جرائم تعود عليها المصريين

[tkamal]

قلبى يبكى عندما كنت اشاهد هذا الموقف المحزن
لم املك غير انى اقوم بتصوير ذلك
على محور 26 يوليو وانا متجة نحو ميدان لبنان فى خطاء هندسى وهو ان الطريق
يضيق قليلا وبالتالى يودى ان حركة السيارات تتراكم فوق بعضها ويحدث
عنق زجاجة نتيجة هذا الضيق
ولكن ان يكون الحل هو ان يكون لصاحب السيارة الانوس الحق فى الطلوع على الرصيف
واستخدام الرصيف حتى يتجاوز زحمة السيارات
طبعا ليس هو الوحيد حيث انى قمت بتصوير اكثر من 5 سيارات فقط ولكن هناك اكثر
ولكن صورة واحدة تكفى لتوضيح الجريمه
تخيلى معى لو هذا الفهلوى فقد السيطرة على السيارة وارتطم بسيارة مقابلة
او الزحمه الى بيعملها الاستاذ علشان هو وغيرة طبعا لازم ينزل من على الرصيف
وبالتالى فهو بيعمل ضغط على عنق الزجاجة الى هو اصلا مهبب بنيله مخنوق لوحدة
وباخد حق الناس الى واقفة فى الطابور السيارات منتظرة المرور
انا مش هقول لو الاستاذ دة فى بلد غير مصر بتحترم القانون كانوا عملوة فية اية

هو الاستاذ دة فهلوى والى احنا اتعودنا على كدة
انا تعبت
طارق
ابو اسلام

[memo_hefnawy]

هو الأستاذ ده معندوش دم و ميعرفش الفرق بين الصح و الغلط ودى مصيبة و أعتقد إنه عارف بس بيعمل عبيط بس طبعا هارجع أقول ده أحد نتائج التسيب و السلبية ...........

هاتقولى سلبية إذاى ؟؟؟ هاقولك لو كل واحد شاف الشخص المتخلف ده بيعمل كده مره أنا أشاورله حارام عليك و مره إنت تقولوا كلمتين فى جنابة و يبص يلاقى الناس كلها بتنظرله فى قرف و إشمئزاز ..... و الأهم إن ولا إنت ولا أنا ننزله من على الرصيف و خليه فوق لبكره والله هايتعلم الأدب ........

هاديك مثال ....... أنا و أنا ماشى متعود دايما لما حد مزنوق أو عايز يعدى بالأدب بعديه ..لكن إللى بيحاول يعدى إستنطاع و فرده ده لو وقف على شعر راسه و شال العربية مش هاسيبه يعدى سواء كان تاكس ..ملاكى ...ولو حتى ميكروب ....طبعاُ فى حالة الأوتوبيس و النقل التقيل مش بقدر أنطق (حكم القوى)

و إللى بيعدى و هو بيحدف أو بيزنق عليه سهوا برده بعديه بس بعد ما أجيبه تانى بعدى و أنا زانق عليه عشان يصحى مش أكثر ..... يعنى بحاول بقدر الإمكان أعود إللى حواليا على الصح و بالظبط ذى إللى طلع على الرصيف ده بيعمل ذيه ناس نفس الحركة فى شارع الثورة فى آخره و إنت خارج على البطل أحمد بيعدوا من المعاكس إللى هو أصلا مقفول و الشارع مكربس ده برده لما ييجى يتزنق أدامى بسيبه مش بعاديه و أخلبه يهوهو حبه عشان يعرف إن الحته إللى عداها دى هاتأخره مش هاتخليه يطلع أسرع ....

[samirpop2]

في ايطاليا مخالفه زي دي ممكن الغرامه توصل ال 1500يورو و احنا في مصر 20 جنيه بتحل الحديد وهي دي مشكلتنا لان لو واحد دفع في مره 1500 جنيه غرامه لايمكن يكررها تاني

[Abdallah]

لا تدع قلبك يبكى يا سيدى والا ظل يبكى طزال العمر فهناك الكثير من امثال هؤلاء ممن يظنون انهم يستطيعوا الحياة كالقرود من شجرة لشجرة ولا حول ولا قوة الا بالله.

