نوبيرا2003 وللا لانسر99

[rona]

محتارة جدا محتاجة عربية ضروري لظروف شغلي فالقاهرة وسكني فالشيخ زايد وامكانياتي فحدود 55000 وعايزة عربية ما افكرش اعمل فيها حاجة قبل سنتين ع الأقل نصحوني كتير باللانسر او النوبيرا بس حقيقي محتارة جدااااااااا ياريت لو تقولولي رأيكم بسرعة اي عربية منهم تتحمل المشوار يوميا وتكون مريحة وتكاليفها ومصاريفها أقل

[ihab]

اولا اهلا بيكى عضوة معانا فى المنتدى
ثانيا بالنسبة لموضوع العربية فانتى موضحتيش الاتى:
1 - هل انت اتعملت السواقة و لا لسه حاتتعملى
2 - هل انتى عايزاها مستعملة و لا ممكن تدفعى ال 55 الف مقدم و تقسطى الباقى
3 - انتى عايزاها مانيوال و لا اوتوماتيك
لو انت فعلا بتقارنى بين الاثنين دول بس انا رأيى الشخصى خليك فى اللانسر 98 -99 لو مانيوال
بس المهم انك تكشفى على الرعبية كويس و ما يكونش ملعوب فيها كثير ( فابريقة بالكامل على قدر الامكان + كيلومتر قليل + شاسيه من تحت سليم + كبس موتور كويس )
و ربنا يوفقك

[sherif_84]

أولا أهلا بيك معانا فى نايل موتورز
ثانيا أنا من رأيى نوبيرا طبعا أكبر وأقوى وأريح من الانسر لكن فى نقطة مهمة
انت بتقولى ان شغلك فى القاهرة وسكنك فى الشيخ زايد والنقطة دى فى صالح الانسر عشان 1300 واستهلاكها للبنزين أقل من النوبيرا لأن النوبيرا 1600 فانت لو حاطة فى اعتبارك استهلاك البنزين فالانسر تبقى أفضل عشان 1300 واستهلاكها حلو فى البنزين لكن يعيبها عن النوبيرا :
أضيق وأخف يعنى مش ثابتة زى النوبيرا بعد 120 كم وموتورها أقل قوة من النوبيرا
وفى نقطة كمان من حيث أسعار قطع الغيار طبعا معروف ان اليابانى أسعاره أغلى من الكورى فكذلك الوضع بين الانسر والنوبيرا حيث ان النوبيرا قطع غيارها أرخص من الانسر
لكن الاتنين قطع غيارهم ممتازين ومعمرين
لو مش حاطة فى اعتبارك نقطة استهلاك البنزين وعايزة عربية قوية ومريحة يبقى النوبيــرا
الخلاصة:
العربيتين كويسين وممتازين وانا أرشحلك نوبيرا

[MMamdouh]

احنا بنتكلم فى مستعمل يبقى لازم تتوقعى انك حتصلحى حاجات فى العربية فى اى ةقت... و بالتالى العربية الافضل هى العربية اللى حالتها احسن بغض النظر عن الموديل و النوع

العربيتين عامين كام الف؟
النوبيرا مانيوال ولا عادة؟
العيوب الموجودة فى كل عربية؟ (حاجات عايزة تتصلح و البائع قالك عليها)
مطلوب فى كل واحدة كام؟
سواقتك كويسة ولا لا؟ (النوبيرا عربية كبيرة و ممكن تكون صعبة شوية عليكى)

MMamdouh

[rona]

اشكركم على سرعة ردكم واحب اوضح للجميع نقطتين اولا انا كان معايا عربية طلعت رووووووووووووووحي واخيرا بعتها وللأسف كرهتني فالسواقة فكنت باعتمد على زوجي فمعظم المشاوير ودي حاجة مش عملية خالص.
الحاجة التانية اني كنت كويسة فالسواقة بس من سنة ما سوقتش خالص يعني هاجيب من الأول . كمان العربيات اللي بادور فيها ولقيت سعرها كاش مناسب لانسر99 اوتوماتيك ب55 الف ونوبيرا 2002 56 الف لحد 58 حسب الحالة واوتوماتيك

[rona]

