دراسة تطبيق مشروع التاكسي الجديد على "الملاكي"!

[oss_m]

أعلن المهندس رشيد محمد رشيد، وزير التجارة والصناعة، أن وزارته ستبدأ بالتنسيق مع وزارة المالية، دراسة لتطبيق مشروع إحلال سيارات الأجرة والميكروباص على سيارات الركوب "الملاكي".

ودعا رشيد في تصريحات صحفية إلى إعادة النظر في منظومة العمر الافتراضي للسيارات الموجودة في السوق، لعلاج المشاكل البيئية والمرورية والأمنية التي تسببها، ويقضي المشروع المقترح بتعويض مناسب لملاك السيارات الملاكي القديمة، خاصة محدودي الدخل.

وقال وزير التجارة والصناعة إن تجربة مشروع إحلال التاكسي ساهمت في كسر الحاجز بين المجتمع والحكومة.

وأوضح قائلا : "كان المجتمع ينظر إلى الحكومة في مثل هذه المشاريع بنظرية المؤامرة باعتبارها تخدم رجال الأعمال، وتدريجيا استوعب الناس جدوى المشروع وظهرت "طوابير" الراغبين في الاستفادة منه".

http://www.contactcars.com/News_ViewStory.asp?NewsID=3174

حسبى الله و نعم الوكيل ........ يعنى الواحد يروح يديلهم عربيته اللى دافع فيها تحويشة العمر .. يتمنوها له ب5000 جنيه و يبفضل باقى عمره يدفع فى اقساط؟

هو احنا بنكسب من عربياتنا زى التاكسى؟ .... و لا برضه هايحطولنا اعلانات على العربية؟ ................... حاجة تقرف و الله العظيم

[compuland]

ربنا يستر
اينعم هو الموضوع حلو وهايحل مشاكل كتير
بس ماينفعش فى بلدنا الكلام ده

[shankosi]

الناس دي مش عارفة تعمل فينا إيه ولا إيه
ده انتهاك للحقوق الدستورية وانتهاك للملكية الشخصية
طيب لما هما بيفكروا يعملوا كده ليه رفعوا الضريبة ورسوم التنمية وفرضوا اللوحات المعدنية الجديدة

لو الموضوع ده حصل فعلاً ناس كتير حيجيلها سكتة قلبية بسبب التعدي السافر على املاكهم

في ناس معتمده على حتة الكهنة بتاعتهم في التنقل وبتغنيهم عن المواصلات وقلة الأدب اللي الواحد بيشوفها في المواصلات العامة والغير أدمية ولا يستطيع تغيرها بأي حال من الأحوال.

لو عايزين نقلد الدول الأجنبية في إحلال السيارات الملاكي لازم يكون دخلنا زي الدول دي والتجارة تكون حره بدون تبعيات لمجموعة من التجار والمستوردين وبدون جمارك تقصم الوسط وتكون الشوارع صالحة للسير بالسيارات.

دي حتى لو عربية سيات حيكون اتصرف عليها قد تمنها ييجي 50 مره من يوم ما طلعت زيرو وبالسهوله كده تتكهن وده مجرد مثال.

ده في سيارات مرسيدي و bmw وبيجو موديلات الثمانينات والسبيعنات زي الفل وتسير بكفاءة عالية وربما احسن في التحمل من معظم السيارات الجديدة.

ومين حيقدر يشتري عربية جديدة بعد ما تتكهن عربيته ؟؟؟

اعتقد ان لو القرار ده نفذ بالفعل يبقى البلد دي قول عليها يا رحمن يا رحيم لأن ناس كتير حتتظلم ومش حتعرف تركب عربية تاني.

[blazer]

اعتقد الحكومه ملزمه بانها تعمل وساشل مواصلات عامله ادميه الاول قبل ما تفترى بلشكل دا على الشعب اللى مفيش فى ايده حاجه
القارا دا هيبقى حلو فى حاله واحده
هو انهم يتمنوا العربيات بتمنها الحقيقى و يدوا كل واحد فلوسه واللى عاوز يشترى يشترى
وبما ان الميزانيه بتاعه الحكومه مش هتعرف تعمل كدا يبقى تدخل للناس دى عربيات ن بره معافاه من الرسوم الجمركيه ومعافاه من الترخيص لاول 3 سنوات بلاضافه ل ال 5 الف جنيه اللى هيدفعوهم

[Samir Elshahawy]

حكومة رجال الاعمال بتستغل موقعها لأصدار قرارات يستفيد منها رجال الاعمال و لتزدهر بها شركاتهم دون غيرهم علي حساب باقي أفراد الشعب المطحون

طبعا القرار ده الهدف منه أجبار الناس علي شراء السيارات الجديدة بدل ماتفضل في المخازن و تصدي

بس برضه و لو :

أن شاء الله هاتصدي ي ي ي ي ي ي

[abdelmessih67]

أهلا يا أخ شانكوسي

الناس دي مش عارفة تعمل فينا إيه ولا إيه
ده انتهاك للحقوق الدستورية وانتهاك للملكية الشخصية

التكهين لا يوجد به تعدي على الملكية لانه لا ينزع منك الملكية بالعافية بل ينزع الرخصة فقط .

