اوبـــــــــــــترا ولا جيـــــــــــن تــــو ... نصيحه لوجهه الله

[Mohamedtefa82]

بص ياباشا, أنا ملاحظ أنك مهتم جدا بالجرى و السرعة و الغرز كله كلام مية مية بس أنت هاتجرى على 170 كام مرة و كام مرة من اللى هاتجرى فيهم هاتاخد غرزة
رأى بصراحة ركز في اللي بعد شراء العربية, خدمة ما بعد البيع, العربية نفسها بعد 100 إلف كيلو و كدة
عشان كدة أنا أرشحلك أولا سيبك من الجين 2 دى خالص توكيلها عز العرب سئ جدا
أما الأوبترا عربية حلوة وواسعه و ثابته و لكن كورى برضة تلاقى المكنة بعد 100 -120 الف كيلو مش زى اليابانى
فى حدود السعر دة أرشح لك نيسان صنى السوبر صالون عشان عفشتها رياضية
و الرأى فى النهاية ليك طبعا

[Sehsss]

بص يا باشا .. أنا رأيي النيسان صني طبعا.. بس بما إنك عاوز مقارنة بين العربيتين اتفضل..
-----------------------
أوبترا

• الطراز صالون
• المحرك الاساسي 1.6 - 107 - 4
• المحرك الاختياري غير متوفر
• منظومة الدفع امامى
• ناقل الحركة يدوى 5 - آلى 4
• الطول 4521
• العرض 1727
• الارتفاع 1448
• قاعدة العجلات 2591
• وزن السيارة 1225
• سعة خزان الوقود 57
• من 0 الى 100 كلم 10.7
• السرعة القصوى 187
• معدل استهلاك الوقود 7.1

ــــــــــــــــــــــــــــــــــــــــــــــــــ ــــــ
جين تو

• الطراز هاتش باك
• المحرك الاساسي 1.6 / 110 / 4
• المحرك الاختياري غير متوفر
• منظومة الدفع امامى
• ناقل الحركة يدوى 5 / الى 4
• الطول 4310
• العرض 1725
• الارتفاع 1435
• قاعدة العجلات 2600
• وزن السيارة 1185
• سعة خزان الوقود غير متوفر
• من 0 الى 100 كلم 12.6
• السرعة القصوى 189
• معدل استهلاك الوقود غير متوفر

[ramy01011]

الاوبترا عربية محترمة و واسعة جدا شنطة و صالون غير انه قطع غيارها و صيانتها رخيصة

[Raul_7]

أنا شايف حضرتك معجب جدا بالجين 2 فبقول يا ريت تعملها test drive في التوكيل ولو عجبتك اتوكل على الله واشتريها بدل متعود تندم كل مرة تشوفها ماشية قدامك على الطريق. :)

وللعلم شنطة العربية مش صغيرة خالص, والصالون الخلفي معقول يعني مساحة الرجلين اوسع من الصني عن تجربة مع إن شكلها من برة لا يوحي بكده خالص.

حضرتك بس هتعاني مع التوكيل شوية لإن ساعات قطع الغيار مبتبقاش موجودة والواحد بيتضر يستنى فترة عبال متيجي.

[graffittiii]

لو علي الشكل الأوبترا مع لون أسود أو فيراني وجنوط وتعديل فوانيس هتتغير الموازيين ...
أنا معاك أنها متتركبش ستوك ...
لكن شوفت أوبترا كتير متظبطة وشكلها جامد جدا ...
مؤيد للأوبترا للبعد عن متاعب قطع الغيار وأعادة البيع ....

ربنا يوفقك ف الأختيار ...

[tutankhamoun]

رمضان كريم ...

كل العربيات ممتازة ( النيسان و الجين 2 و الأوبترا )
أحسن توكيل هو توكيل النيسان
و توكيل عز العرب مش بالسوء اللي الناس بتتكلم عليه به ......... من خلال تعاملاتي معاهم من 2007 و لغاية النهاردة .
الناس بتكبر الكلام من غير ما تجرب ........ أرجوا اللي يتكلم على شئ يتكلم عن تجربة .

أحسن قطع غيار
الأصلي كله سعره غالي ........ التوافر ...... الأوبترا و بعدين النيسان صني و بعدين الجين 2 ( إنما أسعار هي هي )

و برضه من ناحية الثبات كلهم ثابتين ( أحنا مش داخلين على حلبة سباق )
من ناحية اعادة البيع
النيسان تقيلة و الجين 2 تقيلة
أسعار الجين 2 من ناحية أعادة البيع بتكون حسب الموديل و حسب الحالة و الكيلومتر
تقريبا من 60 ألف لغاية 75 ألف موديلات 2008 لغاية 2010 .
يعني خسارة مش كبيرة زيها زي أي حاجة مستعملة ........... و العربية دي بالذات لها زبون معين زي الفيات البونتو كدا تقريبا .

