احدث جهاز انذار

[Adham]

مش عارف اصور العلبة بتاعه الانذار علشان لسة ماشحنتش بطاريات الكاميرا ممكن بكرة بالليل بقى :arrow:

بس عامة العلبة هي لونها اصفر و بصراحه هي شبة علب البسكويت او الشمعدان اللي بنشترية من السوبر ماركت اللي بيبقا فيها 24 او 36 باكو

ولونها بالضبط شوربة العدس :D

و مكتوب عليها الماركة ريتش دراجون

[Adham]

أية يا جماعه من ساعه مانا حطيت صورة ريموت الانذار حسب طلبكم و محدش علق اي تعليق لا بالسلب و لا بالايجاب

هل الريموت شكلة معقول او كويس او رديء و للا اية

عالعموم اسمعوا بقى اخر الاخبار

الانذار طلع عينيا في العيد زي ماسبق و قلت انة كان بيقطع اثناء التركيب و الفني قعد يحرك الفيشة علشان الانذار يلقط

المهم تاني يوم الانذار يظهر مع المشي و المطبات اتهز تاني

لقيتة عمل زي الاول
فصل و مش عاوز يشتغل من الريموت
قعدت اهز الفيشة و احركها علشان يلقط لقيتة عمال يفتح في السنتر و يتكتك (نتيجه انة بيدي اشارة فتح للسنتر مرات متلاحقة) زي المترليوز

الهم شلت الفيشة و ركبتها و حركتها لغاية ما لقط و قفلت العربية بالريموت و طلعت البيت :( الكلام دة يوم الوقفة بالليل

الصبح ( اول يوم العيد) نزلت بافتح بالريموت ما فتحش :?

فتحت بالمفتاح

أدور العربية ما بتدورش

البطارية نايمة خالص (ميتة)

ملحوظة : البطارية دي 70 أمبير جافة جديدة جايبها من عدة شهور و زي الفل

المهم خدت اللانسر و لفيت لغاية ماربنا كرمني و لقيت واحد بتاع اكسسوار فاتح (ماهو كلة قافل بقى عيد) اشتريت كابلات توصيل و رجعت وصلت افرونتيرا باللانسر و برضة مش عايزة تدور (الكابلات رفيعه قوي و مش مدية امبير كفاية) اضطريت ازود بنزين و استنى لغاية مالبطارية شحنت شوية و دورت العربية

رحت مشواري و لما رجعت فصلت الانذار

بس بالليل قعدت اضبط في الفيشة لغاية ما لقط كويس و قفلت العربية و طلعت, طبعا ماكنتش عاوز اسيب العربية مش متأمنة بالذات الجو هادي في العيد و مش عاوزها تتسرق

الصبح تاني نفس الفيلم بالضبط مع اختلاف ان البواب اتصل بيا عالأنتركم و قاللي و هوة بيغسل العربية سامع صوت تكتكة في الباب
طبعا انا عرفت اللي فيها و نزلت الحق ادور قبل مالبطارية تنام
بس على مين لقيت البطارية ماتت تاني :x
و دورتها برضة بعد ربع ساعه شحن عاللانسر
و فكيت فيش الانذار خالص و شلت الموديول في شنطة العربية

امبارح كلمت الراجل بتاع سنتر منعم عالموبايل (اللي انا اتصلت بية و بعتللي الانذار بالبريد السريع مع التحصيل) و قولتلة قعد يقوللي انة مش ممكن و انة مركب مئات الاجهزة ماحصلش ان حد اشتكى الشكوى دي
المهم بعد ضغط مني اتفقنا ان انا ابعتلة الموديول بس بالبريد السريع على اسكندرية يجربة بنفسة و يشوف و لو لقاة فعلا معيوب يبعتلي موديول تاني بالبريد السريع

رحت بعد الشغل امبارح للفني اللي انا باتعامل معاه و قلتلة قاللي ان اكيد فية دراي في لحمات الانذار او الفيشة فيها عيب او سلك الهم انا ماكانش عندي استعداد اسيب العربية من غير انذار اسبوع او اكتر لغاية مالجهاز يتبعت اسكندرية و يتجرب و يرجع تاني (إذا رجع)

المهم الفني (وهو فني كويس انا اعرفة من اكتر من 10 او 12 سنة) قعد يجرب و يختبر في السلوك و ينضف الفيشة و البنات
و في الاخر قاللي لأ لازم افتح الانذار اكيد فية لحام فاكك او Dry طبعا انا ماكنتش مرتاح للموضوع بس مش عاوز اسيب العربية من غير انذار اسبوع زي ما قلت

المهم الفني فتح الانذار و عاد على كل لحامات البوردة بالكامل (كل اللحامات اللي في اللوحه من جوة)

و لقى ان فردة السنتر بتاع باب السواق اتحرقت من كتر ما شتغلت طول الليل في عملية فتح متواصل (لغاية مالبطارية نامت) و اشتريت فردة غيرها و ركبها

