تكييف اللانوس تفوق بجدارة على تكييف ال rb

[shaddadfalcon1]

انا عربيت اللانوس لما يبقي تكييفها متظبط ببقي مشغل علي 1 ومتلج بس للأٍسف كل اما اشحنه ميمكلش شهرين ويبوظ ووالسنه اللي فاتت شحنته ويادوب جيت القاهره وباظ والاسبوع اللي فات شخنته يوم السبت اللي قبل اللي فات والنهارده بشغل لقيت السحب حلو قوي وفي صوت تنفيس كالعاده فعرفت انه خلاص يعني 150 جنيه في اسبوع والمشكله اني كل اما اروح الاقي حاج بتنفس

[SAMEH_FOUAD]

انتوا المشكلة انكوا فاكرين انى بستهزأ بتكييف الهيونداى بس والله ابدا

انا فعلا لاحظت دة , تكييفات الهيونداى كفائتها قلت عن الموديلات السابقة , وكل الناس عارفة كدة

خلى واحد يركب فيرنا ويركب rb وهيونداى النترا 2012 ويقول الفرق

على فكرة صاحبى كان فاكر عندة عيب فى الاول لكن لما ركب الالنترا لاقى فعلا العربية نفس الكلام

انا بس اللى عايز اعرفة ملاك الهيونداى 2012 اتصرفت ازاى فى الموضوع دة

[lost2008]

من تجربتى فى الفيرنا 2009 , طبعا عارفين انها بتنزل من غير فلتر تكييف و بصراحة كان بيتلج على 1 او 2 , لكن بعد مركبت الفلتر مباشرة التبريد قل, و الى اعرفة ان اللانوس مفيهاش فلتر تكييف فيمكن ده السبب.

[SAMEH_FOUAD]

أستاذ سمسم ..
أنصحك لما تركب تاكسي لانوس أو بيض في الصيف و الحر الجامد تبقي تأخد معاك بطانية أو لحاف أو تلبس جاكت

هيونداي عربياتها فيها أمان عالي علشان كده مابيعملوش تكييفات تخليك تتلج و تحس بالبرد علشان بيخافوا علي الناس يجيلها برد

طيب دة لما اركب لانوس

ولما اركب هيونداى اشغل التكييف واخد معايا مروحة توشيبا اربعة ريشة ولا مروحة سقف تفضل انهى واحدة من وجهة نظرك واية اللى عملية اكتر بما انك معاك هيونداى وشايف ان دة افضل حل

لانك كالعادة خدت الموضوع بشكل هجومى من جانبى على الهيونداى ولكن الهدف هو معرفة حل ليس اكتر

[Ultramisho]

بداية واضح ان فيه عيب في تكييف الاكسنت ار بي
معروف ان الهيونداي تتميز بتكييف جيد جدا صحيح ييجي بعد التويوتا والنيسان لكن يسبق الكيا حتى
اللانوس تكييفها معروف عنه ايضا انه مش قوي ده غير انه بيكتف الموتور
معلش اصحاب اللانوس ممكن يزعلوا مني لكن انا بانقل رأيي الشخصي والله اعلم

اخيرا ارجو من الاستاذ أحمد سمير مراجعة ما كتبه ردا على كلام الأستاذ مودي عون
وانا متأكد انه سيعتذر له
لان روح الحب والمودة والذوق هي السائدة في هذا المنتدى والحمد لله
أرجو تقبل كلامي من منطلق تقبل الرأي الآخر
تقبلوا مروري

[mody3on]

يا سمسم يا حبيب الملايين , اللانوس تكييفها قوي جدا وانا مجربه ( دايو وشيفروليه ) بس في الاكسنت والالنترا تحميله عالموتور قليل جدا , ده غير ان الالنترا اكبر من اللانوس كمان , انا مش لاقي اي فرق بين التكييفين ( كل تكييفات الكوري كويسة ) :p

[SAMEH_FOUAD]

يا سمسم يا حبيب الملايين , اللانوس تكييفها قوي جدا وانا مجربه ( دايو وشيفروليه ) بس في الاكسنت والالنترا تحميله عالموتور قليل جدا , ده غير ان الالنترا اكبر من اللانوس كمان , انا مش لاقي اي فرق بين التكييفين ( كل تكييفات الكوري كويسة ) :p

يعنى انا عايز رد نهائى هو دة كدة طبيعى فى الrb صح عشان انا هاقولكوا على صاحبى لما راح التوكيل امبارح قالة اية ؟؟؟؟؟

وبأكد كلامى تانى ياجماعة انا مش بستهزأ بية انا كنت عايز اعرف بس هل هو كدة فعلا ولا دة عيب فردى , وخلاص عرفت الحمد لله

على فكرة تكييف الالنترا 2010 كان احسن بفرق ملحوظ من الالنترا 2012

[waleedraafat]

