حمـــلة ايد في ايد نضع حد للتجار السيارات ** خلوها تصــــــــدى **

[mk20022002]

خلوها------------- تصــــــــدى
المشتري المصري هو واحد من اتنين:
- واحد بيعتمد على التقسيط ودول هيقلوا جدا بسبب تراجع البنوك عن دعم مثل هؤلاء وخاصة في مجال السيارات
- واحد بيشتري كاش ... وده يا اما فقد فلوسه في البورصة او فقد وظيفته (مثل مايحدث الان لقطاع السياحة) وبالتالي مش هيطلع الكاش اللي معاه دلوقتي ... يأما معاه الكاش بس الدنيا دلوقتى على كف عفريت فبرضه مش هيطلع الكاش اللي معاه (اللا لو كان العرض مغري جدا جدا ... مفهوم طبعا).

علشان كده الفترة اللي جاية دي صعبة جدا على كل تاجر يحلم بمكاسب خيالية كما كان بالماضي ولو فضل في العناد مش هيفوق غير على كابوس الانهيار والافلاس
راى منطقى منقول عن العضو المحترم sherif Anton

[احمد عز]

انت اكيد فى مصر

[Ramy_Ali]

انا عندى فكرة كويسة للى بيتحجج ان الشوارع هتتزحم لو الحكومة رفعت الجمارك عن السيارات

اللى يشترى عربية ومش عاوز يدفع جمارك يسلم الحكومة عربيتة القديمة بالشروط التالية :
1- تكون مرخصة باسمة لفترة 3 سنوات مثلا
2- الجمرك يتحسب فوق ثمن العربية المستعملة بسعر السوق لو زادت قيمتها عن 50 الف جنية
3- الحكومة تمتلك العربية القديمة وهيا حرة فيها (تبعها تانى تشغلها فى مصالح حكومية - براحتها)

[akram2025]

يا عزيزي، انت كدة بتحمل الموضوع اكثر مما يطيق. موضوع الجمارك ده موضوع منفصل تماما. موضوع الجمارك موضوع أمن قومي لحماية المنتج المحلي، و بالرغم من اني معتقد زيك انه مبالغ فيه؛ فده ما يمنعشي اننا نقول ان ده موش دور حملة زي حملة خلوها تصدي، لأن موضوع زي ده موضوع كبير، و ما ينحلش بمجرد مقاطعة محدودة لنوع معين من المنتجات، لأنه محتاج جهود اكبر من المقاطعة، و ده يعتبر تشتيت لمجهود خلوها تصدي بدون اي طائل مرجو.

جمال و قوة خلوها تصدي في بساطتها، و سهول تنفيذها بشكل واضح دون اي تفرعات او تعقيد،هي بس ما تشتريش عربية دلوقتي و خلاص على كدة.

الواعز لحملة خلوها تصدي هو الاستفزاز الناشيء عن عدم تأثر اسعار السيارات محليا زي ما اتأثرت عالميا و في بلاد المنشئ نفسها، و على العكس ادعاء الوكلاء و التجار ان الاسعار في مصر هتزيد!!!

بمعنى ادق، ان الحاملة ما بصطشي على مطلق ارتفاع السعر، و ده اللي بيحدده الجمارك و مصاريف الشحن و خلافه، و لكنها بصت على نسبية السعر بالنسبة لباقي خلق الله مقارنة بينا احنا يا دولة نامية و اقتصادها منحل اساساً و اللي السعر نزل عندهم فعلاً.

بمعنى اكتر بساطة، اطلع برة و اشتري عربية و احسب مجموع تمنها و مصاريف الشحن و الجمارك و خلافه و شوف هتوقف عليك بكام، و شوف انت بالشكل ده هتكون وفرت كام عن لو اشترتها من هنا و ده باعتبار انك واحد لوحده هيشحن عربية واحدة بس ، فما بالك باللي بيشتري بالجملة و يشحن بالجملة؟!!!. هو ده تحديدا اللي بتتكلم عنه خلوها تصدي.

