النوبيرا ولا الاكسنت

[ezzatfox]

هو حضرتك عايز اية من التكييف اكتر من انك تشغله فى عز الحر على 2 ويديك المطلوب ..هواء ساقع...

واية العلاقة بين قوة الشاسيه...والعربية تكون من تحت محميه؟؟؟؟

حضرتك انا معاك ان تكنولوجيه النوبيرا قديمة بس عمرى ما حسيت بكدة...ودوسة البنزين فيه لها حساب اوى وبتخلى العربية تطير ما شاء الله...وبتبان اوى بعد الميه...يعنى انا بجيب من 100 ل 160فى وقت قليل جدا وانا مسترح وربنا يسطر طريقنا...(العربية مش موديل 60 ياباشا ..العربية حقن الكترونى 2 كامة علوية)

انا معاك ان فرامل النوبيرا ضعيفة..ولكنها ليست بفرامل عجلة او تكتوك يعننى مش وحشة ...لو كبست العربية هتقف مش هتقول لا

ومعاك كمان فى نقطة ان الصاج ضعيف...الصاج فعلا ضعيف خوصوا الرفرف الامامى...بس مش دى اللى تعوقنى عن امتلاك العربية ..

بالنسبة للاستهلاك انا مجربتش النيو اكسنت بس انا بروح مدينة الشروق وبرجع ب 5 لتر مع العلم انى ساكن مكرم عبيد..

نيجى بقا لحتة واطية وبتحك...مين اللى قلك الكلام دة انا عربيتى ياما حملت فيها بنى ادمين ومشيت فى ...... الحتت سواء التوفيقية او الحرفين او عين شمس..وعمرها ما حكت...الرك على السواء مش العربية...امال بتوع السيفيك با يعملوا اية

مش فاهم اية موضوع الجيل التلت والرابع ولكلام اللى مش بيأكل عيش دة...

عيوب النيو اكسنت الحقيقية..

1 ضيقة خصوصا الكنبة الخلفية يعنى لو معاك عائلة كريمة مش هتستريح
2 العربية ثباتها مش تمام على السرعات...يعنى هات بيها 160 وهات بالنوبيرا 160 واحكم انت
3 العربية شكلها مش ظريف من الخلف ودى الحقيقة وجهة نظرى الشخصية
4 توكيل اللهم احفظنا يعنى لاقدر الله لو حصل حاجة فى العربية هتدوخ 7 دوخات..

عيوب النوبيرا:
1الفرامل مش قد كدة
2 العربية كبيرة جدا حاسس انها مش عملية...يعنى لو رحت مثلا سوق او غيرو مش هتسعفك (وجهة نظرى)
3 الصاج ضعيف
4 الطنابير مش كويسة...الا ازا اتغيرت بطنابير بريمو افضل كتير زى مقال المهندس ممدوح

الى صاحب الموضوع...ياريت فعلا تروح تركب دى وتركب دى فى اى معرض والحكم ليك طبعا

شكرا لمرورك يا استاذ احمد
و اللة انا عارف ان العربية مش موديل 60 و لا حاجة بس بردوا فى احدث من الانجكشن العادىالموجود فى النوبيرا زى ما حضرتك عارف.. و طالما احنا بنقارن بين عربيتين يبقى ميزة التكنولوجيا الحديثة لابد من ذكرها لانها عامل مهم لا يستهان بة .
تقريبا انت اكدت معظم كلامى و وصفك لعيوب النوبيرا فى قدر كبير جدا من المصداقية و الفهم .
بس ليا تعليق على كلامك عن النيو اكسنت
بالنسبة لضيق الكنبة اللى حضرتك ذكرتة ممكن يكون صح لو اتقارن بالنوبيرا انما لو بصيت على باقى العربيات اللى فى حجم الاكسنت هتلاقيهم زى بعض تقريبا و لو فى فرق لن يتجاوز 5سم على اقصى تقدير ، و بعدين ما حضرتك معاك العربية واسعة و كبيرة و مع ذلك انت ادرجت كبر حجم العربية من ضمن العيوب !!!
بالنسبة لموضوع الثبات انا مش متأكد منة بصراحة فمش هفتى فية و يمكن كلامك يكون صح و تكون النوبيرا ثابتة اكتر على 160 .. بس اللى انا متأكد منة انى مش هحتاج السرعة دى فى حاجة انشاءاللة .
بالنسبة للشكل دى طبعا مسألة اذواق و عشان كدة مينفعش نقول عيب لان فى ناس تانية رايها و ذوقها غير حضرتك.
بالنسبة للتوكيل لو حصل حاجة فى العربية مش هتدوخ و لا حاجة لان قطع غيارها موجودة جوة التوكيل و برة التوكيل و مفيش اكتر من مراكز خدمة هيونداى و المراكز المعتمدة على مستوى الجمهورية كلها .
و تحياتى لحضرتك