و الانذار اشتغل كويس الحمد لله

بس بصراحه انا قرفت تماما من الانذار دة و الفيلم المأساوي الدراماتيكي اللي عشتة على مدار ايام

غير الشكل العبيط بتاع الريموت بتاعه

اللي عاوز يجيب الانذار دة يا جماعه يفكر ألف مرة :roll:

ملحوظة: الإنذار دة كدة مكلفني بتركيبة و تمن مكنتين سنتر (باللي اتحرقت) + وحدة رفع للزجاج الامامي اكتر من 520 جنية

و في الاخر ضيع وقت كتير و عكل مشاكل كتير و انا مش مبسوط :x

[Adham]

ابتديت افكر ان الموضوع كان صوري وفية ناحية اعلانية و دعائية للمنتج

[hatem_badawe]

يعني نجيب انذار العادي افضل ال sub zero

الي بيتركب علي السنتر من غير ريموت

[hatem_badawe]

مثل اسلام شاهين

[ابوحميد]

الاخ العزيز ادهم معلش مرديتش من بدرى لانى ليا فترة طويلة مدخلتش المنتدى ولما دخلت امبارح مقريتش الرد بتاعك
انا اللى شفته فى الصورة انه شكل الريموت كويس مش وحش
بس بصراحة انت خوفتنى منه
وكنت عاوز اسالك هل دا عيب فردى يعنى حالة فردية اللى حصلت معاك ولا اصلا الريموت دا تعبان
؟؟؟؟؟؟؟؟؟؟؟؟؟؟؟؟؟؟؟؟

[Kisho]

انا بعت جبته و ركبته و مافيهوش اى مشاكل غير بس ان المدى بتاعه مش زى ما قيل عنه المدى عادى جدا

[Adham]

يعني نجيب انذار العادي افضل ال sub zero

الي بيتركب علي السنتر من غير ريموت

مش فاهم يعني اية الانذار يركب عالسنتر من غير ريموت

متهيألي ان قصدك بيركب عالريموت الاصلي بتاع العربية اللي بيفتح السنتر, بس عربيات قليلة قوي اللي فيها

و انا باقول ان الانذار دة و حش من حيث الصناعه و مراقبة الجودة

يعني جودتة منخفضة و مشاكلة حاتبقى كتيرة و انا طلع عيني معاه إعادة لحامات لغاية ما اشتغل

و ان شكل ريموتة عبيط

بس

لكن فين 200 نوع انذار تاني كويسين في السوق

و ممكن شخص تاني يعجبة شكل الريموت اللي مش عاجبني

ويمكن برضة انا بس اللي حظي وحش و وقع من نصيبي الانذار البايظ دة

بس لا شك ان سرينة الانذار دة ضعيفة قوي و صوتها عبيط كمان (السرينة اللي بتدي ست نغمات مختلفة و را بعض اللي العيال بيركبوها في البيسكلتات)

و ان الريموت مداة عادي جدا

بيشتغل معايا من البلاكونة في الدور التامن و العربية تحتها بس لو انا دخلت للأوضة اللي ورا البلاكونة ب 3 متر الانذار مش بيلقط من الريموت

ولكم حرية الاختيار

[Adham]

الاخ العزيز ادهم معلش مرديتش من بدرى لانى ليا فترة طويلة مدخلتش المنتدى ولما دخلت امبارح مقريتش الرد بتاعك
انا اللى شفته فى الصورة انه شكل الريموت كويس مش وحش
بس بصراحة انت خوفتنى منه
وكنت عاوز اسالك هل دا عيب فردى يعنى حالة فردية اللى حصلت معاك ولا اصلا الريموت دا تعبان
؟؟؟؟؟؟؟؟؟؟؟؟؟؟؟؟؟؟؟؟

لا ياباشا مش قصدي عليك ياريس بس اصل الحوار كان سخن و فجأة من أول مانا حطيت صورة الريموت و لقيت محدش بيرد و لا بيعلق تاني

ياباشا الريموت مش وحش بس شكلة عبيط بجد شبة الموبايلات اللعبة بتاعه العيال
و مقارنة بالانذارات اللي في السوق فية 100 ريموت شكلهم حلو جدا جداا و محترمين و منهم اللي فية مفتاح العربية يجنن و شيك مووووت و منهم اللي رقيق و صغير و اسود ببرواز نيكل شيـــــــــــك بجد

بس زي ما قلت في الرد السابق الانذار جودتة منخفضة و كواليتي كونترول زبالة و اعتقد انة اكيد صيني مش كوري و لا نيلة و حتت ستيكر ملزوق ميد ان كوريا مش حكاية
و السرينة زبالة

و مدى الريموت عادي جدا

وبس

و لولا اختلفت الاذواق لبارت السلع

[Adham]

انا بعت جبته و ركبته و مافيهوش اى مشاكل غير بس ان المدى بتاعه مش زى ما قيل عنه المدى عادى جدا

طيب والسارينة صوتها قوي وللا ضعيف ؟؟ وهل هي نغمة كويسة وللا العبيطة بتاعه العجل؟؟؟

[Karim_Monir]

