محتار بين اوبل استرا كوزمو 2015 وتويوتا كورولا هاي لاين 2015

[AhmedFarhan]

الاسكودا a7 الفتيس بقى 6 سرعات مش dsg و الموتور 1600 مش تربو

[abokoko]

ممكن اعرف ليه سكودا a7 مش في حسابات حضرتك .. دلوقتي كمان في جيتا بقيت ب 200

غالبا صاحب الموضوع حصر الاختيار ما بين الاسترا والتيوتا
الاسترا اجمل شكلا -التيوتا اسم اكثر انتشارا فى مصر
ولو صاحب الموضوع قابل باضافة اختيارات زى الa7 فممكن يفكر فى الهوندا سيفك

[karimHashish]

المقارنه فأي حاجه لصالح الاسترا طبعاً الا اعادة البيع للأسف لو بتدور علي عربيه تركبها اتوكل علي الله في الاسترا

[abo assal]

دخل الرينو الفلوانس في حساباتك عربيه فوق الممتازه.

[wael salah48]

اوعى تخسر التويوتا

هقول لحضرتك شئ من وجه نظرى التواضعه لانى فى نفس الحيره بس بعد اللف والتدوير و المعاناه ارشحلك التويوتا لييييه بقى
اولا : التويوتا فعلا عربيه محترمه جدا وتصميمها ممتاز
ثانيا: التويوتا فعلا زى الاخوه ماقالوا اعاده بيعها ممتازه زى التجار ما بيقولوا فلوسها فى شنطتها رغم ان فعلا ممكن تكون فى عربيات ركوبتها احسن منها وده بدون تحيز ليها بس المشكله ان فى مصر طريقه تفكير الناس عندنا ان التويوتا سعر بيعها عالى فكده ولا كده الاوبل والاسكودا والهوندا والجيتا كمان بيعهم عمره ما هيكون اسهل من بيع التويوتا رغم انهم عربيات محترمه يعنى المشكله فى طريقه تفكير الناس يعنى كل اللى يعجبك والبس اللى يعجب الناس عشان متخسرش فلوسك فلو العربيه هتخليها معاك شويه خلاص خليك فى الاسكودا او الهوند اانما الاوبل لاء انما لو بتفكر تغير بعد شويه طبعاااا التويوتا انا عن نفسى هشترى التويوتا وان شاء الله و لينا نصيب نعيش يعنى اقل شئ هخليها 10 -15 سنه وممكن اخليها لابنى واجيب عليها لانها عمليه فعلا ارجوا انى اكون افدك

[wael salah48]

نسيت اقول لك الجيتا جميله بس بتحك فى المطبات انما الصراحه ركوبه

[rasmaroon]

اوبل استرا طبعا كفخامة وجودة خامات وثبات وعوامل امان وتصميم ساحر كل سم مدروس الالمان ما بيهزروش خصوصا في معيار الجودة حتى لو هايخسروا مقابل تواجدهم في سوق العالمي الجودة والتكنولوجيا هي رأس مال الالمان سعرها متوافق مع سعرها في أوروبا
واضيف راحة الركاب ومتعة القيادة والاداء علي الطرق ااسترا تكتسح متور ecotech 115 حصان موتور عالي التقنية وعزم اقوي من موتور كورولا وفتيس اوتو 6 سرعات رائع واكثر ما يميز اوبل استرا
توكيل منصور اقل من االفطيم في الاداء ولكنه ملتزم بالضمان وللعلم توكيلات مصر كلها سيءة لضعف جهاز حماية المستهلك امام الشركات الكبيرة

