موكب افراح !!!!!!!!!

[hossam_elwani]

امبارح كنت فى فرح فى دمنهور وكنا كذا عربية ماشيين ورا بعض مع العريس ووقفنا عند قاعة المهندسين الى حيتعمل فيها الفرح وبعدين لقيت فجأة الونش هجم علينا وقالى الضابط "الرخص" عطيتله الرخص ورحت ركنت العربية ورجعتله لقيته كتب ايصال سحب رخص (رخصة القيادة + رخصة العربية) وكاتب سبب السحب موكب افراح + ملصقات !!!!!!!!
قلت للظابط طيب موكب افراح يعنى ايه انا تبع العريس مشيين ورا بعض ايه بقا مخلفتنا فى كدا ؟ وبعدين ملصقات ايه انا معنديش اي نوع من انواع الصق على العربية خالص يبقى ازاى انا مخالف ؟
رد عليا قالى القانون الجديد بينص على كده واذا كان على الملصقات ولا تزعل حشيلهالك من المخالفة!!!!!!!
قلتله طيب دفعنى مخالفة فورية بأى مبلغ ؟
رد عليا وقال القانون بينص على ضرورة سحب الرخصتين القيادة + المركبة
**فانا عايز اعرف دلوقتى انا فعلا كنت مخالف ؟ ولو كنت مخالف هل كان من حقى دفع مخالفة فورية؟ وهل كان من حقه سحب الرخصتين ؟ وطيب وغرامة المخالفة دى كام على الرخصتين؟
وحسبى الله ونعم الوكيل

[AHMEDCAR]

فعلا فى الافراح دلوقتى بيسحبوا الرخص لا يكون كذا عربيه ماشيه خلف بعضيهم و بيعوقوا المرور

[MohaMed_Refaat]

مش ممكن انا مش مصدق دة انا اللى اعرفة ان الزمامير الكلاكسات يعنى هى اللى ممنوعة لانها ازعاج اما المشى ورا بعض فى صف فدة حاجة غريبة جداااااااااااااا دة تلاقى الضابط بيستهبل تلاقية لسة جديد سخن ولا حاجة ؟!!!!!!!!!!

[beautiful0mind]

ياباشا انا سمعت اول مالقانون نزل ان فى تصريح بيطلع من القسم موكب افراح عشان تلزق اللى تلزقة وتعمل اللى تعمله بحوالى 6 جنية والله اعلم بس صحابى شفوها فالورقة اللى كانت بتتوزع بالاشارات عشان القانون الجديد .........وبرضه الله وأعلم

وللعلم معظم اصحابى اتسحبت رخصهم فالمواكب دى بعد اصدار القانون الجديد بس العلاقات بتخلص ومحدش سأل على التصريح .... بس قالة لازم تكون مشغل الانتظار فالموكب (سحب الرخصة عشان الانتظار مكنش شغال وبوظ الفرحة بتاعت العريس والشباب كلهم عشااااااااان الانتظار)

[Osama_soliman]

حقيقى فى مواكب افراح فعلاً بتكون ناس - مش ناس اساساً - اكثر من مرة الاقى وانا راجع من الشغل باحلم اوصل البيت ، الاقى تلات اربع عربيات وفيه الفرح والعربيات ماشية بعرض الطريق وببطء


ده مش حرام

[د./اليشع ثابت]

مش ممكن انا مش مصدق دة انا اللى اعرفة ان الزمامير الكلاكسات يعنى هى اللى ممنوعة لانها ازعاج اما المشى ورا بعض فى صف فدة حاجة غريبة جداااااااااااااا دة تلاقى الضابط بيستهبل تلاقية لسة جديد سخن ولا حاجة ؟!!!!!!!!!!

فعلا كدة حاجة غريبة بجد و تحرق الدم فعلا
طيب عربيات ماشية ورا بعض زيها زى اى عربيات ماشية ورا بعض برضة مش تبع بعض
اية المخالف فى كدة
يبقى لو فية فرح كل عربية تبعد ب 2كم عن العربية التابعة للفرح الاخرى يعنى ولا اية
يا عينى على تطبيق القانون

[Michael_Lanos]

اكيد العريس كان حد باصصله فى الجوازه دي
وشكل اللى باسسله هو نفس الظابت

ياحول الله يارب، موكب ايه بس

[ezzatfox]

انا مع القانون الجديد عشان كلنا عارفين اللى بيحصل فى مواكب الافراح انا من اسبوعين كان ابنى عيان و رايح بية للدكتور و الاقى فى جسر السويس موكب من حوالى 6 عربيات قافلين الطريق و منهم عربية فتحة الاربع ابواب و واخد الطريق من اليمين للشمال و انسى ان حد يعدى.. فضلت ماشى وراة و ملقيتش فايدة رحت طالع منة بالعافية و خبطنى خبطة صغيرة عشان مكانش عايز يعدينى.. و فى الاخر قفلوا علية و نازلين يتخانقوا لسة هافتح الباب و انزل جم ناس تبعهم و لموا بعض و مشيوا