سؤال كمان من فضلكم العربية بتعمل متوسط كام الف كيلو فالسنة لو استعمال معقول وبالنسبة لحالة اي عربية انا ان شاء الله مش هشتري غير لما ارفعها في التوكيل واخد عنها ريبورت

[MMamdouh]

بلاش نوبيرا اوتوماتك...خ لليكى فى المانوال

النوبيرا اكبر من اللانسر فا ممكن تكون اصعب فى السواقة لكن متورها اقوى و حتستحمل المشورة و التكيييف لكن طبعا على حساب البنزين

اللانسر قطع غيارها غالية مقارنة بالنوبيرا او الدايو عموما بس النوبيرا ليها مشكلتين كدة مقرفين شوية ممكن تواجهى واحدة بس منهم لو سواقتك كويسة

فكرتى فى لانوس؟؟

MMamdouh

[rona]

ايهاب حضرت معك لانسر ممكن تقوللي هي مانيوال وللا اوتوماتيك وياريت كمان لو تقولي عيوبها للعلم

[rona]

لا للأسف مافكرتش في اللانوس باحس انها واطية شوية وبصراحة ما ركبتهاش قبل كده مش عارفة هلل هي واسعة وهارد ووركر وللا لأ

[MMamdouh]

سؤال كمان من فضلكم العربية بتعمل متوسط كام الف كيلو فالسنة لو استعمال معقول وبالنسبة لحالة اي عربية انا ان شاء الله مش هشتري غير لما ارفعها في التوكيل واخد عنها ريبورت

بتختلف... فيه ناس بتقول 10000 فى السنة بس الموضوع مش كيلوات بس

ممكن ال 10000 دول اتعملوا على طريق سريعو اللى سايق حاطت خامس و مريح الموتورو بالتالى ال 10000 دول مبيهروش الموتور

و ممكن واحد سواقته كلها جوة البلد و العشرة كيلو بيقطعهم فى ساعة زى حالاتى و بالتالى ال 10000 كيلو يقابلوا 100000 ساعة الموتور كان داير فيها

و ممكن تكون عربية ايجار و ملعوب فى عدادها

الاضمن حد يكون ثقة يفحص العربية كويس و يفضل يتقاس كبس الموتور و يتكشف على شايسة و حوض العربية لبيان اذا كانت اتخبطت خبطة جامدة و لا موتورها ضعيف او كدة

MMamdouh

[rona]

وايه مشكلتين النوبيرا؟ سمعت عن وادة منهم جلب العجل الأمامي بتتاكل بسرعة صح وللا فيه تاني لو فيه تاني يبقوا 3 مشاكل وربنا يستر

[MMamdouh]

واحدة منهم جلب المقصات و احس حل لحد دلوقت تغيير المقصات بالكامل بمقصات اسبانى

المشكلة التانية اللى ممكن متحسيش بيها هى الفرامل و دى مبتبنش الا فى الجرى الجامد و استعمال الفرامل بعنف... لو سواقتك عاقلة مش حتحسى باى حاجة

المشكلة التالتة هى الرشاشات بس العبد لله لقى ليها حل قاطع و مبقتش مشكلة خالص

MMamdouh

[rona]

انا هارفعها فالتوكيل قبل ما اتفق ع الشراء ان شاء الله والمفروض ان الريبورت هيوضح حالتها بالظبط بس مش عارفة هل هيوضح كبس الموتور واللعب فالعداد وللا لأ

[rona]

ليه بلاش اوتوماتيك فالنوبيرا؟

[MMamdouh]

اللعب فى العداد حيبان لما نقارن حالة العربية بالعداد... يعنى مينفعش عربية عاملة 20000 كيلو فقط و يكون كرسى السواق عايز ينجد و هابط و طارة الدركسيون و كاوتش الدواسات متاكل و الرسومات اللى على دراع النور و المساحات ممسوحين

برضة وجود الحاجات دى جديدة نوفى فى عربية عاملة 150 الف يحسسك ان العربية اتغير فيها حاجات عشان يبان شكلها كويس و هى بتتباع و ما خفى كان اعظم

ممكن تروحى محطة كالتكس ناصية عباس العقاد و النحاس و هما بيقيسوا كبس الموتور و بيعملوا تقرير عن العربية و كذلك محطة موبيل اللى فى الطيران (بعد تقاطع الطيران و النصر فى اتجاة السابع)

MMamdouh