بونتو كلاسيك ولا جيتز؟

[M.Nasr]

البونتو 1300 (8 صمامات) 2 ايرباج 2 ازاز كهربا بدون كاسيت بدون ريموت وب 73
الجيتز 1600 (16 صمامات) بدون ايرباج 4 ازاز كهربا وسى دى وريموت ومرايات كهربا ودلع يعنى وب 74
معظم اراء الناس ان الايطالى احسن وبيعيش وفيات احسن من هيونداى تمام انا موافق الرأى ده جدا ومقتنع به بس العربيتين سواء بونتو او جيتز شبابية صغيرة ماتنفعش تكون عائلية يعنى هتاخد وقتها كام سنة وهضطر بعدها اجيب عربية اكبر وعائلية فى الحالة دى مش الجيتز تبقا احسن؟ ؟؟
الجيتز اكيد اسرع عشان 1600 ومن ناحية الحجم انا ركبت العربيتين وحسيت ان الجيتز اكبر شوية من البونتو
محتار فعلا اكيد فى حاجات تانية مش واخد بالى منها ارجو الافادة

[fahd_628]

بص هوة فعلا الأختيار محير جدا

بس انا حقولك على حاجة لو عاوز عربية شبابية و ممتازة بجد و كماليات اعلى زى ما انت ذكرت و طلقة فى السرعة بس حتكون مش معمرة اوى بس شغالة الكورى دلوقتى مش وحش اوى و كمان فيها ميزة انها تقفيل كورى مش مصرى يبقى الجيتز

البونتو ليها كذا ميزة

ان شكلها انا فى رأى احلى من الخارج و حتعمر اكتر من الجيتز و اسهل فى البيع بفارق بسيط و قطع الغيار متوفرة خارج التوكيلو مورة اكتر فى البنزين بس محركها ضعيف نسبيا بس معقول على حجمها يبقى بونتو

انا حقولك بصراحة انا لو حشترى حشترى جيتز

[M.Nasr]

انا كمان بصراحة من جوايا ميال اكتر للجيتز شكلها والاوبشنز اللى فيها تخليك تفكر فيها البونتو جميلة طبعا بس انا حسبتها لاقيت ان فوق ال73 هدفع 2000 او 3000 فى السى دى والريموت والفرش وشوية التظبيطات دى يعنى ممكن تجيب ال75 فى الاخر طيب مانا اوفر من الاول واجيب الجيتز اللى فيها الكلام دا كله
بس تيجى بردو ترجع تفكر فى نقطه اعادة البيع وقطع الغيار ويمكن الظروف ماتسمحش تغير على طول وتفضل العربية معاك فترة اطول وغير كدا فى نقطة تانية مهمة وهى استهلاك البنزين وطبعا البونتو موفرة واقتصادية اكتر فى استهلاك البنزين انا حاسس ان دماغى هتفرقع خلاص
هصلى صلاة استخارة وربنا يكرم ان شاء الله

[hazem_khidr]

محرك البونتو معمر اكتر
جسم البونتو برضه معمر
فوق كده 100% ايطالي
و اخونا فهد قال برضه كلمتين حلوين و انا متفق معاه فيهم
لو انا مكانك حجيب البونتو

[cpt_shawky]

البونتو 1300 (8 صمامات) 2 ايرباج 2 ازاز كهربا بدون كاسيت بدون ريموت وب 73
الجيتز 1600 (16 صمامات) بدون ايرباج 4 ازاز كهربا وسى دى وريموت ومرايات كهربا ودلع يعنى وب 74
معظم اراء الناس ان الايطالى احسن وبيعيش وفيات احسن من هيونداى تمام انا موافق الرأى ده جدا ومقتنع به بس العربيتين سواء بونتو او جيتز شبابية صغيرة ماتنفعش تكون عائلية يعنى هتاخد وقتها كام سنة وهضطر بعدها اجيب عربية اكبر وعائلية فى الحالة دى مش الجيتز تبقا احسن؟ ؟؟
الجيتز اكيد اسرع عشان 1600 ومن ناحية الحجم انا ركبت العربيتين وحسيت ان الجيتز اكبر شوية من البونتو
محتار فعلا اكيد فى حاجات تانية مش واخد بالى منها ارجو الافادة

بونتو فيها 2 ايرباج!! يبقا اشترى وانت مغمض عنيك

[OlaOsman]

