خبراء المنتدي، ارجو الإفادة.. محتار جدا بين تلك السيارات

[Beessobeesso]

خبراء المنتدي، ارجو الإفادة.. محتار جدا بين تلك السيارات :
1- هوندا سيفيك 2009، و علاقتي جيدة جدا بكل من في التوكيل و ممن لهم ورش خارجية للهوندا..
2- رينو فلوانس 2014..بس خايف من اسعار قطع الغيار، و ال Re-sale
3- تويوتا كورولا 2013 الياباني.. عربية ممتازة بس مبحبش شكلها من برة و لا من جوة.
3- اجي علي نفسي شوية و اجيب نيسان جوك 2013..بس صغيرة من جوة.
4- اجي علي نفسي اوي و اجيب سوبارو XV 2014.(و انا نفسي اصلا حاجة SUV علشان شوارع مصر).
5- اجي علي نفسي اوي و اجيب كيا سبورتاج 2012.
6- اجي علي نفسي اوي و اجيب لانسر شارك زيرو.
7- اجي علي نفسي اوي و اجيب رينو كابتشر كسر زيرو.

ارجو الرد سريعا لاني حتجنن :)
و شكرا مسبقا علي مجهوداتكم :)

[salam100100]

رائ متجيش على نفسك
مش مستاهله الواحد يعصر نفسه ويلم ثمن العربيه ويبقا طول الوقت خايف عليها وفلوسها مش راضيه تبرد

متلوحش نفسك مش مستاهله

[egyptiandiver]

It's either 1, 2 or 3

[Beessobeesso]

رائ متجيش على نفسك
مش مستاهله الواحد يعصر نفسه ويلم ثمن العربيه ويبقا طول الوقت خايف عليها وفلوسها مش راضيه تبرد

متلوحش نفسك مش مستاهله

انا عارف ان عندك حق, بس انت عارف الواحد مننا اللى بيعشق العربيات لما نفسيته تتفتح فجأة على تغيير عربيته و تبدأ المقارنات و تبدأ الأمال تزيد d:
بس شكرا جدا على النصيحة.. لو كده بقى تنصح ب ايه من أول ثلاثة :]

[Beessobeesso]

شكرا جد للرد, بس انت لو مكانى تختار انهى واحدة ؟؟
1- هوندا سيفيك 2009، و علاقتي جيدة جدا بكل من في التوكيل و ممن لهم ورش خارجية للهوندا....(مشكلتى الوحيدة هنا ان هى عربية بقالها 8 سنيين فا خايف أصرف عليها كتير)
2- رينو فلوانس 2014..بس خايف من اسعار قطع الغيار، و ال Re-sale .......(هنا الفلوانس تكسب فى عدد السنيين غير انها عربية محترمة جدا, بس زلى ما قولت خايف من اسعار قطع غيارها و ال Re-sale..غير انى لما حبيت اشوف لو جبتها و ركبتلها شاشة اندرويد بكاميرا و كده لقيت انها مكانها حيبقى وحش و بعيد عن مستوى ايدى (التاتش)ز
3- تويوتا كورولا 2013 الياباني.. عربية ممتازة بس مبحبش شكلها من برة و لا من جوة. ...فعلا حبقى ساعتها اختارت اختيار عملى بحت لحاجة مش قادر احب شكلها و لا تابلوها..

علشان كده فكرت فى ال XV و السبورتاج بالذات..حتعب شوية تقسيط او كده بس حبقى جبت حاجة تقعد معايا شوية حلويين و فى نفس الوقت عالية و ركوبة ...

[svneleven]

كل عربية فيهم هتتنازل عن حاجه فيها. المشكلة انك مش عارف تتنازل عن ايه. حدد اولوياتك اللي ما ينفعش تتنازل عنها و ساعتها هتعرف انهي عربية تشتريها. يعني مثلا انا واحد اهم حاجه عندي العربية تبقي ممتعه في سواقتها. يعني اختياري هينحصر في الهوندا و السوبارو. و كمان تعبت من المطبات. يبقي هاخد السوبارو مع علمي الكامل بعيوبها من ضيق الشنطة و زيت الفتيس و الفتيس ال cvt الرخم و تيل الفرامل اللي بيعد 10 و الا 15 الف.

[salam100100]

كورولا , انا معاك شكلها مش احسن حاجه لكن عمليه

[borio1704]

فعلا.. لازم تحدد الأول انت عايز إيه من العربية... دي أهم حاجة .. الباقي كله ييجي بناء على الكلام ده.

أنصحك تدخل على الموضوع ده... ممكن يسهل عليك..

https://www.nilemotors.net/Nile/329150-a.html

وعموما.. لو خايف من سعر إعادة البيع... فأنا عايز أوضحلك نقطة مهمة...

سعر إعادة البيع هو ترجمة فورية لمدى رغبة الناس في العربية.. والعربية بتبقى مرغوبة لما أصحابها يكونوا مبسوطين منها.


إمتى تبقى مبسوط من العربية؟؟؟

لما أعطالها تبقى قليلة..
لما قطع غيارها تكون متوفرة.. لإنها غالبا بتبقى منتشرة أو الوكيل بتاعها محترم..
لما ما تغلبش في صيانتها وتلاقي أغلب الميكانيكية بيفهموا فيها..
لما ما تكونش عايزة زيت مخصوص ولا بنزين مخصوص ولا أي حاجة مخصوصة...
لما تكون مش مكلفة في تشغيلها.. موفرة في البنزين.. صياناتها قليلة أو رخيصة..

حد جاب سيرة أداء؟؟
لأ..
حد جاب سيرة ثبات؟؟؟
لأ
حد جاب سيرة أوبشنز؟؟
لأ

من الآخر .. العربية اللي سعرها عالي في الريسيل هي اللي صاحبها مرتاح البال.

ابعد عن الأوروبي عموما.. لإنه فيه أغلب المشاكل اللي فوق دي.

...