مازدا 3 ولا ميجان (2008-2009)

[pioneerahmed]

أنا دخلت على قسم الميجان وأسعار قطع الغيار ترعب. إنتو متأكدين إن المازدا أغلى؟؟؟؟؟؟؟ في طلمبة بنزين بـ2200 جنية يا عالم!!!!!!!

* ديفــــازور ــــــــــــــــــــــــــــــــــــــــــــــــــ 1250.00 جم
* ديـنــامـــــــو ــــــــــــــــــــــــــــــــــــــــــــــــــ ـــ 2450.00 جم
* طرمبة بنزين ــــــــــــــــــــــــــــــــــــــــــــــــــ 2200.00 جم
* المراية الجانبية+كهرباء+ضم ـــــــــــــــــــ 2150.00 جم
* كابــــــــــــوت ـــــــــــــــــــــــــــــــــــــــــــــــــ 2000.00 جم
* شنطــــــــــة ــــــــــــــــــــــــــــــــــــــــــــــــــ ـــ 3000.00 جم
* بـــاب أمــــامى ــــــــــــــــــــــــــــــــــــــــــــــــــ 3350.00 جم
* رفرف أمامى ــــــــــــــــــــــــــــــــــــــــــــــــــ ـــ 1380.00 جم
* رفرف خلفى ــــــــــــــــــــــــــــــــــــــــــــــــــ ـــــ 4200.00 جم
* كارت التشغيل ــــــــــــــــــــــــــــــــــــــــــــــــــ ـــــ 1500.00 جم
*زجاج أمامى ــــــــــــــــــــــــــــــــــــــــــــــــــ ـــــ 1720.00 جم
* زجاج خلفى ــــــــــــــــــــــــــــــــــــــــــــــــــ ـــــ 1980.00 جم

يا باشا الاسعار دى قديمة جدا و بردو مش غالية اوى يعنى بالنسبة للميجان لان محدش بيشترى الحاجات دى من التوكيل الحاجات دى مغرقة شارع دمشق و الحرفيين و بربع الاسعار دى

و بعدين طرمبة البنزين مبتبوظش اصلا الى بيبوظ الموتور و بيتغير ب 200 جم موتور بوش المانى اصلى فى التوكيل و عمرة ما بيبوظ (انا مغيرة عندى و من غير مايكون الموتور الاصلى بايظ عشان كنت مسافر و مش عايز قلق) اما بالنسبة لطرمبة بنزين المازدا تمنها حوالى 4200 جم بس مسمعناش عن حد غيرها ابل كدة خالص كلة بيغير الموتور بس (دة لو باظ و دة نادرا بردو)

اما كارت التشغيل دة بيتعمل عند ناس كتير اوى برة و مابيزيدش عن 700 جنية زية زى اى مفتاح مشفر لاى عربية فى مصر مفتاح الريموت بتاع المازدا فى التوكيل ب 2000 جم و برة ب 800 جم

اما رفرف الامامى بيتباع بلون العربية فى الحرفيين ب حوالى 500 جنية دة بالكتير اوى محدش بيجيبة من التوكيل

يا جماعة ارجوكو بلاش ظلم للميجان عشان بجد عربية جميلة و الى عايز يستفسر عن اى حاجة بخصوص الميجان ممكن يتفضل يشرفنا فى منتدى رينو الوحوش هناك عاملين مواضيع جامدة جدا عن العربية دى

[Mahmode]

@pioneerahmed تسلم يا باشا إنت أوجزت وأنجزت :) هو الصراحة بعد الشرح بتاعك أنا محتاج أحط المازدا والميجان مع بعض في الخلاط وأشتري الخليط. منا عاوز شوية من كل عربية. يعني عاجبني وسع وأوبشن وبرستيج وسعر الميجان بس مقلق جدا من حتة:

س خد بالك الميجان لازم صياناتها تتعمل فى مواعيدها بالساعة عشان لو اهملتها هتزعلك اوى

