تيوتا كورولا 1978 للبيع

[mohamedadelemam]

أسف لو عرضى ضايق حضرتك وربنا يوفقك فى بيعها

[ahmed legend]

ربنا يحسنلك سوقها

[khaled sabry]

فعلا المبلغ اللى حضرتك طالبه ده عالى حبتين

لسه عايزه رش طبعا الدوكو هايخش ف2000 جنيه بالراحه
+ كسوه داخليه لان كسوتها مقطعه وشغل سروجى من 500 الى 1000
+كاوتش لانه بقاله كتير وحضرتك بتقول بتسافر بيها اسيوط ادى كمان 2000 جنيه
+لو فيه شغل فى الميكانيكا والعفشه ودى لوحدها ميزانيه

مافيش زعل ياباشا
بس واحده واحده كده ... حضرتك تانى واحد تقول الفرش المتقطع دى .؟؟؟؟
فين الفرش المتقطع و باين فى انهو صوره ... لو حضرتك تقصد الصوره الاولى فدى نظاره شمس ريبان محطوطه على الكرسى و جنبها فلاش ميمورى - دقق كده و انتا تعرف
لكن الفرش سليم و مافيهوش خدش
- دهان دوكو ايه ده اللى ب 2000 جنيه بالرااحه ؟؟؟ ده انا لما رشيتها السنه اللى فاتت اتكلفت كلها على بعضها 1500 شامله شغل 700 جنيه سمكره - يعنى الدوكو كان ب 800 لوحده
- الكاوتش : هو لما يبقى فيه جوز بقاله سنه يبقى كده قديم ؟؟؟ ولا الجوز التانى اللى بقاله 3 سنين يبقى كده قدم ؟؟ و هل علشان بسافر بيها اسيوط يبقى كده الكاوتش متفرتك - هى دى عربيه فورميلا وان و انا مش واخد بالى !!!!!!1
-افترضت ان فيه شغل ميكانيكا و فى العفشه و افترضت ليه مزانيه كمان ... سبحان الله ماحدش قال كده اصلا
و بالتالى حضرتك جمعت التكاليف الافتراضيه دى و طرحتها من المبلغ اللى انا حاطه ؟؟ متجاهلا انى انا حاطط المبلغ ده على حالتها الحاليه
و انا مش بقول 70 او 50 الف - انا بقول 17 الف فقط فى عربيه تيوتا مش 126 و لا سيات
على العموم ده تقديرى النهائى (Take it all or leave it)

[mohamedadelemam]

بالتوفيق ان شاء الله

[pegpus]

سعيد بمشاركتك و لكن ... حضرتك بتقول ان العربيه محتاجه دوكو و كاوتش و تظبيط فرش و بعض الميكانيكا اى مايوازى يعنى مصاريف 5000 جنيه
كل ده عرفته من الصور ؟؟؟
اولا العربيه مش محتاجه اى مصاريف غير موضوع الدوكو ده - و الطلاء اللى عليها جديد لكن مفقفق فى بعض الاجزاء (معظمها فى السقف ) و بالتالى مش ملحوظه اوى و فيه ناس عادى شغال معاهم زى حلاتى كده
و انا ماكنتش ناوى ارشها اصلا لو ماكنتش حبيعها
يعنى المقصود كل المصاريف اللى ممكن تصرفها على العربيه هى فى موضوع الرش (و ده مش اجبارى) و ده لا يتعدى 1500 جنيه باى حال من الاحوال - جبت منين بقى باقى 5000 جنيه دول
ولو حضرتك عارف الموديل ده كويس حتعرف ان قطع غيارها رخيصه لدرجه ان انتا لو سقط موتور ليها موتورها ب 2500 جنيه يعنى برضه مش حوصل للرقم اللى قولته
و حاله الموتور كما ذكرت جيده جدا والا ماكنتش سافرت اركان مصر بيها
و يتهيألى فيه فرق شاسع بين اللادا و اليابانى ... و ماتنساش اننا بنتكلم عن تيوتا كورولا فياريت تقارن السعر بتاعى بنفس اسعار الطراز ده فى سنين مختلفه