انا عارف ان حمله خليها تصدي ليس مقصود بها الجمارك و ان حمله زي دي برضه ما تنفعش مع موضوع الجمارك الخيالية بس أنا قصدي إن بوجود هذه الجمارك برضه يبقى إحنا بنتسرق وبشكل أفظع من التجار اللي بيسرقونا!!! يعني انا بفضفض مش أكتر

[MEMES]

خلوها------------- تصــــــــدى

[Micro513]

خلى الباروما تاكلها واهى المطرة جاية

شعارنا
(خلــــــــــوهـــا تــــــــصدى)
شارك معنانا عبر عن نفسك

[akram2025]

طب ياجماعة أنا عندي شركة استيراد و تصدير!! هل ممكن اننا نجيب سيارات زيرو من بره و ندفع جماركها عادي و طبعا بما إن السعر بره نزل حوالي 40% هتكون في الأخر أرخص بكتير من سعر الوكيل في مصر..
لو حد عندوا فكرة ايه الإجراءات أنا مستعد أعمل طلبيه لكل الراغبين في سيارة و نجيب شحنة كبيرة لينا و ده برضه هينزل في سعر الشحن جامد و مش عاوز أي مكسب !!!

[mk20022002]

خلوها تصدي

تحت شعار خلوها تصدي ... السعوديون يشنون حملة مقاطعة للسيارة الجديدة

"تسهيلات كبيرة في السداد.. خصم 30% على الشراء النقدي.. اشترِ سيارة بالتقسيط على 3
سنوات بنفس سعر النقدي وبدون فوائد.. نقدم الصيانة المجانية للسيارة لمدد كبيرة"، هذه نماذج
من عشرات الإعلانات التي يطالعها القارئ يوميًا في صحفنا اليومية وتعكس حال ما يشبه الركود
في المبيعات.

وعلى الرغم من التسابق الكبير في تقديم الإغراءات لشراء سيارة، إلا أن سوق السيارات تمر
بأقسى فتراتها؛ إذ كشفت مصادر عاملة بالسوق عن تراجع كبير في المبيعات خلال الشهرين
الماضيين، قدره البعض بقرابة 50% لبعض السيارات، مؤكدين أن أغلب المشترين لديهم أمل في أن
تنخفض الأسعار خلال الفترة المقبلة بحدود 40%

صوتنا وصل السعودية و بداوا يعملوا حملة زينا بالرغم من ان الاسعار عندهم منخفضة اصلا.....

[mk20022002]

أكد السيد أحمد فرج سعودى رئيس مصلحة الجمارك في لقاء صباح الأحد مع برنامج "صباح الخير يامصر" أن وفد من وزارة التجارة الخارجية والصناعة توجه للمغرب لفحص السيارة المغربية الذي سمح باستيرادها دون فرض رسوم جمركية قبل الموافقة على استيرادها.

والسيارة المغربية هى ماركة "لوجان" من تصميم شركة "رينو" الفرنسية وهى إنتاج مغربي فرنسي مشترك وسيتم استيرادها بموجب اتفاقيات إعلان برشلونة وما تلاها من اتفاقيات بين مجموعة الدول العربية التي وقعت على هذه الاتفاقية وهي مصر وتونس والأردن والمغرب ونظيراتها الأوروبية لإعلان منطقة تجارة حرة بتقليل الرسوم الجمركية بشكل متدرج من الجانبين ينتهى بإلغائها تماما.

وقال رئيس مصلحة الجمارك إنه تأكد للجانب المصري أن المساهمة المغربية في التصنيع تصل لـ40% طبقا للاتفاقية وسيتم إدخال السيارة المغربية دون جمارك نهائيا وعلى المشترى تسديد ضريبة المبيعات ورسم التنمية فقط.



وأكد سعودي أن الوفد الصناعي والتجاري المصري تأكد من مطابقة السيارة للمواصفات والكود المصري العام لاستخدام السيارات وأضاف أن هناك تفاؤلا بأن تسهم هذه السيارة فى تخفيض أسعار السيارات المحلية والمستوردة في السوق المحلية .

