لمــاذا لا يلتـــزم الناس بقواعــد عبــور المشــاه !!!

[Rsarabia]

انا على طووووول بكبر فى اى ظرف من الظرووف الا لو واحد قاصد انه يأخرنى او بيبلطج بيبقى يومه مش فايته كلاكس لحد ما اصدعه

[dr_abooody]

حاجة تنرفز فعلا

انا كذا مرة في شوارع سريعة الاقى ناس بتعدي من قدامي و باصين الناحية التانية ر عندهم حول و لا حاجة
و بيعدوا بمنتهى غاية البرود

و مرة الاقى واحد واقفلي في نص الشارع كدا زي التنح و تفضل تديلة كلاكسات و قلابات على ما يحس ان في حاجة
انا عن نفسي لما بجي اعدي الشارع دايما باخدها جري و مش بتردد
بحس و انا ماشي كأني سايق نفسي الاقى عربية ورايا بتدى كلاكس
اقوم ابص ادام و فوق على اساس ان في مرايا ملاقيش حاجة اقوم افتكر اني ماشي على رجلى

[Ghamrawy]

طول اللسان و علو الكلاكس و النور العالى هو الحل
للاسف الناس هنا مش بتيجى غير بالحاجات الفظة

[Mohd_Adel_Amin]

أنا بقعد أصبر في نفسي واستغفر ربنا على التصرفات اللي بيعملوها وكأنهم قاصدين يستفزوك .. وبحرص اني لما اعدي الشارع اريح كل السائقين وكأني بواسي نفسي ان فيه حد في مصر بيحترم الطريق !!
بس ساعات مش بقدر امسك أعصابي وبضطر استعمل اسلوب اني اخبط الدراع بتاعة الانسان السخيف اللي بيستفزك في الطريق بالمراية كأسلوب للتنفيس !!

[Medos]

الناس فى مصر محتاجة توعية جامده عن المشاه و عبوره للطريق لانهم فاكرين الاشارات دى للعربيات فقط !!!

[EngineerAhmedBadr]

بجد مفيش أحسن من الدائري

كنت من كم يوم عندي مؤبلة شغل في مصر الجديدة و أنا ساكن في أكتوبر فألت أطلع الدائري أسهل

صباح الضحك

الناس وaقفة لحد تاني حارة عند المنازل إلي الميكروبص بيوقف فيها و صباح التناحة

شايفين عربيات جاية بتجري عليهم و بتقلبلهم نور و كلاكسات ولا هما هنا

ارحمنا يا رب

[Amrrr]

اللي سايق يخلي باله من نفسه وخلاص عشان هو الخسران برضة العربية ساعات بتتأذي برابريز مثلا او فانوس غير العطلة والاقسام والمحاضر والمشاكل والفلوس بقى اللي هتدفع في كل خطوة ومش هقول طبعا انك هتأذي بني آدم عشان الكلام هنا عن الناس اللي بتتغابى وتدور مثلا وشها الناية التانية او يبص لك ويدخل في وشك وانت ماشي بالعربية او ..... أو ....... او .........وبصراحة اللي بيستهبل كدة دا على أد ماقدر بأهزقه ومفيش مانع لو شايل حاجة في ايده اطيرهالة بالكصدام او أديله خبطة بالمراية ماهي غباوة بغباوة وساعات باستغبى وادخل فيه وادور وشي الناحية التانية لو كان باصصلي واتأكدت انه شايفني باقوم مستهبل انا ونشوف ساعتها مين اللي هيخاف - وبعد دا كلة باستغرب نفسي واقول ايه اللي انا عملته بس الناس بجد مستفزة واذا الواحد مانفسشي في ساعتها بيفضل متغاظ مدة بعد كدة لحد اول موقف تاني وهكذا طول فترة السواقة
والعيال دي ربنا يستر مالهمش حل غير ان الواحد يخلي بالة منهم وبالذات لو لقيتي كورة ولا عيل بيجري ممكن يبقى في حد تاني بيجري وراة او ورا الكورة

[mkhalifa73]

علي فكره في ناس كتير تعبانه يعني اكل زي الزقت وشرب زي الزفت وغيره اكيد طبعا صحه زفت الزفت ياريت نستحمل بعضينا شويه
ماهو لا دي شوراع اللى احنا ماشيين فيها ولاايه الواحد بيبقي سايق حاطط عينه في وسط وسط راسه دا كمان لو عرف يحطها عمال تفادي في بلاعات وحفر ومطبات واشباه مطبات وبني ادمين وحيوانات واشباه موصلات في العربيات والله لما بتكون عربيتي عطلانه واضطر اركب مواصلات بحس ان انا مستريح

