نيسان صنى ولا هيونداى النترا الجديده؟

[hh]

للموضوعية!!!!!!!!!!!!!

يا ريت تضع الموضوع في منتدى نيسان عشان تعرف اراء أصحابها. رأي الشخصي النيسان تكسب بمراحل لعدة أسباب. أولا و ثانيا صني يابانييييييييييييي. مينفعش أساوي بين الياباني و الكوري عشان ال Options و الا بنفس المنطق تروح تشتري اسبرانزا!!!!!!!!(مع احترامي لأصحابها). تالثا الشكل ده أزواق يعني ناس كتير مش بتحب شكل النترا الجديدة و بعدين شكل الصني فخم جدا و حتى الموديل الجديد مش حينزل مصر غير في 2009 و هو فيه اختلافات بسيطة مش شكل مختلف خالص زي هيونداي ما عملت في النترا. يعني اللي أشتري النترا القديمة فوجئ بعد سنتين أنها بقت شكل أثري. أخيرا تستطيع أن تقارن بين موديلات نيسان و هيونداي القديمة لتري حالة السياراتين مع الاستخدام الطويل و التي قطعا تصب في صالح نيسان وتؤثر في سعر أعادة البيع.

[sab3aawy]

اسمحولى اضيف كام نقطة فى الموضوع ده باعتبارى من مستخدمى الصنى واتيحت لى فرصة تجربة كل العربيات الهيونداى تقريبا

1-اولا تعليقا على كلام الأخ اللى قال ان الصنى موديل 1995 فانا بس حابب اوضح ان الشكل الحالى للصنى اوله 2002 بقاعدة عجلات جديدة تماما كما ان المحرك المستخدم فيها والمسمى Qg16DE برضه مصمم فى بداية الالفية ومستخدم فى موديلات نسيان ما بعد 2000 فى العالم كله، يعنى مش بنتكلم على تحفة ولا عربية اثرية لكن عربية بتكنولوجيا يابانية تعود الى 5 سنوات ومضت وهو بالمناسبة نفس حال اللانسر شكل 2003-2007 بدون زيادة ولا نقصان ،

2- ثانيا، الميزة الاساسية اللى انت بتاخدها لما بتشترى عربية فيها power train يابانى (power train يقصد بها المحرك وآلات الجر) انك بتشترى محرك طيع وخدوم وهادئ وطويل العمر، انا جربت عربيات هيونداى ودايوعمرها 5 سنوات فاكثر، صحيح ان المحرك يؤدى وظيفته بكفائة لكن صوته يعلو ويخشن ويصبح مختلف بشكل واضح عن محركات الماركات اليابانية التى تحتفظ بنفس جودة ونعومة الأداء لدرجة اننى عندما كنت اجرب سيارات يابانية يملكها اصدقاء معتدلين فى القيادة وقد قطعت مسافات تزيد كثيرا عن ال150 ألف كيلومتر افرق بصعوبة بين اداءها واداء الزيرو والكلام ينطبق على تويوتا وميتسوبيشى ونيسان ، فى حي ان الفرق فى النعومة كان يكون واضحا جدا مع هيونداى او دايو عاملة اكثر من 50 الف

فلو انك زى حالاتى من النوع الذى يقدر المحرك الناعم الطيع الذى يحافظ على جودة اداءه اطول فترة ممكنة فاظن ان الصنى ستكون مبتغاك ، وهى الميزة الاساسية التى اراها للصنى عن الإلانترا، اما لو ان شكل وكماليات الإلانترا لها عندك اعتبار اكبر يبقى خليلك فى الحاجة اللى مريحاك نفسيا ، لأن مش معنى كلامى ان الإلانترا وحشة لكن انا بس اقصد انك هتحس انها اختلفت شوية عن طبعها وهى جديدة وفقدت شئ من رونقها بعد فترة قصيرة

[Kisho]