استاذ ادهم وضاح ان قرفتك كانت مش مظبوطة معاه
انا ومهندس محمد علاء بعتنا جبناه من اسكنرية وركبناه عن فني كويس قوي اعرف وشاطر موووت
الاتنين شغالين تمام
مكان الانتنة بتاعتة لازم تكون قريبة من السقف ولمبتة بتنور الصالون كلة ازاي ضعيفة
انا حاسس ان كل مشاكلك من الفني اللي ركبلك مع احترامي ليه
الجهاز كويس ومداه زي الفل وبيلقط من اودة النوم وانا في السلادس وغرف النوم مش عالشارع
اغبي ما فيه فعلا شكل الريموت بس انا اتغاضيت عنة عشان تمنة
300 جنية !!!!!!
ده اللي زية في دمشق ب 750 جنية عشان الريموت شكلة حلو شوية
لو مش مصدقني تقدر اشوفك في اي مكان واويهولك ولو جيتلي عن شغلي هاورهولك وهو راكب في الكرولا بتاعتي والبكانتو بتاعت محمد علاء

معلش بقي نصيبك كدة

[Adham]

استاذ ادهم وضاح ان قرفتك كانت مش مظبوطة معاه
انا ومهندس محمد علاء بعتنا جبناه من اسكنرية وركبناه عن فني كويس قوي اعرف وشاطر موووت
الاتنين شغالين تمام
مكان الانتنة بتاعتة لازم تكون قريبة من السقف ولمبتة بتنور الصالون كلة ازاي ضعيفة
انا حاسس ان كل مشاكلك من الفني اللي ركبلك مع احترامي ليه
الجهاز كويس ومداه زي الفل وبيلقط من اودة النوم وانا في السلادس وغرف النوم مش عالشارع
اغبي ما فيه فعلا شكل الريموت بس انا اتغاضيت عنة عشان تمنة
300 جنية !!!!!!
ده اللي زية في دمشق ب 750 جنية عشان الريموت شكلة حلو شوية
لو مش مصدقني تقدر اشوفك في اي مكان واويهولك ولو جيتلي عن شغلي هاورهولك وهو راكب في الكرولا بتاعتي والبكانتو بتاعت محمد علاء

معلش بقي نصيبك كدة

طيب ياباشا انا معاك ان موضوع اللحامات ممكن دة قرفتي مش تمام او على بختي خد خبطة في الشحن, بس خللي بالك ان الفني بتاعه ركب الجهاز تمام و عالج العيب بإعادة اللحمات يبقى الفني كويس و محترف كمان و زي ما قلتلك الفني دة انا اعرفة من يمكن 12 سنة و ركبللي انذارات و سناتر و كاسيتات و غيرة و غيرة و هو عندة محل كويس في مدينة نصر يعني مش بيتعلم, يبقى اكيد انا بختي جة في انذار معيوب او اتخبطت الكرتونة خبطة جامدة في الشحن, و برضة تبقى قرفتي كدة

طيب انت موافقني ان الريموت شكلة عبيط ماختلفناش

بس انت ماقلتش رأيك ياباشا في السرينة هل هي عالية و نغمه كويسة وللا زي مانا قلت؟؟؟؟ أفيدني أفادك الله

و بالنسبة لللمبة نورها ياباشا اقرب لل Black light (Ultra Violet) I اللي هو مش بيبان من على مسافة 10 متر اصلا

[Karim_Monir]

معلش موضوع السرينة ده انا عندي سرينة كدة من ريموت شايلة من زمان قوي صوتها مميز وبعرف انها عربيتي منها
السارينة عشان كدة ما ركبتش سارينتهم بس السارينة مش مشكلة ممكن تجيبلك اتخن سارينة ب 20 جنية

اما النور فهو فعلا جامد
بس لازم تركب الانتة فوق خلف الشماسة بتاعتك على الازاز وتخليها بالعرض
هاتلاقي المدى احسن ونور السارينة اقوي

[Adham]

انا فعلا عاوز اشتري سرينة كويسة, فية صوت سارينة مححد عاجبني و عاوز اجيب زية بس المشكلة اني باعرفة لما أسمعه بس استحالة طبعا اوصفة

حاحاول ابقى أسأل اللي مركبة نوعها او نوع الانذار اية, هو نغمة عادية بس التون نفسها رخيمة و رزينة كدة يعني :D

بس الكتالوج بيقوللك ركب الانتا بالطول موازي للقايم و يكون بينة و بين القايم من 5-10 سم

انت حاطط الأنتنا في الشماسة بالعرض !!!

[Karim_Monir]

السرينة لما تشوف عربية مشغلاها اطلب من صاحب العربية تفتح الكبوت وتشوف شكلها وتنزل تجيب زيها
انا فعلا مركبه بالعرض واداني مدى احسن خاصة من فوق من الشقة ولما بكون في اي مكان ارفع ايدي يلقط فورا غير لما يكون بالطول يخبط في العربيات
الموضوع ده انا مجربة من ايام الانذار الوولف ابو شاشة تو واي برضه ودي كانت احسن نتيجة