لو عايز تركب و تتمتع ............. و مش هامك اعادة البيع ........ هات اللي نفسك فيه .

من ناحية الجين 2 العربية ممتازة و يعتمد عليها و كلامي عن تجربة لعربيتين مش كلام سامعه من واحد صاحبي أو قرأته على المنتدى أو بألفه من دماغي أو جربت العربية من أول شارع الهرم لأخره .
أنا أمتلكت 2007 و بعديها 2010 ....................................... العربية ممتازة .

فلو عايز تجيب العربية ..... حاول تجربها و تشوف كذا رأي ....... ( ناس مبسوطة و ناس مخنوقة ) و تقارن و تشوف الأصح من وجهة نظرك النهائية .

و في النهاية
أغلب عربيات السوق عربيات ممتازة و كل واحد حسب هو شايف الحاجة ازاي .

[tutankhamoun]

على فكرة أنا جربت النيسان صني و جربت الأوبترا ......... و مع أصحابي و كلهم بيشكروا في العربيات بتاعتهم و كل واحد مرتاح لعربيته علشان هو أختارها حسب هواه ....... ( اللي بيفكر في اعادة البيع أكتر من العربية و اللي بيفكر في العربية و يمتع نفسه )
فكل واحد له نظره .

ده كان تأكيد على كلامي بتفسير أكتر شوية

[mado83]

الاوبترا اوسع من الجين 2
ولكن انا مع ان النيسان افضل

[Adam87]

الجين تو وش......... تسألني ليه
1-حاسس انها عاجباك "علي فكرة انا بعشقها حتي الممات"
2-امان اعلي وجري اكتر
3-موتور ابن حرام " من شركة لوتس "
4صاج قوي
5-شياكة اوي ورياضية مووووت

نيجي بأه اللي البعض بيسموه عيب فيها وهو قطع الغيار وسعر اعادة البيع
الكلام ده ممكن يكون صحيح بس قبل 3 او 4 سنين
قطع غيارها بقت متوفرة اكتر دلوقت وبترخص مع الوقت
سوقها في اعادة البيع علي اوي "لان الناس فعلا بدأت تحس بقيمة العربية دي بعد ما اتجربت " وده مش كلامي لوحدي تاابع كل التصويتات والمقارنات بتاعت العربية دي وانت تعرف
6-الاوبترا من وجهة نظري صندوق باربع عجلات مش فيها اي حاجة مميزة لا شكل ولا مضمون
بس قطع غيارها ارخص من الجين 2
ولو عايزها عائلية اكتر وحجم اكبر يبقي البيرسونا "تقريبا هي هي العربية "

[apoadel_vip]

لو بتفكر فى عوامل الأمان والقوة والثبات ....
ومش فارق معاك سعر أعادة البيع و الصيانة الغالية وقطع الغيار اللى ممكن تتعب شوية عشان تلاقيها ....
يبقى هات الجين 2 وش ....

لكن لو بتفكر فى سعر أعادة البيع وقطع الغيار اللى من السهل جدآ تلاقيها فى أى حتة ....
يبقى الأوبترا ....

فى البلد دى الكورى النهاردة هو الكسبان ....
وأديك شايف العربيات الكورى مغرقة كل شوارع المحروسة وحواريها ....
نصيحة الناس كلها لأى حد عايز يشترى عربية هى :
هات عربية ليك وللسوق ....
. When in Rome , do as the Romans do
اللة يكون فى عونك وعون أى حد عايز يشترى عربية فى بلدنا دى .

والله الراجل ده جاب من الاخر

[OOOKA]

ممكن اعرف حضرتك رسيت علي ايه عشان انا محتار نفس حيرتك

[bouda205]

. When in rome , do as the romans do
اللة يكون فى عونك وعون أى حد عايز يشترى عربية فى بلدنا دى .

تسلم ايدك على الكلمتين دول هما الخلاصه فى البلد ديه و الكورى مبقاش كمان رخيص زى الاول فى قطع غياره الحاجات الاصلى برضه معديه..............خليك فى الكورى تكسب

[hossam_bonie1]

والله الواحد مختار نفس الحيرة
ربنا يهديك للي فيه الخير

[Dawns_Mist]

كلام مهندس ميكانيكا باور .. مجرب العربيتين ...
هنقارن بكل حيادية بين العربيتين .. طبعا أعلى فئة :

