جين-2 ولا سانديرو استيب واي

[mody21990]

السلام عليكم

انا مهندس و اول مره حشتري عربية و كنت محتار جدا و بعد اللف ثبت على عربيتين بس محتار بنهم جدا

انا عاوزكم تقارنوا بين جين-2 و سانديرو استيب واي طبعا جديد مش مستعمل
انا محتار بينهم جدا و بعد اللف في المنتدى سواء للبروتون و لا الرينو
الجين-2 تتميز
1.موتور اقوي (ده مش مهم اوي انا مش حسابق في خلق الله)
2.ABS, EBD و ده انا شايفه مهم
3. الثبات و handling
4. الاوبشن (انزار -سينسور بارك ,.....)
5. شبابي و جميلة

عيوبها
1. قطع الغيار غلية (انا مش شايفها غالية فوي )
2. و اهم عيين واللي مخليني متردد اصلا التوكيل وتواجد قطع الغيار يعني غالية نعديها انما مش موجوده اصلا دي مشكلة كبيرة و مش كل مره حروخ لجهاز حماية المستهلك
انا عاوز عربية تريحني


السنديرو استيب واي
مميزاتها

1. قطع غيار اللوجان و اللوجان منتشرة
2. توكيل حرامي برده غالي يعني بس قطع الغيار موجوده
3. عربيه شبابي و عجباني
4. فيها ABS

عيوبها
1.الكلاكس حاجه غريبة بجد و تاعبني نفسيا
2. عاليه عن الارض و اعلي من السنديرو العادية و ده حيقلل الثبات وhandling
3. مفهاش EBD و ده مزعلني الحقيقة
4. فقيرة في الاوبشن
مفهاش غير سمعتين و مفهاش انزار و الزجاج الامامي بس اللي كهربا و كده



و الاتنين قريبين من بعض جين-2 ب 86 الف و استيب واي ب 80 الف

و محتار جدا انا مش عاوز اشتري حاجه تتعبني


يا ريت يا رجاله آرائكم و تعليقاتكم و يا ريت يا رجالة الحياديه مش ندافع عن عربية
الاتنين حلويين

و شكرا مقدما و اسف على الاطالة و مستنى المقارنة بقى

[mody21990]

نسيت في الجين-2 عيوب التقفيل

[Dr'AhmZZong]

لولا توكيل gen2 وحش .. لكنت اخترتها ..

أنا دايما مع منطق إنك بتشتري توكيل مش عربية .. توكل على الله و هات رينو

[Sehsss]

فعلا التوكيل مهم فللأسف أنا كمان هاختار الرينو، لكن طبعا كعربية الجين 2 أفضل، وبالتوفيق

[mxz911]

بصراحه فى حاجه حضرتك نسيتها مهمه جدا لصالح الرينو ( سواء لوجان . سانديرو . ستيب واى ) وهيه العلو جدا عن الارض لدرجه انك تنسى حاجه اسمها تحك ف مطب حتى لو محمل العربيه !


اداء الموتور معروف الجين 2 أعلى .. والثبات برضه بكتير .

لو ركبت دى ودى من جوه هتحس ان الرينو (لوجان . سانديرو . ستيب واى ) .. هتحس نوعا ما انها قديمه شويه

فرامل ال ( لوجان . سانديرو . ستيب واى ) جميله على فكره


الباور بتاع الرينو تقيل !! يعنى لو سقت لانوس او فيرنا هتحس بفرق شاسع مثلا !

القعده برضه بتاعت اللوجان غريبه شويه ودى حاجه تحكم عليها بنفسك لكن انا بكلمك من وجهه تجربتى للرينو اللوجان لمده سنتين .

الانتشار :( لوجان . سانديرو . ستيب واى ) انتشارها بيكتر بسرعه وده دليل على انها عربيه اعتماديه

من وجهه نظرى كتير من الناس نظرتهم للرينو ( لوجان . سانديرو . ستيب واى ) انها شاهين حديثه عشان انتشار . قطع غيار . اعتماديه
الاختيار : انا لو مكانك هبقى فى حيره فظيعه وعشان كده قلتلك رأى ومش هقدرلك اقولك انهى احسن من انهى

ملاحظه انا دايما اتكلم على الرينو بالاقواس دى ( لوجان . سانديرو . ستيب واى ) لانهم تقريبا نفس العربيه بالظبط مع اختلاف الشكل وطبعا بتكلم على المانيوال عشان محدش يجى يقولى لا عدد احصنه الاوتوماتيك 110 والمانيوال 90 !!!

[Dr'AhmZZong]

محدش يجى يقولى لا عدد احصنه الاوتوماتيك 110 والمانيوال 90 !!!

بص في احتمالين :

لاما غيروا الموتور .....

