مناقشة هامة..أرجو المشاركة والتعليق !! (وائل عطية)

[وائل عطية]

الحقيقة خلال رحلة بحثي عن سيارة مناسبة أشتريها، كنت في الأول محدد اختياراتي في كام عربية من العربيات اللي نقدر نقول عليها بمفهومنا إنها من الفئات العالية، (الهوندا سيفيك، الأوكتافيا، الميجان، النيسان تيدا ، السوزوكي SX4 ، التيريوس الكاملة، الفورد، السيتروين C4 والبيجو SW) والاختيارات دي كانت في المرتبة الأولى ويليها بالترتيب (الياريس والهوندا سيتي والأوبترا والإلنترا)
ولقيت نفسي محتار جداً مابين المجموعة الأولى والمجموعة التانية، وبدأت أجمع معلومات من مالكي هذه السيارات (وبالمناسبة باشكر كل اللي شاركني التفكير وشرحلي تجربته مع عربيته)
المهم بعد البحث والتشاور (مع إني خلاص كنت أوشكت إني أجيب السيفيك، ) تقلصت الختيارات من المجموعة الأولى إلى:
- ميجان
- السيتروين C4
- النيسان تيدا
- السوزوكي SX4

ومن المجموعة التانية إلى

- ياريس
- أوبترا

دي كانت حيرة الاختيار مابين الفئة العالية (وكنت ميال ليها أكتر) والفئة المتوسطة (من حيث السعر)
نيجي بأة للتنفيذ:
كنت متابع لموضوع الأخ محمود زميلنا في المنتدى عن الميجان بتاعته من أول مااشتراها وباركناله عليها لغاية ماقرر يبيعها بسبب الغلو المُبالغ فيه في قطع غيارها وصيانتها لغاية لما قرأت له الموضع دا:

http://www.nilemotors.net/Forum/viewtopic.php?t=8852

ودا صحاني على حقيقة سعر إعادة البيع للعربيات الغالية، يعني الراجل في شهرين خسر على الأقل 14 ألف جنيه وكمان ماكانش هو المالك الأول ..حاجة تزعل فعلاً !!

كمان لقيت إن المعارض بتحاول بكل قوة وبإغراءات كبيرة جذب رجل الزبون لشراء ماركات غالية لأنها أساساً مش ماشية قوي عندهم .
المهم لقيت نفسي دلوقتي تفكيري مُشتت واتحول بدرجة كبيرة للتفكير في عربية لا تتعدى الـ 70 أو الـ 80 ألف جنيه، حيث أنه بدراسة متأنية لواقع سوق السيارات المصري هاتلاقي إن معظم عربيات الفئة السعرية دي هي اللي محافظة على سعر جيد لإعادة بيعها.
دا تفكيري، ومش عارف أنا كده صح ولا غلظ
أعتقد إن دي قضية هامة لمناقشة أحوال سوق السيارات المصري تعرضت لها على هامش بحثي عن سيارة جديدة
إيه رأي حضراتكم في الكلام دا، وياريت نشوف آراء متحررة من الانحياز لماركات معينة لأني باتكلم في الأساس على مبدأ في الاختيار وليس الاختيار في حد ذاته.

[eng_mkhalaf]

لو يهمك سعر أعادة البيع يبقى خليك فى الانسر 1600
لو مش فارق معاك نص نص يبقى هات نيسان صنى
غير كدة سواء 70-80 الانوس والأفيو والفيرنا غليين على مميزاتهم
السيتى واليارس مش مستريح ليهم نفسيا وخايف منهم الأوبترا غالية علشان النيسان زيها وكسبتها على اللرغم من أنها تقفيل مصرى
أرجو ان أكون أفادك

[إسلام شاهين]

والله يا أستاذ وائل ديه كانت نفس وجهة نظري لما برضخ قررت أشتري عربية ، كانت عاجباني قوي قوي القورد الفوكاس ونفس الكلام بالنسبة لسعر إعادة البيع وبرضه الميجان خفت جدا من موضوع قطع الغيار ثم فكرت في السيفك ( روعه روعه ) لكن عرفت إن سير الكاتينه بتاعها ( مثلا ) ب 1400 جنيه !!!!!!!!!! المهم استقريت والحمد لله على اللانسر زي ما إنت عارف لأسباب كثيرة جدا منها سعر إعادة البيع وقطع الغيار إلخ .

إلا إنني إلا الآن لو عاد بي الزمن لاشتريت السيفك بالذات لاميجان ولا أوكتافيا لأني بصراحه بأعشقها وةمش هيفرق معايا موضوع قطع الغيار ولا سعر إعادة البيع ولا غيره لأني بحبها وعايزها ومش هغيرها .

اللي عايز أوصلهولك إنك بتشتري العربية اللي على كيفك واللي مريحاك وبيني وبينك العربية عند ناس كثير زي الزوجة طالما جبتها خلاص وعمرك ما تفكر في طلاقها إلا لو قدر الله .................. .

