عشان البلد تنضف

[Car's Sniper]

نفسى مع بعض نشوف حلول للفوضى اللى احنا عايشين فيها دى من مرور وغيره بس بما اننا فى منتدى سيارات يبقى المرور هو موضوعنا
الموضوع ده ضرب فى دماغى من شهر كدة لما لقيت العسكرى اللى واقف فى اللجنة لما يوقفك وتقول له ظابط يسيبك تمشى على طول ومايفتحش بقه معاكبس بصراحة كنت متردداعرضه لغاية ما لاقيت موضوع للأخ شريف احمد بعنوان(والله عمرنا ماهنتقدم) واللى كان بينتقد فيه الناس اللى بتخالف القانون-رشاوى ووسايط وكده- وبعدين تقول ان البلد بايظة. وفعلا عنده حق وكلامه صح وكان فى رد على موضوعه ده وكان مكتوب فيه بالحرف"طول ما الواحد مش عارف ياخد حقه بالقانون يبقى اكيد هنفضل نخالف القانون"
طيب محدش سأل نفسه احنا ليه مش عارفين ناخد حقنا بالقانون وليه هنفضل نخالف القانون-ومحدش ينكر اننا بنخالفه احيانا-هل احنا بنحب الغلط؟؟!! اكيد لأ اومال ايه اللى بيخلينا نعمل كدة اكيد فيه حاجة غلط>>>>فعلا فيه ملايين الحاجات غلط بس للاسف احنا اللى ساكتين عليها ومابنحاربهاش وبصراحة كدة ومحدش يزعل انا مبدأى انى ماسكوتش عن حقى لأن اللى يسكت عن حقه مرة يبقى مايلومش غير نفسه لما ينضرب على قفاه بعد كدة عشان ماطولش عليكوا هادخل فى الموضوع على طول
ظباط المرور هما الغلط الكبر اللى هما المفروض يطبقوا القانون للاسف يتهاونوا فى تطبيقه
يعنى مثلا تلاقى الظبط من دول مفيم عربيته او ماشى عكس السير وضارب الزينون ومع ذلك محدش بيكلمه فى اى لجنة اما لو مواطن عادى حاطط لو حتى منديل على التابلوه يتاخد مخالفة اعاقة روءية..طيب وايه الحل احنا مش بنكتب مواضيع عشان ننتقد وخلاص وإلا ده يبقى اسمه غباء ,المفروض ان احنا نضع حل للى انتقدناه
وانا عن نفسى باقترح ان المفروض يبقى فى كل لجنة كاميرا مراقبة تراقب كلا من الظابط والسائق عشان محدش يبلطج على التانى الكاميرا دى تتحط طول مافيه ظابط بيشوف الرخص يعنى من اول ماتتعمل اللجنة لغاية ماتنتهى
وتكون بتسجل كل شىء بيحصل فى اللجنة فى وقته وتاريخه ويكون من حق المواطن لما يتاخد مخالفة ظلم انه يعترض ونشوف تسجيل المخالفة دى بالفيديو وبردو لو انا اتاخدت مخالفة وشفت واحد عامل زيى بالظبط وما اتاخدش مخالفة يبقى من حقى اشتكى الظابط ده وكمان لو الظابط وقف العربية اللى قدامى يبقى المفروض يشوف رخصها مش اللى فى العربية يقوله كلمتين (انا ظابط ولا لواء) يروح سايبه منغير مايشوف رخصه اومال هو وقف العربية ليه مش عشان شاكك فيها وبرضه يبقى من حقى اشتكى الظابط ده وكله متصور فى الكاميرا
محدش يقول عليا انى عايش فى حلم وردى. لأ ده ممكن يتحقق اصلها حاجة مش مكلفة وتعتبر بقشيش بالنسبة لميزانية الدولة ولو نقدر نعمل حتى جروب فى الفيس بوك ولا اى حتة نقدر نوصل بيه ارائنا لأى برنامج من البرامج اللى ليها وزنها ومهتمة بمشاكل الناس نبقى كده عملنا اللى علينا واكيد البلد ان شاء الله هتنضف وتتقدم ومستنى اقتراحتكوا فى حل المشكلة دى. يمكن فيه حد عنده فكرة احسن منى وان شاء الله نقدر نقضى على البلطجة اللى عندنا فى البلد
واسف انى طولت

[Terrible_DaRsH]

هى كلمة واحدة فقط اللى عندى .

مــــوســـولـــيـــنــــى .!