سعيد جداا باهتمامك و لكن غير سعيد بالسعر اللى حضرتك قولته - ده ال 128 بتتباع 12 و 15 و ماينفعشى يتركب فيها تكييف و ماتقدرشى تروح بيها الاسماعيليه مش اسيوط

يعنى العربيه اقصاديه فى البنزين و قطع الغيار و حمارة شغل و قطع غيارها رخيصه و تجد الاصلى بسهوله (مش مضروبه زى قطع الفيات) و مكيفه و اعطالها قليله جدا و سهلة الصيانه
يعنى الاختار الامثل لمن يريد سياره رخيصه ولا يهتم بالشكل - ماعتقدشى انها تستهال اقل من السعر اللى انا حطيته
انا لا اجيد مدح العربيه لأنى انا مش تاجر و لكن ده لاينقص من قيمة السياره
على العموم المسأله تقديريه و شكرا لاهتمامكم

اخى الكريم \ تشرفت بمعرفتك اولا
حضرتك قد تحدثت صدقا ونحن نشرح واقعا باءمانه وهو حقيقه لا نختلقها من الوهم
عزرا ان قلت ان التشقق لاينتج الا فى حالتين \ ان تكون البويه رشت ولم تطهير البطانه بيتنر او يوجد بعض الصداء تحت المعجون \ ثانيا وهى كثرة كمية المعجون بتلك المناطق وهنا يجب ان يعاد السمكره حتى لايتكرر هذا الخطاء وهذه الافاده للمعرفه لااكثر وارتكان المياه فى تلك التشقوقات يسبب الصداء تحت البويه حضرتك قد سبق لى العمل بتلك المجال البويه والسمكره سنين طويله وانا من المنصوره وحضرتك ممكن فعلا تلمها باءقل مما تصورته فليس هناك فرق عند الذى لايفقه شيئا + ندرة وجود لاقدر الله الشبكه والفوانيس الصاج الابواب كبوت اكر ابواب
حضرتك ذكرت ان الكاوتش الخلفى عمره 3 سنوات فيجب تغييره طعبا خصوصا ماشاء الله حضرتك بتسافر بيها كتير سلمك الله ورعاك
عموما اى سياره بيتشيك عليها قبل الاستعمال لمن اراد ان يحافظ على نفسه ويجد الاداء المتوقع من هذه السياره كالعفشه وحالة المتور العامه وللاسف اصبحت العماله شريهه خاصه فى تلك الظروف التى تمر بها البلد

[khaled sabry]

اخى الكريم \ تشرفت بمعرفتك اولا
حضرتك قد تحدثت صدقا ونحن نشرح واقعا باءمانه وهو حقيقه لا نختلقها من الوهم
عزرا ان قلت ان التشقق لاينتج الا فى حالتين \ ان تكون البويه رشت ولم تطهير البطانه بيتنر او يوجد بعض الصداء تحت المعجون \ ثانيا وهى كثرة كمية المعجون بتلك المناطق وهنا يجب ان يعاد السمكره حتى لايتكرر هذا الخطاء وهذه الافاده للمعرفه لااكثر وارتكان المياه فى تلك التشقوقات يسبب الصداء تحت البويه حضرتك قد سبق لى العمل بتلك المجال البويه والسمكره سنين طويله وانا من المنصوره وحضرتك ممكن فعلا تلمها باءقل مما تصورته فليس هناك فرق عند الذى لايفقه شيئا + ندرة وجود لاقدر الله الشبكه والفوانيس الصاج الابواب كبوت اكر ابواب
حضرتك ذكرت ان الكاوتش الخلفى عمره 3 سنوات فيجب تغييره طعبا خصوصا ماشاء الله حضرتك بتسافر بيها كتير سلمك الله ورعاك

انا سعيد اكثر بمعرفت حضرتك
على العموم من كلام حضرتك تقلصت مصاريف العربيه حتى رش دوكو و كاوتش
دوكو و سمكره 1500+ و الكاوتش 600 كمان = 2100 جنيه ... فين باقى 5000 اللى حضرتك قولتهم قبل كده
على العموم اشكرك لتحليل حالة السياره (بدون رؤيتها على الطبيعه) و هذا يدل على فطنه قويه تتمتع بها
ولكنى سوف ابيع السياره على حالتها الحاليه بنفس الرقم الذى ذكرته قبل ذلك

