بالحساب كده العربية الزيرو بتكلفنا كام مصاريف تشغيل

[abou_ruqi]

موضوع غريب وان شاء الله يكون مفيد للجميع

وآعتقد هو بيحل معضلة تشتري زيرو وآلا استعمال وآلا تقضيها تاكسيات ارخص

انا جبت عربية افيو في صيف ٢٠٠٥ وبعتها اليومين دول يعني تقريباً بعد اربع سنين
العربية مشيت بها ٨٠ الف كيلو فلو حبيت آعرف الكيلو الواحد بالعربية كلفني كام حاحسبها كالتالي :

٢٥٠٠٠ جنيه خسارة بين ثمن الشراء وثمن البيع
١٤٨٠٠ جنيه بنزين ( بمتوسط ١ لتر لكل عشرة كيلو مع الاخد في الحساب التكييف و السواقة الرياضية بعض الشيئ x ١.٨٥ قرش )
٢٠٠٠ جنيه زيت موتور وفلاتر (غيرت ٨ مرات موبيل ون بالفلتر بحوالي ٢٥٠ جنيه)
٥٠٠٠ ثمن الصيانة الدورية في الاربع سنين
١٠٠٠ جنية اربع فرد كاوتش بريدجستون (عند الخمسين)
٤٠٠ بطارية جافة (عند الستين)
١٤٠٠ مصاريف سايس
٢٠٠ جنيه غسيل اضافي
المجموع
٢٥٠٠٠+١٤٨٠٠+٢٠٠٠+٥٠٠٠+١٠٠٠+ + ١٤٠٠+٢٠٠+٤٠٠ = ٤٩٨٠٠

وزي ما قلتلكم مشيت ٨٠٠٠٠
يعني كل كيلو كلفني
٤٩٨٠٠ / ٨٠٠٠٠= ٦٢ قرش

ايه رآيكم ؟؟ العربية آحسن وآلا التاكسيات ؟؟
حد كان يتخيل انه بيصرف ٦٠ قرش على كل كيلو بيمشيه ؟
اعتقد معظمنا فاكر انه اقل من كده

وطبعا كل ما العربية تغلى بيكون سعر تكلفة الكيلو اغلى

ويا ترى المستعمل بيعمل آقل من كده بكتير ؟؟؟


اداره المنتدي تشكر العضو الفاضل علي مجهوده المثمر
تم تثبيت الموضوع لمده اسبوعين
مشرف القسم 3

[Imhotep]

معلش بس هو فى عامل تانى مهم لم يدخل فى الحساب، و هو عامل معنوى، لذلك تقديره يختلف من شخص لآخر، وهو عامل الراحة من:
- استخدام المواصلات العامة
- الفصال مع التاكسيات
- فى حالة سكنك بعيد، ستكون حركتك من و الى الشغل لو مثلا فى وسط البلد عذاب ما بعده عذاب
- لو متزوج، كل ما سبق سيتضاعف المتاعب التى تحدث منه
- لو فى اطفال، 3 اضعاف المتاعب
- حرية الحركة و السفر
و عوامل اخرى كثيرة تجعل وجود سيارة مناسبة لاحتياجاتك و استخدامك شئ حيوى. و ضع كثير من الخطوط تحت مناسبة لاحتياجاتك و استخدامك.

[bassem.naguib]

حسبة غريبة قوي .. بس جامدة جداً

[AYMANEZZE]

انت رائع تسلم ايديك

[abou_ruqi]

معلش بس هو فى عامل تانى مهم لم يدخل فى الحساب، و هو عامل معنوى، لذلك تقديره يختلف من شخص لآخر، وهو عامل الراحة من:
- استخدام المواصلات العامة
- الفصال مع التاكسيات
- فى حالة سكنك بعيد، ستكون حركتك من و الى الشغل لو مثلا فى وسط البلد عذاب ما بعده عذاب
- لو متزوج، كل ما سبق سيتضاعف المتاعب التى تحدث منه
- لو فى اطفال، 3 اضعاف المتاعب
- حرية الحركة و السفر
و عوامل اخرى كثيرة تجعل وجود سيارة مناسبة لاحتياجاتك و استخدامك شئ حيوى. و ضع كثير من الخطوط تحت مناسبة لاحتياجاتك و استخدامك.