[pro_samir]

أينعم هما مزودينها حبتين

بس دة ميمنعش ان فى افراح بيهرجو وبيبهدلو الدنيا ويعطلو الناس وبتبقى حاجة تشل

لكن السؤال بقى هتفرق فى اية لما تطلع تصريح أو متطلعش تصريح ؟
ماهو كدة كدة موكب و العطلة واحدة

[sleepyhammer]

فعلا فى افراح بتنرفز من العطلة والازعاج والاستهتار

[ehabradwan]

فعلا موضوع المواكب ده معروف
بس اللي انا مش عارفه جكاية الغرامة دي متهيألي كان ممكن تدفع وتاخد رخصك

[zanativich]

ya gama3a mafesh mo7`lfa esmaha MAWKEB AFRA&
el mo7`lfa betkon 3ala el kalaks we ta3tel el tarek
we mafesh 7aga esmaha tasre7 mawkeb ana saalt 3aleh fe el meror abl far7i

[mo7a_mo7a]

هو كده فعلا
وبعدين ده بيتم لما يكون الموكب بيعوق المرور مش لمجرد انكم ماشيين ورا بعض
لكن الظابط جي وواقف عند القاعة يعني مستنيكوا
واكيد كان في ناس بتعمل اكروبات او بتزمر الموكب بالتاكيد مكنش سوكيتي

[dr_darsh]

والله يا باشا أنا مع القانون فى موضوع المواكب دى لأن فى ناس بتكون فاكره انها ماشيه لوحدها فى الطريق وامفيش اعتبار أى حد ماشى تانى

[M_Nabil]

أرسل أصلا بواسطةhossamdoaaaa فانا عايز اعرف دلوقتى انا فعلا كنت مخالف ؟ ولو كنت مخالف هل كان من حقى دفع مخالفة فورية؟ وهل كان من حقه سحب الرخصتين ؟ وطيب وغرامة المخالفة دى كام على الرخصتين؟

أنا هحاول ارد على تساؤلاتك حسب معلوماتي المتوضعه عن قانون المرور المعدل أو الجديد كما يطلق عليه البعض
1- انا فعلا كنت مخالف ؟
نعم مخالف طبقا لنص المادة (72) مكررا بند (ب) اللى بتعاقب المخالف بسحب رخصة القيادة فقط لمدة لا تقل عن شهر ولا تزيد على ثلاثة أشهر فى حالة إرتكاب المخالفة وهي استعمال المركبة فى مواكب خاصة أو تجمعات دون تصريح من الجهات المختصة، عليه نفهم من كدة ان المواكب الخاصة ليها تصريح عشان الناس اللى كانت بتسئل، هما يوافقو عليه أو لأ دي قصة ثانية.
2- ولو كنت مخالف هل كان من حقى دفع مخالفة فورية؟
الاجابة لا عشان القانون هنا لم يضع غرامة مالية للمخالفة انما استوجب سحب الرخصة لمدة زمنية محددة فقط بقرار من مدير إدارة المرور المختص. (هى الحته دي مكلكعه شوية لو حد من الأعضاء الأفاضل عنده تعديل او تفاصيل اوضح تفيد ياريت يقولها ).
3- وهل كان من حقه سحب الرخصتين ؟
هو من حقه سحب رخصة القيادة فقط عشان الموكب لكن طلما حضرتك قولت ان الظابط كان بيقولك ملصقات كمان في الحاله دي بيسحب رخصة العربية بس دى فيها تصالح فوري بتدفع 50 جنية وطلما لما حضرتك قولت له (ملصقات ايه انا معنديش اي نوع من انواع الصق على العربية خالص يبقى ازاى انا مخالف ؟) رد عليك ( واذا كان على الملصقات ولا تزعل حشيلهالك من المخالفة!!!!!!!) كان في الحاله دي المفروض يرجعلك رخصة العربية وتطلبها منه، ولما قالك ( القانون بينص على ضرورة سحب الرخصتين القيادة + المركبة) افتكران الظابط ده مش فاهم حاجة ومحتاج يذاكر كويس يا اما هو بيستعبط.
4- طيب وغرامة المخالفة دى كام على الرخصتين؟
الموكب: قلنا سحب لمدة لا تقل عن شهر ولا تزيد على ثلاثة أشهر بس بعد العرض على مدير إدارة المرور المختص أو من يندبه من مأمورى الضبط القضائى من ضباط المرور المختصين ويتم عرض الرخصة مع محضر الضبط على نائب مدير الأمن المختص ليقرر بحسب الأحوال إما إعادة الرخصة إلى صاحبها إذا تبين له عدم وجود مخالفة وإما ليأمر بإيقاف الرخصة على الوجه الذى يحدده القانون.
الملصقات: انا مش عارف هو شلهالك ولا لأ عموما هيه غرامة لا تقل عن مائة جنيه ولا تزيد على ثلاثمائة جنيه.