ماذا تفضل ؟

[أبو عبدالله]

السلام عليكم ورحمة الله وبركاته


أرجو ان يكون الرد ليس متحيزا لجانب معين من السياره ولكن لكل جوانب السياره ....
يعني ((( قطع الغيار واسعارها والصيانه و الاداء وقوة الماتور و قوة الاستحمال و العمر الأفتراضي و الشكل الخارجي و ماذا تعطيك مقابل الثمن و جودة الخامات المصنع منها السيارة و................................................. .... ))))

[وائل عطية]

بالطبع ألمـــــــــــــــــــــــــــــــــــــــــــــــ ـــــــــــــــــــــــــــــــــــانـــــــــــــ ــــــــــــــــــــــــــــــــــــــــــــــــــ ـــــــــــــــــــي
لو الظروف تسمح

[M_ElSabaa]

المانى طبعا يليه اليابانى

[أبو عبدالله]

ولكن الا ترى ان الألماني اسعار قطع الغيار غالية وصيانته صعبه وسعره عالي كمان

[Abdallah]

تعالى نحسبها بالعقل
الماني = متانة + جودة + قطع غيار وصيانة مرتفعة الثمن جدا + استهلاك بنزين عالى
ياباني = شكل جيد + قطع غيار متوفرة + سهل الصيانة نسبيا + استهلاك بنزين جيد جدا
امريكي = قوة + متانة + قلة قطع الغيار+ ارتفاع سعر السيارة + استهلاك بنزين عالى
فرنساوي = شكل ممتاز+فخامة+قطع غيار مرتفعة+ ارتفاع تكاليف الصيانة+ استهلاك بنزين جيد
كوري = شكل جيد+ قطع غيار متوفرة ورخيصة + سهلة الصيانة + بنزين جيد
صيني = شكل معقول + سعر قليل

انا عن نفسى اخترت الكورى ولكن الكورى المصنع فى كوريا وليس المجمع فى مصر, وان لم يكون متوفرا ساختار اليابانى المصنع فى اليابان بطبيعة الحال.

[Sharky]

السلام عليكم

أنا عن نفسى بفضل الألماتى لو معايا تمنه ثم الفرنسى

[mina_ramsis]

لو الفلوس موجوده طبعا مفيش حاجة غير الالمانى بس نعمل ايه فى بنت الايه الفلوس ديه :D

[hazem_khidr]

quote]
ولكن الا ترى ان الألماني اسعار قطع الغيار غالية وصيانته صعبه وسعره عالي كمان
[/quote]
فعلا قطع الغيار غاليه بس معمره و بتعيش و عربيات مش بتقدم بسهوله(معظم الموديلات ما بيتغير شكلها غير كل 8 سنين)
الياباني كويس بس ما يتركبش اكتر من سبع سنين انما الالماني عربيه العمر بجد

[fahd_628]

لو معايا فلوس اكيييييييد حجيب حاجة المانى

بتاخد حاجة محترمة و عليها القيمة و شيك و برستيج

بس مقابل دة سعر قطع الغيار غالى بس خلينا نبقا واقعيين لو واحد اشترى عربية المانى مثلا ب 600 700 الف مش حتفرق معاة قطع غيار غالية صح ولا اية !

[Santino]

الياباني زي الفل : أداء , عربية معمره , أسعار قطع الغيار كويسة , أمان و يعتمد عليها , عايز إيه تاني ؟! أنا شايف إن الياباني مناسب أوي .

[د.أحمد سمير]

لو فيه مراكز خدمة محترمة والعربية منتشرة هاشتري أمريكاني .. السيارات الأمريكية دليل رائع على الفخامة والرفاهية والأداء القوي جداً وخصوصاً في الموديلات الكبيرة .. أنا لا أتكلم هنا على السيارات التي تنتجها الشركات الأمريكية العالمية ولكني أتكلم عن السيارات المنتجة داخل الولايات المتحدة نفسها يعيبها طبعاً استهلاكها الرهيب في البنزين ( في العالم ) ، وارتفاع قطع غيارها ، وغياب وكلائها المحترمين ، وارتفاع سعرها ، وندرة قطع غيارها في مصر ، ولكن في رأيي لو هناك وكيل محترم لأي ماركة أمريكية مثل الكاديلاك أو الشيفرولية سوف تتغير هذه الصورة .
أما الياباني والأوربي فهي سيارات ممتازة .. الفارق الجوهري بينهما أن السيارات اليابانية يظهر عليها القدم ، ونظرة واحدة لأي سيارة يابانية قبل التسعينيات أو في بداياتها سوف تشعرك بمنظرها القديم ، وهذا لا يظهر في الأوربي فلا زالت المرسيدس الستينات والسبعينات تباع بسعر عالي في غياب أي من هذه الموديلات لأي ماركة ثانية . كذلك البي إم أوائل الثمانينات لازالت تباع ولها سوقها ، والبيجو لازالت أسعارها مرتفعة جداً في موديلاتها القديمة وهذا لا تجده في أي سيارة يابانية .
وهذا يرجع في رأيي إلى أن السيارات الأوربية مهما حصل لها قادرة على العودة مرة أخرى لحالتها ، أما السيارة اليابانية مهما كانت لا تعود أبداً لحالتها الأولى مع أي حادثة أو تغييرات جوهرية فيها .
إذاً السيارة اليابانية أنعم . أكثر توفيراً . اقتصادية . ذات أداء عال جداً . بشرط ألا تصل إلى الفترة الحرجة التي هي ما بين 10 إلى 15 سنة بحد أقصى بعدها لا تستحق النظر إليها .
أما السيارات الأوربية فهي سيارات معمرة جداً . أخشن نسبياً من الياباني ، أداء عال وراق ، أكثر ارتفاعاً في تكاليف التشغيل والصيانة ، عمرها يتحدد وفق الاستخدام .
والسيارات الأوربية تتوجها السيارات الألمانية بروعتها وجمالها وأدائها وسمعتها العالية . أما الفرنسية فهي ذات شكل جميل وتكنولوجيا متقدمة لكنها غير مناسبة لنا فأعطالها كثيرة والدعم الفني لها غير متوافر بكفاءة . مع جميع عيوب الألماني من حيث ارتفاع ثمن الصيانة وتكاليف التشغيل وقطع الغيار واستهلاك الوقود العالي .
والسيارات الكورية سيارات شعبية ، مهما قيل عن أدائها وجمالها ، لذا لاحظ دائماً أن الكوري الفاره مثل السوناتا والأزيرا وغيرها لا تباع هنا وليس لها سوق ، وتخسر السيارات الكورية في الفئة المتوسطة مبالغ كبيرة جداً في إعادة البيع مقارنة بالفئات الصغيرة ، فسعر الإلنترا 96 قريب جداً من سعر الإكسيل لنفس السنة ، والناس تفضل الإكسيل ، كذلك النوبيرا المستعملة سعرها قريب جداً من اللانوس والناس تفضل اللانوس ، والأمر ذاته ينطبق على الليجانزا الرائعة التي قد يظل صاحبها شهوراً يحاول إقناع المشتري بالشراء ولا يجد . خلاصة القول أن السيارة الكورية سيارة لأداء الغرض الرئيس من السيارة وهي التنقل المريح وفق ظروف تشغيل معقولة فقط ، وغير ذلك لا قيمة له ، وهي الوريثة الشرعية لفيات في مصر .
أنا عن نفسي في مصر أفضل الألماني ثم الياباني ثم الفرنسي ثم الكوري .
أما خارج مصر فأنا أفضل الأمريكي ثم الألماني ثم الياباني ثم الفرنسي ، ولن أفكر في اي سيارة أخرى .
تقبلوا خالص مودتي