اظن انه لو زود شحن الفريون من 30 الي 50 جرام وليس اكثر هتظبط معاه

[ahmed_mido1889]

ممكن يكون فلتر التكيف عنده مكتوم لكن في اللانوس مفيش فلتر تكيف اساسا

[S O P H O S]

انا ركبت لانوس موديل السنة لسه حوالي 3000 كيلو
بصراحة تكيف كرهني فنفسي معرفش ليه
بس انا معرفش ده يمكن علشان العربية جديدة ولا ايه هو في هوا بس مفيش تبريد
والله اعلم علشان مفتيش

[hossam_elwani]

مساء الخير ياهيونداوية

طبعا انتوا عارفين انى عملت اختبار لل rb بس كان فى الشتاء

والمهم من اسبوع كدة ركبت ال rb وسوقتها لمسافة 40 كم لمدة يوم واليوم التانى لمدة 35 كم تقريبا وطبعا الجو حر جدا بس ماكنش حر اوى فى الاسبوع اللى فات دة وركبت الrb وكانت مركونة فى الشمس بس مش كل العربية وكان تقريبا النص الامامى متغطى , ودورت العربية وسيبتها شغالة وفتحت كل الزجاج وركنتها فى الظل لمدة 15 ساعة عشان كنت بدور على السايس , عشان كان فية عربية راكنة قدامها والمهم ركبت العربية وجيبت التكييف على سرعة 2 التأثير خفيف مش قوى مش التكييف اللى يخليك ماتحسش بالجو , وعملتة على 3 عشان 2 ماكنش محوق خالص مشيت شوية بردة نفس الكلام مافيش اى تغير , لما جيت مشيت بالعربية فى حتة ظل لقيت العربية حسيت شوية بالتكييف ولما جينا فى حتة شمس لقيت الجو رجع تانى يدوبك فية نسمة هواء ساقعة , المهم قولت عادى جربتها تانى يوم واليوم دة كانت مركونة فى الجراج وخرجت بيها لقيت التكييف عادى جدا بردة مش ساقع , وجيبتة على ثلاثة بردة عشان احس بالهواء ومايخلنيش اعرق

والمهم انهاردة كنت رايح مشوار كدة ماينفعش اخد فية العربية , ركبت تاكسى لانوس مشغل التكييف وانهاردة الجو كان حر اضعاف الجو اللى كنت راكب فى الrb ومش عايز اقولكوا بجد انا كنت متلج فعلا والجو كان تحفة جوة العربية واستغربت جدا

ولما رجعت ركبت تاكسى byd وبردة كان التكييف احلى من الrb وماكنش يرقى لمستوى اللانوس

والمشكلة انى جربت الالنترا 2012 وكانت فى مستوى الbyd بس للانوس افضل

فاية بقى دة ؟؟؟؟؟؟؟؟؟؟؟؟؟؟ هل كل الناس عندها كدة لانى كتير اوى بشوف ملاك ال rb بالذات جايبين التكييف على 3 واى عربية تانية جايباة على 2

وقت ركوب اللانوس كان الساعة 11:30 انهاردة والجو انهاردة كان صعبببببببببببب جدا لدرجة ان خدت التاكسى من قدام البيت من كتر الحر وقوة الشمس
وقت ركوب الrb كان الساعة 3:30 الاسبوع اللى فات

يمكن يكون ضغط الفريون مش مثالى .........

[hazemhassan]

اللانوس تكييفها معروف عنه ايضا انه مش قوي ده غير انه بيكتف الموتور
معلش اصحاب اللانوس ممكن يزعلوا مني لكن انا بانقل رأيي الشخصي والله اعلم

تقبلوا مروري

ياباشا احنا عارفين ان التكيف بخلى العربية بطة وبيكرهك فى السواقة واكيد كل واحد بيعرض سلبيات وايجابيات لعربيتة واللى مايعملش كدة يكون عندة حالة نفسية لكون انه يمتلك عربية ولا يحب احد انو يعرض سلبياتها عشان مافيش فى مصر الحبيبة اى عربيات بدون سلبيات
تقبل مرورى

[semi]

تكييف الفيرنا برضه محترم زي اللانوس
واعتقد والله اعلم ان مسألة جودة التكييف دي بتتوقف على ان العربية نازلة فين
يعني الفيرنا واللانوس بيبقوا نازلين مصر مخصوص
ومعروف ان جو مصر حر
بخلاف باقي العربيات التانية اللي بتبقى نازلة لدول تانية وبتيجي مصر
فمش بتبقى خاصة بمصر ومش بيراعوا مسألة اداء التكييف
برضه الحاجات اللي بتنزل الخليج نفس الكلام
تلاقي العربية قديمة واداء التكييف بتاعها محترم
ودي مجرد وجهة نظر

[misoalex]

شيل فلتر التكييف وجرب التكييف
لان حسب معلوماتى اللانوس مفيهاش فلتر تكيف