هوندا سيفيك 2015 مقارنة بباقى فئتها من السيارات..أين هى؟

[ENG.MaRk]

بص يا باشا أنا لما باجي أشتري عربية الشكل بالنسبة لي عامل من العوامل مش السبب الرئيسي اللي هيخليني ماركبش عربية روعة زي ديه !!!
الفلوانس طبعا سوقها ماشي عنب عشان هي عربية محترمة فعلا و أوبشنز روعة من أول الفئة التانية ... بصراحة الفلوانس is a car to buy عشان هي the best value for money ...أنا شايف إنها ناقصها موتور أقوي ... لو ركبوله تربو و عرفوا يوصلوه ل 140-150 حصان مثلا و زودولها esp هتبقي أحسن عربية في فئتها و تحدي ... بالنسبة بقي لثقافة الشعب اللي حضرتك معترض عليها نتكلم بقي شوية في الموضوع ده ... أولا انت في شهر واحد تقدر تقلل مبيعات عربية معينة للنص لو افتيت و قولت إنها مليانة مشاكل زي مثلا نقص الزيت في الفلوانس و الذي منه ... الفكرة يا باشا إن المبالغ اللي بتتدفع في العربيات عندنا مش قليلة خالص ف الواحد بيفكر في أحسن حاجة يجيبها بالمتاح و عشان كدة بمجرد ما يسمع إن في عربية اتنين مختلفين عليها بيبعد عنها ... يعني باختصار محدش بيحب يغامر !!!
بصراحة العربيات أرزاق (اه أرزاق) ... الفلوانس معايا (2011) ما عطلتش ولا مرة و لا حصل فيها أي مشكلة (الحمد لله فضل و نعمة من عند ربنا) و مع ذلك واحد صاحبي كان مشتري عربيته (فلوانس) معايا في نفس اليوم و من نفس المعرض و فضلت مغلباه أربع شهور و باعها في الاخر بخسارة و جاب سيفيك 2010 !!!
اللي أقصده يعني إن العربيات مظلومة جامد في مصر و مستقبلها مش باينله ملامح خالص و تحب أقولك حاجة كمان ... بعد خمس سنين العربيات الصيني مش هتخرج برة المقارنات تاني و سعرها هيلعب في السماء و لو حابب تشوف دليل بنفسك ممكن تتفرج علي (توب جير) ... كانوا عاملين مقارنة بين العربيات الصيني من خمس سنين و دلوقتي !!!

[riko8888]

اعتقد والله اعلم ان هوندا سيفيك 2014 تركى مش يابانى والفئه الاولى فاضيه و ب 195000 اشتريها ليه والاوكتافيا 2015 الفئه الاولى الفاضيه ب 190000

[M.Elwan]

يا جماعة العربية بتبيع في الخليج كويس ده من واقع مشاهدتي في الإمارات والسعودية بس شكلها مختلف من الخلف ومحرك ١.٨ ivtecc




بالمناسبة اللي ما شافش الفيديو بتاع Honda the other side ماشافش اعلانات قبل كده
The Other Side of Honda

[ENG.MaRk]

اعتقد والله اعلم ان هوندا سيفيك 2014 تركى مش يابانى والفئه الاولى فاضيه و ب 195000 اشتريها ليه والاوكتافيا 2015 الفئه الاولى الفاضيه ب 190000

انت متأكد من اللي حضرتك بتقوله ده ؟!
الأوكتافيا أربع فئات
200 و 214 و 222 و 262 !!!

[ENG.MaRk]

يا جماعة العربية بتبيع في الخليج كويس ده من واقع مشاهدتي في الإمارات والسعودية بس شكلها مختلف من الخلف ومحرك ١.٨ ivtecc




بالمناسبة اللي ما شافش الفيديو بتاع honda the other side ماشافش اعلانات قبل كده
the other side of honda

يا باشا اللي هناك مختلفة تماما عن اللي هنا و علي فكرة السيراتو في الخليج خدت أكتر عربية مبيعا في فئتها السنة اللي فاتت !!!