انا بس عاوز اصحح معلوماتين

اولا الالانترا الشكل السابق بدايه انتاجه سنه 2000 يعنى من 6 سنين مش من سنتين
اما بالنسبه للتغيير الجذرى للشكل فا ده سياسه كل الشركات حتى مرسيدس و كون ان الصانى لسه بتنتج بنفس الشكل فده مش شطاره دى بسبب ان مصنع مصر هو الى لسه بينتج موديل تقريبا 2000 زى بالضبط ما الهيونداى الاكسنت فضلت تتأفل فى مصر لغايه مش عارف 2006 تقريبا و هى فى الحقيقه بطلت من سنه 1999

ثانيا سعر اعاده بيع الهيونداى احسن من النيسان

[hh]

ليس هجوما

الاخ Kisho أنا لا أهاجم شكل الالنترا و لكن كما قلت من قبل هي أزواق. أنا رأي الشخصي أن الصني أحلى و ده ما يقللش من الالنترا. و بعدين زي ما قال م.سبعاوي شكل الصني من عام 2002 و لم يتغير في الخارج الا 2008 وهو الشكل الذي سيتأخر نزوله مصر حتى 2009 مش 5 سنين زي غبور. و التغيير في الشكل بسيط و ليس جوهري يعني لو اشتريت النهاردة مش حتحس بعد سنتين أن عربيتك أثرية. و ده برده رأي شخصي. لكن ما لا يستطيع أحد انكاره هو كفاءة سيارات نيسان و أعتماديتها الممتازة.
أما مسألة أعادة البيع فهناك خلط بين سهولة أعادة البيع الذي قد يكون لصالح سيارات هيونداي و سعر أعادة البيع الذي يعتمد على حالة السيارة و سمعة الماركة و الموديل.

[ahmedfd]

مع إحترامي لجميع الإخوة الأعزاء لكن يا جماعة موضوع كوري و ياباني محدش بيقولها في الدنيا كلها غيرنا إحنا بس و بعدين مش معقول نقول بالمطلق إن الياباني أحسن من الكوري و إلا الـ Azera اللي مكسرة الدنيا برة نقول مثلاً إن الكورولا أحسن منها.
ممكن بكل بساطة نشوف الـ Reviews عن الإلنترا في أمريكا و العالم كله و حتلاقوا بالنسبة للمحرك كمثال و ليس حصراً إن الإلنترا محركها من المحركات القليلة المؤهلة لتتوافق مع قوانين البيئة الصارمة في ولاية كاليفورنيا خلال الفترة القادمة و يطلق عليه PZEV أو partial zero emission vehicle، فبالتأكيد هي مش محركات ضعيفة تفوت بعد 50000كم بالإضافة لوجود تكنولوجيا الـ CVVT أو constatnt variable valve timing الذي يعطي أداء مرتفع للمحرك مع إستهلاك منخفض للوقود.
و السيارة حاصلة على معدلات سلامة مرتفعة جداً و حجمها الداخلي يصل لـ 114 قدم مكعب أي أكثر من السيفيك و الكورولا و اللانسر و السنترا (السنترا على فكرة هي موديل نيسان المقابل للصاني في أمريكا كما أفادنا مشكوراً الأخ سبعاوي سابقاً و هو موديل ناجح جداً أيضاً) و هذا الحجم يضعها في مصاف السيارات الـ mid size و ليس ال compact مثلا نظرائها.
الإلنترا بها تكنولوجيا الـ EPS أو Electric Power Steering أي أن دعم الدريكسيون أو الباور بمحرك كهربائي منفصل و ليس النظام الهيدروليكي المعتاد، و هو نظام حديث يجعل الدريكسيون مثل الهواء في خفته حتى أن في أحد المنتديات الأجنبية كانت هذه شكوى من السيارة لإن الناس مش واخدة على هذه الخفة.
بالطبع الصاني سيارة ممتازة و لا خلاف عليها و الأخ سبعاوي كلامه عن تجربة و لكن ما دفعني للمشاركة الحقيقة هو موضوع الياباني و الكوري اللي أعذرني يا أخ سبعاوي لا أتفق معاك فيه.
المفروض يا جماعة اللي يدفع فلوس في سيارة يبحث عن أحدث موديل و أحدث تكنولوجيا و أحدث شكل (دي أذواق طبعاً) و إلا كنا قلنا نستورد بيجو 504 من نيجريا (لسة بتنتج هناك لحد إنهاردة) لإن بالنظر كدة في شوارعنا المكسرة فهي عايشة من 38 سنة و شغالة تاكسي و سفر بين المحافظات و في الأقاليم و الصعيد و تشوفها في الشارع زي العروسة و تتباع إنهاردة بـ 40 و 50 ألف و بدون زعل تدوب وراها كل الياباني و لا أعتقد إن في سيارة ياباني واحدة مشية في مصر موديل 1970.
و شكراً لسعة صدركم.