[Abonora]

فى هولندا لابد من اجراء اختبار للكحول لان مافيش انسان طبيعى ممكن يتصرف بهذا الشكل --ولو اكتشف انة مخمور تسحب الرخصة لمدة 6 شهور -وان لم تكن المرة الاولى تسحب نهائىولا يحق لة استخراج بديل قبل 3 سنوات ولابد ان يدرس من جديد واجراء امتحان عملى ونظرى وميكانيكا ---وغرامة الف ايورو ويقدم للمحاكمة-وان لم يكن مخمورا --تسحب الرخصة بشكل نهائى ومن اول مرة --بالاضافة للعقوبات الاخرى ---

[mbluethunder]

أنا شوفت الموضوع ده على المحور قبل كده والمصيبه اللي شوفته كانت عربيه أوبل كورسا وأخت فاضله ( مجنونه ) هي اللي كانت متوليه القياده وراكب جنبها طفلين وفي الخلف أربع أشخاص :shock:

المهم الأخت ده لقت المحور أفندى مزنوق . قلتلك ( هو أنا لسه هستنى لما الأفندى ده يفتح ويخلصنا ) راحت واخدالك الرصيف ( طخ طش ) لأن العربيه كانت واطيه وطلعت عليه وعدت كام عربيه قدام

أخوك الغلبان شاف كده موت على نفسي من الغيظ وجتلي ( عقدة أشمعنا ) محنا كلنا في الهوا سوا

المصيبه أن حوالي أربع عربيات عمله كده برده

بعد حوالي م500 لقيتها مزنوقه فوق الرصيف ومش عرفه تنزل :D لأن طبعا كله متغاظ منها

بس بعد كده انا حسيت أن الرصيف بقى طريق عمومي للعربيات وبقى الكل يعدي كده عادي ولا كأن حد شايف حاجه 8)

ونفس منطق ( أشمعنى ) هتلاقي أي واحد هايخالف الكل وراه بدون تفكير

للأسف ده حال وطبيعة شعبنا العزيز

وشكرا

[محمد المرسي]

السادة الأفاضل أنا مش شايف حاجة فى الموضوع بالعكس المفروض ان أحنا واخدين على كدة ...

طبعاً الكل هيسأل أيه الكلام اللى بقوله ده ...؟؟

معلش لكن احنا فى مصر مش فى أوربا ولا احنا دولة متقدمة ... علشان يبقى عندنا طرق كويسة ومخططة تخطيط جيد لتجنب الزحام ولا احنا عندنا تكهين للسيارات القديمة كما يحدث بالخارج...

وعلى ما أظن ان كلنا له مواقف مع سواقين الميكروباصات ما بين خدش أو أكصدام طاير {ربنا يسترها علينا جميعاً} ...

يا سادة نحن فى بلد متخلف من كله وعلى ما أظن أننا أمامنا الكثير حتى نحد من بعض تصرفات التخاف الموجودة ...

ولكم جزيل الشكر ..

[m_elkhishin]

يا سيدي الفاضل دي هينة شوية .... أهي اسمها ماشية في تفس اتجاه السير ولو حد زنفها حتفضل واقفة ومش حتأثر على حد

المصيبة الكبرى لما تبقى ماشي على طريق رايح جاي والطريق يقف وتلاقى واحد قور طلع يمين على التراب وطبعا 20 -30 واحد وراة وواحد اقور منه دخل شمال اللي المفروض انه المقابل وبرده وراه 20-30 عربية وهب الطريق اتقفل ولا حد عارف بفتحه يمين ولا شمال

وحسبي الله ونعم الوكيل

[sokasoon]

انا عندى اقتراح ممكن يتعمل يخلي اى حد يفكر اكتر من مره علشان يطلع فوق الرصيف

ان الرصيف يكون اعلى من كده يعنى يكون مثلا نصف متر بحيث انو يبقا صعب على العربية انها تطلع عليه

وبعدين الرصيف اللى فى الصورة واطى جدااا يعنى تطلع عليه العربية بسهولة مع طبعا خبط وبهدلة للعربية

وواضح على العربية اللى راكبها بايعها ومش محافظ عليها بالبلدى مش همووو العربية المهم انو يعدى ويمشى

[alaaaboelata]

