من المهندسين لمدينة نصر

[OlaOsman]

شغلي في المهندسين و الأسبوع اللي جاي هاضطر أروح زدني بصفة شبه يومية عشان الحفلة قربت اوي و عندنا هناك شغل كتير و طبعا لو استلمت العربية الأسبوع ده فإن شاء الله هاروح بيها الأسبوع اللي جاي. حد يعرف طريق تاني غير كوبري 6 أكتوبر أورح عن طريقه من المهندسين لميدان رابعة العدوية؟ أصلي بصراحة مش باحب الكوبري ده خالص خصوصا في المسافات الطويلة دي و فواصله هاتبهدل لي العربية و هي لسه جديدة.

يا ريت اللي يعرف طريق تاني يقول لي، علما بإني هاروح المشوار ده في وقت الذروة، يعني ع الساعة 5 العصر تقريبا.

[WalidAdel]

هوه تقريباً اقصر طريق حيبقي كوبري 6 اكتوبر لحد اخره النزله الشمال مش اللي علطول
و بالنسبه للفواصل الظريفه دي خليكي في الخانه اليمين و امشي براحه علي 50-60 كده حتبقي معقول
الناحيه الشمال هيا اللي بايظه خالص و لازم تقفي علشان تتاخد كويس

[iunknown]

فيه طريق طوييييييييييييييييييييييييل شوية (كرأس الرجاء الصالح مقارنة بقناة السويس)


هتاخدي الدائري من بعد ميدان لبنان المتجه لاسكندرية الزراعي
وتفضلي طايرة بالعربية
كوبري الوراق
تقاطع اسكندرية الزراعي
مدينة السلام
طريق السويس

وتاخدي مخرج الحي العاشر اللي عند اكاديمية الشرطة
وتمشي في ذاكر حسين لأخره
هتبقى في الطيران
تاخديه لحدا طريق النصر هتلاقي مسجد رابعه على يمينك

حوالي 60 كم


اقول لك نصيحة: كوبري اكتوبر مش بطال خالص

[MOHAMED ABD EL SHAFY]

طريق اخر بس اطول سنة واصعب شويه
الكورنيش
كوبرى قصر النيل
الدخول الى ميدان التحرير
ثم ميدان محمد فريد
ثم الى نفق صلاح سالم
ثم على طوووووووووووووول
ثم الدخول يمين من عند الجهاز المركزى ثم على طول
هتلاقى نفسك عند المنصة


كوبرى 15 مايو
ثم الدخول لشارع رمسيس
ثم ميدان محمد فريد
ثم الى نفق صلاح سالم
ثم على طوووووووووووووول
ثم الدخول يمين من عند الجهاز المركزى ثم على طول
هتلاقى نفسك عند المنصة


تخريمة
فى الحالتين الاولتين

بعد نفق صلاح سالم عدم طلوع اول كوبرى واللف يمين من جنبة للدخول للاتوستراد ثم اول يوترن على طول نوصل للمنصة



كوبرى 6 اكتوبر هوا الحل الامثل والاقصر

[MOHAMED ABD EL SHAFY]

فيه طريق طوييييييييييييييييييييييييل شوية (كرأس الرجاء الصالح مقارنة بقناة السويس)


هتاخدي الدائري من بعد ميدان لبنان المتجه لاسكندرية الزراعي
وتفضلي طايرة بالعربية
كوبري الوراق
تقاطع اسكندرية الزراعي
مدينة السلام
طريق السويس

وتاخدي مخرج الحي العاشر اللي عند اكاديمية الشرطة
وتمشي في ذاكر حسين لأخره
هتبقى في الطيران
تاخديه لحدا طريق النصر هتلاقي مسجد رابعه على يمينك

حوالي 60 كم


اقول لك نصيحة: كوبري اكتوبر مش بطال خالص

طريق تانى من الدائرى الى المعادى ثم على طول
التجمع الخامس
زهراء مدينة نصر
متهيالى دا اقصر شوية

[HeMa_LanCeR]

كوبري اكتوووووووووووووووووووبر
انا بموت فيه

[Hassan Khalil]

