ما رأيكم بمشروع شراء سيارات الحوادث واعادة اصلاحها ثم بيعها مره اخرى؟

[Dr.A.Nabil]

انا سمعت
ان في ناس
بتشتري سيارات الحوادث
مثلا لانسر 2006 ب 20 الف ج
وتصرف انت عليها 20 الف ج
ثم تبيعها مثلا ب 80 الف ج او ب 70 الف ج

تكسب فيها 30 او 40 الف ج

ايه رأيكم في المشروع ده؟؟؟
هل هو مضمون؟؟
ايه عيوبه؟

[Karim_Monir]

مشروع حرام
لان لو اللي بيشتري العربية عرف انها مقلوبة او مركبة نص عمرة ما هاشتريها
وانت كدة بتغشة

[احمدعبدالعزيز]

مشروع حرام
لان لو اللي بيشتري العربية عرف انها مقلوبة او مركبة نص عمرة ما هاشتريها
وانت كدة بتغشة

فعلا حرام جدا دى الواحد لما بيبع العربية فيها جاجة صغيرة بحس انى مش مسامح نفسى

[Islam_galal]

ده غير ان لازم علاقات كبيرة و خبرة في التعامل مع الصنايعيه
لو بعتها و قلت انها متصلحة المكسب حيبقي فرق الخبرة في التعامل مع الصنايعيه و تقدير المصنعيات و أرخص أماكن قطع الغيار و دي كلها علاقات

أما لو كان المكسب من تغفيل الزبون فهو حرام و ما نبت من حرام فالنار أولي به

[mamdouh]

ببساطه حط نفسك مكان الي حيشتري انت حتسامح واحد دفعك 80000 في عربيه مقلوبه من غير ما يعرفك

[Dr.A.Nabil]

فعلا عندكم حق

[dodo002]

مشروع حرام مشروع حرام

[bassam nagy]

ده غير ان لازم علاقات كبيرة و خبرة في التعامل مع الصنايعيه
لو بعتها و قلت انها متصلحة المكسب حيبقي فرق الخبرة في التعامل مع الصنايعيه و تقدير المصنعيات و أرخص أماكن قطع الغيار و دي كلها علاقات

أما لو كان المكسب من تغفيل الزبون فهو حرام و ما نبت من حرام فالنار أولي به

الموضوع دة مربح جدا بس معظم الية شغالين فية بيبعوا العربيات من غير مايقولو تاريخها

[FASTER]

حرااااااااااام

حرام بالثلث ولو عايز تعفي نفسك من حساب ربنا تعمل اللي عليك وتصارح المشتري باللي كان في العربية وتتركله حرية الاختيار طبعا هاينفض يبقي انت تسيبك من الموضوع من اساسه ابعد عن الشبهات يا عم

[hazem_khidr]

انت ممكن تجيبها و تعملها و تركبها انت
و تبقي برضو كسبان

[FLYINGPEUGEOT]

زى ما حززوم قال ممكن تعملها وتركبها انت....انا عن نفسى دى هوايتى المفضله..وهى اخراج الشىء من اللاشىء...مخمخه جامده اوى...بس ماتخرجش عن نطاق الهوايه او المنفعه الشخصيه فقط...

[Ahmad Allawy]

يا سيدي علي المخمخة..
شيء و لا شيء و كلام كبير قوي..
لالالالا احنا مش قدك يا عم انت.. ده كلام كبير قوي :) :) :)

[محمد المشد]

المشروع اذا كان قائم على صراحة فلا حرمة فيه 000 بمعنى انك اذا قمت بأصلاح سيارة وهممت بيعها 000 فعليك ان تبلغ المشترى بأنه السيارة كانت بحادثة مثلاً وتم اصلاحها وله ان يقوم بالكشف عليها لمعرفة اى عيوب قبل البيع واعتقد انك غير مستعد لتحمل هذة المشاق 000 فأصرف نظر عن الامر برمتة لعلك تجد مشروع اخر ترضى به الله ونفسك

[Ahmed Hassan]

ممكن لو العربيه تمنها في اسوق 70 الف مثلا... و انت تشتلري عربيه حوادث و تصلحها تعرضها بـ 50 او 60 الف مع اعلام الشاري بحالتها. في الحاله دي هوه مستفيد فرق السعر و انت مكسبك و بدون حرمانيه باذن الله.

[Ahmad Allawy]

بس طبعا مفيش حد هيجازف انه يركب عربية و هو عارف انها متغيرلها نص مثلا ولا حاجة..
اذا كان اصلا في ناس كتير بتقلق لما تكون عربية متغيرلها موتور.. فما بالك بن شاسيه ولا كده..

انا هاقولكم حاجة.. اللي يوافق انه هو نفسه يعمل الموضوع ده و يأمن انه انه يركب العربية دي
و يجري بيها.. قلبه جامد يعني او واثق قوي في الشغل.. ثليل قوي او نادرا لو لقيت حد يوافق علي كده.. ولا ايه..؟؟
يعني لو انت نفسك وافقت بدون تردد يبقي فكر في المشروع..