[night_whisper]

أنا شايف النوبيرا أفضل
بس لازم حضرتك تركب الأثنين و تشوف مين اللى حضرتك مستريح فيها أكتر
و ربنا يوفقك فى الأختيار

[ahmad--ezzat]

بالنسبة لموضوع الثبات انا مش متأكد منة بصراحة فمش هفتى فية و يمكن كلامك يكون صح و تكون النوبيرا ثابتة اكتر على 160 .. بس اللى انا متأكد منة انى مش هحتاج السرعة دى فى حاجة انشاءاللة .
بالنسبة للشكل دى طبعا مسألة اذواق و عشان كدة مينفعش نقول عيب لان فى ناس تانية رايها و ذوقها غير حضرتك.
بالنسبة للتوكيل لو حصل حاجة فى العربية مش هتدوخ و لا حاجة لان قطع غيارها موجودة جوة التوكيل و برة التوكيل و مفيش اكتر من مراكز خدمة هيونداى و المراكز المعتمدة على مستوى الجمهورية كلها .
و تحياتى لحضرتك

شكرا للرد..بالنسبة لموضوع الثبات دة مهم بالنسبالى ...لانى بينى وبين حضرتك انا كتر بسافر وبمل اوى لما امشى على 100 120 الفجر...بحب اخلص...وخصوصا انى حافظ الطرق الحمد لله الى حد ما فده بيساعدنى انى اجرى..

بالنسبة لموضوع التوكيل هو فعلا فى برة التوكيل...بس للاسف لو عملت حاجة برة هتخرج برة الضمان...ولو العربية لقدر الله فيها حاجة..هتتعب اوى مع غبور...وفنفس الوقت استحاله تغير برة..دة يبقى حرام طبعا..

وشكرا لمشاركة حضرتك

[Morieno]

اى حاجه غير الكوريى يبقى افضل
بس لو هتشتر كوري يبقى دايو
وهتلاقى مليون واحد غيرى يكتبولك كتب عن الفروق والمميزات
انا بس اعرف اقلك عن تجربة 90% من الكورى اى دايو هتبقى افضل من المماثلل لفئتها فى الكورى اللهم الا الكيا (والحدق يفهم)
هى الوزنه كدا
كورى ولا يابانى ولا المانى ولاغيره
الاجابه كورى
يبقى السؤال دايو ولا .......
الإجابه دايو
على فكره انا جربت امتلاك الاتنين الكورى(الدايو والـ.....)

[moudy88]

تقريبا ده عاشر موضوع يتعمل مقارنه بين العربيتين ...انا مالك للعربيتين ...العربيتين مش نفس الفئه ياجماعه ..الاكسنت من فئه الانوس والافيو ..والنوبيرا من فئه الاوبترا والالنترا ...وماينفعش ابدا ابدا نقارن الوسع مابينهم ...ونقول النوبيرا اوسع !!!! لان الاكسنت لو بقت اوسع هاتخرج عن فئتها
ثانيا : تكييف النوبيرا اقوى من الاكسنت ولكن الاكسنت انقى
التكييف لايؤثر في الاداء بالنسبه للاكسنت مقارنه بالنوبيرا
ثالثا : الاكسنت اسرع كانطلاق من 0 -100 لكن النوبيرا افضل في التسارع بكثير على السرعات العاليه بعد ال 100

يكفي اني اقول ان النوبيرا كانت جايبه 190 على 5,3 ار بي ام والاكسنت 180 على 6 ار بي ام ...مع العلم ان النوبيرا اوتوماتيك والاكسنت مانيوال
رابعا : الصاج في الاكسنت افضل
خامسا : الارتفاع عن الارض لصالح الاكسنت...يكفي ان النوبيرا لو حملتها بتحك في الاسفلت !!!!!!!!!

