وقعت في ايد ضابط مش بيفهم وحسب كلامك ملازم اول وكبير في السن يبقی كان امين شرطة و ذاكر حقوق وبالتالي فخبرتهم في قانون المرور منعدمة اساسا

[ahmed.Elashy]

الدعامه دي الاكصدام الحديد المنتشر ف الجيب .. انا مستغرب جدا ليه يبقي من الممنوعات

[mohammedabdallh]

ده العادى بيلموا فلوس مش اكتر

[demonarundo]

هو عنوان الموضوع اتغير ؟

ظباط الشرطة شكلهم ليهم نسبة فى المنتدى