اشترى ميجان ٢٠٠٨ ولا اشترى سكودا اوكتافيا ٢٠٠٠

[Marlboro011]

ارجو المساعده من الاعضاء اشترى سكودا اوكتافيا موديل ٢٠٠٠ فوانيس ليدات مانوال حاله جيده ب ٦٨٠٠٠ --- او اشترى رينو ميجان ٢٠٠٨ بانوراما اعلى فئه ب ٦٣٠٠٠ ياريت الافاده بسرعه لانى مقبل على الشراء

[amrelsaqqa]

الاوكتافيا
بس الاوكتافيا دى غالية
انا بدور على اوكتافيا وكان واحد مكلمنى على واحدة موديل 2001 ( يعنى الشكل اللى بعد 2000 ) مانوال فابريقة برة وجوة و فيها خبطة بسيطة في الرفرف الخلفى بـ 68 ! وانا استغليتها وقلت مش هجيب حاجة اغلى من 63 !

بيتهيألى موديل 2000 تيجى في حدود 60 61 ولو حالة نادرة 65 اخرها ويبقى كتير كمان
وممكن تسأل استاذ شريف في موضوعه بتاع تسعير السيارات المستعملة في قسم البيع

[Marlboro011]

اولا متشكر جدا على الرد السريع هيا الاوكتافيا حلوه بس مانوال وكمان فيها فوانيس ليدات مخليه شكلها تحفه والعربيه دى بالذات انا بقالى ٥ سنين بركابها وعارف حالتها لانها مع صاحبى بس ابوه طالب فيها ٧٠٠٠٠وبقول دا كتير جدا عليها علشان كده فكرت فى الميجان ٢٠٠٨ طبعا اتوماتيك وفيها اوبشن رهيب وبعدنا عن ٢٠٠٥ اللى فيه مشاكل

[abogharib]

الميجان هتبقى افضل و الله اعلم ان الموديل قريب يعنى بقالو 4 سنين او 4.5 سنين لكن الاكوتافيا بقالها 12.5-13 سنه يعنى هيبقى مشاكلها اكتر من الميجان لان اكيد طبعا عربيه بقالها 13 سنه ماشيه فى شوارعنا غير عربيه بقالها 4 سنين فقط
مجرد رائى

[Marlboro011]

متشكر جدا لحضرتك وعلى فكره دا كمان رائى

[abogharib]

متشكر جدا لحضرتك وعلى فكره دا كمان رائى

بس اهم حاجه الكشف الكامل على العربيه فى التوكيل

[amrelsaqqa]

الكلام ده صح بشكل عام ، انما بيتهيألى مش صح مع الميجان
الميجان عربية لازم تكون ضامنها ولازم لازم لازم تكون صيانتها كلها في التوكيل
انا عن نفسى مش مقتنع ان مشاكل ال2005 كلها اتحلت في ال2008 والا ماكنش سعر العربية وقع بالطريقة دى كلها
يعنى ايه اللى يخلى عربية زي الميجان يبقى سعرها مستعمل زي النيو اكسنت مثلا ! مع الفرق الرهيب في كل حاجة بينهم ؟

[dodopop2]

+1111111

الكلام ده صح بشكل عام ، انما بيتهيألى مش صح مع الميجان
الميجان عربية لازم تكون ضامنها ولازم لازم لازم تكون صيانتها كلها في التوكيل
انا عن نفسى مش مقتنع ان مشاكل ال2005 كلها اتحلت في ال2008 والا ماكنش سعر العربية وقع بالطريقة دى كلها
يعنى ايه اللى يخلى عربية زي الميجان يبقى سعرها مستعمل زي النيو اكسنت مثلا ! مع الفرق الرهيب في كل حاجة بينهم ؟

[Marlboro011]

اكيد لازم اكشف عليها فى التوكيل ب٥٥٠ عادى اهو نشترى دماغنا وبالنسبه لمشاكل ٢٠٠٥ هيا اصلا ما كنش فى مشاكل لان الشعب المصرى بيخاف من التكنولوجيا ما بيعرفش يتعامل مع العربيه طبعا لان اللغه انجليزى يبقا هوا عمل حاجه غلط ويقول العربيه خرفت والسعر بتاعها الرخيص دا لقله الانتشار بحكم ثقافه الشعب

[amrelsaqqa]

لا الميجان مشكلتها مش بس في مصر، العربية واخدة سمعة في دول العالم كلها ..