[JapRuleZ]

يا جماعه الموضوع بسيط جدا
العيب طبعا مش فى العربية
العيب فى المصريين
هما اللى بيشترو ال DSG و خدت 4 سنين عشان الناس تفهم
هما اللى كانو بيشترو الصينى زى الهافى لوبو و الكلام ده
معقوله عيب الارتفاع لسه فى ناس فاكراه ده محلول من زمان اوى
اشمعنه لما الكورولا كانت واطيه و رجعو صلحوها مخدش افتكر موضوع التعديل ده قبل كده
ماركات غير موجوده فى السوق زى ال lexus و infiniti
منتشرة بره و هنا لأ
هنا تلاقى الاجانب بذات بتوع السفارات راكبين Honda accord و toyota camry و سايب الbm و merc
تفتكر ليه ؟
يا باشا انت نص الشعب جاهل و عندو امية
هيفكر ازاى
العربية المنتشره هنا لا تعنى شئ و اراهنك ان مصر كله - ما عدا المنتدى هنا بيفكر فى حامل الاكواب و طقم الابانوس قبل استهلاك البنزين و ال Co2 emissions
مش هي حس الكلام ده الا اللى سافر بره
المستهلك المصرى معظمهم لا يفقه شئ عن منتجه بيعجبه اللون و التصميم بيشترى و خلاص مى غرركش ال 1% اللى بيخش عل منتدى هنا


اما الهوندا مقدمتش اى جديد فى العربية
و ده سببه - انها مش محتاجه تقدم جديد لأنها اصلان سابقه العصر بتاعها
اسرع سياره 1600
من اثبت السيارات ال1600 بجانب السوبارو و البى ام
اعتماديه تقارن بالتويوتا
اعتماديع يا جماعه يعنى عربية مش بتبوظ يعنى فتيس و تكييف و استهلاك قطع غيار و الحاجات اللى بتبوظ بسرعه ده فى الاوروبى بس فى اليبانى عيب ان العربيىة تقف او تتعطل الا لو كاوتش مخروم او بطاريه نايمه
تابلوه فَضائى فريد من نوعه غير تقليدى لا يشبهه شئ
الموتور مش هتكلم عليه
بس كده

[superdry90]

ايه الي يخليني اجيب السيفيك لما عندي الاسترا شكل احلي صاج أمتن عربية الماني تقفيل اوروبي مش تركي ثبات ممتاز و معدلات أمان اعلي و خامات انضف و عفشة واتس لينك تضاهيً المالتي الي في السيفيك و كمان سعر اقل مع الملاحظة ان الاسترا برا سعرها أغلي من السيفيك انما منصور طلب من اوبل انه ينزلها بسعر منافس عشان يأكل من السوق و بالفعل كان له ما كان . الاسترا اسما حاليا ماسكة سعر عن السيفيك رغم اعتمادية السيفيك المشهورة و غلاء قطع غيار الاسترا بس دائماً في تاريخ كل عربية بيبقي فيه موديلات ناجحة و موديلات فاشلة زي الكورولا العيون مثلا و السيفيك الحالية!!! هاتلي سبب واحد يخليني اجيب السيفيك بدل الاسترا !!!!! وكيل السيفيك قمة الغباء. دلوقتي حتي لو الاسترا غليت ١٠٠٠٠ برده الناس حتجيبها و مش حتجيب السيفيك لان خلاص السيفيك اسمها وقع انا بكلم عالشكل ده

[superdry90]

سبب فشل السيفيك الرئيسي ان الوكيل اول ما نزلها في ٢٠١٢ نزلها بسعر غالي جدا ب١٧٦٠٠٠ و كانت بنفس تمن الجولف و الاسترا الهاتش .ده غير ان الشكل وحش فا العربية محدش اشتراها فا سمعتها وقعت خلاص يعني حتي لو الوكيل نزل عليها خصم ٢٠ الف برده محدش حيشتريها لان خلاص الناس قفلت من العربية و دي غلطة الوكيل علي عكس منصور الي اول ما نزل الاسترا نزلها ب ١٥٥ سعر رخيص عشان يعمل للعربية سمعة و بعد كده لو رفع السعر زي ما عمل محدش حيقوله حاجة لان العربية انتشرت خلاص و باعت . دي غلطة وكيل زي الجيتا الجديدة بالظبط دلوقتي منزل ٢٢ الف خصم و برده محدش بيجيبها!