هيقولك الآتي : السيارة ملكك لا أحد ينازعك فيها و لكن الرخصة ملك للدولة و من حقها ان تسحب الرخصة لو المركبة
غير مطابقة للمواصفات التي وضعتها الدولة لاعطاء الرخصة .

زي ما تشتري حتة أرض و ترفض الدولة اعطاءك ترخيص مباني .

لا أحد ينازع حقك في الملكية و لا يتعدى عليها لكن الرخصة من حق الدولة و من سلطتها الا تعطيك رخصة للبناء .

[Samir Elshahawy]

أهلا يا أخ شانكوسي


التكهين لا يوجد به تعدي على الملكية لانه لا ينزع منك الملكية بالعافية بل ينزع الرخصة فقط .

هيقولك الآتي : السيارة ملكك لا أحد ينازعك فيها و لكن الرخصة ملك للدولة و من حقها ان تسحب الرخصة لو المركبة
غير مطابقة للمواصفات التي وضعتها الدولة لاعطاء الرخصة .

زي ما تشتري حتة أرض و ترفض الدولة اعطاءك ترخيص مباني .

لا أحد ينازع حقك في الملكية و لا يتعدى عليها لكن الرخصة من حق الدولة و من سلطتها الا تعطيك رخصة للبناء .

طيب و لو العربية قديمة و موديل الثمانينات بس حالتها كويسة و محافظ عليها و مابتعطلش و مافيش منها أنبعاثات عادم و ماشية في الشارع زيها زي الجديدة , حد له عندي حاجة ؟؟؟

و بعدين أي هيا المواصفات دي ؟؟ ياريت يقولوا لنا عليها بالمرة ؟؟

[shankosi]

أهلا يا أخ شانكوسي


التكهين لا يوجد به تعدي على الملكية لانه لا ينزع منك الملكية بالعافية بل ينزع الرخصة فقط .

هيقولك الآتي : السيارة ملكك لا أحد ينازعك فيها و لكن الرخصة ملك للدولة و من حقها ان تسحب الرخصة لو المركبة
غير مطابقة للمواصفات التي وضعتها الدولة لاعطاء الرخصة .

زي ما تشتري حتة أرض و ترفض الدولة اعطاءك ترخيص مباني .

لا أحد ينازع حقك في الملكية و لا يتعدى عليها لكن الرخصة من حق الدولة و من سلطتها الا تعطيك رخصة للبناء .

طبعاً متشكر لتفاعلك السريع

وانا مش ضليع قانونياً بس بتكلم بالمفهوم العام للقضية

ما دمت دفعت قيمة الترخيص يصبح الترخيص جزء لا يتجزأ من قيمة المركبة ولا الدولة بتعطي التراخيص دي بحق الاستغلال فقط

وفي كل الاحوال اعتقد لو الدولة بطريقة ما تمنع صاحب المالك من استغلال ملكه باختراع قانون غير مناسب لحالة البلد فسيكون نوع من التعدي عليه لان المالك لا حول له ولا قوة

وكل اللي بقوله يا ريت الدوله تدور على حاجات اهم من السيارات القديمة وتحاول تحسن الظروف المعيشية وترفع قيمة الجنيه وزيادة الإنتاج وتشجع التجارة الحرة وعدم الاحتكار ولما البلد تنتعش يعملوا اللي هم عايزينه.

ما ينفعش نكون بنتحول للرأسمالية بأخذ أسوا ما فيها دون الحصول على المميزات.

بجد في ناس ياما حتنظلم لو القانون ده تم وأرجوا اني ما اكونش منهم إن شاء الله والحمد لله تحت إيدي أربع عربيات اقدم واحده موديل 1999 بس لازم نراعي الطبقات الكادحة اللي تعبت عشان تركب عربيات.

تحياتي ....