تحياتي

ملحوظة :- أنا عشت في السعودية كثير وترسخ جوايا حاجه من عندهم إني يا أركب عربية عربية يعني يا بلاش فأنا عن نفسي كنت مقرر يا ياباني يا إما لأ ولا كوري ولا ماليزي وهندي ولا فرنسي حاجة متعرفش نفسية يعني من جوايا لأن هناك كانت التويوتا الكريسيدا حاجة مش قادر أقولك هيا والكرولا غير الأمريكاني طبعا الذي لا سوق له هنا نظرا لبنزينه المستهلك كثيرا وقطع غياره .

[eng_mkhalaf]

وال وبيني وبينك العربية عند ناس كثير زي الزوجة طالما جبتها خلاص وعمرك ما تفكر في طلاقها إلا لو قدر الله .................. .

أصيل يا أسلام -ربنا يزيدك كمان وكمان

[أبو_حمزة]

ثم فكرت في السيفك ( روعه روعه ) لكن عرفت إن سير الكاتينه بتاعها ( مثلا ) ب 1400 جنيه !!!!!!!!!!

و تفتكر سير الكتينة فى لانسر بكام
اكيد مش اقل من كده بكتير
ده عندى فى موديل 99 بحوالى 1000 طبعا فى التوكيل
الجديدة مش ها يقل عن 1200 يعنى مش فارقة كتير عن سيفيك
الميزه فى لانسر انك ممكن تلاقى بره التوكيل بسعر أقل كتير بس اكيد مش أصلى و الجودة أقل

[وائل عطية]

الحقيقة يا أستاذ إسلام أنا من هواة التغيير وبازهق بسرعة
فخايف أجيب حاجة عالية والزنونة تلعب في دماغي بعد سنة ولا حاجة ألاقي نفسي بايعها وخسران فيها 20 30أو ألف جنيه
لدرجة إن خوفاً من النقطة دي أنا طولت قوي في الاختيار وكمان زوجتي عارفة كويس حتة إني هاغير في أي وقت لذلك ععالة تأكد عليا إني ما أتسرعش ..تصدق إني في أقل من 4 سنوات غيرت 3 عربيات !!

[إسلام شاهين]

الحقيقة يا أستاذ إسلام أنا من هواة التغيير وبازهق بسرعة
فخايف أجيب حاجة عالية والزنونة تلعب في دماغي بعد سنة ولا حاجة ألاقي نفسي بايعها وخسران فيها 20 30أو ألف جنيه
لدرجة إن خوفاً من النقطة دي أنا طولت قوي في الاختيار وكمان زوجتي عارفة كويس حتة إني هاغير في أي وقت لذلك ععالة تأكد عليا إني ما أتسرعش ..تصدق إني في أقل من 4 سنوات غيرت 3 عربيات !!

أنا بقه عكسك خاللللللللللللللللللللللللللللللللللص أنا لست من هواة التغيير أبدا أبدا علشان كده بقه نصيحه متجبش غير الحاجة البياعه اللي متخسرش كثير وإنت كده حصرت نفسك بين حاجتين يا كرولا يا لانسر .

[fahd_628]

رأى مفيش عربية من فئة 130-150 تقدر تبيعها بدون خسارة كبيرة لأنها عربيات تقريبا غير مطلوبة المطلوب فى حدود 80 - 100 لكن اعلى من كدة بيبقى لفئة محدودة من الناس

و راى انت تستقر على عربية من الكويسين الى فى الرينج بتاع السيفيك و الميجان و حتعجبك و ان شاء الله مش حتغيرها و انا رأى ميجان فل اوبشن الى بفتحة سقف فيها كماليات كتيرة تييييييييييييييت :? :? :? :? :? :mrgreen: :mrgreen: :mrgreen:

و حتعجبك ان شاء الله

[sab3aawy]

انا رأييى لو انت مش هتركب حاجة عالية أوى وحيث انك مش ميال للصنى يبقى ماتريكس او لانسر الشكل القديم

لو هتركب فى العالى يبقى سيفيك او فيكترا

[Abdallah]

كلام إسلام شاهين مظبوط, طالما بتحب تغير كتير يبقى لازم تشوف السوق ماشى فيه ايه وممكن تشتغل معاك الزنونة كمان قد ايه علشان متخسرش كتير بمعنى انك ممكن دلوقتى تشترى لانسر شكل قديم وتحب تغير بعد سنة ونصف مثلا تلاقى ان الزيرو بتاعها نزل زى ما حصل قبل كدة وبالتالى سعر عربيتك نزل برضة ودة حصل فى اللانسر بالذات ولكن الكورولا ورغم كرهى للموديل دة منها ولكنها انسب الحلول لأن كورولا مبتلعبش فى الاسعار ودائما بتحاول تثبتها ان مكانتش بترفعها .