الطرق كتير يا علا .. بس النفس ..
*طبعا اكتوبر اولهم .. و هو الحل الكثالي .. مع العلم انه بيكون واااااقف تمااااااما في المنطقة من التحرير لغمرة في الوقت اللي بتتكلمي عليه ..
*اما موضوع الطريق الدائري ده ظريف و حلو .. و حتعيش فيه حياتك .. و بعد الحفلة حتخشي علي صيانة الخمسة الاف علطول .. ..بالميت حتعملي في اليوم مش اقل من 130 كم ..
* شبرا .. بما انك شبراوية .. ممكن تطلعي من المهندسين للكورنيش و تاخدي كوبري امبابة او روض الفرج تنزلي الناحية تانية .. علي شبرا علي السواح علي ميدان الحدائق .. تطلعي كوبري الفنجري .. تعدي مترو الانفاق .. تنزلي علي يمينك الكلية الفنية العسكرية و علي شمالك دار المشاه .. تطلعي الكوبري الصغير اللي بعده .. حتعدي صلاح سالم .. تنزلي عند ال رشدان .. و صلتي لجامعة الازهر .. و بعدين رابعة مباشرة ..
* من المهندسين الي ميدان التحرير ... و في ميدان التحرير ..متروحيش علي عبد المنعم رياض .. و لكن ادخلي علي وسط البلد من الشارع اللي قدامك مباشرة .. ( للاسف معرفش اسمه ) و خليكي مع العربيات طوالي لحد ما توصلي لجراج الاوبرا .. ( حتلاقي كل العربيات في التوقيت ده ماشية معاكي ) .. و من هناك انزلي النفق ( نفق الازهر ) تطلعي علي صلاح سالم .. من صلاح سالم لحااااااااااااااااااد شارع الطيران .. تخشي يمين .. مشيتي شوية .. وصلتي رابعة ..
...........
المشكلة مش في الطرق . لكن في التوقيت .. توقيت صعب فعلا .. ربنا يعينك

[Hassan Khalil]

ممكن تدينا فكرة سريعة عن الحفلة يا علا؟؟؟؟

[OlaOsman]

ممكن تدينا فكرة سريعة عن الحفلة يا علا؟؟؟؟

أولا جزاكم الله خيرا جميعا على التفاعل السريع و على نصايحكوا :)

ان شاء الله هاجرب و اقول لكوا انا عملت ايه.

بالنسبة لحفلة زدني - و لو ان مش ده مكانه - فاللي هاقدر أقوله هي انها حفلة سنوية بيعملها فريق زدني بمناسبة ختام النشاط السنوي و السنة دي للسنة التانية على التوالي هاتتعمل في الأزهر بارك و السنة اللي فاتت الحفلة حققت نجاح كبير اوي و فقراتها كانت جديدة جدددددددا.

اما عن تفاصيل الحفلة فأنا نفسي لسه ماعرفهاش.. ممكن يتنوه عنها قريب.. انما عموما الحفلة دي بيستاها محبي زدني من السنة للسنة عشان كل سنة بتبقى مبهرة و بتبقى بالجهود الذاتية لفريق زدني من الألف للياء.

[HeMa_LanCeR]

في طريق جامد قوي
اطلعي كوبري 15 مايو من جامعه الدول
وخليكي لأخره يعني انزلي نزله الوكاله
واطلعي علي شارع رمسيس
وطواااااااااااااااااااااااالي لحد العباسيه وجامع النور
اطلعي كوبري جامع النور وانزلي
وعلي طول الي الاوتوستيراد
الي طريق النصر الي رابعه
والطريق ده انا بمشي فيه لما بكون سايق النقل وبصراحه يعتبر نفس طريق كوبري اكتوبر بالظبط
ولو مش عايزه كوبري 15 مايو كمان قوليلي وانا اوصفلك طريق اجمل

[hotboja]