أنا مش قد زعل العربيات وباكره مشاوير الميكانيكية والصيانات وبصفة عامة مهمل شوية في العربية. معنديش حاجة اسمها بالساعة. العربية تستنا لحد ماتصعب عليا وأبقى أوديها للميكانيكي

في المقابل المازدا حسب كلام سيادتك:

اما المازدا قشطة يعنى غيرلها زيت و حطلها بنزين و دوس مش هتقولك لا ابدا دة غير ان فيها حتة موتور ابن عفريتة

دي حاجة فل أنا أحب العربية اللي مشاكلها قليلة ومتقلش لأ. أديها زيت أديها ميه. تاخد الموجود وتحمد ربنا بس مضايقني ضيق مساحتها وصغر حجمها وموضوع إنها تحك والقصص دي. عموما حابقى أعمل استخارة وأشوف دي ودي وربنا يسهل.

[Mahmode]

و بعدين طرمبة البنزين مبتبوظش اصلا الى بيبوظ الموتور و بيتغير ب 200 جم موتور بوش المانى اصلى فى التوكيل و عمرة ما بيبوظ (انا مغيرة عندى و من غير مايكون الموتور الاصلى بايظ عشان كنت مسافر و مش عايز قلق) اما بالنسبة لطرمبة بنزين المازدا تمنها حوالى 4200 جم بس مسمعناش عن حد غيرها ابل كدة خالص كلة بيغير الموتور بس (دة لو باظ و دة نادرا بردو)

أنا غيرت طلمبة البنزين في البولو بتاعتي بـ300جنية. وواحد صحبي عندو فيات بونتو برضو غير طلمبة البنزين. عشان كدة معلمة معايا

[pioneerahmed]

خد بالك ان المشكلة دى هتلاقيها فى كل العربيات الاوروبى عشان دايما بتحتاج بنزين 95 و دة مياكلش معانا و دة بيسبب ان الفلتر بتاع الطرمبة بيتسد شوية فبيعمل حمل على شفط الموتور و دة الى بيخلية يتحرق دايما بس لما بتغيرة بماتور المانى بيعد معاك كتيير

[د.محمود صلاح]

الميجان اكثر انتشارا وبالتالي قطع الغيار متوفرة خارج التوكيل

الصيانة كل 10 الاف في حدود 700 - 800 ج ومش هتفتح الكبوت بينهما

الصيانة الكبرى كل 60 الف وبتتكلف 3 الاف ج عشان بيغيروا مضخة المياه

ظهرت بعض المشاكل في البوبينه وبتتغير ب 500 ج الواحدة في التوكيل وبرة ارخص من كده

بتاخد بنزين 90

بعض المشاكل في الحساسات وبتتغير بحد أقصى 500 - 600 ج

كل ده وارد في اي عربية

مافيش مشاكل جوهرية نهائي من الفتيس للإستخدام المعقول

[Mahmode]

pioneerahmed@

و بعدين طرمبة البنزين مبتبوظش اصلا الى بيبوظ الموتور

خد بالك ان المشكلة دى هتلاقيها فى كل العربيات الاوروبى عشان دايما بتحتاج بنزين 95 و دة مياكلش معانا و دة بيسبب ان الفلتر بتاع الطرمبة بيتسد شوية فبيعمل حمل على شفط الموتور و دة الى بيخلية يتحرق دايما بس لما بتغيرة بماتور المانى بيعد معاك كتيير

يعني أعتبر الرأي الأولاني متقالش؟

[pioneerahmed]

موتور الطرمبة هو الى بيبوظ اما الطرمبة نفسها مفيهاش اى مشكلة و الفلتر بتاعها بيتنضف عادى لانة عامل زى المصفاة مش فلتر مقفول

انت قصدك اية بالراى الاولانى؟

[Mahmode]

انت قصدك اية بالراى الاولانى؟

قصدي: "و بعدين طرمبة البنزين مبتبوظش اصلا الى بيبوظ الموتور"

