لو عربيتك اتخبطت هتاخد عوض؟؟؟؟؟

[eng.octooo]

على حسب يعنى لو علربيتى راكنة وجة واحد لبس فيها لوحدة كدة اكيد هادفعة اما لو خطاء غير مقصود ف المسامح كريم

[toty5681]

قدر الله ما شاء فعل

بمناسبه الموضوع ده انا عربيتى كنت لسه شاريها لانوس 2008 وماشيه 500ك بس وعلى الطريق الصحراوى عربيه ميكروباص تخبطنى من وراا دغدغلى الشنطه والجانب الشمال قالى حديك 200 ج هههه ينفع لاء طبعا انت عارف تتكلف كام المصيبه الى انت عملتها دى المهم رفض دفع اى مبلغ وعملنا محضر فى القسم ولا اخد ابيض ولا اسود بس عزائى الوحيد ان عيالى اصلا كانو نازلين معايا ويشاء القدر انى الغى نزولهم معايا بسبب ان الجو وحش فى تانى ايام عيد الاضحى 2007 والدنيا كانت بتشتى بغزاره وقدر الله ما شاء فعل لو ابنى حصلت له اى حاجه كنت ساعتها حدور على العربيه والا على ابنى ومراتى الحمد لله على كل شئ وغرمت لى فى المشوار ده 6 الاف ج:b4_611:

[Qamar]

اظن ان الاستخفاف بالامور الشرعية واختراع نكات مختلقة عليها
لا يمكن قبوله ابدا ابدا
اولي بك ان تتجنب المشاركة علي ان تعلق بنكتة اقل ما توصف به انها سخيفة

شكرا لتنبيهك وهو ده المنتظر من الأخوة (النصيحة)
أعتذر و شكرا

[mohamedbook]

من افسد شيء فعلية اصلاحة

[SmartMega]

انا جت عليا فترة قبل ما ربنا سبحانه وتعالي يكرمني ويرزقني وأشتري البونتو كنت بأجر عربيه أكسنت من واحد معرفه كان ساكن قريب مني بس كان شاب مش تمام وأهم حاجة عنده الفلوس وازاي يلبسك الحاجة اللي بايظه المهم ...
ف مرة كنت مستعجل وماشي علي الأتوستراد وبدخل يمين من جنب قاعة المؤتمرات اللي قدام المنصة (المنصه علي شمالي ) وبعدين وأنا بلف شاب محترم جنتل مان راكب عربيه جيب المهم الراجل وهو بيلف كان وضعه بالظبط بالنسبه للعربيه بتاعتي الحارة اللي جنبي بس قدامي المهم قام الباشا كسر عليا فجأه (وأحنا الأتنين بنلف مع بعض يمين) وفرمل مرة واحدة .....
طبعا كانت النتيجة أن الفانوس الأشارة أتكسر طبعا أنا كنت لحقت نفسي وفرملت وإلا كان زمانه جابلي الفانوس كله والخبطة كانت في الأكصدام عنده يعني حتي معملتلوش خربوش واحد في الأكصدام (مبدأيا انا ضد حاجة أسمها عوض) فالأستاذ الفاضل نزل من العربيه وبيقول والله ياباشا انا اسف جدا ومقصدش واصل التاكسي اللي قدامي هو اللي وقف فجأه (مع العلم اني مأجر العربيه مش بتاعتي )
الراجل قام ركب العربيه وركن علي جنب الطريق وقالي ياباشا اللي أنت عايزه أنا هادفعوا دلوقتي قولتله أبدا والله انا مبقبلش العوض ودي إرادة ربنا سبحانه وتعالي وأن المولي عز وجل لو كان عايز يمنع حدوث ذلك لفعل والحمد لله علي كل حال ويبته ومشيت .....
المهم بقي نيجي لصاحب العربيه ههههههههههههه
انا بقوله حصل كذا وكذا واللي انت عايزة انا تحت أمرك قالي خلاص لو هاتعرف تشترية أشتريه انت .. قولتله انا معرفش بيتباع فين هاته أنتي
المهم بعدها لاقيته بيقولي الفانوس بيتباع كامل ب 150 جنيه ده للأكسنت ومش بيتباع الأشارة بس ... قولتله ماشي والطلوب قالي هاندفع تمن الفانوس أنا وأنت بالنص مع العلم اني كنت شاكك في كلامه ودفعتله اللي هو عايزة مع العلم ان تمن الإشارة أكيد مش زي تمن الفانوس الكبير ....
المهم بعدها بالصدفة وأنا بشتري حاجات للانوس بتاعت واحد زميلي من شارع أحمد زكي اللي في المعادي لاقيت فانوس الأشارة الأكسنت محطوط في الفاترينه فبسأل الراجل هو الإشارة دي بتتباع لوحدها ملا لازم الفانوس معاها قالي لوحدها زي ما انت عايز فسألته بكام قالي ب 25 جنية والفانوس الكامل بالأشارة ب 95 جنية قولت حسبي الله ونعم الوكيل
وغير ده كتير مره كمان اخدت منه العربيه وسألته العربيه فيها حاجة قالي لأ انا بس كنت عايز أغير الدسك والأسطوانه بس مش دلوقتي
المهم سافرت الأسكندرية ساعتها كان الخميس بالليل ورجعت الجمعة الصبح بدري وانا جاي عند أكتوبر كده لاقيت الفتيس مش عايز ينقل
البس .... ديسك وأسطوانه يامعلم ودفعت 1000 ساعتها هههههههههههههههههههههههههههههههههههه