الكورولا عربية لا تساوي سعرها واغلى من الدول الاخري وبها عيوب ولكن شعبيتها وثقافة الناس تجعل المشتري لا يري هذه العيوب الا من يعرف معنى كلمة سيارة
موتور الكورولا ذو 122 حصان لا غبار عليه ومجرب في موديلها السابق بدون مشاكل ولكن اقل تكنولوجي من استرا
فتيس cvvt موفر واقتصادي ويجعل السيارة اقل استهلاكا للوقود وهذا هو هدف تويوتا في موديل كورولا معيار الاقتصاد
قطع الغيار والصيانة السيارتين متساويين
عيوب
1- السيارة ضعيفة من الخارج وحساسة جدا كصاج ودهان ضعيف وده هيؤثر على رونقها بعد سنتين او ثلاثة
2- تم تعديل ارتفاع السيارة لكي يناسب شوارعنا (اول مره اشوف هكذا تعديل في تاريخ السيارات في العالم) حسابات الثبات والتعليق للسيارة اختلفت وشكل السيارة اختلف من الخلف ومن الجانب وزي ما يكون وشها في الأرض، وده حصل لأن موضوع الأرتفاع حرج وهيكون مسمار في نعش هذه السيارة ذات الشعبية الواسعة يعني إرضاء لذوق المستهلك وده في رأيي خطأ فادح ولم يحدث في دولة أخري لنفس الموديل
3- الخامات الداخلية للتابلوه والفرش ما بين متوسطة ورديئة واقل من مستوي تويوتا المعروف وهذا بسبب التقفيل التركي ونسبة المكونات التركية (اليبان هزروا في الموضوع ده) ولي رأيي ان تركيا فاشلة في صناعة السيارات والصناعات المغذية لها
فيه شكاوي من الفرامل واصوات من التابلوه والعزل والتكييف اقل كفأة من موديلات كورولا السابقة
وانا بعتذر اني قارنت اليباني بالألماني على رغم من جودة اليباني لكن احنا بنتكلم على معقل وبلد السيارات في العالم

[rasmaroon]

ملحوظة هيكل اوبل استرا تم تصميمه ليتحمل محرك تربو قدرته 180 حصان واسترا تميل لمعيار الرفاهية اكثر من معيار الاقتصاد عكس كورولا

[Matious33]

غالبا صاحب الموضوع حصر الاختيار ما بين الاسترا والتيوتا
الاسترا اجمل شكلا -التيوتا اسم اكثر انتشارا فى مصر
ولو صاحب الموضوع قابل باضافة اختيارات زى الa7 فممكن يفكر فى الهوندا سيفك

انا فعلا حصرت الموضوع علي العربيتين دول لاني بدور علي الاعتماديه لاني هاستخدم العربيه في شغلي وانا بسوق كتير يعني مينفعش معايا عربيه زي الهوبدا لانها واطيه جدا وال a7 صحبي جابها وجابت موتور بعد 25 الف كيلو وقالولوا اصل ده عيب بنزين رغم انه بيحط 92 زي ماقالولوا .

[denjouan83]

اعتقد مشكله a7 كانت في الموتور التربو 1400 ,, لكن هل صاحب حضرتك ده موتور 1600 الجديد ؟؟

[مهند السحتري]

الكورولا اذا الوسع يهمك
استرا افضل فخامه اعلى وصاج اقوى

[DR.MG]

الكورولا اسهل كالعادة
والتصميم والاختلاف لصالح الاوبل

فعلا
بس فى مشكلة فالاسترا اكبر من مجرد التصميم سىء للكرولا
هى انها بتاخد بنزين 95 ودى اكبر مشكلة تواجة ملاك الاسترا لان كلهم زينا بيحطوا بنزين 92 وادخل قسم الاسترا فالمنتدى و شوف
ومش معقولة تباى راكب استرا المانى 2015 و فيها صوت كركرة وانت ماشى
الكرولا + التصميم اللى علية خلاف فهى تمنها مبالغ فية جدا
حاول تدور اكتر وتدخل فالمقارنة موديلات تانية

[Waseem.Elbialy]

corolla is better .....more durable and can be resale easily

[ahmzd]

رأيي المتواضع : أسترا .. متانة وثبات، شكل وإمكانيات، قطع غيار غالية ولكن معمرة ( وفيه إيه قطع غياره مش غالية ) ، مجربة في السوق المصري منذ عدة سنوات وبلا مشاكل تذكر، سعرها منطقي ومعقول وغير مبالغ فيه، ألماني تجميع بولندي يعني كل معايير الجودة الأوروبية، توكيلها عامل عرض كويس حاليا ( موديل 2015 بسعر 2014 )، شغالة بنزين 92 عادي ( وممكن نتأكد من ملاكها ) .. والله أعلم.

[meemo20032000]

لو ليك أسترا
لو ليك وللزمن كورولا
الرأى الأول:
بس هقولك حاجة الألمان رقم 1 فى الصناعات الثقيلة
يعنى لو فاتك الألمانى ....؟
الرأى الثانى:
حسن السوق لا حسن البضاعة