[pioneerahmed]

قصدي: "و بعدين طرمبة البنزين مبتبوظش اصلا الى بيبوظ الموتور"

بردو مش فاهم

[Mahmode]

أنا حاريحك مني خالص. محدش يمسكني:

ههههههههه. يا باشا أنا قصدي إنك الأول قولتلي إن طلمبة البنزين عمرها ما بتبوظ. بعدين قلتلي إنها بتبوظ من الرصاص اللي في بنزين 92 و90. عموما إنسى يا باشا وخلينا نكمل حياتنا

[pioneerahmed]

يا باشا انا قصدى الموتور بس هو الى بيتحرق انما الطرمبة نفسها حتة بلاستيك اية الى هيبوظ فيها الا اذا اتكسرت بقى و هى بتتفك دى حاجة تانية

[Mahmode]

آآآه كده فهمتك. إنت قصدك موتور الطلمبة!!!!! تصدق أنا إفتكرت قصدك موتور العربية. وكنت مش فاهم إزاي موتور الميجان ب200 جنية. دا محصلش موتور مروحة. بس قلت أفوت

[ahmed_samir12]

الميجان افضل إختيار بس الأفضل تكون بانوراما هاى لاين عربيه مريحه وفخمة وفرق سعرها عن الفئات الاقل مش كتيير والفتيس ستيب ترونك يعنى لو بتجب الشد والجرى بتخليه على الوضع المانيوال و التوب سبيد ف العداد 250 كلم مريحه جدا جدا وواسعه من هنا للصبح وكل يوم هتكتشف فيها اوبشن جديد وهتحس انها بتفهمك زى البنى ادمين ااايوه مش هزار العربيه فيها 3 انواع من القياده العاديه والاقتصادية والرياضية والعربيه هيا اللى بتحدد نوع القياده من دوسة رجلك على البنزين .....فيه حاجه كده بس تعمل حسابك انها محتاجه اهتمام خاص وصيانه دوريه
الرأى بناء عن تجربه وسيبك من اللى بيقولك قطع الغيار نار والكلام ده طبيعى اللى عايز يركب عربيه فخمه يبقا نزيه فى التعامل معاها ولا يروح يركب 128 مش كده ولا ايه وربنا يوفقك

[Mahmode]

الميجان افضل إختيار بس الأفضل تكون بانوراما هاى لاين عربيه مريحه وفخمة وفرق سعرها عن الفئات الاقل مش كتيير والفتيس ستيب ترونك يعنى لو بتجب الشد والجرى بتخليه على الوضع المانيوال و التوب سبيد ف العداد 250 كلم مريحه جدا جدا وواسعه من هنا للصبح وكل يوم هتكتشف فيها اوبشن جديد وهتحس انها بتفهمك زى البنى ادمين ااايوه مش هزار العربيه فيها 3 انواع من القياده العاديه والاقتصادية والرياضية والعربيه هيا اللى بتحدد نوع القياده من دوسة رجلك على البنزين .....فيه حاجه كده بس تعمل حسابك انها محتاجه اهتمام خاص وصيانه دوريه
الرأى بناء عن تجربه وسيبك من اللى بيقولك قطع الغيار نار والكلام ده طبيعى اللى عايز يركب عربيه فخمه يبقا نزيه فى التعامل معاها ولا يروح يركب 128 مش كده ولا ايه وربنا يوفقك

تسلم ياباشا على التقييم. أنا معاك في كل اللي قولته. بس أنا صرفت نظري عن الميجان عشان سمعتها عن الأعطال. صحيح الكلام ده ممكن يكون إشاعات بس أنا قولت أخليني في السليم. أنا دلوقتي باقارن بين السيفيك والجيتا.

[Haitham10]

صعبانة عليا الميجان بسمعتها عن الاعطال دي

اانا واحد برضه نفسي فيها ومرعوب من الي بسمعه عنها وشكاوي الناس وشرائها صعب