نيو النترا 2007

[mido777]

شكرا يا أستاذ ماجد
الاسباب ليست شخصيه ولا حاجه
انا هشرح لحضرتك الاسباب
-صوت رنه ظهر في الموتور بعد ال5 الاف كيلو روحت التوكيل قالولي ده صوت الموتور كان عالي وظبطه .........المهم توصلت معي نفسي بعد فتره انه البليه بتاعت الدبرياش مش عارف ازاي وهي زيرو.

انا عارف الصوت ده من ايه ؟؟
جوز اختى معاه برضه النترا وحصل نفس الصوت اللى بتقول عليه ده ..ومحدش كان عارف مصدره ايه لغاية لما روحنا التوكيل والمهندس جرب العربية وقالنا ده بلية او الفورش عايز يتنظف بتاع الدبرياج.....
وفعلا الصوت راح نهائى

-العربيه كبيره زياده عن اللزوم وتغلبك في الركنه.
دى عند حق فيها انا كمان معايا النترا بس مشكلة الركنة دية خلصت خالص لما ركبت الباركنج سنسور

6-انها كوري واصبحت لا اثق انها ممكن تفاجئني بمشكله وانا ماشي.
شكلك اتعقد منها - بس صدقنى العربية حلوة
7-في الزحمه اثناء المشي بالعربيه بحس ان الموتور بيتنطط ومش بيقبل علي طول.
لا ده مش بحسه خالص

ااااااااااااااااااااااااا

[mido777]

على فكرة انا كمان فكرت ابيع العربية ؟؟

بس مش علشان اى سبب ميكانيكى فيها ولا حاجة لكن علشان جالى سعر فيها كويس جدا عن طريق صديق وهو 92.000 جنيه

وانا عامل لغاية دلوقتى 11000 كيلو وكنت شاريها ب 92.000 جنيه من التوكيل

[Ahmed Anwer]

استاذ احمد اشكرك لذوقك بس احب اوضحلك حاجة
اكيد لازم شريكك يحصل معاه كدة لانه نزل من عربية وزنها مقرب على 2 طن يركب عربية وزنها طن و100 تقريبا
لازم يحس بالفرق ده طبعا
دكتور عمرو لو عايزني انزل معاك الحرفينن لحد يظبطلك المواضيع دي ماشي بس انا مستحرم تخسر جامد كدة
لو قفلت منها بقي
ربنا يحسنلك بيعها باذن الله

لا والله يا باشمهندس كريم مش مجاملة ،، ده إحترام لحياديتك ،، عشان أنا عارف إنك كنت حاطط الإلنترا في إختيارتك في موضوعك الشهير لما كنت بتشتري ،، و انتا عارف لما حد بيبقي بيختار ما بين كام عربية و يستقر علي عربية و يشتريها ،، بيبتدي يذم جامد في العربيات التانية اللي كان بيختار ما بينها ،، عايز يثبت لنفسه إنه أختار أحسن إختيار بس حضرتك مبتعملش كده ،،

يا ريت تكتبلنا تاني نمرة الفني اللي كنت قلت عليه في موضوع قديم ،، و شغال في غبور و فاتح في الحرفيين ،، خدمة لأخواتك الهيونداويين ،،

[Karim_Monir]

لا والله يا باشمهندس كريم مش مجاملة ،، ده إحترام لحياديتك ،، عشان أنا عارف إنك كنت حاطط الإلنترا في إختيارتك في موضوعك الشهير لما كنت بتشتري ،، و انتا عارف لما حد بيبقي بيختار ما بين كام عربية و يستقر علي عربية و يشتريها ،، بيبتدي يذم جامد في العربيات التانية اللي كان بيختار ما بينها ،، عايز يثبت لنفسه إنه أختار أحسن إختيار بس حضرتك مبتعملش كده ،،

يا ريت تكتبلنا تاني نمرة الفني اللي كنت قلت عليه في موضوع قديم ،، و شغال في غبور و فاتح في الحرفيين ،، خدمة لأخواتك الهيونداويين ،،

الله يعزك
اصلها مساله امانة هاتسال عنها يوم الدين ان كنتنصحت واحد ولا ضليته
وانا اشتركت في المنتدى لنفع الناس مش اضلهم
ورغم اني اخترت الكرولا الا انها ليها مساوئ كتير لا تنكر لكن مميزتها وفيت احتياجاتي تبقي اكتر عربية تناسبني
وياريت كل الناس تفكر كدة
انا لو عايز عربية اجمد في الاداء كنت اختارت سوبارو ولا النترا لكن الاتنين ماوفوش باحتيجاتي زي الكرولا
دي الفكرة