الموضوع دة خطير جدا ياجماعة
المفروض ان احنا هنا عندنا فى مصر كل ماواحد يجى يرخص عربية يصرفولة النمر وعيونو علية عدد 2 امين شرطة يبققو معاه فى العربية علشان المخالفات دى واحد الصبح وواحد بالليل
هو احنا لحد امتى هنفضل كدة ( طالما مفيش ظابط مرور واقف هنا يبقى اعمل اى حاجة حتى لو كانت غلط او خطر ) لا ونرجع تانى نقول عايزن نتقدم و؟؟؟و؟؟؟ طب ازاى وكل حاجة احنا بنتعامل معاها بمنتهى السلبية والتخلف ( انا اسف على التعبير ) بس هى دى الحقيقة .
شكرا

[خالد]

والله حاجة تغيظ فعلاً ، ومنتهى التخلف وقلة الأدب اللى بيحصل فى شوارعنا ده ،
السواقة بقت كأنك داخل حرب أو بتلعب أتارى ، وكل واحد فى البلد دى بيعمل اللى هوه عايزه ،
بس برضه فى حاجة أسمها سلوك الزحام ، يعنى الشخص ممكن يتصرف تصرفات مش كويسة عند الزحام ،
وينعدم لديه الأحساس بالذوق واللطف ، فتجد عند ركوبك متروالأنفاق مثلاً زحمة جداً ، تجد الناس تتزاحم على أى كرسى يفضى، ويزقوا بعض ، بينما فى حالة عدم الزحام والمترو رايق جداً ، وفيه كرسى يفضى ، تلاقى هوه هوه نفس الشخص اللى كان
بيتزاحم على الكرسى ويزق اللى حواليه أصبح لطيف ومهذب جداً بيعزم عليك بالكرسى أنك تقعد ، وهو مايسمى بسلوك الزحام
ونفس الشئ بيحصل فى الشارع عند زحمة الطريق والإختناقات
ولاحول ولاقوة الا بالله

[alaaaboelata]

بس انا فى رأيي ياستاذ خالد ان دة مش مبرر بردة للى ببيحص دة
لأن دة مش بيحصل فى الزحام بس لا دة كمان بيحصل على طول وانا بشوفها بعينى بتحصل بالليل متأخر جدا وبيكون مفيش زحام او بمعنى اصح بتكون البلد شبة فاضية وبعدين دة هنا عندنا فى المنصورة اللى سايق
شكرا

[AlmAhAtmA]

بالاحضان بالاحضان بالاحضان

اكيد عبد الحليم كان يقصد الموقف اللي حضرتك بتحكيه ده
الموضوع ببساطه ان احنا ما عندناش فكره عن اداب و سلوكيات الطريق
انا بسافر اسبوعيا علي طريق مصر-اسكندريه و نفس الموضوع بيتكرر كل مره باركب فيها وصله المحور للدائري
و بشوف السير في عكس الاتجاه علي الصحراوي كمان تفاديا انه يمشي كام كيلو زياده و يلف من المكان الصح
و الاحلي انه بيولع العالي في عينيك زياده في المحبه
يا ريت اعضاء المنتدي يكتبوا عن اداب و سلوكيات الطريق من ناحيه الدين - القياده - الذوق ...الخ
دي اول مشاركه ليه و مش حتكون الاخيره

[AhmedElsayed]

دى حاجة طبيعية جدا على المحور وبصراحة ببقى حطق من الغيظ لانهم لما بيجوا ينزلوا بيعطلونا اكتر وهما جايين من ورانا فطبعا لما يموت اللى قدامى مبرضاش انزله الا لما اعدى انا الاول

والله مرة واحد جرى بسرعة قدامى ونزل من على الرصيف وكنا حنلبس فى بعض ومشى ولا كان فى حاجة
فعلا ساعتها حسيت انى لازم اخبطه من ورا اطيره الشنطة ومش مهم يحصلى ايه انا كمان

الحل مدام اننا سعب متخلف كده انهم يحطوا اليفط العريض اللى بتبقى واخدة الرصيف كلها
واحد كل 50 متر ولا حد حيقدر يطلع فوق زى القرد

[Abonora]

انا كتبت من قبل موضوعين فى المنتدى العام--تحت هذا المسمى واضفت لاحدهم -لفظ التجربة ولفظ الاحساس --وكنت اتحدث عن اداب القيادة واداب الطريق -----وفى الحقيقة انا ارى انة لابد من اضافة مادة جديدة فى المدارس تخص اداب الطريق لان القاعدة هى الاساس--