كيف تهرب من رسوم تسجيل الشهرالعقاري

[baher]

الموضوع ده لسه عارفه من صديق محامي ليا طبعا كلنا عارفين ان رسوم التسجيل في الشهر العقاري عاليه جدا ومرتفعه يعني انا افتكر عربتي الشاهين دفعت ليها حوالي الف جنيه علشان اسجلها المهم الحركه دي بقى حلوه انت هترفع على نقسك قضيه تطلب فيها من نفسك انك تتملك العربيه يعني انت المدعي وانت المدعي عليه انت المدعي علشان معاك توكيل وانت المدعي عليه علشان انت اللي معاك العربيه المهم هيطلع ليك عقد صحه ونفاذ من المحكه تاخد العقد وتوثق بيه طبعا الموضوع ده صعب شويه يعني هيحتاج حوالي اسبوع بس أوفر كتير هتحتاج فيه لمحامي هياخد بالكتير 200جنيه ورسوم القضيه هتبقى حوالي 100جنيه يعني كله بالكتير موش هيكمل 400جنيه واللي موش مصدق ممكن اديكم نمره المحامي صديقي وهو يخلص ليكم اللي انتوا عايزينه وهو شغال على الحركه دي ليل ونهار وأي خدمه ومتنسوش تدعولي

[Abdallah]

انا سألت امبارح على رسوم تسجيل عربيتى ( كورولا 93 ) كانوا 37 جنيه متهيالى الواحد يسجلها اوفر ههههههههههه

[baher]

انا سألت امبارح على رسوم تسجيل عربيتى ( كورولا 93 ) كانوا 37 جنيه

:shock: :shock: :shock: :shock: :shock: :shock:

[جندى مجند]

انا سألت امبارح على رسوم تسجيل عربيتى ( كورولا 93 ) كانوا 37 جنيه

حضرتك تقصد رسوم التسجيل فى الشهر العقارى ولا الضريبة اللى بتتدفع فى المرور عند التجديد؟؟ لو حضرتك قصدك رسوم التسجيل فى الشهر العقارى يبقى أكيد قللوها جداً لأن أنا كنت مسجل نقل ملكية فليشيا 96 من حوالى سنتين كنت دافع فيها 600 جنيه

[خالد]

الأخ الفاضل / باهر
أفتكر أن الموضوع ده يعتبر سرقة وحرام جداً للطرفين ، صاحب السيارة الذى يحتال على الدولة ، والمحامى الذى يأكل من حرام ومن سحت ، ومن نبت لحمه من سحت فالنار أولى به ، وربك دائماً بالمرصاد وأفعل ماشئت كما تدين تدان
ربنا هايرزقك باللى ينصب عليك فى أضعاف أضعاف ماأخذته ، أو تحصل حاجة للعربية وتدفع فيها الشئ الفلانى ، وساعتها الناس مش هاتدعيلك زى ماأنت فاكر

[Abonora]

ولية تتهرب؟؟ :?:

[Abdallah]

سورى يا جماعة غلطة مطبعية 370 جنيه

[جندى مجند]

أفتكر أن الموضوع ده يعتبر سرقة وحرام جداً للطرفين ، صاحب السيارة الذى يحتال على الدولة ، والمحامى الذى يأكل من حرام ومن سحت ، ومن نبت لحمه من سحت فالنار أولى به ، وربك دائماً بالمرصاد وأفعل ماشئت كما تدين تدان

برجاء عدم القاء التهم جزافاً فالاجراء المشروح أعلاه اجراء رسمى مسموح به فى الدولة و ليس تزويراً مثلاً أو ما شابه .. و فوق كدة لماذا لا تقول ان الرسوم اللى الدولة فرضاها على التسجيل هو نوع من الاتاوات ليس له أى هدف سوى لهف أموال الناس و خلاص زيه زى جمارك السيارات اللى مفيش مثيل لها فى العالم كله "و لا تأكلوا أموالكم بينكم بالباطل و تدلوا بها إلى الحكام لتأكلوا فريقاً من أموال الناس بالإثم و أنتم تعلمون" - البقرة 188

[Hazem Salah]

مع احترامى التام للجميع و تفهمى للمبررات
فان هذا احتيال لامبرر له

[Abdallah]

يا جماعة الراجل مغلطش ومضربش حد على ايده فلا مجال هنا للتجريح والاهانات وعيب اننا نوصف واحد انه مزور او محتال عشان هوا بيحاول يساعد والنقطة هنا انى شايف ان الدولة بتفرض رسوم تسجيل على السيارات ذات الموديلات الحديثة مبالغ فيها , وجمارك مبالغ فيها واشياء عديدة ودة مجرد ثغرة بننفذ منها مش اكتر لا احتيال ولا تزوير, وبالنسبة للاخ الى بيقول اننا بنحتال على الدولة فيا عزيزى انظر حولك وسترى قمة الاحتيال فى رسوم تسجيل او جمارك او رسوم ضريبية او تامين تدفعه اجبارى ولا تستفيد به وعجبى.