اما عن الفني اسمه وجدي وده دكتور فعلا بس يخاف يشتغل في الالنترا عشان ظبط الكمبيوتر يعني لو اي صيانة عادية يعملها بسهولة
لكن شغل محتاج اجهزة مش هايفيد
وممتاز في الكوري والياباني
اسمه وجدي
تليفونة
0122322817
اي حد يروحلة يقولوة من طرف مهندس كريم وهايقوم بالواجب ان شاء الله
واي حد عايزني انزل معاه معنديش معاه بس يقولي قبلها بكام يوم اظبط حاللي

[ماجد يوسف وهبه]

الى الباشمهندس كريم:

1- أشكرك على المعلومة اللى أنت قلتها عن المساعدين الغاز لأنى كنت فعلا ما أعرفهاش.
2- أنا قصدتش ابدا أن التويوتا الكرولا وحشة اطلاقا بالعكس دى من ضمن العربيات اللى فعلا نفسى أشتريها لولا ثمنها المبالغ فيه جدا من وجهة نظرى. كل اللى قصدى عليه فعلا أنت قلته فى رسالتك الأولى والثانيه أن دكتور عمر خسارة أن يبيع عربيته علشان يجيب ياريس لأنه مش هيحس بفرق تقريبا مع فرق المشاكل طبعا اللى بيقول عليها (انا متوقع كدة وكلامك أكدلى بعد ما حضرتك جربت الألنترا وشهدت انها حلوة)
3- أشكرك جدا على دعوتك للتجربة بس صدقنى الكلام اللى انا قلته سمعتة من مصدرين بعاد عن بعض تماما ويمكن فغلا يكون كلامى غلط.

الى دكتور عمر :
فعلا الهدف من كلامى انى مستخسر انك تبيع العربية على فكرة فى مشكلة فى توكيل غبور انه فاهم جدا جدا فى كل العربيات اللى بيبعها بس احيانا بيطنش اللى ما بزنش عليه أو لازم تجيب واسطه علشان تاخد اللى انت عايزه. فأنا رأيى تخليك وراه لغاية لما تصلح كل المشاكل اللى عندك. لكن لو أنت مصمم برضه الياريس عربية فوق الممتازة.

أنا بعت عربيتى لأنها مانيوال وأنا ظروف شغلى بتخلينى أسوق مش أقل من ساعتين ونص يوميا لذلك رجلى تعبت جدا منها وفى نفس الوقت حسيت انى ممكن بفلوسها أجيب حاجة أتوماتيك أصغر. الغريبه أن بعد ما أستعملتها 15 الف كم وبعد حوالى 7 شهور بعتها بخسارة ألف جنيه فقط من ثمنها (شاريها كانت عاملة 20 الف كم)

[Karim_Monir]

احب اضيف معلومة
ان فعلا كرولا 2001 واحد كان فيها مشاكل كتير وخاصة في الثبات وده اللي عمل في سمعتها كدة
عشان كدة الموديل ده رغم انه اتباع منه كتير الا انه اتغير بعد سنة واحد بس
الموديل 2002 الى 2004 مشاكل اقل وعالجوا موضوع الثبات ده بنسبة 70%
في الموديل 2005 لحد 2007 عالجوة تماما بس المشكلة بعد 140 لما بيكون الكاوتش الصغير ال 14 بوصه
عشان كدة ال 1600 اللي بجنوط 15 مفيهاش المشكلة دي اطلاقا
وعشان كدة غيرة كاوتش وجنوط قبل ما العربية تعمل 3 الالاف كيلو
ده للتوضيح
----------
استاذ عمرو
لو عايزني اجي غبور قليوب وواريهم الوش الوحش بتاع الشبراوية انا تحت امرك وبجد مش عزومة مراكبية
لانهم فعلا ما بنفعش معاهم غير كدة
لاني افتكر كويس قوي زميلة ليا في العمل كان معاها فيرنا 2004 ال 1600 جابتها ايام ما كانت ب 88 الف
وعلبة الشكمان الخلفية باظت وراحت وقالوها برة الضمان دي اتخبطت في الرصيف
قالتهم اللي في النص ماشي لكن ورا صعب
قالولها مالناش دعوة-كلمتني وقالتلي شوفلي بتاع شكمانات ولما عرفت الحوار
روحت معاها قليوب وقلت للمهندس ارفعها ولو لقيت خربوش في العلبة الخلفية هدفع حق الشكمان ادب من جيبي
اترفعت العربية والعلبة سليمة تماما
غيرها وفردة القديمة في بقه لانه لو كان اتكلم كان هايعرف شغلة
اللي قالهولي مهندس وجدي ان لو مهندس الاستقبال غير حاجات في الضمان اكتر من ليمت معين بيتخصم منه بونص جامد جدا
عشان كدة اللي بيسكت بياكلوووة
او لو مش فاهم
لدرجة ان قالولها الكلاكس لما باظ ده من المية (بالذمة ده كلام)
وانا في الكيا من غير ماقولهم الكلاكس وكنت نسيت لقيتهم غيروة بواحد صوتة احلى
توكيل محترم وتوكيل بياكل عملائة
على فكرة انا جاد جدا في عرضي اني اجي معاك بس لو مش هاتبيع العربية
عذرا للاطالة