فى طريق تانى احلة وحد مفضل لية لم بروح مدينة نصر بس طريق صايع


امشى اخر شارع السودان هتلقى الكتكات وبعدين امشى على الكورنيش طريق امبابة هيقبلك الكوبرى الحديد سايبك منة فى كوبرى تانى اطلع علية وخليك ماسك الشمال على شان هنتزال نزلة بتاعة معهد ناصر تقريبا او اسمة نزلة شبراة الخيمة وبعدين فى 3 شارع يمين وفى تخريمة من هناك ابقى اسئل لم توصل هناك بس هى بتاخد وقت 30 دقيقة على شان فى زحمة هناك
انا عرفت اطريق دة من السى تى ا لم كنت رايح سواق السيارات

بس كنا بنتفسح الصرحة

================
تم حذف التوقيع لمخالفته الحجم
وشكرا

الادارة 3

[sab3aawy]

بصى يا ستى

حيث ان عملى فى المهندسين وسكنى فى مدينة نصلا فهديلك كل البدائل المتاحة ومدى صلاحيتها

1- كوبرى اكتوبر من المهندسين الى مدينة نصر، ممتاز فيما عدا من 4 مساء الى 7 مساء

2-كوبرى اكتوبر من المهندسين الى نزلة شارع اول رمسيس(نزلة ميدان التحرير اللى بعد نزله عبد المنعم رياض ب 50 متر فقط قبل مطلع عبد المنعمر رياض، ثم اول يمين بعد النزلة مباشرة فى شارع معروف وحتى الوصول الى طلعت حرب ، نقطع شارع طلعت حرب بالعرض فى اقصر مسافة ممكنة وندخل يسارا فى ممر بهلر(مدخله بعد مخرج شارع معروف بحوالى 50 متر) الى شارع قصر النيل، طوالى حتى ميدان مصطفى كامل، ممكن نكمل طوالى بعد ميدان مصطفى كامل الى نهاية الشارع فيسارا الى ميدان الاوبرا ثم يمينا الى نفق الأزهر، وممكن ندخل يسار فى ميدان مصطفى كامل فى اول يمين شارع عبد الخالق ثروت ثم طوالى الى نفق الأزهر عبر ميدان الأوبرا، بعد الخروج من نفق الأزهر طوالى فى صلاح سالىم الى اى مدخل من مداخل مدينة نصر(ده طرقى المفضل فى معظم الوقت لما بلاقى مطلع كوبى اكتوبر من المهندسين فاضى)

3- من شارع الدقى يسارا فى شارع التحرير حتى ميدان شراتون القاهرة، ثم عبر كوبرى الجلاء الى شارع التحرير بالجزيرة، ثم عبر كوبرى قصر النيل الى ميدان التحرير، من ميدان التحرير ممكن ناخذ شارع طلعت حرب حتى ميدان طلعت حرب ثم يمينا فى شارع قصر النيل ونكمل من شارع قصر النيل كما فى الوصفة رقم 2، او ممكن من شارع طلعت حرب ندخل فى شارع(معرفش اسمه بس هو بيدوى على ميدان باب اللوق، عموما الشارع ده وشارع طلعت حرب هم المخرجين اللى كل الناس اللى خارجة من ميدان التحرير بتخرج منهم، وهو المخرج اللى قبل طلعت حرب مباشرة ودايما بيحصل اشتباك مرورى فى الحتة دى بين العربيات الللى داخلة باب اللوق واللى داخلة طلعت حرب) المهم بنكمل طوالى زى ما احنا، ونعدى ميدان باب اللوق وبعدي ندخل يسار فى شارع محمد فريد وحتى ميدان مصطفى كامل ثم نكمل كما بالوصفة رقم 2