[khaled sabry]

معلشى انا ماختش بالى من اسعار اخى الكريم فى التعليق السابق
بس تعالو كده نحلل الارقام بتاعته

+ كسوه داخليه لان كسوتها مقطعه وشغل سروجى من 500 الى 1000

طبعا خطاء الكسوه الداخليه المقطعه ده سببه نظارة الشمس اللى فوق الكرسى فى الصوره الاولى - انا حصورهالك مخصوص تانى الناهرده لما اروح
بس بفرض ان الفرش مقطع ازاى بقى تقول شغل سروجى من 500 الى 1000 - انا لما ركبت الكسوه خد منى 70 جنيه قول حتبقى 100 - وصلت ل 1000 ازاى ؟؟
و بفرض ان السعر ده شامل ثمن الكسوه
- انظف انواع الكسوه ب 300 جنيه مع التركيب يعنى 400 جنيه -- برضه لسه بعيد اوى على 1000 دى

+كاوتش لانه بقاله كتير وحضرتك بتقول بتسافر بيها اسيوط ادى كمان 2000 جنيه

هو فيه كاوتش ب 2000 جنيه ؟؟؟ جامده دى

بصراحه اانا شايف انك بتبالغ اوى فى الاسعار علشان تقول فى الاخر

يعنى زى ماقالك احد الاعضاء 9000 حلو قوى وممكن توصل ل10000

ماشى لو حضرتك عاوزها على السعر ده قول كده و خلاص زى ماقال احد الاعضاء
لكن ماتخلقشى مصاريف ليها و ماتبالغشى فيها

[pegpus]

اتمنى لحضرتك كل التوفيق وبارك الله لك فى كل ماتملكه يدك
ارجو اخى الكريم الا تفهمنى خطاء هنا منتدى للسيارات وقد اوضحت معنى التشقق للبويه للقارئ العادى ليستفيد من المناقشه بالقدر الذى يفيد لااكثر
ولك منى كل تقدير واحترام

[khaled sabry]

اتمنى لحضرتك كل التوفيق وبارك الله لك فى كل ماتملكه يدك
ارجو اخى الكريم الا تفهمنى خطاء هنا منتدى للسيارات وقد اوضحت معنى التشقق للبويه للقارئ العادى ليستفيد من المناقشه بالقدر الذى يفيد لااكثر
ولك منى كل تقدير واحترام

شكرا على المعلومات القيمه

[wawamoha]

السلام عليكم
باشا من غير عصبيه كده - مش كل الناس زي بعضها انا عارف في ردود مستفزه بس مش كل الردود
وجهه نظري البسيطه من قوايم العربيه و شكل الاكصدامات و الشكل العام العربيه مش متهانه خالص و اعتقد لو الموتور و العفشه سليمه زي ما الاستاذ خالد بيقول يبقى ده سعر كويس - لان مش هاتلاقي عربيه كويسه مكيفه في حدود المبلغ ده

معلش كمان الاساتذه اللي بيقارنوها بال 27 و اللادا ؟؟ المقارنه ظالمه جداا و التويوتا تكسب بالاسم بس

نصيحه لصاحب السياره - طول بالك بس كده و ماتستعجلش ..وربنا يوفقك

شكرا

[aboomar22]

اجمل حاجة ان النقاش بيتم بدون زعل او تجاوز كعادتنا دائما منتدى متحضر واعضاء متميزون بصراحة انا مرة حطيت نفسى مكان صاحب العربية يعنى معقول عربية بحالة جيدة ومكيفة وزجاج كهربى ومجاهزة للسفر واسمع فيها 9 الاف دا حتى مش سعر 128 نفس الموديل وبعدين ارجع احط نفسى مكان المشترى هو انا هدفع 17 فى عربية موديل السبعينات ولو جيت ابيعها مش هتجيب السعر دهلانها مش منتشرة بالشكل الكافى برضه وجه نظر سليمة الخلاصة العربية دى عايزة اللى يقدرها ويكون مبيفكرش فى بيعها هتكون عربية مريحة ومكيفة واقتصادية ولما يحب يبعها مش هيكون مهم تجيب كام ماهو هيكون استعملها كام سنة .على فكرة دى مجرد افكار بتدور فى دماغى ربنا يبارك لك فى عربيتى ويرزقك بخير منها واشكر كل الاعضاء وصاحب الموضوع على سعة الصدر