[Ahmed Anwer]

مع إحترامي لجميع الإخوة الأعزاء لكن يا جماعة موضوع كوري و ياباني محدش بيقولها في الدنيا كلها غيرنا إحنا بس و بعدين مش معقول نقول بالمطلق إن الياباني أحسن من الكوري و إلا الـ Azera اللي مكسرة الدنيا برة نقول مثلاً إن الكورولا أحسن منها.

اسمحلي بقه أنا اختلف مع حضرتك رغم إني ممكن تعتبرني من المعسكر الكوري لو صح التعبير ،،

غطس كده في الإنترنت و حضرتك هتشوفهم بيقولوا ايه علي هيونداي تحديدا تاريخيا ،، من أول Garbage on wheels و البطة القبيحة لحد يوم ما بيكرموها يقولوا عليها بادجت كار أو Cheep & cheerful

و ده تاريخيا ،، لكن تقييمات الجودة الحالية بتحط الكوري علي نفس الدرجة مع الياباني ،، و هيونداي دلوقتي في تقييم jdpower سابقة نيسان و سوبارو و سوزوكي و ميتسوبيشي ،، ده غير قائمة الجوائز اللي عربيات هيونداي واخداها



بس لما نتكلم علي فلوس هتدفع يبقي تقييمات الإنترنت مش هتنفعني ،، ينفعني رأي السوق و العربيات اللي شايفها قدامي ،، و التاريخ عشان أكون في المضمون أكتر ،، بمعني أكثر لو عربيتين عجبني بنفس الدرجة واحدة ياباني و واحدة كوري ،، يبقي أختار الياباني أو لو الإثنين بنفس السعر و الإمكانيات

لكن أنا متفق مع حضرتك إن ده عنصر من ضمن كذا عنصر ،، ميبقاش هوا العنصر الوحيد ،، مثلآ أنا بخش علي منتديات سعودية و دلوقتي هيونداي هناك الثانية بعد تويوتا و تقرأ أحلي كلام عليها و وجهة نظرهم التالي :_

1- الياباني سعره سرقة و مبالغ فيه ،، بثمن الكورولا اجيب سوناتا و بثمن الكامري اجيب ازيرا يعني باخد امكانيات اعلي.

2- علي أسوأ الظروف و تاريخيا ، الكوري بيعيش خمس سنين من غير مشاكل كبيرة و دي فترة مناسبة لواحد بيشتري عربية زيرو ،،


فعشان كده أنا متفق مع حضرتك إن الناس في المنتدي بتبالغ بسذاجة في حتة ياباني و كوري،، ده لو قيسنا علي التاريخ اللي مش ممتاز للكوري ،،

فما بالك لو طلع فعلآ إن الدنيا اتغيرت و هيونداي اتطورت و جودتها فعلآ بقت زي الياباني ( علي حسب التقارير) و ممكن احسن من بعض ماركاته

،، ده كده يبقي إختيار عبقري ،، و مش لازم نقعد ثلاثين سنة عقبال منكتشف إن الكوري تطور زي ما قعدنا ثلاثين سنة عقبال مكتشفنا إن الياباني كويس ،، في حين الناس كانت في الخليج مهيصة تكييف وباور و نعومة و إعتمادية من الثمانينات و إحنا هنا عايشين مع الفيات ،، و عقبال ما نكتشف كده يكون الكوري خد اسمه و بقي غالي جدا هوا كمان ( و ده اللي بيحصل حاليا كل شوية الكوري سعره بيزيد )