[Car's Sniper]

مــــوســـولـــيـــنــــى

موسولينى دا اتعدم بأيد شعبه الايطالى
وبصراحة انا الفكرة عششت فى دماغى ولازم اصحيها عند الناس وشكرا عالرد

[ainshouka]

مفيش فايدة

برضه مش حيحصل النتيجة المرجوة اللى انت منتظرها

وحضربلك مثال صغير

روح موقف عبود وشوف الميكروباصات اللى بتحمل زيادة

وفى نقطة المرور موجودة جوه الموقف

والنتيجة

بتوع المرور بياكلوا من السواقين عشان كله يمشى حاله

وآدى جهة رقابية بتشرف على السواقين وفضل الفساد زى ماهوه

دلوقتى الناس اللى حتشوف فيلم الفديو اللى اتصور دا ايه اللى يضمنى انهم ناس حياديين وابسط حاجة لما يكون فيه تجاوز ممكن يمسحوه من الفديو ويقولك عيب كاميرا( انا بضرب مثال يعنى عشان اوضحلك انه فيه مئة طريقة للتحايل على القانون)

المشكلة الاساسية هى الاخلاق طول ممافيش اخلاق ابقى سلملى عالقانون لان القانون دا مش حيطبقه غير شوية بشر وهمه واخلاقهم بقى

[Ghost2]

بص انا هقولك حاجه ,,, العملية دي ليها حاجات كتير بتحكمها .. اولا ظابط الشرطة قانونا مينفعش يعترض ضابط جيش ,, والا تبقى كارثة .. الفكرة الاحلى من كده اننا نعلم الناس تحترم القانون مش ان الظابط يطبق القانون ... القانون عمر ماكان الاصل فيه العقوبة .. الاصل فيه هو الالتزام ... وتعالى بقه بالعقل .
1-لو ظابط شرطة اعترض ظابط طيار حربي (فايتر ) عشان مركب زينون وفاميه .. الطيار هيتصل بالشرطة العسكرية ويقول انا في
المكان الفولاني وفي ظابط شرطة اعترضني .. الشطرة العسكرية تنزل تكسر الكمين على اللي فيه .


2 - وكيل النيابة مينفعش تتسحب رخصة ومفيش عليه مخالفات كل الحكاية ان ظابط الشرطة اخره يعمل تقرير ويبلغه للنائب العام ووكيل النيابة بياخد جزاء اداري .. واخر السنة بيروح المرور كل مخالفاته بتتشال

3 - تقدر تقولي انت هتجبر ازاي الظابط انه يسحب رخص الناس دي اذا كان طلبك اصلا غير قانوني

4- طالما انت ماشي كويس ومش مخالف متشغلش بالك بحد .. التطاول على القانون موجود في كل بلاد العالم .. هو صحيح في بلدنا التطاول كتير اوي وغريب جدا ..

لكن الطبيعي انه يكون فيه تطاول لانه لازم يكون في صح وفي غلط عشان قدرة الانسان على التمييز والتفكير تشتغل

ولك مني ارق التحيات

[SeiffoZ]

الحل واحدات رقابية من القوات المسلحة لها سلطة على الشرطة و ليس لها سلطة على المدنيين .

[M.ABDEEN]

المشكلة الاساسية هى الاخلاق طول ممافيش اخلاق ابقى سلملى عالقانون لان القانون دا مش حيطبقه غير شوية بشر غلابة واللي مش هيطبقوا كمية بشر عايزين الضرب ب ..............

[abzoabzo]

الحل واحدات رقابية من القوات المسلحة لها سلطة على الشرطة و ليس لها سلطة على المدنيين .

يا بيه مهم راقبوة البلد من ايام عبد الناصر واحنا عيشين فى تخلف وفساد وعقول متحجرة الرجل العسكرى ليس رجل سياسة



وانا شايف ان الحل ابادة شاملة ونبدا على نظافة نظام الترقيع ده مبيكولش واسال مجرب


حته نووى زى بتاعة اليابان

[Michael_Lanos]

يا باشا لو حطوا كاميره هايظبتوها برده وهاتاخد رشوه ... احنا بنعلم اى حد ياخد رشوه يا اما تتكسر
ولو الكاميره صورت، اللى بيفرغ المخالفات منها برده هايظبتك

الموضوع من جوانا احنا الاول .......
للاسف احنا عاوزين قرون علشان نتغير ونبقى متحضرين زي باقى البلاد المحترمه
الناس هناك محترمه من جواها مش علشان الكاميره

ربنا يرحمنا ويهدى الجميع

[alisleman]