[وائل عطية]

انا رأييى لو انت مش هتركب حاجة عالية أوى وحيث انك مش ميال للصنى يبقى ماتريكس او لانسر الشكل القديم

لو هتركب فى العالى يبقى سيفيك او فيكترا

ماينفعش الخبير المثمن والمصفي العربياتي سبعاوي يدخل ويقول " نص كلمة" وخلاص :lol:
فين ياباشا تحليلاتك
وبعدين حكاية إني مش ميال للصني دي ليها سببين عندي أولاً التقفيل المصري بمساوئه وثانياً الاستهلاك المرتفع نسبياً للوقود
ومن الأسباب اللي كانت مخلياني في الأول خالص أفكر فيها إنك إنت ياخالد اشترتها ومقتنع بيها

[Ahmed Anwer]

يا أ / وائل بعد التحية
طبعا مقدرش افيدك تختار ايه بعد الأخوة الخبراء منصحوا حضرتك و هما أكيد أدري
أنا بس هاحكيلك تجربتي الشخصية في قرار شراء سيارة
أنا جبت فيرنا 1600 أتوماتيك ب 74 ألف و العربية ذي الفل الحمد لله
المهم أنا كان باستطاعتي بس بزنقة شوية اوصل لعربية في حدود 90 ألف و كان إختياري ساعتها الأوبترا أو الياريس الأتوماتيك عشان الأتوماتيك أساسي بالنسبة ليا و تحت الضغط الحكومي أكيد حضرتك عارفة تنازلت عن أحلامي و جبت أقل حاجة معقولة أتوماتيك
المهم بعد ما جبتها لمت نفسي و قلت يا أخي هوا الواحد بيجيب عربية كل يوم مكنت تجيب أحسن عربية ممكن تجيبها يا ريتك ما مشيت ورا كلام الحكومة
لحد ما في يوم بعد أقل من شهر ببص علي العربية لقيتها مخبوطة و لا شفت اللي خبطها ولا اعرف اتخبطت إزاي و حسبي الله ونعم الوكيل،، قلت الحمد لله
اهوا لو كان الواحد عصر نفسه عشان يجيب العربية اللي نفسه فيها كان زمانه حزنه و حسرته و خسارته أكبر
المشكلة تقريبا إن بلدنا حلو قوي عليها بالكتير عربية ب 80 أو 90 ألف عشان الشوارع و السواقة الظريفة
طبعا دي وجهة نظر مش أكتر

[eng_mkhalaf]

فعلا مص مش محتاجة عربية غالية - كلة بيؤدى الغرض الفرق بس فى المنظرة - أنا واحد صاحبى جايب صنى EX صالون أوتوماتيك عمل حادثة قريب وكمان مكنش غلطان - العربية كلفتة 25 إلف أصلاح غير أنة رش قايم - يعنى دفع تمن عربية تانية

[أبو_حمزة]

ممكن تسمحوا لى ادخل فى الموضوع و اطلب نصيحة فى نفس السياق
عربيتى لانسر 99 اتوماتيك و عاملة حوالى 130,000 كم والحمد لله حالتها بشهادة الجميع ممتازة باستثناء بعض الخرابيش و الخبطات البسيطة نتيجة الركن فى الشارع
واحد صاحبى زهوق وبيحب يغير و معاه ميجان 2006 أعلى كماليات تحفة فابرقة و لسة فى الضمان و نوى يببيعها عشان يغير
السعر اللى عايزه منى عشان اصحاب 80 (الجديدة حوالى 140)
العربية مزقزقة فى دماغى قوى و عجبانى جدا
بس طبعا اسعار الصيانة و انى لازم اروح للتوكيل هو ده اللى مخوفنى
لانسر زى ما انتو عارفين قطع غيارها فى كل حتة و صنايعية كتير بره التوكيل يفهموا فيها
انصحونى ربنا يبارك لكم

[eng_mkhalaf]

ممكن تسمحوا لى ادخل فى الموضوع و اطلب نصيحة فى نفس السياق
عربيتى لانسر 99 اتوماتيك و عاملة حوالى 130,000 كم والحمد لله حالتها بشهادة الجميع ممتازة باستثناء بعض الخرابيش و الخبطات البسيطة نتيجة الركن فى الشارع
واحد صاحبى زهوق وبيحب يغير و معاه ميجان 2006 أعلى كماليات تحفة فابرقة و لسة فى الضمان و نوى يببيعها عشان يغير
السعر اللى عايزه منى عشان اصحاب 80 (الجديدة حوالى 140)
العربية مزقزقة فى دماغى قوى و عجبانى جدا
بس طبعا اسعار الصيانة و انى لازم اروح للتوكيل هو ده اللى مخوفنى
لانسر زى ما انتو عارفين قطع غيارها فى كل حتة و صنايعية كتير بره التوكيل يفهموا فيها
انصحونى ربنا يبارك لكم)

لو عجباك توكل على الله ومتحمش نفسك - أنت ممكن تركبها شوية وتقلبها كلها توكيل ب15 جنية لأنك مش هتخسر حاجة أنت جايبها فطسانة ودية ميزة توكل على الله صدقنى حتحس بفرق كبير - أركب وأتمتع وعيش وبيع وهكذا هى دية الدنيا