لو تلاحظ من عنوان الموضوع انا بتكلم عن تكلفة التشغيل مش اي حاجة تانية

[sasatony]

ماهو الكيلو واقف عليك بالحساب ده في نظير راحتك وانك متحملش هم المواصلات وحرقة الدم
فاانا شايف العربية اريح حتي لو اغلي كمان

[شاهين - بنز]

حسبة رائعة
و الكيلو عندك ب 62 قرش التاكسي حيبقى الواحد متبهدل وراكب تاكسي قدييم إللي يقاله ربع ساعة مستنيه والكيلو حيبقى 1.2 يعني على الأقل الضعف
مثلا من رمسيس ل 6 أكتوبر 30 كيلو بالتاكسي 50 جنيه وهكذا باقي المشواير

[abou_ruqi]

ماهو الكيلو واقف عليك بالحساب ده في نظير راحتك وانك متحملش هم المواصلات وحرقة الدم
فاانا شايف العربية اريح حتي لو اغلي كمان

بص انتوا مش واخدين بالكوا من فايدة الموضوع
انا بتكلم عن تكلفة كل كيلو بتمشيه

بس لو العربية كانت مستعملة كنت حتشيل الـ ٢٥ الف بتوع خسارة الزيرو وتشيل الخمسة بتوع صيانة التوكيل ، وتضيف ١٥ تكلفة تصليح مثلا حتلاقي الكيلو ارخص بكتير

ومحدش يقولي ماهو المستعمل حيضيع وقتك عند الميكانيكية
ما انا عارف انا مش بتكلم عن تكلفة الفرصة البديلة انا بتكلم عن التكلفة الفعلية المالية فقط لا غير

يبقى دلوقتي انا شايف ان ارخص كيلو بتعمله العربية المستعملة وبعدين الزيرو والاغلى التاكسي

[abou_ruqi]

حسبة رائعة
و الكيلو عندك ب 62 قرش التاكسي حيبقى الواحد متبهدل وراكب تاكسي قدييم إللي يقاله ربع ساعة مستنيه والكيلو حيبقى 1.2 يعني على الأقل الضعف
مثلا من رمسيس ل 6 أكتوبر 30 كيلو بالتاكسي 50 جنيه وهكذا باقي المشواير

الله ينور عليك انت كده فهمتني

[YaSSerwIN]

طبعا ً العربية أحسن لأسباب كير

وطبعا ً تكون زيرو او تكون عربية مستعملة تكون كويسة جدا مش حاجة مثلا من أكتر من 20 سنة

اول سبب
1- التاكسيات حيث التحايل على سواقين التاكسى علشان يركبك شوية وتقولو انت رايح فين

سواقين التاكسى كتير فيهم بيحبو يحورو فى الطريق علشان يزوده الأجرة ياعنى ممكن طريق مختصر يوصلك فى مند يروح واخد طرق غريبة علشان يوصلك فى ساعة ويضاعف الحساب

2- البهدلة فى جميع أنواع المواصلات من تاكسى لمكروباص لأتوبيس لغيره

[abou_ruqi]

وبما اننا وصلنا لان كيلو التاكسي اغلى من كيلو العربية الزيرو يبقى المفروض نبص على اللي راكب عربية زيرو انه فقير واللي راكب تاكسي غني !

[zanativich]

على اى حال انا كتير افضل اركن السيارة ال البديا ادمى و مريح


و كمان بستريح من السواقة الى بقت بجد معركة

[zanativich]

المترو مع انه زحمة بس انا افضله عن عربيتى

[want_better]

السلام عليكم
أنا من أنصار أن السيارة أولا راحة لك وللأسرة قبل ماتحسب هي بتكلف كام
أحيانا بتقابلك مواقف تقول لو التاكسي يوافق يوديني دلوقتي وياخد اللي ياخده !!!!! صح
الفكرة أصلا في القدرة المادية
بس عامة الحسبة اللي في أول الموضوع جامدة جدا
شكرا شكرا

[Salamonti]

نسيت مصاريف تراخيص السيارة + القيادة
وافتكاسات المرور من طفاية + مثلث + اسعافات + مخالفات + تأمين اجباري
ده غير التأمين الشامل لو جايبها قسط... وكمان نسبة فوائد التقسيط

ومحدش ضامن الظروف مفروض تحط مبلغ للحوادث العارضة اللي بتحصل في بلدنا بدون ارادتنا حتى وممكن تكون العربية واقفة في مكانها تحت البيت (سمكرة - دوكو - كسر أو شرخ زجاج)