[Nile_Storm]

متفق مع احمد جدا

[yahyanaabil]

انا رأى الصنى لو حضرتك ناوى تطول بالعربيه وميهمكش الاوبشنز الزياده اللى فى العربيه ولسبب اخر ان العربيات اليابانىمعمره لمده اطول من الكورى وانا اقصد من معمره مش الموتور بس انا افصد العربيه كلها
انا مره ركبت لانسر بطه كانت تقريبا موديل 94 وبعدين ركبت عربيه اختى لانوس موديل 2004 واكتشفت ان الدايو ديه مش عربيه اساسا
انما لو حضرتك حتغير العربيه بعد 4 او 5 سنين مثلا فانا ارشح الالنترا بقوه لانها فيها اوبشنز اعلى من الصنى
______
،، ده كده يبقي إختيار عبقري ،، و مش لازم نقعد ثلاثين سنة عقبال منكتشف إن الكوري تطور زي ما قعدنا ثلاثين سنة عقبال مكتشفنا إن الياباني كويس ،، في حين الناس كانت في الخليج مهيصة تكييف وباور و نعومة و إعتمادية من الثمانينات و إحنا هنا عايشين مع الفيات ،، و عقبال ما نكتشف كده يكون الكوري خد اسمه و بقي غالي جدا هوا كمان ( و ده اللي بيحصل حاليا كل شوية الكوري سعره بيزيد )
_____
احنا اكتشفنا اليابانى بعد 30 سنه انه حلو لانه مكنش موجود اساسايعنى حضرتك قبل سنه 90 مكنتش حتلاقى معرض بيبع بابانى اساسا او نادر ما كنت حتلاقيه فى السوق
مثلا والدى كان راكب فى الامارات سنه 1988 مازدا 929 وكان فيها كل الكماليات اللى ممكن تتخيلها بس لما نزل سنه 93 اشترى شاهين

[Ahmed Anwer]

انا مره ركبت لانسر بطه كانت تقريبا موديل 94 وبعدين ركبت عربيه اختى لانوس موديل 2004 واكتشفت ان الدايو ديه مش عربيه اساسا

ما هيا دي المشكلة حضرتك ،، الكوري بالنسبة لنا اللانوس و الإكسنت و الفيرنا و دي عربيات صغيرة Sub-compact

و أدائها كده طبيعي جدا ، عربيات صغيرة للمدن و السفر البسيط و أول فئة في العربيات ،، كل المطلوب منها إنها توصلك من هنا لهنا بأقل تكاليف

و إحنا بنقارنها بالكورولا و اللانسر و الصني ،، عربية فئة أكبر Compact فطبيعي جدا المقارنة تبقي لصالحها ،،

لكن لو قارنت اللانوس و الإكسنت بالتيرسيل و الإيكو و النيسان مارش ، هتبقي المقارنة منطقية ،،

زي واحد صاحبي كان عنده اكسنت 1500 و ربنا وسع عليه و جاب لانسر 1600 كاملة ،، بيقولي فرق كبير ،، طب ما ده طبيعي فئة أكبر و عربية اقوي و أحدث ،،

و العكس صحيح واحد قريبي كان عنده نوبيرا ،، و باعها و قال اشتري ياباني اللي بنفس السعر ،، ساعتها كان الإيكو ،، و ندم اشد الندم ،، كان حاسس إنها عربية لعبة بالنسبة للنوبيرا ،، و خسر فيها كتير ،،

[Kisho]

انا مره ركبت لانسر بطه كانت تقريبا موديل 94 وبعدين ركبت عربيه اختى لانوس موديل 2004 واكتشفت ان الدايو ديه مش عربيه اساسا

مقارنه غير سليمه كما ذكر الاستاذ احمد انور فى مضمون حديثه نظرا لاختلاف الشرائح
اللانسر فى شريحه غير اللانوس

[Kisho]

و بعدين زي ما قال م.سبعاوي شكل الصني من عام 2002 و لم يتغير في الخارج الا 2008 وهو الشكل الذي سيتأخر نزوله مصر حتى 2009 .