[m_love4me]

السيفيك عربيه جباره
لم امتلكها بصراحه لكن ركبتها كذا مره الموديل القديم
وكنت هشتري ال 2015 من يومين بالظبط الهاي لاين
وروحت معرض بي اوتو اتفرج عليها
ما لقتش غير البيز لاين وهي عربيه واحده بس
بغض النظر ان اي عربيه موديل تاني موجود منها كذا فئه وكذا سعر واتفرج براحتك
دي حاجه تحسب علي وكيل هوندا ، فين الدعايه و فين التسويق
وكيل هوندا هو ال موت العربيه

وانا لما ركبت العربيه للاسف اتصدمت جدا فيها من جوا
اولا لو مش مشغل الكونتاكت ، العربيه شكلها سيئه جدا بعكس الموديل القديم لانك مش هتشوف اي انبهار
فرش قماش زي ما يكوم موبر ، هيعمل وبره يعني
ايه دا ؟؟
تابلوه حاولت اقنع نفسي بكلام الناس هنا ان البلاستك من انظف الانواع ومافيش ريحه وبتاع
لكن للاسف ما قدرتش اتقبله نفسيا
فعلا بلاستك شكله سيئ جدا جدا وفي فراغات محترمه بين اجزاء التابلوه و الفواصل بتاعته

كاست اقل ما يقال عليه انه عره ، اه والله شكله عره
فين مفتاح العربيه الشيك ؟؟
فين الستارت انجن

حاجات كتيير اوي ناقصه فعلا
حاجات كتير اوي
اة مش نازله مصر للاسف

انا عمري ما فكرت بالشكل دا
بس لما هدفع 217 الف ف عربيه معلش ف انا مش هروح اغيرها كمان سنه وعلي الاقل محتاج اتمتع بيها
ك واحد كان راكب تيدا و كنت بعشقها جدا ع الرغم من بساطتها المتناهيه
بس بالنسبه ليا ، اجيب التيدا الجديده علي الاقل متقبلها نفسيا اكتر
بعد ما اتصدمت ف السيفيك
اقل ما يقال
يعني اهمال الوكيل و الشركه ف العربيه واضح جدا جدا جدا

ودي حاجه للاسف لازم اخدها بالاعتبار مع ارتفاع اسعار العربيات
و البنزين و قطع الغيار

[ahmzd]

أعتقد والله أعلم أن الوكيل هو السبب الرئيسي في فشل الموديل الحالي من سيفيك لأنه لم يحدث بها أي تغيير منذ 2006 في أساسياتها طبعا ( موتور وفتيس ) ، وحتى التغيير الوحيد الذي قام به فكان كمن زاد الطين بلة، فالشكل الحالي سيء جدا مقارنة بالسابق الذي وصل بالسيفيك إلى القمة فعلا وخصوصا أنها كانت سابقة فعلا - في وقتها - كل سيارات جيلها.. أضف إلى ذلك سعرها المبالغ فيه جدا حاليا في مقابل انخفاض جودتها وقلة كمالياتها وسوء شكلها.. وبالتالي فالبدائل أصبحت كثيرة جدا بنفس السعر وربما أقل وبجودة أعلى وكماليات أكثر.. وآسف على الإطالة!

[swimmer25]

أنا رأيي بسبب السعر فقط
البيز لاين في الكورولا ب 177 ألف والبيز لاين في السيفيك ب 195 ألف يعني فرق كبير
دا غير إن مفهاش خليجي بسبب إنها في الخليج 1.8
نفس الكلام في الخليج السيفيك أقل إنتشارا لنفس السبب وهو السعر وإنها موتور 1.8 وإلا معظم المصريين في الخليج كانوا إشتروها
بس عايز الحق..الغالي ثمنه فيه

أنا لسه عامل مشاركة في موضوع أخر عن إنتشار السيفيك...

