أيهما افضل السيارة الدفع الامامى ام السيارة الدفع الخلفى ؟

[MohaMed_Refaat]

كنت عايز اعرف راى الاخوة الاعضاء فى ايهما افضل السيارة الدفع الامامى
ام السيارة الدفع الخلفى

***وايهما تفضل
(علما ان هذا الموضوع لابداء الراى فقط لمن يحب حتى لا ياتى عضو ويقولى اية الفايدة من الموضوع اللى حتطلع بيها ) وشكرا

[MohaMed_Refaat]

انا عن نفسى اعتقد ان السيارة الدفع الخلفى افضل لانها بتكون اقوى وسحبها وعزمها افضل علما انى لم اقد سيارة دفع امامى سوى مرتين وكانت مش عربيتى لذلك طرحت هذاالموضوع .

[midomizo]

السحب الامامى افضل ولسبب لو هو مش جيد مكنش زمانو الشركات نزلتو فى كل العربيات الجديدة وبعدين الدفع الخلفى بيحتاج عزم لدفع كتلة العربة باكملها اما السحب بيكون افضل وبيحكم السيارة بالماتور افضل

[A7MED_PHARMA]

السحب الامامي افضل من ناحيه السحب
لكن في التفحيط والخمسات ..الخلفي طبعا
لكن بوجه عام
تقريبا مفيش فرق
يعني الي يسوق الاتنين..مش هيحس بفرق

[Eng.Geo]

انا افضل الدفع الخلفي وانا شايف انه الافضل
وفكرة انه الامامي اكثر انتشارا مش عشان الافضل ولكن اوفركتير في الانتاج فالمصانع بتحاول توفر
اما بالنسبة لمن هو الاقوي في السحب فهو الخلفي وفي مثال
تخيل انك طالع كوبري وعايز تتطلع حاجة بتزقها ياتري انهي افضل طريقة عشان تطلعها لو شدتها من قدام هتبذل مجهود جبار اما لو زقتها من الخلف فهتتحرك بمجهود اقل
والدليل علي كدة انك لما تكون بتزق عربية حتي مش بتشتغل فبتزقها من الخلف مش بتشدها

[E30power]

الخلفى متعة وسحب اعلى من الامامى بفرق ملحوظ بس انا عندى يمتاز بالقوة وعفشتة تستحمل شوارعنا الحلوة.....ومن رايى الخلفى ميتركبش اقل من 1800 علشان تحس بية......

..........بس الامامى احلى منة فى المناورة كتير والملفات ....

[E30power]

سورى يا جماعة ان الكلام مش رابط مع بعضة......كان قصدى ان الخلفى مناسب اكتر لخدمات شوارعنا الشاقة وفعلا سحبة وقوتة بتحس بيها اكتر من الامامى .....بصراحة متعة عن الامامى كركوبة ......بس عيبة فى الملفات لو واخدها على سرعات عالية بلاقيها بتعمل درفت ولازم تتحكم فيها او تشيل بنزين مهما كانت العربية ثابتة ....عكس الامامى بيكون التحك فيها افضل بكتير وممكن تكمل من غير ما تشيل رجلك من على البنزين....

[Abo_Lina]

مفيش فرق
كان معايا تمساحة دفع خلفي و دلوقتي ميجان أمامي و مقدرش أقول دي دفعها أحسن أو دي أحسن

[kangaro]

عشان محدش يزعل ..


أحسن حاجة 4X4

[alhourriah]

هم عشان ما يبقوش يحيرونا عملوا الدفع الرباعي
الأمامي كويس للسحب بس الخلفي للعزم تكون أفضل
أنا سيارتي دفع خلفي

[kareemhisham]

من الناحية العملية .. الدفع الخلفى افضل طبعا و دة لسبب مهم ..

لان العجلات الورا بتبقى مسئولة عن الدفع بينما العجلات الامامية بتبقا مسئولة عن التوجيه و دة بيدى تحكم افضل فى العربية ككل ..

انما الدفع الامامى بتبقا العجلات الامامية هى المسئولة عن الدفع و التوجيه ..

بالنسبة لموضوع الانتشار فهو فهذا لا يدل على اى نظام هو الافضل .. و الدليل على ذلك ان سيارات bmw كلها دفع خلفى .. و معظم السيارات الرياضية و السوبر رياضية يأما دفع كلى او دفع خلفى

[Sameh]

فى التسارع (الدراج) : الخلفى أفضل فى الثبات عند التسارع لأن وزن العربية بيترمى على العجل اللى ورا ويزود التماسك ويقلل الفاقد ، فى حين فى الأمامى الوزن بيقل من على العجل الأمامى وبتالى الكاوتش يفرك فى الأرض (يأمرك) وده معناه فقد فى القوة ونقصان فى الثبات

فى الملفات : فى الخلفى بيبقا التماسك قدام أكتر من ورا فالعربية بتميل إنها تقفل الملف بزاوية حادة وده ما يعرف ب oversteering ، فى حين فى الأمامى عشان التماسك اللى ورا أعلى من الخلفى فالعربية مابتقدرش تقفل الملف أوى وبتضطر يا إما تهدى السرعة يا إما الملف يفتح منك وده إسمه understeering ، وعشان كدة الدريفتات بضهر العربية أو ما يعرف بال e-brake بتبقا أسهل أوى فى الخلفى لأن بسهولة تقدر تخلى العجل الخلفى يفقد التماسك حتى لو ماستعملتش فرامل اليد من أصله يكفيك موتور قوى وقرص جامد والعجل يفرك والعربية تبدأ الدريفت من الخلف

فى المطالع والكبارى : العربية بتبقا مايلة للخلف يعنى الوزن بيتشال من على العجلات الأمامية ويترمى على العجلات الخلفية ، وبالتالى نرجع لأول نقطة تانية ونلاقى إن الخلفى هيبقا أحسن عشان التماسك هيبقا هايل مهما كان التسارع وإنت طالع ، فى حين فى الأمامى مش هتقدر تعمل تسارع عالى لأن العجل أكيد هيفرك وممكن العربية تروح منك يمين وشمال .

الصيانات : طبعا بدون شك الكورونا والكردان صيانتهم أقل بكتييير من الكبالن

وضع الموتور : فى الأمامى وضعه عرضى بالفتيس بالكبالن وده يخلى العربية من قدام أتقل بكتير من ورا ، فى حين فى الخلفى الموتور وضعه طولى وبيبقا الفتيس تقريبا فى نص العربية غير الكورونا اللى ورا بوصلاتها ، بيكون توزيع الوزن على العجلات الأربعة أفضل بكتير من الأمامى وده يعزز الثبات فى الملفات وفى الفرامل الشديدة

بإفتراض إن إحنا راكبين عربية بموتور قوى قول مش أقل من 2000 سى سى ، يبقا الأفضل على الإطلاق هو الرباعى ثم الخلفى ثم الأمامى .

[nab!l]

كلام زى الفل
بس اعتقد فى السحب الامامى احسن

[د.محمود صلاح]

السحب الأمامي الموتور بالعرض يعطى مساحةأقل للكبوت وأفضل للإنسياب الهوائى ايرودايناميك

[maka]

الصيانات : طبعا بدون شك الكورونا والكردان صيانتهم أقل بكتييير من الكبالن

مش داخلة دماغى الحتة دى , لان طول عمر الكبالن ارخص من الكورونا و ملهاش زيت كل شوية تكشف عليه