معروف ان فيها مشاكل واعتماديتها قليلة لأن التكنولوجيا الجامدة اللى نزلت فيها كانت غير محسوبة وفعلا بيحصل فيها اعطال مفاجئة يعنى ممكن تبقى ماشى في طريقك مثلا وتركن تدخل بنزينة تيجى تطلع تلاقيها كاتبالك مثلا gearbox error
او steering error

وتلاقيها وقفت مكانها ! ، طب اعمللك ايه يعنى ، تلاقى الدركسيون قفل ومش عايزة تتحرك ، وده مش كلام او اشاعات دى حاجات حقيقية وادخل قسم رينو وشوف
او ممكن تبقى ماشى وتلاقي موبينة اتحرقت والعربية ماشية 3 سلندر او 2 مع بعض اتحرقوا عادى جدا والواحدة ب1250 وحاجة استغفر الله العظيم

انا كل اللى اشوفه جاب ميجان ما بتقعدش معاه كتير والاقيه باعها على طول !

على النقيض تماما الاوكتافيا عربية محترمة واعتماديتها عالية و قطع غيارها متوفرة ومش غالية اوى ، يعنى قريبة لليابانى مثلا وزيادة حاجة بسيطة

[hossam_elwani]

2008 واعلى فئه وب ــ 68000 !!!!!!!!! العربيه دى فيها حاجه... السعر ده مش سعرها الحقيقى وكلامى ده من خبرتى فى البحث عن ميجان بحاله جيده حتى 2007 اعلى فئه اغلى من كده

[Marlboro011]

هيا الاوكتافيا ٢٠٠٠ مانيوال سودا وشكلها تحفه بجد لكن مانيوال مش هاسوق ابدا بس ممكن اشتريها واركبلها فتيس اوتوماتيك وسينسور بارك حد يعرف الفتيس الاوتوماتيك بكام ويتغير فين

[amrelsaqqa]

طبعا الميجان ماعليهاش كلام في ناحية انها ركوبة ومتعة سواقة و برستيج وفخامة قول زي ما انت عايز ، بس للاسف عيوبها كدة زي ما قلتلك
انا في نفس الموقف اللى انت فيه بالظبط يعنى بفكر اجيب عربية في حدود 62 الف او هستنى شوية وازود لحد 65 66 بالكتير ودورت في كل العربيات شايف ان الاوكتافيا انسب حاجة في الرينج ده بس طبعا كدة كدة اي عربية من دول لازم يتكشف عليها في التوكيل ايا كان ، لان في ناس بتركب الاوروبى ده وتهينه جدا وللاسف العربيات دى بتستحمل كتير فما بيبانش عليها بسرعة والزبون اللى يشترى هو اللى يلبس بعدين

عموما ربنا يوفقك في حاجة كويسة ويوفقنى انا كمان
انا شايف الاوكتافيا اللى انت بتقول عليها ميزتها انك عارفها وعارف صاحبها بس لو ينزل في السعر شوية لحد 66 حتى ، هتبقى حلوة

[Marlboro011]

فعلا والله سعرها صاحبها بيبعها ومستعجل الظاهر محتاج فلوس

[amrelsaqqa]

بالنسبة لموضوع انك تحول عربية لاوتو ، بلاش منه
اولا هيقلل من سعر العربية جدا بعد كدة انها كانت مانيوال واتحولت
ومش هتلاقى حد يعمللك الشغل ده صح اصلا وكل الصنايعية هيقولك اه واعرف وما تخافش وبتاع ، وبعد كدة هتلاقى العربية لا محصلة اوتو ولا محصلة مانيوال

فطالما انت لسة هتشترى يبقى هات اوتو على طول ، بس اكشف على الفتيس كويس لأن فتيس الاوكتافيا حساس اوى ولازم يتغير له زيت اصلى ومش كل الناس بتعمل كدة