التسارع .... جين تو
قوة الموتور .. جين تو
الثبات على السرعات العالية و في الملفات الخطيرة .. جين تو
الوزن .. جين تو أثقل و هتحسها على السرعات العالية خصوصا مع الفرامل
العفشة .. جين تو تكنولوجيا أعلى ، لكن الأوبترا نسبيا أنعم
الاتساع الداخلي .. الأوبترا
مساحة الشنطة .. الأوبترا
الشكل الخارجي ، الشكل الداخلي .. هي أذواق طبعا لكن مافيش شك إن تصميم الجين جوه و بره تصميم ثوري
الصاج الخارجي .. الجين تو أكثر متانة
نوعية الدهان الخارجي و كفائته .. الأوبترا أفضل
الفرامل .. الجين تو تكسب و صدقني بفرق كبير ، و مهما يقولوا .. جرب دي و جرب دي و قولي رأيك
التوكيل .. أوبترا منتشر جدا لكن معاملة نسبيا أسوأ من عز العرب اللي أقل انتشارا
قطع الغيار .. طبعا أوبترا .. انت ممكن مع كل نص كيلو جنبة من عند البقال تاخد فانوس أو اكصدام هدية
الكماليات .. طبعا جين تو تتفوق

من الآخر يا أفندم .. لو عايز تحس إنك فعلا راكب عربية بتعمل كل اللي نفسك فيه و مش بتقول لأ و قلبك مطمن على الآخر و انت فيها يبقى الجين تو بس في المقابل هتلاقي قطع غيارها الخارجية سعرها أغلى 30% لكن قطع غيارها الداخلية بنفس أسعار السوق زيها زي البومة بالظبط تقريبا ، و التوكيل مش منتشر لكن معاملته محترمة

أما لو عايز تخليك في الشعبي علشان لما تفكر تبيع تبيع بسرعة ، أو علشان لما لاقدر الله يكون فيه أي مشكلة في العربية تلمها بكام مية جنيه و تكبر دماغك و برضه عربية مريحة مش وحشه و بتجري و واسعة .. يبقى خليك في الكوري عموما أيا كانت الكوري بقى....

[tamerosman]

كلام مهندس ميكانيكا باور .. مجرب العربيتين ...
هنقارن بكل حيادية بين العربيتين .. طبعا أعلى فئة :

التسارع .... جين تو
قوة الموتور .. جين تو
الثبات على السرعات العالية و في الملفات الخطيرة .. جين تو
الوزن .. جين تو أثقل و هتحسها على السرعات العالية خصوصا مع الفرامل
العفشة .. جين تو تكنولوجيا أعلى ، لكن الأوبترا نسبيا أنعم
الاتساع الداخلي .. الأوبترا
مساحة الشنطة .. الأوبترا
الشكل الخارجي ، الشكل الداخلي .. هي أذواق طبعا لكن مافيش شك إن تصميم الجين جوه و بره تصميم ثوري
الصاج الخارجي .. الجين تو أكثر متانة
نوعية الدهان الخارجي و كفائته .. الأوبترا أفضل
الفرامل .. الجين تو تكسب و صدقني بفرق كبير ، و مهما يقولوا .. جرب دي و جرب دي و قولي رأيك
التوكيل .. أوبترا منتشر جدا لكن معاملة نسبيا أسوأ من عز العرب اللي أقل انتشارا
قطع الغيار .. طبعا أوبترا .. انت ممكن مع كل نص كيلو جنبة من عند البقال تاخد فانوس أو اكصدام هدية
الكماليات .. طبعا جين تو تتفوق

من الآخر يا أفندم .. لو عايز تحس إنك فعلا راكب عربية بتعمل كل اللي نفسك فيه و مش بتقول لأ و قلبك مطمن على الآخر و انت فيها يبقى الجين تو بس في المقابل هتلاقي قطع غيارها الخارجية سعرها أغلى 30% لكن قطع غيارها الداخلية بنفس أسعار السوق زيها زي البومة بالظبط تقريبا ، و التوكيل مش منتشر لكن معاملته محترمة

أما لو عايز تخليك في الشعبي علشان لما تفكر تبيع تبيع بسرعة ، أو علشان لما لاقدر الله يكون فيه أي مشكلة في العربية تلمها بكام مية جنيه و تكبر دماغك و برضه عربية مريحة مش وحشه و بتجري و واسعة .. يبقى خليك في الكوري عموما أيا كانت الكوري بقى....

+111111111111

تقييم موضوعى و احترافى جدا

بس مختلف معاك فى نقطتين :

1- الاوبترا عفشتها مش مريحة و مرتين سفرت بيها و كنت قاعد وراء و معايا ناس تانية و نزلنا تعبانيين

2- توكيل عز العرب سىء جدا و ده عن تجربة مش سماعى بما انى مالك لجين 2 و الناس الوحيدة الى بتشكر فى توكيل عز العرببتكون لها اصحاب شغالة فى التوكيل يساعدوهم انهم ياخدو حقهم مش اكتر و غير كده يقولك مافيش قطع غيار و استنى شهر