[khaled sabry]

الف شكر على تشجيعكم ده
و انا ما اتنرفزتش من ردود الاعضاء زى ما حضرتكم متخيلين
لكن اللى نرفذنى هو اسلوب تصيد الاخطاء - يعنى النظاره الشمس لما اتصورت على الكرسى بقى الفرش مقطوع
و بقيت العربيه محتاجه فرش جديد اللى حيجر شغل سروجى من 500 الى 1000 (معرفشى ازاى)- رغم ان كل ده كان ممكن نتجنبه بعد تدقيق النظر لمدة ثانيه اضافيه
ثانيا المبالغه فى بعض الاسعار .. يعنى مين قال ان السروجى بياخد 1000 لتركيب فرش !!!! و لا مين قال ان جوز الكاوتش ب 2000 جنيه و لا مين قال انها عاوزه ميزانيه للعفشه و الميكانيكا !!!!
برضه موضوع المقارنات ماينفعشى - اللى اعرفه ان المقارنه بتم بين عربيات فى نفس الفئه
يعنى قارن تيوتا بهوندا او مازدا ... لكن ماتقرنهاش بمرسيدس و لا تقارنها بلادا او 128

و لو انا حتبع الاسلوب ده اقارنها بعربيه مرسيدس موديل سبعينات برضه بتتباع ب35 الف تقريبا او اقارنها ببيجو 504 و بتتباع فى حدود 25 الف

على فكره الكلام ده لو كان اتقالى فى التليفون (زى بعض الناس المحترمه اللى اتصلت) كنت حقبله عادى
لكن الاسلوب ده بيعمل شوشره و بتوقع العربيه و بيقلق اى حد لسه مالهوش فى العربيات و بيفكر يجيب عربيه يتعلم عليها مثلا

يعنى انا لما اكون غشيم فى العربيات و عاوز اشترى عربيه و الاقى 50 واحد بيفاصلو فى السعر علشان عيوب وهميه فى العربيه
ساعتها حخاف و مش حفكر ان اصلا كل اللى بيتكلم ده ماعينشى العربيه على الطبيعه علشان يقول نص اللى بيقوله و استنتج الكلام ده من خلال شرحى المفصل لحالة العربيه - يعنى انا كمان طلعت غلطان فى شرح حالة العربيه علشان اتجنب القلق ده

حاجه اخيره ... مع شديد احترامى للجميع
انا صاحب العربيه و ادرى واحد بحالتها و قدراتها
و انا اللى بحط السعر على حالتها الحاليه
يعنى ممكن تطلع فى دماغى اعلى السعر ل 100000 الف مثلا - انا حر ياجماعه - كيفى كده (على رأى سوكه فى فيلم ابو على )

و الظاهر فعلا انى غلط لما حطيت السعر اللى شايفه مناسب لها
كان المفروض اعمل زى مابعض الزملاء قالولى و احط 20 الف ... علشان بعد الشد و الجذب تجيب السعر اللى انا عاوزة

[kaity]

السلام عليكم استاذ خالد

واضح ان حضرتك زعلت من تحليلى للعربيه من كلام حضرتك وانى طلعت غشيم (ده على حسب كلام حضرتك)

اولا انا فعلا ما شوفتش النظاره واتخيلت انها قطع كبير بالفرش وده كان السبب فى كل اللى انا قولته لكن لما دققت
فعلا طلعت غلطان فى التقدير بشكل مجمل ....فأنا آسف فعلا...