[oss_m]

اعتقد الحكومه ملزمه بانها تعمل وساشل مواصلات عامله ادميه الاول قبل ما تفترى بلشكل دا على الشعب اللى مفيش فى ايده حاجه
القارا دا هيبقى حلو فى حاله واحده
هو انهم يتمنوا العربيات بتمنها الحقيقى و يدوا كل واحد فلوسه واللى عاوز يشترى يشترى
وبما ان الميزانيه بتاعه الحكومه مش هتعرف تعمل كدا يبقى تدخل للناس دى عربيات ن بره معافاه من الرسوم الجمركيه ومعافاه من الترخيص لاول 3 سنوات بلاضافه ل ال 5 الف جنيه اللى هيدفعوهم

ماهى نفس المشكلة يا باشا ...... يعنى لو عملوا كده ... هاتبقى ارخص عربية بكام؟ ... مثلا السوزوكى ماروتى؟ 25 ألف ؟ طب المواطن البسيط يجيب العشرين ألف منين؟ .... و لا هيقعد يقطع من قوت عياله علشان يدفع اقساط لمده خمس سنين؟

ده غير طبعا النقطة اللى اثارها الاعضاء ... ان فيه عربيات موديلات السبعينات و الثمنينات و حالتها احسن من عربيات كتير زيرو .....

ربنا يستر علينا

[Samir Elshahawy]

وكل اللي بقوله يا ريت الدوله تدور على حاجات اهم من السيارات القديمة وتحاول تحسن الظروف المعيشية وترفع قيمة الجنيه وزيادة الإنتاج وتشجع التجارة الحرة وعدم الاحتكار ولما البلد تنتعش يعملوا اللي هم عايزينه

تحسن الظروف المعيشية

ظروف التجار و الوكلاء طبعا

وترفع قيمة الجنيه

مش مهم الجنيه المهم الدولار و اليورو اللي هما بيتعاملوا بيه

وزيادة الإنتاج

طبعا أنتاج السيارات من مصانع الوكلاء

وتشجع التجارة الحرة

طيب ماهو القانون هايساعد علي تنشيط المبيعات لسلعهم الراكدة

وعدم الاحتكار

طيب و هماهايكنزوا الفلوس أزاي ؟؟؟؟

ولما البلد تنتعش

ماهي البلد بتنتعش علي طووووول (أصلها في الانعاش)

أنت مش واخد بالك و لا أيه ......

[M.Mostafa80]

حسبنا الله ونعم الوكيل لو دا حصل صحيح ممكن متأثرش بس حرام فى ناس كتير هتتأثر

[SeiffoZ]

هو الحل كويس بس بشرط واحد فقط عشان يراعوا الموضوع ده ...

يكون الموضوع إختيارى !

[Terrible_DaRsH]

طب و اخبار القسط هتكون ايه !

و اسعار العربيات ؟؟ يا ترى برده الناس هتاخد عربيات من غير جمارك زى التاكسي كده ولا ايه ؟

و ايه العربيات اللى هترخص ! ( ده طبعا بالاتفاق مع عم غبور و شركاه ) .

[Samah AbdAllah]

لا عاوزين يكهنوا العربيات يشتروها بسعر السوق قبل ما يبتكروا موضوع التكهين ده وبرده حسب رغبة صاحبها مش يلغوا الرخصة ويبقا بلوى الدراع

[city_ct]

المشكلة التى سوف تظهر و تزيد خلال الأيام القادمة و التى بالفعل بدأت مع بداية مشروع التاكسى هى توفر قطع غيار السيارات القديمة، فمثلا نجد أن قطع غيار السيارات القديمة مثل الفيات سوف تقل لإحجام تجار قطع غيار السيارات القديمة عن شراءها و تحويل نشاطهم إلى الموديلات الحديثة- مثل تحول فخرى زلط من الفيات إلى موديلات جديدة مثل هيونداى و و غيرها و غيره كثيرون فى محلات شارع دمشق.

إذا المشكلة التى ستواجه ملاك السيارات الملاكى القديم تدريجيا هى عدم توافر قطع غيار جديدة لسياراتهم و مع الوقت ارتفاع ثمنها و اختفائها من السوق و وجودها استيراد أو مستخدمة فى عزبة شلبى و الوكالة.

إذا سوف يصبح ملاك السيارات القديمة فى خانة اليك مجبرين على التخلى عن سياراتهم، و هذا لمجرد انتشار خبر عن نية الحكومة علىتطبيق مشروع التاكسى الجديد على الملاكى.

الأيام القادمة و دورة مجلس الشعب الجديدة سوف توضح الأمور.