4- ممكن ناخد شارع الدقى الى نهايته وحتى حديقة الأورمان، ثم ندخل يسارا مع سور حديقة الاورمان حتى شارع مراد امام مديرية امن الجيزة، ندخل يمين فى شارع مراد مسافة بسيطة حتى ميدان حديقة الحيوانات، ندخل مع الميدان يمين الى كوبرى الجامعة، طوالى فى الكوبرى الى المنيل، طوالى زى ما احنا مع اتجاه السيارات حتى كوبرى المنيل الصغير امام القصر العينى الفرنساوى،بعد عبور كوبرى المنيل الصغير قدامنا حلين، الحل الاول طوالى زى ما احنا ، نعدى تقاطع شارع القصر العينى ، ونكمل طوالى زى ما احنا، هنلاقى قدامنا كوبرى ابو الريش نطلعه وننزل منه بعد كوبرى ابو الريش نكمل زى ما احنا ماشيين، الطريق هيتحول الى مطلع نكمل معاه لحد ما يخلص وهيلف يمين نلف يمين معاه بدون الدخول فى اى طرق فرعية، نكمل معاه لحد ما نلاقى الطريق خلص ووصلنا لطريق مجرى العيون(مجرى العيون بذات نفسه هيبقى فى وشنا، ناخد شمال مع مجرى العيون ونكمل معاه لحد اشارة المرور، نعدى الاشارة وناخد شمال فى شارع صلاح سالم لحد كوبرى السيدة عائشة ، نطلع الكوبرى وننزله ونكمل مع صلاح سالم لحد ما نخلص منطقة القلعة ونقابل اللى خارجين من نفق الأزهر ونكمل لحد اى مدخل من مداخل مدينة نصر، الحل التانى بعد عبور كوبرىالمنيل الصغير ندخل يمين مع كورنيش النيل لحد ميدان فم الخليج(هنلاقى اول سور مجرى العيون هناك، ندخل شمال ونطلع كوبرى فم الخليج وننزله ونكمل مع طريق مجرى العيون وصلاح سالم وكوبرى السيده عائشة كما بالوصفة اعلاه)(ده طريقى المفضل لما بيكون مطلع كوبرى اكتوبر واقف)

5- الى ميدان لبنان ثم محور 26 يوليو حتى تقاطع الدائرى ، ناخد يمين فى مدخل الدائرى اللى قبل ما نوصل لكوبرى الدائرى المار فوق المحور(اتجاه قليوب وطريق مصر اسكندرية الزراعى)وبعدين بلاد تشلينا وبلاد تحطنا لحد مخرج طريق السويس فى اتجاه مصر الجديدة، ننزل فى طريق السويس لحد تقاطعه مع اوتستراد مدينة نصر(اول كوبرى هنعدى من تحتيه بعد دخولنا فى طريق السويس، وناخد يوتيرن ونرجع وندخل يمين مع منزل الكوبرى الى الاتوتستراد لحد رابعة العدوية، لكن لا انصح بهذا الطريق نهائيا، اولا لأن الداخل فيه مفقود والخارج منه مولود بسبب عربيات النقل، ثانيا لأنه اكتر من 50 كيلومتر، ثالثا لأن وقفة الكماين بتاعته اسوا من وقفة كوبرى اكتوبر مليون مرة

فيه شوية طرق تانية، بس الطرق من 2 لحد 4 هى افضل الحلول

[Ahmed Selim]

بصى يا عُلا

أنتى تطبعى الصفحتين دول وكل يوم تجربى طريق منهم والطريق اللى يعجبك فيهم تبقى تروحى منه السنة الجاية أن شاء الله :) :) :)

بس بجد الرجالة مخلوش طريق ألا وقالولك عليه

أحسنهم من وجهة نظرى اللى بيعدو من خلال نفق الأزهر عشان فى 98% من الوقت النفق مبيبقاش واقف ( الا لو فى حادثة لا قدر الله ) وبعد الطلوع من النفق أي يمين رئيسى هيطلعك على طريق النصر ( المنصة )

[OlaOsman]

ما شاء الله.. و الله ما جصرتوا يا شباب..و الله ما جصرتوا

انا عاجبني أوي طريق مجرى العيون ده.. باحب المكان ده اوي :)

اما طريق كوبري الساحل و معهد ناصر فده عند بيتنا بالظبط.. يعني انا لا مومكن آآآآآآآآبدا و يستحيل أعدي من قدام الشارع اللي فيه بيتنا و ما أروحش

جزاكم الله خيرا جميعا على المساعدة.. فعلا رجالة نايل موتورز أدها و أدود

[OlaOsman]

طيب لو لا مناص من صديقي اللدود كوبري أكتوبر.. آخده منين من المهندسين بس مش من آخر شارع البطل احمد عبد العزيز؟ انا شغلي في ميدان لبنان، هل ليه طريق من كوبري مايو مثلا؟ منين؟ و ازاي؟