انتا مسئلتش قبل مايركبوة الكاميرا الناس دى بتمد ايديها ليه ومستنيين رشوة ليه المرتب ضعيف +الحاجة بتغلى دون اى زيادات
اللى تفكر فى الطرق السريعة علشان المجازر اللى عليها
شوفت المحور عليه كام رادار والله كله بيمشى محترم عليه فيها ايه لو الطرق السريعة كلها تبقى كدة هتقول الرادارات تكلفة على الدولة بلاش هات الهيكل بتاع الرادار (رادار وهمى) وركبه فى الشارع هتلاقى كلة بيجى يهدى عندة مش هيكلف الدولة 10 جنية تعالى احسبها اعمل كل كيلو رادار وهمى زى كدة وكل فين وفين واحد حقيقى الناس هتمشى محترمين وفهم الناس ان الحارات كل حارة وليها سرعة والنقل ليه اليمين و 60 كيلو مش الاقى ماشى جنبى وعلى 120 كيلو

[M.Osman]

انا شايف ان مخالفة القانون موجودة في كل مكان في العالم مش بس في مصر

الحل في رأيي ان يكون كل حاجة تبع المرور إلكترونية ..من اول تسجيل المخالفة نفسها ... حتى دفع قيمة المخالفة إلكترونياً برضه

يعنى من غير اي تدخل بشري يخلق مكان للرشوة
او زي ماعملت انجلترا... (هو يعني الإنجليز يعني مش بشر زيينا وميعرفوش الرشاوي؟)

http://www.nilemotors.net/Nile/65533-a.html

[Car's Sniper]

للاسف ياجماعة وبجد الكلام ده حقيقى ان اكثر من90%من الظباط * * * * * * وده مش مهم واكثر من 75% من الضباط * * * * * * واكثر من 45%* * * * * * والكلام ده حقيقى و قعدت اسأل كل اللى اعرفهم من الشرطة عن عنابرهم وكدة والارقام دى لو غلط هتبقى بنسبة لا تزيد او تقل عن 5%
و الفسدة دول اللى انا نفسى يمحوهم بأنهم يعملوا كشف طبى شامل مفاجىء واللى يلاقوا فى دمه نسبة حشيش يتفصل نهائى من الخدمة حتى لو كان قاعد فى قعدة حشيش و مكانش بيشرب هو (دى الحجة اللى بيقولوها لما يتمسكوا)
مع خالص احترامى وتقديرى لل5% (واللى فى الاحصاء تقريبا 1%)المحترمين من ظباط الشرطة

دلوقتى الناس اللى حتشوف فيلم الفديو اللى اتصور دا ايه اللى يضمنى انهم ناس حياديين وابسط حاجة لما يكون فيه تجاوز ممكن يمسحوه من الفديو ويقولك عيب كاميرا

by ainshouka
و علشان مايبقاش فيه تزوير وتلفيقيبقى مدام مافيش فيديو يبقى مافيش مخالفة واللى قصدى عليه كمان ان الكاميرا تسجل التاريخ والوقت بالظبط عشان محدش يقدر يزور او يمسح اى مشهد وشكرا على ردك

لو ظابط شرطة اعترض ظابط طيار حربي (فايتر ) عشان مركب زينون وفاميه .. الطيار هيتصل بالشرطة العسكرية ويقول انا في المكان الفولاني وفي ظابط شرطة اعترضني .. الشطرة العسكرية تنزل تكسر الكمين على اللي فيه .

هو ده اللى احنا عايزين نقضى عليه يا Ghost2 وشكرا على ردك

الحل واحدات رقابية من القوات المسلحة لها سلطة على الشرطة و ليس لها سلطة على المدنيين .

by Relentless_mayhem
دى هتبقى اكثر بلطجة و القوات المسلحة هتحاول تفرض سلطتها بأى طريقة على الشرطة والشعب عشان تنتقم من الشرطة.. دا فيه حاجات بتحصل بين الشرطة والحربية والتلفيق اللى بينهم,,بلاوى بس مش عايزين ندخل فيها عشان محدش ييجى يقولنا امن قومى وشكرا على ردك

المشكلة الاساسية هى الاخلاق طول ممافيش اخلاق ابقى سلملى عالقانون لان القانون دا مش حيطبقه غير شوية بشر غلابة واللي مش هيطبقوا كمية بشر عايزين الضرب ب ..............

by mohammedsamirabdeen

للاسف يامحمد الاخلاق دى مش سلعة تباع او تشترى واحنا كنا ممكن نشتريها للناس اللى ماتعرفش الاخلاق
بس ممكن نخلى عندهم اخلاق بتطبيق مبدأ الثواب والعقاب
يعنى اللى يغلط يتعاقب واللى يعمل الصح مايستناش مكافأة لان ده اللى المفروض يتعمل وشكرا على ردك

الموضوع من جوانا احنا الاول للاسف احنا عاوزين قرون علشان نتغير ونبقى متحضرين زي باقى البلاد المحترمه
الناس هناك محترمه من جواها مش علشان الكاميره