ارجو اني اكون افد

[sameh127]

انا عندي فى النوبيرا اقدر اخلي كل زجاجها يشبر لما اشغل التكييف الساعة 3 ظهرا لدرجة ان محدش يقدر يشوف مين بداخل السيارة و اخلى كل مفاصل الشخص اللى قاعد فى العربية توجعه لدرجة انه يطلب مني اغلاق التكييف قائلا حرام عليك يا أخي. يا ترى ده موجود فى الأكسنت؟
انا سوقت اكسنت و الانترا و اكسل و جيتز و ملاقيتش وجه مساواة.
اما بالنسبة للوزن فهذه القيمة المذكورة قد تكون غير صحيحه لحد كبير.
طب بص ...إفتح كبود دي وكبود دي و شوف فرق وزن كل كبود منهما و بص لحجم الشاسيه و الموتور و الجيربوكس الأوتوماتيك. و حجم المقصات. و حجم و خامة قواعد الموتور و الجير.دا الموتور له 3 قواعد ارتكاز و فى الهيونداي 2 فقط فرق شاسع .امسك المساعد الأمامي لكل من النوبيرا و الأكسنت ده في يد و الأخر في اليد الأخرى و شوف فرق الوزن و انت بنفسك حتحكم.بلاش سيبك من اللي فات ده كله .خد بدي مطب و خد بالتانية مطب و احكم .بلاش سوق الإثنين و خش اي دوران بالسرعة اللي تعجبك و شوف مين اللي حيعجب.

[fouady]

أنا شايف النوبيرة تكسب مستريح مع احترامي لل ناس التانية أنا ركبت الاتننن النبرة واحش بصراحة وال accent مش وحشة طبعا بس النوبرا جامدة قوي بصرحة خصوصا el manual جامدة جدا

[bmw323]

هرشحلك النيو أكسنت

[Eng.Geo]

انا شايف ان الاتنين كويسين بس في عيوب في ده وعيوب تانيه في الاخري شوف انهي اللي ينفع تتماشي معاها
عيوب النوبيرا:
1 الصاج ضعيف
2 ارتفاعها قليل جدا ومع التحميل بتحك في كل المطبات وده راجع برده لقاعدة العجلات الكبيرة
3 عريضة جدا و طويلة وده مايتنفعش في الزحمة
4 تكنولوجيا الموتور قديمة بس مش مؤثرة
5 فرامل ضعيفة
6 التكييف يؤثر مع السحب بس بصورة قليلة
7 تقفيل مصري مش كوري
8 بعد دخول لانوس دايرة شيفروليه وانفراد نوبيرا باسم دايو في السوق المصرية وقلة الطلب علي نوبيرا فممكن يتوقف انتاجها او تبقي تحت اسم شيفروليه ده هياثر بعد كدة مع التوكيل من حيش الاهتمام وما الي ذلك وده مش مؤكد
7 و 8 عيوب غير جوهرية في النوبيرا نفسها
عيوب الاكسنت:
1 عفشة ناشفة
2 الصاج الي حد ما ضعيف بس اقوي من النوبيرا
3 مساحة داخلية اقل من النوبيرا وده لانهم مش نفس الفئة
4 كنبة ضيقة
5 توكيل رخم
6 شنطة اضيق من النوبيرا
7 انا حاسس ان زجاج العربية ضعيف بس مش عارف ده احساس صح ولا لأ
8 العزل ضعيف وده وجهة نظري
انا لو هجيب فهجيب الاكسنت لان من اكتر العيوب اللي مش بحبها ان العربية تحك في اي مطب وده بياثر عليا جدا لدرجة اني ممكن اتعصب واتنرفز جدا بسبب ان العربية اتحكت في مطب ....وجهة نظر
غير كدة انا بحب النوبيرا جدا وهي عربية تستحق الاحترام