اخيرا قبضت الجمعيه لولولولولولولي .....

[aboyahea]

انا شايف ان حضرتك من الزقازيق الاول اسال فيه ناس شغالة فى الالفا رميو وفيه بتوع قطع غيار جديد واستيراد وكده وبعدين شوف راىء اللى معاهم العربية لو انى شايف انك ممكن تجيب ابيزا او سويفت او اكسيل -- والف مبروك مقدما وتكون وش الخير عليك يارب

الف شكر اولا يا ابوعمر علي اهتمامك .... الصراحه انا مش شوفت الفا في الزقازيق الا 3 مرات ومش عارف اذا كان اصحابهم من الزقازيق ولا لا ... ووجهه نظر حضرتك صحيح 100% ... وكمان الاختيارات بانواع العربيات ديه انا مقدرها بس اناعاوز حاجه تكون عائليه والف شكر ثاني مره لاهتمامك بالموضوع

[aboyahea]

شاهين وممكن كيا برايد والفا روميو على العين والراس بس بيع صعب و قطع غيار مش سهلة

ان شاء الله شاهين .... لان البرايد ضيقه شويه وصغنونه وبين وبينك اخوك مليان حبيتين ,, والف شكر لاهتمامك

[aboyahea]

انت الظاهر ال الفا داخله دماغك جامد
انت اول مره تجيب عربيه متغامرش فى حاجه الميكانيكيه يكرهوك فى اليوم اللى اشتريت فيه العربيه
جرب فى المضمون الاول وبعدين لما يبقى معاك مبلغ كبير جازف براحتك
دى نصيحه لوجه الله

الف شكر يا عادل ونصحتك علي راسي وكلامك سليم والمشكله اني بتخنق بسرعه يعني ممكن لو اتخنقت منها ارميه في اي ترعه واخلص منها ....والف شكر لاهتمام حضرتك

[aboyahea]

لو انت ماكنش معاك عربيات قبل كده ودى اول عربيه ليك يبقى بلاش الالفا علشان دى عربيه رياضيه وبتاعت جرى وكده
انت حاول تجيب حاجه تريحك وماتتعبكش علشان ماتكرهش العربيات ولا تخلى حد يكرهك فيها
دور على حاجه شاهين او بيجو 505 مكيفه او هينداى اكسنت
وربنا يوفقك لما هو فيه خير لك

الف شكر لاهتمامك بالموضوع ... والصراحه ديه اول عربيه ليا بس انا بسوق في الشغل في الصحراء وما ادراك ما الصحراء اي نعم مافهاش زحمه بس فيها رمله ناعمه وما ادارك ما الرمله الناعمه يعني تبقي ماشي في امان الله فجاه تلائيك غرزت ... وانا ما ركبتيش الا civic 2008&mazda3 2008 وطبعا حببتي الtoyota hilux والله لو معايا حقها مش هتردد ثانيه اني اجبها وان شاء الله ربنا يوقعنا في اي عربيه نضيفه

[aboyahea]

الفا روميو من العربيات المحترمه جدا بس كمان من العربيات اللي ملهاش سوق في مصر من العربيات اللي مظهرتش كتير فبالتالي هتلاقي قطع غيارها بصعوبه و اكيد النسبه الأعظم منها استيراد ناهيك عن ان الميكانيكيه هتلافيهم فيها ابيض و هتخش عالم الفتوي من اوسع ابوابه .
طالما دي اول عربيه ليك اول تشتري حاجه سهله و بسيطه كده و متداوله تتمتع بيها و تريحك مش تكرهك في اليوم اللي انت قبضت فيه الجمعيه ؟
موفق للي فيه الخير ان شاء الله

الف شكر يا ابو حميد وانا شيلت فكره الرميو من دماغي وهخليني في الشعبي وربنا يستر والف شكر لاهتمامك

[aboyahea]

انا في مرحلة الشراء زي حضرتك و بدور برضه علي عربية بس نصيحة اخوية انت هتحط كل ما تملك في عربية . يبقي تجيب عربية تصونك و متتعبكش في الصيانة و يوم ما تحب تبيعها تلاقي اللي يشتريها بسهولة . و مبروك مقدما

ربنا يوفقنا يا هيثم في المرحله ديه دا الواحد حاسس انه بيمتحن ثانويه من اول وجديد ... ربنا يسهل ونجيب مجموع ندخل بيه اي صالون جديد وتكون واخده وش نضافه بس اللهم امين