اللي بيتكلموا عن السرعة.. لو في القاهرة هايستخدموا السرعة دي في ايه؟ انا متهيألي السرعة دي ميزة للي بيسافروا كتير او اللي بيشتغلوا في مكان يتراح له عن طريق هاي واي.. و حتى دي كمان مش مضمون فيها ان الواحد يعرف يسوق بسرعة

متهيألي ما دام الحيرة جامدة اوي كده يبقى الفيصل هو التوكيل.. و لو انا في مكانك ابعد عن التعامل مع توكيل غبور من كتر ما سمعت من حكاوي تشيب لها الولدان :D

[hazem_khidr]

متهيألي ما دام الحيرة جامدة اوي كده يبقى الفيصل هو التوكيل.. و لو انا في مكانك ابعد عن التعامل مع توكيل غبور من كتر ما سمعت من حكاوي تشيب لها الولدان :D

و توكيل فيات يا علا برضه مش اد كده
بس الميزه ان البونتو مش محتاجه توكيل

[TAG_Turbo0]

مع ان الجتز عربية ممتازه
بس انا مع البونتو العربية دى أكتر من ممتازه

[د.اشرف هنداوى]

انا كمان محتار بس بين البونتو و اللانوس
هي فعلا البونتو نازله من غير كاسيت او ريموت ؟
و اكيد فيها ايرباج ؟

[fahd_628]

ايوة يا باشا انا متأكد ان فيها 2 ايرباج انا شفتها فى المعرض

[fiatmomo]

عاوز توفير شديد فى استهلاك البنزين ..+ تقفيل ممتاز = بونتو

عاوز موتور كبير وقوه حصانية كبيره بالمقارنة مع حجم ووزن السياره + استهلاك بنزين فوق المتوسط = جيتز

عاوز رأى الاتنين جامدين جدا جدا وعاجبنى اوى اوىىىى .. بس جمله Made in italy و بادج فيات اعتقد حيحسمو اختيارى .

و بردة شوف وقارن بنفسك

لو الجيتز فيها كماليات اكتر فا البونتو فيها امان اكتر ... وكل الكماليات الى فى الجيتز ممكن تتركب فى البونتو و بخامات احسن كمان ..

المقارنة انا شايفها تنحصر فى نقتطين

1 موتور اقتصادى ولا موتور رياضى .
2 صناعة ايطالى ولا صناعة كورى .

اعتقد انتا ممكن تشوف احتياجاتك اية وتقرر فى الاخر ايه المناسب ليك اكتر .

[M.Nasr]

بجد متشكر جدا على اهتمامكم وردودكم على الموضوع
انا فعلا بحس فى المنتدى اننا كلنا اسرة واحدة جزاكم الله كل خير
انا صليت صلاة استخارة وسيبتها على الله فى الموضوع ده
بس بصراحة لما عرفت ان فى اشاعة عن ارتفاع سعر البنزين قريبا يبقى فعلا البونتو احسن اللى هيدفع فيها هيقابله توفير فى المستقبل ان شاء الله

[bassam nagy]

الفيات بونتو عربية حلوة والفيات كلوا جامد وانا ركبت فيات بترا وكانت عربية تحفة الفيات كلوا عربياتوا صاجها جامد وتقيلة على الطريق وامان بس عيبها ان قطع غيارها نار نار نار وتقريبا تقفيل تركى او صينى مش ايطالى
الجيتز موتورها قوى قطع غيار اسعارها معقولة

[M.Nasr]

انا كمان محتار بس بين البونتو و اللانوس
هي فعلا البونتو نازله من غير كاسيت او ريموت ؟
و اكيد فيها ايرباج ؟

ايوة اكيد ان البوتنو فيها 2 ايرباج ومن غير كاسيت ولا ريموت هى بس تكيف وباور وسنتر وازاز كهربا 2 اللى قدام بس

انا عايز حد ركب البونتو وساقها على طريق سريع يقولى اخبار ثباتها ايه وفى السفر كويسة وتستحمل ولا؟؟

[fahd_628]

اسأل الأخ توت عنخ امون معاة بونتو 2003 و دية تختلف عن الجديدة ان محركها 12 صباب مش 8 المحرك اقوى قليلا و فية اختلاف بسيط فى الفوانيس الأمامية