انا بس نفسى اعرف فين بتتصنع العربيه الصنى بتاعتنا لحد 2007 غير فى مصر
لأن المواقع الرسميه لنيسان مش جايبه سيره الموديل ده خالص

[ahmedfd]

ما هيا دي المشكلة حضرتك ،، الكوري بالنسبة لنا اللانوس و الإكسنت و الفيرنا و دي عربيات صغيرة Sub-compact

و أدائها كده طبيعي جدا ، عربيات صغيرة للمدن و السفر البسيط و أول فئة في العربيات ،، كل المطلوب منها إنها توصلك من هنا لهنا بأقل تكاليف

و إحنا بنقارنها بالكورولا و اللانسر و الصني ،، عربية فئة أكبر Compact فطبيعي جدا المقارنة تبقي لصالحها ،،

لكن لو قارنت اللانوس و الإكسنت بالتيرسيل و الإيكو و النيسان مارش ، هتبقي المقارنة منطقية ،،

زي واحد صاحبي كان عنده اكسنت 1500 و ربنا وسع عليه و جاب لانسر 1600 كاملة ،، بيقولي فرق كبير ،، طب ما ده طبيعي فئة أكبر و عربية اقوي و أحدث ،،

و العكس صحيح واحد قريبي كان عنده نوبيرا ،، و باعها و قال اشتري ياباني اللي بنفس السعر ،، ساعتها كان الإيكو ،، و ندم اشد الندم ،، كان حاسس إنها عربية لعبة بالنسبة للنوبيرا ،، و خسر فيها كتير ،،

أتفق معاك 100 % و ده يرجعنا لمشكلتنا إننا بنحكم بالمطلق و دة يا جماعة كلام مش سليم.

[ahmedfd]

معلش يا جماعة هو الموضوع شكله إتقفل خلاص بس لقيت الينك دة من موقع هيونداي أمريكا و فيه مواصفات العربية و رداً على أخونا سبعاوي في موضوع الـ power train لو بصيتوا تحت شوية حتلاقوا إن هيونداي بتدي ضمان على الـ power train بتاع الإلنترا.
100 ألف ميل يعني حوالي 160 ألف كيلومتر أو 10 سنوات.

http://www.hyundainews.com/Media_Kits/2008_Models/Elantra/Features.asp

و خارج الموضوع لو بصيتوا على بقية المواصفات حتلاقوا إن الإلنترا اللي بتجيلنا مصر تقريباً فاضية من الكماليات و يبدو إن دي سياسة غبور علشان يلعب في منطقة لوحده بعيد عن اللانسر و الكورولا و السيفيك، لإن حتى أعلى إلانترا موجودة في مصر اللي هيا تقريبا ـ بـ 125 ألف مفيهاش معظم الكماليات المتوفرة في السيارة الـ full option بصحيح.
إنا أعتقد إنه لو حط نفس الكماليات الموجودة في الكورولا و اللانسر و السيفيك الجداد حتلاقوا إن السعر تقريباً قريب من بعض، يعني بصوا على الينا ده و قولولي رأيكوا

http://www.cars.com/go/compare/modelCompare.jsp?myids=9113,9660,8970,9736

طبعاً سيبكوا من السوباروا الـ WRX لإنها 304 حصان بس أنا الحقيقة معرفتش أشيلها من المقارنة و أعتقد إن السيفيك الغالية اللي بـ 29 ألف دي الهايبريد، لكن ممكن تشوفوا إنهم كلهم قريبين من بعض.
و شكراً ...

[Ahmed Anwer]

حضرتك فعلآ ،،

هيونداي بتدي أعلي ضمان في أمريكا ،،

بس ده سببه إنها بتحاول تكسب ثقة الناس في سيارتها ،، اسباب تسويقية

[ahmedfd]

أيوة حضرتك بس خد بالك إن أكيد الأرقام دي مش من فراغ - أكيد دة عن ثقة في جودة سياراتهم و إلا هيونداي تفلس بعد سنتين لو الناس طالبت بحقها في الضمان لو حصلت مشكلة قبل 160 ألف كيلو أو 10 سنوات.