كما أوضح أن إعلان برشلونة فى مصلحتنا على المدى البعيد حيث سنقوم بتصدير سلع إلى المغرب مقابل السيارة المغربية ويتكرر ذلك مع كل الدول الموقعة على الاتفاقية.

وبالنسبة لاتفاقية الجات قال رئيس الجمارك إن اتفاقية الجات التى تم التوقيع عليها عام 1994 سيبدأ العمل بها فى مجال استيراد السيارات عام 2010 بتخفيض 40% من قيمة الجمارك يليها تخفيض سنوي بنسبة 4% حتى ينتهى الرسوم الجمركية تماما.

أولا الخبر ده يعتبر قديم شوية بس ده كان نص الخبر ... المهم سعر السيارة دى فى المغرب عامل 10.000 دولار و المفروض انها تتباع فى مصر من غير جمارك يعنى لو الإتفاقية دي اتنفذت فعلا بالشكل ده هيكون سعر السيارة لوجان لا يزيد عن 55000 جنيه مصري و هو الأمر الذي سيهز السوق خاصة ان السيارة لوجان سيارة ممتازة جدا 1600cc و بقوة 90 حصان و عيبها الوحيد هو ان عجلة القيادة ليست باورستيرنج و لكني لا اعتبره عيبا في ظل مواصفتها الجيدة بالنسبة للسعر !!

[saidbakr]

خلوها تصدي

تحت شعار خلوها تصدي ... السعوديون يشنون حملة مقاطعة للسيارة الجديدة

...

صوتنا وصل السعودية و بداوا يعملوا حملة زينا بالرغم من ان الاسعار عندهم منخفضة اصلا.....

للأمانة، الحملة دي في الأصل حملة سعودية المنشأ.

[Ghamrawy]

طب ياجماعة أنا عندي شركة استيراد و تصدير!! هل ممكن اننا نجيب سيارات زيرو من بره و ندفع جماركها عادي و طبعا بما إن السعر بره نزل حوالي 40% هتكون في الأخر أرخص بكتير من سعر الوكيل في مصر..
لو حد عندوا فكرة ايه الإجراءات أنا مستعد أعمل طلبيه لكل الراغبين في سيارة و نجيب شحنة كبيرة لينا و ده برضه هينزل في سعر الشحن جامد و مش عاوز أي مكسب !!!

فكرة ممتازة و نشوف اى بلد الاسعار فيها مضروبة كمان

[Sharky]

أولا الخبر ده يعتبر قديم شوية بس ده كان نص الخبر ... المهم سعر السيارة دى فى المغرب عامل 10.000 دولار و المفروض انها تتباع فى مصر من غير جمارك يعنى لو الإتفاقية دي اتنفذت فعلا بالشكل ده هيكون سعر السيارة لوجان لا يزيد عن 55000 جنيه مصري و هو الأمر الذي سيهز السوق خاصة ان السيارة لوجان سيارة ممتازة جدا 1600cc و بقوة 90 حصان و عيبها الوحيد هو ان عجلة القيادة ليست باورستيرنج و لكني لا اعتبره عيبا في ظل مواصفتها الجيدة بالنسبة للسعر !!

حضرتك ناسى حاجة فى تسعير اللوجان المغربى
السيارة تمنها 10 الاف دولار لسه فيه 10% ضريبة مبيعات + 2% رسم تنميه على سعرها + مصاريف الشحن + ربح التوكيل و فى الحالة دى سعرها لن يقل عن 60-65 الف على الأقل

[نور العمر]