[fadynabil]

لو حد هنا بيمشي ع الدائري بلليل أكيد هيعرف معني أشباح الدائري

فعلاً حاجة تنشف الدم لما تبقي خلاص تحس إنك هتموت بنى أدم

أنا كل يوم برجع أعصابي مش مظبوطة من المغامرات اللي الواحد بيشوفها كل يوم

فعلا إحنا ماشيين في سيرك لازم تكون بهلوان كبير عشان تعرف تتعامل مع الشارع المصري

[hossaam]

مشكلة أزلية .... نظرا ً لان مفيش ثقافة ( كبيرة الكلمة دى بلاش منها ) .... نبتدي من الاول تاني .... في البلاد الوحشة اللى بتحقد علينا بيعلموا الاطفال ازاى يعدوا الشارع و قواعد المرور .... فبيترسخ داخلهم الامر منذ الصغر

كلام مضبوط مليون الميه..
فين البرامج الموجهة للاطفال..
فين الحملات القومية الحقيقية في المدارس والنوادي
اللي هدفها التثقيف ونشر الوعي "المروري"..
انا قضيت فترة المدرسة خارج مصر..
مش عاوز اقولكوا قد ايه كان موضوع
التوعية المرورية والصحية والاجتماعية..شيء
حيوي ومستمر طوال العام الدراسي
على شكل لوحات ومسابقات ومحاضرات من رجال المرور وعمل ما يسمى باسبوع او شهر السلامة..
وغيره لدرجة احيانا كانت بتزهقنا..
بس اكتشفت بعدين اهميتها..

يا جماعه اللى بيعدى الشارع من المشاة و الاغلب من غير حائزي السيارات ما يعرفش حاجة عن قواعد المرور و الصح و الغلط

بالضبط.. فين وزارة الاعلام "الجبارة"بتاعتنا ..
فين البرامج التليفزيونية التثقيفية في
موضوع المرور واستخدام الطريق
ولا شاطرين في المهرجانات الهابطة وال...

في نقطة كمان المشاة لهم حق فيها .... فين اماكن عبور المشاة ، مفيش .
فين العسكري اللي بينظم المرور .... مفيش ( بيرزق )
فين الكباري و الأنفاق .... مفيش

صحيح..اصل موضوع تحديد نقط عبور المشاة مش سبهللة
زي عندنا دي هندسة ودراسة للمكان وكثافة السكان ونوع الطريق..
ويا ترى الافضل للناس "دول" في المكان "ده"ايه كوبري ولا نفق ولا اشارة..

وبعدين فين التطبيق الحقيقي لقوانين المرور وتنفيذها على الوزير قبل الغفير؟؟ انا زميلي كان من فترة في دولة شقيقة
(من اللي احد الاخوة في المنتدى بيحلو له انه يسميهم دول الصحراء)
عبر الطريق من مكان غير مخصص لذلك..وفورا اتوقف ودفع غرامة في الحال لسه بيحلف بيها للنهاردة

يعني الموضوع له ابعاد اعمق بكتير من ان احنا نختزلها
في كلام زي ان الناس باردة او مستهترين او متنحين..لانه حرام بجد وتجني على ناس من حقهم قدر اكبر من المعرفة قبل ان نحاسبهم

[شاهين - بنز]

أنا إللي بيحرق دمي كمان تلاقي أربع رجاله ماشيين بالعرض سايبين رصيف عرضه 10 متر ونازلين يتمشوا في الشارع بس العيب مش عليهم العيب على الدولة إللي سايبة إيدها من كل حاجة

[أشرف العدوي]

الحل في المرايات الجانبية
الي بيتنح بلبه بالمراية على طول يا اما بزنقه في العربية بتاعتي و العربية الي راكنة او الرصيف اي كان و ببقى مبسوط قوي
و البنات الي شايفة نفسها بهدي بس بمور و أعلي صوت الموتور و اتفرج على الضحك
الامورة الي كانت بتعدي زي الملكة طالعة تجري زي الي هرابنة من السجن
و هكذا

[MohaMed_Refaat]

ولا اى حاجة حعمل اية يعنى بسيبهم يعملوا مابدالهم ولو واحد استهبل فيها ااخرى الكلاكس والنور العالى لكن موش بشتبك مع حد بالكلام علشان ميحصلش احتكاك بالايدى والموضوع دة على فكرة مرتبط بالتوبيك اللى كان اسمة مظاهر الحقد الطبقى فى الشارع المصرى لان المشاة بيحقد عليك وعايز يقرفك لمجرد انة يغتت عليك ويعرفك انة وقفك وعمل اللى فى دماغة ودة احد مظاهر الحقد .