[جندى مجند]

اليابانى و الألمانى قمة طبعاً ... لكن لو أخدنا رأى اخواننا الخليجيين حنلاقيهم بيفضلوا اليابانى عن الألمانى ... و أعتقد هم ممكن يحسوا بموضوع العمر الافتراضى دة أكتر من مصر بكتير نظراً لدرجات الحرارة الغير طبيعية طوال العام + التكييف ليلاً و نهاراً + المسافات الطويلة جداً + السرعات الخرافية اللى بيمشوا بيها + الفحت اللى بيعملوه فى عربياتهم ... و الخلاصة عندهم شوف اليابانى منتشر ازاى يليه الأمريكانى يليه الألمانى

[أبو عبدالله]

لا هما يمكن بقو بيفضلو اللماني شويه عن الامريكان الأيام دي
ولكن يا جماعه برضه محدش قادر يفهم السؤال
احنا مش بنقول مين الاحسن من غير ما نبص على جانب الفلوس ......... لا
احنا عاوزين نقيس السياره من حيث كل الجوانب يعني بمعنى أصح ..

============= هما هيدوني ايه مقابل كام ============

وهل هذه المعادلة متوازنه ولا هناك جانب راجح عن جانب يعن مثلا العربيه غاليه وفي عربيه بنفس الكفاءة بتاعتها ولكن أقل في السعر اذن يبقى هناك عدم توازن

[PRO-DRIVE]

المقارنة غلط كل شركة و ليها سياستها
يعنى بى ام تلاقيها فى السعر ارخص من منافستها من مرسيدس بس قطع غيار بى ام اغلى

اذا تقارن بالدول انا اشوف انه غلط يعنى اوبل المانى و نيسان يابانى عندى اوبل بجميع فئاتها اسؤا من نيسان بجميع فئتها مثلا

فير كدة مثلا لكزس اليابانية تتفوق احيانا على كاديلاك الامريكية بس تلاقى ان افالون اسؤا من كابرس رويال

الامثله فى الحجات دى كتير بس يعنى على اقل تقدير شركات لانى فى الامريكى مثلا بحب كرايسلر و دودج و اكره جى ام و احب فورد فى الالمانى اكره اكره بى ام :twisted: عداااااااااااااااااااااااااااااااااء بينى و بينها :mrgreen: و طبعا له اسبابة بس مش موضوعنا :D

[sab3aawy]

انا شايف ان لو بنتكلم عن بلدنا العزيز فالإستفتاء محسوم من قِبَل السوق لصالح اليابانى والكورى
مصر خلاص بقت سوق للسيارة اليابانية والكورية اللى عمرنا ما كنا نعرفهم قبل 15 سنة باستثناءات قليلة، اما باق الماركات فهى موجودة للتمثي المشرف، يعنى الالمانى موجود لهواه القمة، والفرنساوى موجود لهواة التميز، والصينى موجود لمن يريد ارخص سيارة فى فئتها،والماليزى موجود كبديل للكورى وان كان ليس بأعداد كبيرة، والأمريكى مش موجود تقريبا سوى من خلال السيارة شيروكى-الشيفرولية اللى موجود فى مصر كورى فى الملاكى ويابانى فى النقل- والإيطالى لم عزاله ورحل آخذا معه ابناءه البولنديين والأتراك واليوجوسلافيين بعد صولات وجولات طويلة فى مصر،

السوق الشعبية فى مصر حالية هى سوق كورية ويابانية فقط، تتراوح الأذواق فيها حسب ما يراه انصار كل فئة