وده اللى نفسى فيه يا مايكل واللى وضحته فى اول كام سطر من الرد ده وشكرا على ردك

انتا مسئلتش قبل مايركبوة الكاميرا الناس دى بتمد ايديها ليه ومستنيين رشوة ليه المرتب ضعيف +الحاجة بتغلى دون اى زيادات

مش حكاية مرتب وزيادة الاسعار المسألة مسألة مبدأ ياما فيه ناس مرتباتها ضئيلة ومابتمدش ايدها للحرام وفى الجانب الاخر ياما فيه ناس معاها فلوس وربنا مسهاها معاهم بالقوى وبيمدوا ايدهم للحرام ومثال على كدة واقسم بالله ان ده حقيقى رئيس مرور المدينة اللى انا منها هو اللى بياخد رشوة عشان تتطلع رخصة بدون اختبار وفى 3 ساعات بس وده اللى انا فكرت انى اديله فلوس مترقمة وبعد كدة ابلغ عنه النيابة على طول وان شاء الله هحاول اعملها ومحدش يقول ان انا بدخل نفسى فى مشاكل ان انا ببلغ عن خطأ لان ده مبدا عندى وياريت يكون عند كل الناس ونبطل سلبية

هات الهيكل بتاع الرادار (رادار وهمى) وركبه فى الشارع هتلاقى كلة بيجى يهدى عندة

ههههه بجد الفكرة دى كانت عندى بس كنت بقول نجيب علبة سمنة روابى ونحط فيها عدسة ودى مش هتكلف اكتر من 33 جنيه وشكرا على الرد ياعلى

الحل في رأيي ان يكون كل حاجة تبع المرور إلكترونية ..من اول تسجيل المخالفة نفسها ... حتى دفع قيمة المخالفة إلكترونياً برضه

ياريت يا SuccessCre8or بس للاسف الحكاية دى هتاخد وقت كبير وفلوس اكتر
وشكراعلى ردك
وشكرا على ردودكوا جميعا اللى ليا تعقيب عليها- بعد اذنكو طبعا- انى ملاحظ ان معظمها و اسف للانتقاد سلبيييية ومحبطة ياريت ياجماعة نبقى متفائلين اكتر من كدة
بس الحمد لله ربنا رزقنى بنعمة التفاؤل والعزيمة والاصرار




___________________________
تم حذف التجاوزات أعلاه
مع تحذير بعدم التطاول بدون دليل

مشرف عام .4

[moatazbunny]

يا بيه مهم راقبوة البلد من ايام عبد الناصر واحنا عيشين فى تخلف وفساد وعقول متحجرة الرجل العسكرى ليس رجل سياسة



وانا شايف ان الحل ابادة شاملة ونبدا على نظافة نظام الترقيع ده مبيكولش واسال مجرب


حته نووى زى بتاعة اليابان :o_stupid[1]:

100 % 100 %

[Car's Sniper]

باعتذر للمشرف على التجاوزات اللى من غير دليل واللى ممكن يتجبلها دليل بسهولة بس للاسف هيبقى فيها خيانة لاصحابى الظباط وانا بصورهم من غير مايخدوا بالهم وده اللى لن ولم يحدث بس اقسملكوا ان كل التجاوزات دى حقيقية وانا ماوجهتش كلامى لشخص معين من الشرطة او الشرطة بأكملها لكن دى مجرد شريحة منهم زى كل الوظايف بس مينفعش فى الوظيفة دى بالذات يكون فيه كده
و مع كل ذلك احترم رأى المشرف وتشكر عليه

[ابوهاشم]

انا امبارح كنت واقف فى طابور طويل فى البنزينه
علشان البنزين 80 وقعدت اكثر من نصف ساعه
المفاجئه ان كان قدامى عربيه فيات 125 قديمه
ولما جه دورها واذا بسائقها ينزل يفتح غطاء التانك
واول ماشوفته اندهشت
كان عميد شرطه ولابس ميرى
وقعدت افكر مع نفسى
عميد شرطه وراكب عربيه زى دى وبيمون 80 زينا
وواقف الطابور معانا ومستنى دوره
وكل الاسئله دى ليس لها الا رد واحد
ان ده مثال لراجل محترم ومش ممكن يكون مرتشى
ولا بيتطاول على حقوق غيره
والله كان نفسى انزل احييه واشكره
بس اكيد موقف يخلى الواحد يتأكد ان مش كل اصحاب السلطه
مفسدين ابدا فيهم ناس يستحقو التقدير والاحترام
معلش هو موقف حصل قدام عينيه حبيت احكيلكم عليه