مازدا 3 ولا ميجان (2008-2009)

[ahmedsadek82]

السلام عليكم, أنا بادور على عربية مستعملة في حدود ال 100 ألف جنيه (أقل شوية أو أكتر شوية) وتكون مش أقل من مو2008 ومش ماشية كتير وحالة جيدة وتكون هاي لاين. بعد البحث والتدقيق أنا دلوقتي رسيت على مازدا 3 و رينو ميجان. العربيتين كويسين. الميزة الأساسية في الميجان واسعة وليها هيبة كدة وسعرها مستعمل حلو جدا نتيجة نظرة المصريين للفرنساوي. بالنسبة للمازدا فا عربية شيك وشكلها حلو وياباني صميم وسحب حلو وتكييف قوي. وطبعا العيب إنها عربية صغيرة مش زي الميجان. يا ريت كل واحد يقللي وجهة نظره لو هوا مكاني يختار أنهي واحده. ومحدش يقللي حسم إحتياجاتك, اللتنين يكفو إحتياجاتي ويزيدو :). يعني أنا عايز رأي بعد تقييم العربيتين من جميع النواحي

ولو في حد شايف عربية تانية فالحدود يه و هاي لاين يقوللي بس بلاش الكوري وشكرا

المازدا 3 افضل لألاسباب التالية :
-عفشة خلفية muktilink عالية التقنية
-ثبات رائع بسبب العفشة السابق ذكرها
-اعتمادية اعلى من الميجان و كذلك اعادة البيع

[Mahmode]

صعبانة عليا الميجان بسمعتها عن الاعطال دي

اانا واحد برضه نفسي فيها ومرعوب من الي بسمعه عنها وشكاوي الناس وشرائها صعب

للأسف دا صح. نسبة الأعطال فيها كبيرة. ومش بس الميجان دا حتى الفلوينس الجديدة فيها كام مشكلة كدة واخل قسم الرينو وبص. فا على إيه. الواحد عاوز عربية تريحه. مش تعذبه.

[Haitham10]

علي فكرة هي مشكلة الميجان مينفعش تتبهدل زي الفيرنا واللانسر والعربيات المعتادة ... معتقدش انت هتركب عربيه بالمميزات دى عشان تبهدلها وناس بتشكر فيها وناس بتعيب عليها
بس هي راحة نفسيه وغالبا الي بيعيب ممتلكهاش

في عربيات كتيره جدا بيتشكر فيها من الكل بلا استثناء وتشتريها متعجبكش ودة عن تجربة

اعتقد المازدا تكسب في الاعتماديه واعادة بيع بس تقريبا

وانت قلت بنفسك ان الميجان اوسع واكبر وفخامة افضل وبعدين فيها امكانيات انا نفسي حد يفهمني فئاتها ولا كمالياتها بالكامل لاني بسمع
مرايات ضم - 8 ايرباج - جنوط 16 - حساسات مطر وضوء - مثبت سرعة - فتيس ستيبترونيك - كارت تشغيل - كاسيت سي دي - مرايات تعتيم ذاتي - ثباتها ممتاز وعدادها 250 - فتحة سقف بانوراما ودي تحفة في رأيي

اعتقد لسه في امكانيات تانية انا لسه معرفتهاش .. بس تفتكر الامكانيات دي انت شوفتها فين في عربيه تحت ال200 الف جنيه غير الباسات مثلا

ومن رأيي الشخصي ليك لو ميال ليها وخايف عشان سعر اعادة البيع
اعتقد اني بشوف 2007 2008 فحدود 80 الف او اقل وبعد 3 سنين هيبقي سعرها 70 او اقل

اعتقد دة نفس سعر المازدا حاليا 2007 2008 من 75 ل85 كحد اقصي

يعني في جميع الاحوال هتنقص عن المازدا في حدود5 او 6 الالاف في البيع المهم المحافظه

اما لو ميال للمازدا يبقي اتمتع بقيادتها فعلا وشد وجري وغرز وكل الي انت عاوزه بس هات الجديده اخر فئه وطبعا هيبقي في فرق سعر عن الي ذكرته سابقا فحدود 40 50 الف

[محمد عز]

امتلك مازدا 3 وفى نفس الوقت سقت ميجان حوالى شهرين على 3 مرات بس كانت ايجار

كوسع

الميجان اوسع من المازدا 3 سواء فى الكنبة اللى ورا او الشنطة

كشياكة

الاتنين شيك ، لكن بحس ان الميجان اشيك فى التصميم الخارجى والمازدا اشيك فى التصميم الداخلي

لو كلمنا عن التكييف

المازدا 3 افضل بمراحل من تكييف الميجان ، ده غير كمان زرار منع دخول الهوا من بره ، الحقيقة افضل فى المازدا لانه فعلا بيمنع دخول اى روايح او غبار او عادم داخل العربيه لكن الميجان كنت بحس ان نسبة من عادم السيارات التانية بيدخل للكابينة

الفتيس الاتوماتيك فى المازدا افضل ونقلاته انعم من الميجان

كفرامل الميجان افضل من المازدا ، ولكن فرامل المازدا ممتازة برده لكن كنت بحس الميجان اقوى

كمتعة قيادة الاتنين حلوين الحقيقة

كراحة ، الحقيقة ميجان اريح فى السفر من المازدا ، السبب ايه معرفش

اعتمادية مازدا 3 عاليه جدا وأعطالها لاتذكر بس الميجان معنديش فكره

توافر قطع الغيار والصيانات ، مقدرش افيدك

استخير والعربية اللى حالتها احسن وانضف اشتريها ، اى كان الاختيار لان الاتنين صفقة رابحة باذن الله