اللي قاله كدا بيتكلم من حيث اللي بيشوفه أكتر في الشارع وبس
وخلي بالك إن الهوندا في الخليج أغلى بكتير من الكورولا ومش زي ما الناس فاكرة إن الخليج مبيفكرش في السعر
بالعكس اللي بيشتري كورولا وسيفيك في الخليج مقيمين بس مش مواطنين دا غير مكاتب الإيجار عشان كدا بيدوروا على الأرخص وبالتالى مش هتلاقي مكتب إيجار عنده سيفيك أساسا لأن ركوبتها ليها ناسها
الكورولا شغال إيجار وشغل مواقع مع عمال ومهندسين عشان كدا بينزلوا منها فئة مفهاش أي أوبشن
عمرك شفت عربية دلوقتي بتنزل بمقابض أبواب بدون دهان...بتنزل في الخليج للفئة دي بيلعبوا عليها عشان يبيعوا أكتر
بالترتيب في الخليج في الفئة دي من الأقل للأعلى

كوري
لانسر بومة/ياريس
لانسر شارك
كورولا
سيفيك

شوف كدا الهوندا رقم 4 في السيارات الصغيرة في حين إن الكورولا رقم 14 و إن اللانسر وخلي بالك دي الشارك رقم 36:
Best Affordable Small Cars Rankings | U.S. News Best Cars
وده تقييم تاني
الهوندا رقم 3 والكورولا رقم 9 واللانسر رقم 19:
Best Affordable Compact Cars Rankings | U.S. News Best Cars

طبعا ممكن تلاحظ بعض الإختلافات في المواتير بسيطة بس قريبين من بعض جدا

هي مالها السيفيك اليومين دول ماسكينها تقطيع ليه...ههههههه !

[swimmer25]

يا جماعة العربية بتبيع في الخليج كويس ده من واقع مشاهدتي في الإمارات والسعودية بس شكلها مختلف من الخلف ومحرك ١.٨ ivtecc




بالمناسبة اللي ما شافش الفيديو بتاع Honda the other side ماشافش اعلانات قبل كده
The Other Side of Honda

مختلفة من الخلف ومن الداخل كمان وأنا لما بسوقها مش ببقى عايز أنزل منها

الإعلان جامد..شفت الإعلان ده كمان
Honda Advert: Impossible Dream II 2010 - YouTube

[Mohamed.Hany]

الاسباب في وجهة نظري

١. اخدت سمة انها واطية
٢. سعرها المبالغ فيه جدا مقارنة بالمنافسين
٣. قلة الاوبشنز و الكماليات بشكل غريب
٤. الشكل الخارجي خصوصا من الخلف غير مقبول لشريحة كبيرة من الناس
٥. غلو قطع غيارها بشكل مبالغ فيه
٦. التوكيل دايما متاخر سنة يعني تلاقي كل العربيات نازلة ٢٠١٥ و هو لسة بيبيع في ٢٠١٤ و كمان ٢٠١٣ عامل عليها عروض

[khaled_afandy]

التوكيل فاشل فشل ذريع، هذا هو السبب الرئيسى (من يذهب الى فرع سور نادى الزمالك حيعرف انا قصدى ايه، جتجس انك داخل صيدناوى بتاع الخازندار من طريقة التعامل ده لو لقيته فاتح اساسا، بيقفلوا الساعة 6 و الجمعة قافلين) + قطع غيار غالية + توفير فى المواصفات لزيادة المكسب، يعنى معقول الهاى لاين تنزل ب 4 ايرباج و هى اقل فئة فيها فى امريكا 6 من الأول + عربيات موديل قديم سنة

[Tamer Elkateb]

الاسباب في وجهة نظري

١. اخدت سمة انها واطية
٢. سعرها المبالغ فيه جدا مقارنة بالمنافسين
٣. قلة الاوبشنز و الكماليات بشكل غريب
٤. الشكل الخارجي خصوصا من الخلف غير مقبول لشريحة كبيرة من الناس
٥. غلو قطع غيارها بشكل مبالغ فيه
٦. التوكيل دايما متاخر سنة يعني تلاقي كل العربيات نازلة ٢٠١٥ و هو لسة بيبيع في ٢٠١٤ و كمان ٢٠١٣ عامل عليها عروض

الاستاذ محمد جاب من الاخر. النقطة الاولى بس مش صحيحة لان الهوندا من اول 2013 فيها اكبر خلوص وبالتالى بقت اعلى عربية عن ارض فى فئتها. انا من عشاق السيفيك ودايما رأيى انها العربية اليابانى رقم 1 فى فئتها لكن المشاكل اللى فوق من رقم 2 الى 6 خلت الواحد صعب يفكر فيها. مثلا انا مش فاهم ازاى عربية ب 195 الف جنية مفيهاش مدخل usb وكمان العجل بطاسات!!