[ahmedfd]

[quote=karim_monir;136244]الله يعزك
اصلها مساله امانة هاتسال عنها يوم الدين ان كنتنصحت واحد ولا ضليته
وانا اشتركت في المنتدى لنفع الناس مش اضلهم
ورغم اني اخترت الكرولا الا انها ليها مساوئ كتير لا تنكر لكن مميزتها وفيت احتياجاتي تبقي اكتر عربية تناسبني
وياريت كل الناس تفكر كدة
انا لو عايز عربية اجمد في الاداء كنت اختارت سوبارو ولا النترا لكن الاتنين ماوفوش باحتيجاتي زي الكرولا
دي الفكرة

أشكرك على كلامك الذي يدل على إنك إنسان موضوعي و عاقل و محترم و فعلاً لو كل الناس فكرت كدة مش هنشوف أي خناقات على المنتدي.

[dr.amr]

والله يا جدعان انا متشكر ليكوا جدا
والله انا فعلا استفدت كتيير بغض النظر عن اني هبيع ولا لأ
استاذ/كريم منير
انا متشكر جدا لدعوتك للذهاب معايا الي التوكيل
علي فكره انا برضه انتمي جزئيا لشبرا يعني عندي نص شبراوي بما ان والدي من شبرا
من الملك الصالح قريب من بحر الكراكول
انا قمت بالواجب معاهم.......بس تقدر تقول اني اخطأت في الشراء
انا بستعمل العربيه كتير في وسط البلد
ومباسافرش غير مره او اتنين بالكتير اوي
اعتقد ان الف و300 تبقي كافيه اوي
انا مكنتش عايز امكانيات كتيره علي قدر ما انا كنت عايز حاجه تستحمل
بس الهيونداي يظل مابيستحملش اوي.علي فكره العيب في شوارعنا مش
في السيارات.....
ولتاني مره يا استاذ/كريم متشكر وياريت ممكن نتقابل بعيدا عن التوكيل بس لما اجيب
عربيه تانيه ان شاء الله :))

[dr.amr]

السؤال بقي يا جدعان اللي محيرني جدا دلوقتي
انا تقريبا ان شاء الله استقريت علي الياريس
بس رأيكوا مانيوال ولا اتوماتيك
انا اللي مقلقني بس اني مجربتش الاتوماتيك 1300 قبل كده
هل بيفرق؟

[أبو عبدالله]

أظن انه كويس في الياريس الأوتوماتيك

[hh]

صني

ممكن حضرتك تشوف الصني كمان, عربية ياباني سحبها و عفشتها حلوين و تستحمل ان شاء الله

[dr.amr]

بس مشكلة الصني انه مش بياع

[Ahmed Anwer]

واضح إن حضرتك من النوع اللي بتحب تغير كتير ،

يبقي بقه خليك في التويوتا أو الميتسوبيشي ،، في الياباني

[dr.amr]

انا مش بحب التغيير بس انا مش لاقي عربيه ارضتني حتي الان
هي فين بي وانا البد فيها

[tutankhamoun]

انا مش بحب التغيير بس انا مش لاقي عربيه ارضتني حتي الان
هي فين بي وانا البد فيها

هات فيات بونتو ........... و أنت تعشقها ......... أنا عارف أنها حاجة تانية خالص عن كل العربيات اللي موضوع بيتكلم عليها
إنما عربية عملية مليون 100 %