[magyver]

مش عارف دار الافتاء مش عايزين يردوا لية
ممكن حد يطوع ويسال كدة ياجمااعة

[دينا أبوالعلا]

مش عارف دار الافتاء مش عايزين يردوا لية
ممكن حد يطوع ويسال كدة ياجمااعة

بكره ان شاء الله هبعتلهم عشان انهارده اجازه

[nasroo]

انا مرة سواق تاكسي حكلي العربية وانا باخد يوترن هو راح طالع ريحلي على الباب بتاعي الراجل اتاسف ومشي وانا سيبته بعدين ببص على الباب لاقيت الحكة شالت الدهان وجابت الصاج كنت متنرفز جدا
مرة تانية عربية ربع نقل ريحت على الباب اليمين وخبط المرايا وانا واقف - شتمته وسيبته يمشي بس الباب لغاية دلوقتي تقيل جداً في الفتح قولت ياريتني كنت مسكته لطشته
اخر مرة بئا عربية تقل كبيرة وانا نازل من عالمطب راح جاي من ورا بسرعة وعاوز يدخل شمال را خبطلي الرفرف اليمين بهدله
قولت بئا انا مش هفأ كل شوية حد يخبطني واسيبه نزلتله قال لي يابيه انا عارف اني غلطان وخد بطاقتي اهي واللي انت عاوزه الناس اتلمت وبصراحة انا ماكنتش عارف اعمل ايه بس الناس هما اللي قالوله ادفع له حق الرفرف وراحوا جابولي سمكري وقالي هتتكلف 250 جنيه الراجل طلع لي 150 وقال لي ده كل اللي معايا خدتهم منه وكنت مش عارف اللي انا عملته ده صح ولا غلط وحرام ولا حلاال بس لو ماكنتش خدتهم كنت هأنب نفسي برضه زي كل مرة

[Samah AbdAllah]

ده مش عوض فى مبدا بيقول من اتلف شئ عليه اصلاحه

[smax]

لاو هوا الي غلطان حسب الخبطة و اسلوب السائق طبعا, بس بسمع "هتقبل عوض" بتنرفزني اكتر و طبعا هاقبل العوض.

