استفسار بخصوص المزاج

[max_ziro]

أولا .. انا زيك .. بسافر كتير .. وبشرب شاى كتير

علشان كده بيكون معايا .. حافظ حرارى للسوائل ( تورموس .. او طورموس .. مش عارف بيتكتب أزاى !!!)

=====

فى حاجة تانية كده بتكون عاملة زى الكوباية وبتكون لها غطا من فوق .. وفتحة صغيرة علشان تشرب منها
ودى من 5 : 20 جنيه .. على حسب المكان اللى أنت هتشتريها منه

ودى فاشلة تماماً .. أولا بتاخد مقدار كوباية واحدة .. ثانيا مش بتحتفظ بالحرارة أكتر من نص ساعة
ثالثا .. مكوناتها الداخلية بلاستيك .. وده غلط على الصحة

فى كوباية تانية .. منها بلاستيك وأخرى أستانلس .. وفيها سلك بتوصله بمخرج الكهرباء الموجود فى العربية
ودى وظيفتها أنها بتدفى السائل فقط .. يعنى لو فيها شاى بارد .. تدفيه علشان تشربه

النوع الأخير .. واللى أنا دايخ عليه ... على الرغم من ناس كتير بتقولى أنه موجود .. بس محدش قادر يفيدنى على المكان اللى بتتباع فيه

عبارة عن كوباية زى السابقة .. استانلس .. فيها سلك بيتوصل بمخرج الكهرباء بتاع العربية .. وبتسخن الماء لحد الغليان

يعنى تقعد فى عربيتك .. وتعيش حياتك يا معلم .. لا كافيتريا ولا قهوة

ممكن تسأل فى التوفيقية .. أو فى محل كبير فى القاهرة بتاع أدوات كهربائية والكترونيات فى وسط البلد
(مش عارف اسمه دلوقتى .. معلش انا مش من القاهرة .. فى ناس قالولى أن ممكن ألاقيه فيه)

ولو لقيت النوع الأخير ده .. ياريت تبعت لى رسالة خاصة

وبالتوفيق

موجودة يا باشا فى بورسعيد ب الهبل و جبتها ب 12 جنية
و شوفت منها فى التوفيقية و مش فاكر كانت بكام ..
ربنا معاك

[aly_hosny]

في براد بيشتغل على الولاعة على طول من غير مخرج كهربا ولا حاجة
هو عيبة انه بياخد وقت شوية على ما يسخن المياه
وانا شوفته عند بتوع الادوات المنزلية ال جمبنا

[ana]

موجود البراد اللى بيشتغل على ولاعه العربيه (اخترعوه يعنى) وانا جايب واحد بس من السعوديه مش من هنا بس معرفش بقى بيتباع هنا ولا لا كان عامل 80 ريال السنه اللى فاتت ممكن تخلى حد يجبهولك لو ليك حد فى الخليج

[misoalex]

يا جماع الموضوع بتاع السوئل السخنه ده غلط لو حاجه اتقلبت حتتلخم و تبوظ الدنيا وممكن تتسب لاقدر الله فى حادثه
الاحسن تركن وتريح شويه نفسك من المجهود والتركيذ وتشرب اى حاجه انت عاوزها

[m.aligamal]

متشكر يباشا عالرد هوا فعلا الواحد بيركن ويعمل كوب الشاى و يشرب وبعدين يسوق بمزاجه انا سالت عشان الواحد بيبقى نفسه يشرب حاجه و بيخاف بالذات بليل ينزل يلاقى صيع على كافيه ولا حاجه عشان كده الواحد يبقى حر نفسه

[misoalex]

عندك حق
انا بس حبيت الفت نظرك لحاجه صغيره بس مهمه
وربنا يسترها معانا كلنا

[M.Mohsen_Saleh]

يا جماعة انتو نسيتوا حاجة مهمة في موضوع تحويل الكهرباء لل 220
أولا دينامو معظم عربياتنا ميقدرش يطلع أكتر من 900 وات في أحسن أحواله.
ثانيا محول الكهرباء ده تمنه غالي سعر الوات بجنيه يعني ال 300 وات ب 300 جنيه و غير كده كفاءته مش 100 % يعني مش هيديك ال 300 وات بمعنى لو وصلتله جهاز 300 وات مش هيشتغل كويس و ممكن يتحرق.
بالنسبة لسخان الشاي، أقل سخان في السوق 1200 وات يعني مش هتقدر تشغله في عربيتك.
هتقوللي فيه محولات 1200 وات، أيوه بس دول مش لعربيات سيدان، لعربيات سفاري و كده بيبقى فيها دينامو كبير.

أنا شايف ان الأحسن تبعد عن سخانات الكهرباء عموما في العربية حتى لو على ولاعة العربية عشان لو حصل قافلة فيه هتخرب الدنيا. الأجهزة ديه صيني معندهومش فكرة عن التأمين.

[m.aligamal]

شكرا يا جماعه بعد قراءه مستفيضه و متابعه لجميع الاراء قررت انى اخد ترومس و خلاص و ابعد كل البعد عن براد كهربائى يعمل على ولاعه السياره لعدم جدواه

[batviser]

عندى سؤال ....
هو انفرتر Inverter ده اشتريه منين ؟؟؟؟
يا ريت حد يحدد مكان بعينه مش "عند اى محل اكسسوار عربيات" مثلا ...
شكرا جزيلا ...

[M!NA]

من الآخر...أفضل حل للموضوع ده هو السبرتاية... ب20 جنيه... و براد ب15 جنيه... و كل

فين و فين لما هتحتاج تفولها بالسبرتو (الإزازة ب3 جنيه و نص)

بس يكون معاك صفيحة علشان تسد الهوا و انتا بتعمل الشاي....

و ممكن كمان تجيب كنكة و شوية بن... (دا لو انتا غاوي قهوة) و هينفعوك جامد جدا في السفر الطويل لو حبيت تصحصح....

العدة ديه معايا بقالها 3 سنين في عربيتي... و فعلا هي أنسب حل... لأصحاب المزاج... :)

[zaza_lanos]

على فكرة انا شوفت ماج رحلات
بيشتغل على ولاعة العربية
الكلام ده من سنة وكان فى الحنين مش غالى

[ابوهاشم]

انا شوفت الماج ده فى كارفور
هو عباره عن غلايه على شكل وحجم الماج
والفيشه بتاعته تركب عادى فى ولاعة العربيه
بدون اى وسيط وسعره كان 35جنيه
وانا ان شاء الله ناوى اشتريه
بس الافضل طبعا انك تستخدمه غلايه فقط
ويكون معاك ماج عادى تصب وتشرب فيه
علشان سهولة تغيير نوع المشروب حسب الرغبه

[kasten]

هوا الفكره يباشا فى البراد ان فى اى وقت ممكن تعمل الى انتا عايزه ده لو عايز كابتشينو كمان يعنى موضوع كويس ويسلى الواحد فى سفره منا عندى التورمس فى البيت وياخد عشر كوبايات ومع ذلك مش عارف ليه مش مقتنع بيه يمكن عشان ماضى عليه فى القائمه فخايف يتكسر مثلا اخش فى كلابوش عشان كده انا بدور على براد

ههههههههههههههههههههههههههههه
انت فكرتنى بالمثل : اللى ميخفش من المدام ميبقاش راجل

[m.aligamal]

الى يخاف من البعبع يطلعله
اؤيدك فى مثل
للى ميخفش من المدام ميبقاش راجل

[Michael_Lanos]

انا شوفت البراد اللي بيشتغل على الولاعه بيتباع قبل كده
بس مش فاكر فين