نيجى للقولته فى مشاركتى وياريتنى ما قولته


1-عايزه رش طبعا الدوكو هايخش ف2000 جنيه بالراحه

هنا انا قولت كده بسبب ان حضرتك قولت المعجون زياده وطقطق وده محتاج انك تشيل البويه خالص والمعجون اللى فيها وتتمعجن من جديد على نضافه ودى ميزانيه مصنعيه لوحدها +بويه نضيفه وفرن...يعنى شغل صح.
انما لو عايزها تتلم ..فعلا ال1500 سمكره ودوكو تتلم بيهم.

2- الكلام على الكسوه وسبق شرحت لحضرتك ان ده سوء تدقيق (العتب على النظر وجل من لا يسهو) ودى انا آسف جدا جدا جدا عليها.

3-الكاوتش طبعا له عمر افتراضى حتى لو ممشيش يعنى مع الوقت بيشقق( وكان قصدى ال4 فرد مش فردتين) ومعاه كمان الاستبن...وده ما فيهوش مبالغه 2000 .. وآسف على التحليل ده برضه.

4-و فيه شغل فى الميكانيكا والعفشه ودى لوحدها ميزانيه....وده تحليل بسبب عمر العربيه .... وده برضه انا آسف لهذا التحليل كان لابد من المعاينه قبل الحكم على الحاله...


وآسف جدا انك زعلت منى....... مع انك وصفتنى فى بعض الردود بالغشيم ... وانا مسامحك فيها.


وآسف جدا انى دخلت قولت رأى اتفهم كله غلط..

ما تزعلش منى احنا اخوات واتمنى تبيعها بعشرين مش ب17000 بس تقبل مرورى

[khaled sabry]

وآسف جدا انك زعلت منى....... مع انك وصفتنى فى بعض الردود بالغشيم ... وانا مسامحك فيها.


وآسف جدا انى دخلت قولت رأى اتفهم كله غلط..

ما تزعلش منى احنا اخوات واتمنى تبيعها بعشرين مش ب17000 بس تقبل مرورى

لا انا اللى اسف جداا وواضح ان حضرتك فهمت ردى غلط فى جزئيه الغشيم دى بالذات

لكن الاسلوب ده بيعمل شوشره و بتوقع العربيه و بيقلق اى حد لسه مالهوش فى العربيات و بيفكر يجيب عربيه يتعلم عليها مثلا

يعنى انا لما اكون غشيم فى العربيات و عاوز اشترى عربيه و الاقى 50 واحد بيفاصلو فى السعر علشان عيوب وهميه فى العربيه
ساعتها حخاف و مش حفكر ان اصلا كل اللى بيتكلم ده ماعينشى العربيه على الطبيعه علشان يقول نص اللى بيقوله و استنتج الكلام ده من خلال شرحى المفصل لحالة العربيه - يعنى انا كمان طلعت غلطان فى شرح حالة العربيه علشان اتجنب القلق ده

المقصود بكلمة الغشيم هو المبتدئ فى عالم السيارات بدون اى خبره و هو ليس حضرتك بالطبع
فتخوفى ان ذلك "الغشيم " يحجم عن شراء العربيه بسبب تحليلك
يعنى انا نفسى شوفت بيعه لسيارة احد الاصدقاء باظت بسبب تلف الكوندسر - و صاحب العربيه يقسم ان المشكله حلها ب 10 جنيه و لكن الزبون الغشيم "المبتدئ" بالغ تقدير حجم التلف فى العربيه و تخيل ان التلف فى الموتور
و اقسم بالله ان كلمة غشيم لم اقصد بها سباب بالاقصد بها وصف الزبون المبدتئ فى عالم السيارات -وهى مرحله كلنا مررنا بها
و اعتذر على عنف الفاظى (صعيدي بقى )

[د.أبونضال]

موفق في البيع وما تستعجلش .... أنا قعدت شهرين أبيع عربيتي اللادا علشان ما انزلش من ثمنها العادل ألف جنية وفي الآخر بعتها زي ما انا عايز واللي أخدها مبسوط بيها الحمد لله وما اشتكاش منها رغم إن أنا شرحت له عيوبها قبل مزاياها