[hoka]

استعوض ربنا و احمد الله اننى بخير ومش هقبل العوض
دا راى الشخصى

[zalpany2000]

انا رأيي بمنتهي الامانة

خد تكلفه التصليح ده لو عرفت لأننا للأسف في غابة وغالبا هو هايهرب من سيادتك و اصلا مافيش فرصة انه يصلحلهالك. حتي لو عنده نية للصلح كمان هاعمله محضر في ساعتها لو مش هايدفعلي فلوس التصليح كاش. علشان اضمن حقي. او علي الاقل بهدلته ومعرفته ان الله حق. خصوصا ده لو مش محترم.
و للأسف حتي لو مش هاقبل العوض علي نفسي النهاردة لو لا قدر الله حصل ده معايا هاعمله محضر ان شالله يكون حكلي البويا بمسمار
مش كده بس، ده انا لو شوفت قدامي حد بيحك عربية حد ولا بيخبطها هاقفل عليه و هاعمله مصيبة لحد ما صاحب العربية يجي

ده الصح
لأن مشكلتنا اننا مش بنقدر بعض

يوم الاتنين اللي فات قدام نادي هيئة الدريس اللي في المنيل في صلاح الدين... واحد بميكروباص عشه... راسه و ألف جزمة يلف من قدام النادي... و انا 10 دقايق مش عارف اطلع من البوابة بسببه و الاخر الباشا رجع بضهره بغباء وراح داخل في عربية 128 راكنة... انا رحت مبطل عربيتي ونازل متخانق معاه ومزعق و ندهله امين شرطة واقف وسألت بتوع بوابة النادي علي صاحب العربية وعرفنا مكانه وبعتله يجي
وهو حر بقي يصرف معاه براحته... و خدت عربيتي ومشيت

وانا لو لا قدر الله وربنا يسلم طريقنا جميعا ... خبطت حد او حكيت عربيته مش هايهدالي بال الا لو صلحتها او علي اقل تقدير دفعت جزء من قيمة التصليح

عذرا للاطالة ... تحياتي

[mrghost]

الحكاية مش بالبساطة دي
لك مقام مقال
يعني مثلا ممكن اللي يخبطك يكون غصب عنه
او قضاء وقدر
او ليس نتيجة اهمال
او خدش بسيط وما شابه
وفي الحالة دي لا عوض ولا يحزنون ده نصيب
انما ممكن مثلا واحد برعونة او تهور يدغدغلك عربيتك خالص ويعجزها لانه ماشي عكس الاتجاه مثلا
فده لازم يدفع تمن غلطته بالكامل خاصة لو صاحب العربية المصابة معندوش امكانية انه يصلحها بسهولة ومحدش فينا بيلاقي الفلوس
ومش من العدل اننا اشتغل واتعب علشان اصرف علي اخطاء واحد متهور وارعن
وبعد ما يدفع يبقالك مطلق الحرية اما نك تصلح بيها عربيتك او تنفقها في الخير
لكن يكون هو اتقرص والفلوس وجعته يمكن ده يعلمه ان السواقة مسؤولية

+11111111111111111111111

[hesham_tawfiq]

ده مش عوض فى مبدا بيقول من اتلف شئ عليه اصلاحه

دا مش مبدأ يافندم دا حديث شريف
واكيد الهدف منه انى لو كنت انا اللى غلطان ودفعت تمن غلطتى اكيد هتصرف بحرص المره اللى بعدها

[kingtefa]

الحكاية مش بالبساطة دي
لك مقام مقال
يعني مثلا ممكن اللي يخبطك يكون غصب عنه
او قضاء وقدر
او ليس نتيجة اهمال
او خدش بسيط وما شابه
وفي الحالة دي لا عوض ولا يحزنون ده نصيب
انما ممكن مثلا واحد برعونة او تهور يدغدغلك عربيتك خالص ويعجزها لانه ماشي عكس الاتجاه مثلا
فده لازم يدفع تمن غلطته بالكامل خاصة لو صاحب العربية المصابة معندوش امكانية انه يصلحها بسهولة ومحدش فينا بيلاقي الفلوس
ومش من العدل اننا اشتغل واتعب علشان اصرف علي اخطاء واحد متهور وارعن
وبعد ما يدفع يبقالك مطلق الحرية اما نك تصلح بيها عربيتك او تنفقها في الخير
لكن يكون هو اتقرص والفلوس وجعته يمكن ده يعلمه ان السواقة مسؤولية

هو ده بالظبط اللى انا عاوز اقوله
الله ينور يا باشا:k49: