البوز بيز (قاعدة ارمي بوزك)

[aamin]

1- كان في واحد وحش أو مش متربي أو مش متعلم أو مش فاهم
كان بيحدف أو بيكسر أو بيرمو بوزو على الناس وهو بيسوق
2- وكان في واحد حلو أو متربي أو متعلم أو فاهم
بيسوق صح وبيراعي الناس
3- اتقبلوا الاثنين
والوحش كسر على الحلو وطار
الحلو قرر أن ده بلد زبالة ومينفعش فيها إلا كده
وبدأ يدخل غباوة ويكسر ويرمي بوزو
4- وكان في واحد حلو تاني أو متربي أو متعلم أو فاهم
بيسوق صح وبيراعي الناس
5- اتقبل الحلو (4) مع ال كان حلو (2) وكسر الكان حلو على الحلو
6- الحلو ظن ان الوحش ال كسر عليه ده مش متربي أو مش متعلم أو مش فاهم

الخلاصة:
تعالو نتفق اننا نسوق صح حتى لو قابلنا حد مش بيسوق صح منعملش ذيه بل نحاول نبتسم في وشه ونشاور له ان ده غلط ومينفعش

الدنيا هتتغير لو احنا اتغيرنا، وهتخرب لو احنا عملنا زيهم

[tata12001]

حاولت كتير مع الشعب دة بس بجد شعب ينرفز وبيحاول يخش في أي خرم فاضي ، يعني لو سبت في يمينك حتة فضية حتلائيه بيحاول يزنق نفسه ، وطبعاً كفاية سواقة الميكروباصات منهم لله ،دول باءة مش بوز باز ، دول ارمي عربيتك و اللي يخاف على عربيته يرجع.
بس أوعدك اني بجد أحاول أفضل كويس علشان بفضل الله أنا سوأتي محترمة ، بس المشكلة لزم تبئة سوأتك زبالة علشان تعرف تاخد حقق في البلد دي ، وطبعاً دة مش في السواءة بس ، البلد كلها بايت كدة

[aamin]

هي ده المشكلة
"بس المشكلة لازم تبقى سوأتك زبالة علشان تعرف تاخد حقق في البلد دي"
لو كل واحد فكر كده هتبقى مصر كلها زبالة :-)

[karimone]

النص الكامل للبوز بيز:

/ لو عربيتك كبيره أو قديمه أستخدم المبدأ القانوني : اللي خايف على عربيته يوسع !
ملحوظه : أبعد عن سكة العربيات المخرشمه، بيسوقوا بنظرية ضربوا الاعور على عينه

2/ أستخدم قاعدة البووز بييز booze base : اللي يدخل ببوز عربيته الأول للتقاطع هو صاحب أولوية المرور.. احرص على ان تكون صاحب أول بووز B)
ملحوظه : لا تطبق البوز بييز مع أي لوري أو أتوبيس ، حرصا على بوزك لاموآخذه

3/ الأشارات تكشف نواياك للأعداء أياك ان تستخدمها

4/ لا تترك مسافه للأمان بينك وبين السياره اللى أمامك فهذا له عدة مخاطر
أولا : عربيه تانيه هاتملا الفراغ في ثواني وبرضه ما يبقاش فيه مسافه بينك وبين اللي قدامك، كل اللي كسبته انك اتأخرت لورا شويه
ثانيا : حتدي فرص للعيال يعملوا غرز قدامك
ثالثا :كل المشاه هايغمضوا عنيهم ويعدوا من الحته دي
رابعا : اللي وراك هايقعد يزمر _ لو كان مؤدب _ أو تسمع شوية أسامي حيوانات _ لو كان سواق تاكسي مؤدب _، أو هايخبطك من ورا لو كان سواق ميكروباس _ ودول مافيش حد منهم مؤدب _ .

5/ الأشارات مش معموله عشان تنظيم المرور، معموله عشان شكل القاهرة يبقى متحضر بس !

6/ أعتمد على العساكر( مع تحملك كامل المسؤوليه لو واحد منهم شاورلك تعدي وبلدياته الناحيه التانيه فتح السكه للوري )
أو يفضل ان تستعمل قاعدة البووز بيز مع الحذر ( راجع القاعده 2 )

7/ أذا كنت مش واقف في الصف الأول في الاشاره أعمل حسابك تزمر بشكل متواصل وهستيري أول ما الاشاره تفتح ، لأن الناس اللي قدام بيكونوا واقفين في الأشاره من زمان وجايزجدا يكونوا ناموا !!

8/ معظم الحوادث بتحصل في التقاطعات، أول ما الاشاره تحمر ، كل ما عديت الاشاره أسرع كل ما قلت فرصة انك تتخبط !

9/ الشارع مكان مقرف ، سوق بأسرع مايمكن حتى تتخلص من هذا الهم بسرعة، الناس اللي ماشيين بالراحه دول مرضى نفسيين بيستمتعوا بالعذاب ، يستاهلوا كل اللي يجرى لهم

10/ من حقوقك الدستوريه ان تركن أمام باب المحل الذي تريد ان تشتري منه، أذا سبقك واحد ابن ستين في سبعين وركن قدام الباب فمن حقك ان تقفل عليه وتركن صف تاني أو تالت ومش مهم لو الشارع اتقفل، ايه يعني لما يستنوك 10 دقايق عشان تستمتع سيادتك بحقوقك الدستوريه !!! هي يعني الدنيا طارت ولا كان وراهم الديوان

11/ من حقك ايضا ان تخرج من مكان انتظارك في أي لحظه تشاء ، أكسر الدركسيوون شمال وأطلع ، أي حد ماشىي في الشارع لازم يقف لك فورا ( راجع البند السابق ) B)

12/ احترس من 3 انواع من السائقين بيسوقوا وكأنهم مش ممكن يموتوا :
1 - العيال الروشين اللي بيلعبوا computer games وفاكرين ان ممكن يكسبوا life اكتر لو ساقوا اسرع
2 - موتوسيكلات توصيل الطلبات home delivery :et:
3 - سواقين الميكروباس
ملحوظه : أوعى تحاول تثبت لحد منهم ان فكرته غلط .. فاهمني ؟؟؟

13/ لما تشوف حادثه لازم تهدي وتتفرج – مش مهم تساعد- الحاجات دي دمها اخف من الأ خبار الممله بتاعة التليفزيون ، وبعدين لما الطريق وراك يقف انت كده بتحمي المجتمع من حادثه تانيه

منقول...

[aamin]

انا والله متخيل لو كلنا عملنا كده ايه تصوركم كيف ستكون الحياة؟
سامع واحد بيقول مهيه خربانة اصلا
طب تخيل لو كلنا (الموجودين في المنتدى) معملناش كده، كيف ستكون الحياة؟
هتتحسن ولو 1%
العقل بيقول 1% أفضل من لا شيء.

[ehab_mansour]

بجد شوية نصائح رائعة بمعني الكلمة بارك الله فيك

[aamin]

يا بشمهندس ايهاب لا تسمع لهذه النصائح انا عامل الموضوع ده عشان الناس تبطل مش تتعلم

[شاهين - بنز]

موضوع تحفة وفعلا هو ده الشارع المصري الهمجي ربنا يخلصنا من البلد دي في أسرع وقت ممكن

[ehab_mansour]

يا بشمهندس ايهاب لا تسمع لهذه النصائح انا عامل الموضوع ده عشان الناس تبطل مش تتعلم

بهزر ياباشا والله المستعان

صدقني كله في الأخر محصل بعضه ومش هتاخد غير الي قدره لك ربك ومش هتوصل غير في ميعاد محدد ومقدر وربنا يسلم طريقنا

وجزاكم الله خيرا علي النصيحة

[aamin]

موضوع تحفة وفعلا هو ده الشارع المصري الهمجي ربنا يخلصنا من البلد دي في أسرع وقت ممكن

الهمج مش هينصلحوا لو سبناهم همج أو لو شاركنا معاهم في مهرجان الهمج اليومي

يا جماعة لازم نغير مش بس نتغير

[أشرف فتحى]

الهمج مش هينصلحوا لو سبناهم همج أو لو شاركنا معاهم في مهرجان الهمج اليومي

يا جماعة لازم نغير مش بس نتغير

كلام سليم

[abdalla45]

كان نقصلك بند دستورى وتغطى على ابو العربى
سياره لكل مواطن

[KHALED AYMAN]

اولا انا بحس ان اى سواق بيضايق لو حد عدى من جنبه ليييه مش عارف ؟؟
يعنى يبقى سواق ميكروباص ماشى فى الشمال رايح فى النوم و بيعد الفلوس و يلم الاجره تيجى تعدى من اليمين يقوم و انت جنبه مديك اشاره و داخل و لو تجرأت فتحت بؤك بكلمه يبقى انت متكبر علشان ركبت ملاكى و سورى (لو انت صغير) والدتك جايبالك العربيه ..!!


موضوع رمى البوز ده كان هيموتنى امبارح والله :
انا جاى من اسكندريه و ماشى فى الشمال و فى واحد جاى من على الطريق التانى و عايز يلف و يدخل على طريقى و المسافه مستحيل تجيبه لانى قريب منه جداااااااااااااااااااااااااااا
المعلم قام طالع وواقف ادامى ليييييييه ؟؟
علشان فى ناس جايه من على يمينى !!!!!!
يعنى بيطلع يحجز و خلاص
طبعا انا وقفت على الفرامل واقسم بالله وقفت قبله بكام متر ..
بصراحه معرفتش امسك نفسى و طلعتله من الشباك و شتمته و متكلمش ولا كلمه و فضل ماشى بالراحه بعدها علشان يبعد عنى ..

حد يقولى بقى انا غلط فى ايه و انا سايق علشان اموت بسبب حمار زى ده ..؟؟
و المشكله ان الناس بتعلم بعضها السواقه يعنى الحمار ده هيعلم ابنه مثلا و يطلعه جحش صغير و هكذاااااااااااا....
حسبى الله و نعم الوكيل ..

[samehafez]

ايه ده هو لسة فيه ناس بتعترض علي الهمجية في السواقة ...... غريبة دي انا افتكرت ان كل الناس اتعودت
انا عن نفسي اتعودت ....
نعم اعترف انا ببلطج ..
و رسالة بوجهها لكل بلطجي زيي
-انسي انك تعدي من يميني و خصوصا لو كنت لسة لافف يمين
-انسي انك تيجي من ورايا و تعديني في الحتت اللي الطريق بيضيق فيها و ميعديش غير عربية واحدة ( نظرة واحدة علي جنبين العربية و هتعرف انا مبيهمنيش الحك )
- انسي انك تخرجني من الطريق في الوصلات الاتجاهين عشان جنابك تتخطي اللي قدامك ( و دي رسالة اعتذار لكل قائدي السيارات علي طريق القطامية اول امبارح بالليل عشان اتنرفزت و عرضت بالعربية و وقفت الاتجاهين عشان اربي الانسان اللي كان عاوز يلعب chicken معايا

انا فعلا بحب مصر جدا و بحب السواقة في مصر
حيث التخلص من كل القيود و تفاهات التحضر و الذوق الخ الخ

[Rembrandt]

ايه ده هو لسة فيه ناس بتعترض علي الهمجية في السواقة ...... غريبة دي انا افتكرت ان كل الناس اتعودت
انا عن نفسي اتعودت ....
نعم اعترف انا ببلطج ..
و رسالة بوجهها لكل بلطجي زيي
-انسي انك تعدي من يميني و خصوصا لو كنت لسة لافف يمين
-انسي انك تيجي من ورايا و تعديني في الحتت اللي الطريق بيضيق فيها و ميعديش غير عربية واحدة ( نظرة واحدة علي جنبين العربية و هتعرف انا مبيهمنيش الحك )
- انسي انك تخرجني من الطريق في الوصلات الاتجاهين عشان جنابك تتخطي اللي قدامك ( و دي رسالة اعتذار لكل قائدي السيارات علي طريق القطامية اول امبارح بالليل عشان اتنرفزت و عرضت بالعربية و وقفت الاتجاهين عشان اربي الانسان اللي كان عاوز يلعب chicken معايا

انا فعلا بحب مصر جدا و بحب السواقة في مصر
حيث التخلص من كل القيود و تفاهات التحضر و الذوق الخ الخ

im so proud of u r on the right way keep going