[Abonora]

طيب ممكن تفهمونا واحدة واحدة --يعنى اية تسجيل سيارة وبنسجلها فين وبنسجلها لية--افضل من الخلافات --

[memo_hefnawy]

أستاذ جنيدى طبعا سؤالك هو بسيط بس إنت مش عارف الإجابة لأنك عايش بره مصر أم الدنيا :) بس بوضح عشان الأعضاء إللى ميعرفوش

الإجابة :

إنت لما بتروح تشترى عربية مستعمله و ليكن منى أنا فعشان تثبت ملكية السيارة و تنقلها ليك ؟ بتعمل إيه ...حاجة من 2 يا بعملك توكيل يا بروح معاك الشهر العقارى و أسجلك

سواء ده أو ده فى النهاية لازم تسجل و لما تروح تسجل لو العربية موديل حديث بيدفعوك رقم ممكن يعدى ال 1500 جنيه مش لحاجة بس عشان إنت راجل معاك فلوس ...دى نظرة الدوله بتنظرلك على أنك تقدر تدفع فى سيارة رقم فوق ال 50 ألف إذن مش خسارة فى الدوله 1000 و لا 2000 إتاوة يعنى

التسجيل هدفه إثبات الملكيه ذي ما بتروح تسجل شقتك أو أرضك ...أتمنى أكون وضحت

[baher]

أنا مردتش أرد غير لما يتجمع اكبر قدر من الردود علشان أشوف انطباع الناس
أولا بالنسبه للناس اللي قالوا حرام وأن المحامي بياكل سحت وان ده نصب
ممكن أعرف نصب ليه ؟ ونصب على مين؟ نصب على اداراه المرور ولانصب على الشهر العقاري ولا نصب على الحكومه كلها ؟ متهيألي موش نصب على الشهر العقاري لأن المحكمه بتقدميلي نفس الخدمه وهي اثبات ملكيتي للعربيه بس بسعر أقل زي بالظبط ورشتين بيدهنوا عربيتات واحد مشهور وكل الناس بتروح له وغالي جدا وواحد موش معروف أوووي وسعره رخيص هل غلط أني أروح للرخيص رغم انهم كفاءه واحده؟
ولو قصدهم نصب على الحكومه موش الشهر العقاري والمحمكه الهيئتين دول تابعين للحكومه زي فكره وكلاء البيع اللي عنده كذا فرع وكلهم بيقدموا خدمه واحده للجمهور بس صاحب المحلات شايف اني في واحد معروف ومشهور وبيقدم الخدمه أسرع فغلى الأسعار فيه والتاني محدش عارفه واجراءته صعبه فرخصه شويه ياريت الناس تفكر شويه قبل ما ترمي الاتهامات على الناس جزافا".
واللي موش مقتنع بكلامي ياريت يناقشني

[Hazem Salah]

عزيزى عبدالله
أكرر . . مع احترامى لكل صاحب رأى و لنوايا الجميع الحسنة ، هنا احنا بنتكلم على صحة اجراء ، بنوصف و بنقيم اجاراء بمنتهى الحرية بدون اسقاط على أشخاص أو أسماء، أخذا فى الاعتبار تجريم الفكرة بوصفها تحايل مع كافة الاحترام لصاحبها. .
- بمنهى الوضوح مع النفس قبل الصراحة و الوضوح مع الأخرين :هل هذا تصرف سليم ، هل لما يبقى ظاهرة ، مش هايصدر تشريع خاص لتجريمه . . هذا سؤال
- لحد امتى هانشترى عربية بمبلغ كبير، و نستخسر 1% حق الدولة اللى هى احنا ( وليست عدو لنا أو مراة أبونا )
- مش الجمارك اتخفضت قريبا ، و معظم الناس ركبت ال 1600 !!!! و لسه تخفيض 2000 و يتسنى ركوبها لفئة كبيرة كانت تكتفى بمشاهدتها و التغنى بمفاتنها فقط ....!!!
- ألم يكن معروف للجميع أن رسوم الشهر العقارى ستزيد على السيارات بنسبة محدودة بعد قرارات تخفيض الجمارك، فى المقابل تم تخفيض رسوم تسجيل العقارات، أليس هذا جزء من منظومة اصلاح اقتصادى ( بشكل عام يمكنك بهدوء ملاحظة طفرة فى اقتناء السيارات كما و نوعا بين جيل حالى و جيل سابق كان قمة اعجابه الـ 128 و اللادا و الـ 133 و 132 و خلافه من الأرقام )
و فى الأول و الأخر : استفد من أى ثغرة قانونية كماشئت ، لكن ساعة الحساب النهائى (أمام الله) لن يكون هناك أى ثغرات
فلا تحجر على رأى أحد فى وصف الاجراء أو تسمية الاجراء، مع كامل الاحترام لأصحاب الرأى

[Hazem Salah]

و لماذا نهرب و بعد كده نلاقى اللى يجرى ورانا

كيف تهرب من رسوم تسجيل الشهرالعقاري

ياجماعة حتى العنوان : كيف تهرب من . . .