أو ممكن يكون الفتيس الاوتوماتيك الجديد زود الأحصنة ......

الله اعلم ........

[mxz911]

http://www.nilemotors.net/Nile/272346-logan.html#post3874117579

مكتوب هنا انه

وتكشف مواصفات "Logan" أوتوماتيك عن أداء محسن لها بفضل محرك أكثر قوة وأعلى تقنيا مكون من 4 إسطوانات مزودة بـ16 صمام لينتج قوة 110 حصان بنفس السعة التي تتوافر للناقل اليدوي وهي 1,6 لتر وبمعدل 20 حصان كقوة إضافية.

بس انا كنت بوضح ردى عشان محدش يجى يقولى لا ده الموتور بتاع اللوجان عالى ويخش فى جدال ف دايما بحاول اتجنت المداخلات دى

[mody21990]

mxz911 Ahmazong Sehsss
متشكر جدا يا رجاله ليكم بس فعلا ان متحير جدا
انا عجباني الجين2 اكتر بس خايف اجبها و تتعبني يعني استهلاك بنزين عالي شويه مش مهم او قطع غيار غالبه حبة برده مش مهم المهم انها تكون موجوده بس
و برده عجباني سانديرو استب واي بس موضوع علوها ده حلو للمطبات وبرده بيقلل الثبات بس توكيلها احسن من عز العرب و طبعا الكلاكس (في ناس شايفه الموضوع ميستهلش و انه بالتعود بس الموضوع قافلني شويه )
ربنا يوفق يا رب

ة مستني آراء تانيه برده

[Sehsss]

العفو يا باشا، فعلا موضوع الكلاكس ده تعود، والساندير اقتصادية أكثر من الجين 2 اللي بالطبع أداءها أفضل من السانديرو، وفعلا الموضوع محير

[dr_radioooooo]

العقل بيقول الرينو عشان قطع الغيار و الوكيل
لكن انا لو مكانك هجيب الجين طبعا

[Sehsss]

العقل بيقول الرينو عشان قطع الغيار و الوكيل
لكن انا لو مكانك هجيب الجين طبعا

بالضبط كده

[Mahmoud_ezzo]

Gen2

[Dawns_Mist]

قطع غيار الجين تو مش عملة نادرة ولا حاجة دلوقتي .. الحمد لله بقت متوفرة و العربية كمان نفسها انتشرت كتير عن زمان .. عندنا في طنطا فيه محلات فيها قطع الغيار الخارجية دي كتير و طبعا بأسعار أحسن من التوكيل كمان ، و اكتشفت إن قطع غيارها الميكانيكية تقريبا نسخة طبق الأصل من عربيتي البومة و دي حاجة مريحة جدا ... و بالنسبة لاستهلاك البنزين بتاعها مش عالي زي ماحضرتك متخيل الناس اللي معاها البروتون بيقولولي استهلاك عادي جدا زي أي عربية 1600 طول مانت مش بتحرق على العربية ..
السانديرو محترمة جدا و أنا أحترم حضرتك إنك جيبت مقارنة متزنه بين عربيتين محترمين .. السانديرو راحة داخلية أفضل نسبيا من ناحية إن العفشة أطرى شوية من الجين تو طبعا مش بفارق كبير ..
أعتقد أنا لو مكان حضرتك هختار الجين تو ..
بالتوفيق للجميع ..

[sherifboo]

حضرتك خايف من العلو بتاع الستب واي على اساس انه ممكن يضعف الثبات بتاعها ..... الموضوع ده اعتقد انه صحيح مع السرعان العالية اوي بس زي ما قلت في بداية الموضوع انك مش بتحب الجري يبقى فيين المشكلة .. على فكرة انا كنت زيك تماما بس اخترت ستب واي بالرغم من ان الجين تو احدث تكنولوجيا بس الواحد في البلد دي يبعد عن اي حاجة معقدة و يجييب ابسط حاجة و ده موجود في الستب واي..موتور ممكن يكون قديم من ناحية التكنولوجيا بس بسطاته دي هتريحك اوي بعدين .. بجانب اني اتلسعت من توكيل بروتون لانه كان معايا ستروين قبل كده وتوكيلهم واحد "عز العرب" فقررت اني ابعد عنه و من ناحية تانية الناس بتشكر كتيير في توكيل رينو .... ده رأيي و ربنا يوفقك في الاختيار

[mody21990]

اشكركم جدا يا رجالة بجد افضل منتدي و افضل ناس في المنتدى ده
انا ميال اكثر للجين2 بس برده لسه الستيب واي في المقرنة و ربنا يكرم
حصلي صلاة استخارة الاول و بعد كده حقرر بإذن الله

Dawns_Mist sherifboo
شكرا جدا لكم