:k30:بصراحة بدأت أفرح رغم حالة الاكتئاب إللي استقريت عليها حسستوني إن فيه أمل في مصر. رغم صعوبة الأمر ....
بس عاوزة أقول حاجة مهمة
التجار الجشعين إللي عاوزين نتحداهم دارسين علم نفس المستهلك المصري كويس قوي وعندهم طولة بال ونفس طويل وإمكانيات للتاثير عليه عالية قوي.
وعارفين كويس إن كتر التصريحات والتقارير السلبية عن الأسعار سوف تجعل المقاطع يتراجع ، وإن المصريين لا يتحدوا على موقف ولا يتبنو قضية لفترة طويلة وإنها هوجة وحتعدي ... وكمان نايمين على خميرة كويسة قوي مش حتخاليهم يقلقوا ولا يتزعزعو بسهولة إلا في حالة واحدة لو المبيعات وصلت لـ من 0% إلى 5 % واستقرت على ذلك.
يا جماعة الموضوع أكبر من السيارات. ده في كل حاجة شقق وسلع استهلاكية وكمالية وضرائب وغرامات ومصاريف ونصب وسرقة ................. الخ متعدوش
أنا عندي اكتئاب من كل حاجة في مصر
من الناس وقلة ادبها وقلة ذوقها والسب العلني إللي يمس الحياء والبلطجة والتحرش بالنظرات وبالأقوال والأسوأ بالأفعال.
ده غير لعبة السمسرة والمصالح والسبوبة إللي بقت مسيطرة على عقل كل واحد عشان يكسب من ورا أي فرصة حتى ولو كان جار واللا زميل.
وحطوا تحت البلطجة بكل صورها من كل فئات المجتمع 100 خط.
كل واحد أناني . مثال " ركبت تاكسي من أول كبري القبة لآخره + ونزلت أول مصر والسودان" قال بيشتكيلي من استهبال الناس عاوزة تدفع مبالغ عبيطة في مشاوير طويلة وفي الآخر عاوز ياخد 5 ج على الخطوتين دول .... رفضت طبعاً ولولا مشكلة الفكة كنت إديتو 2.5 ج .
في شغلي بقى صاحب الشان داخل متحفز عنده استعداد يضرب ويشتم ويقل أدبه معتقد إن دي أحسن وسيلة لإنجاز مصالحه . دون احترام للموظف إللي بيقابله باحترام وبتحكمه لوائح إدارية في سير منظومة العمل ... بصراحة شوفت العجب من الناس ومن الموظفين ومن القوانين ومن كل حاجة.
والكوسة والبذنجان والبطيخ إللي ماشية بيه كل حاجة من أول التعليم لحد القضاء.
يا مصريين أصبحت لا يشرفني أن أقول أنا مصرية.
من أفعالنا ... العيب فينا كشعب ... العيب فينا مش في حد تاني
احنا إللي بقينا بندفع أي حاجة عشان أي حاجة ومبنفكرش غير في نفسنا طالما معايا وقادر مش مهم أي حاجة تانية
والخيبة بتاعة عقدة الغالي ثمنه فيه ... خلت إلي ما يسواش يغلى عشان عقدة الخواجة تسوقه بسرعة ..

ربنا معاكوا ومعايا ومع ولادي الأطفال إللي مبقتش عارفة أربيهم إزاي وأزرع فيهم إيه
( انا بنتي kg1 لغات ومدرسة بنات ) بتيجي مضروبة ومبطوحة من بنات معاها ده غير الكلام والألفاظ إللي بتسمعها.
احنا مبقناش فاضيين لحاجة
حتى لتربية اولادنا ولا لتهذيب نفسنا بنسابق عجلة الجشع إللي محوطانا عشان نعرف نعيش وبس ومش مهم الأخلاقيات إللي بقينا عليها إيه.
آسفة على الثرثرة الطويلة دي ... بس ده تعبير عن جزء بسيط جداً مما أشعر به ومسبب لاكتئاب فظيع مبينتهيش بقالوا أكتر من سنة.
والله المستعان
نفسي ارجع احبك تاني يا مصر
نفسي احس فيكي تاني بالأمان

[bassem.naguib]

نفسي ارجع احبك تاني يا مصر
نفسي احس فيكي تاني بالأمان

يا ريييييييييييييييتتتتتتتتتتتتتتتتت

[lolly136]

http://www.facebook.com/home.php#/group.php?gid=41473233099

خلوها تصدي وموديلها يعدي