ضرورى يا شباب مقارنه جامده هوندا سيفيك و لا مازدا 3 2010

[okacha]

محتار بين السيفيك 2009و المازدا 3 2010 الجديده الكامله
كنت عاوز اعرف اراء الخبراء فى الموضوع ده عشان مش عارف اقرر خالص
عايز اقارن بينهم من حيث كل حاجه اداء و عزم و امكانيات و قيمه مقابل سعر و توافر قطع الغيار و سعر اعاده بيع و تكنولوجيا و مشاكلها لو حد يعرف و جرب .شكرا سلفا

[Terrible_DaRsH]

المازدا 3 السيارة الشبابية الاولى فى مصر من حيث كل حاجة خاصة ان سعرها مش زى الجولف .

و لكن السيفيك السيارة اليابانى الوحيدة التى تتفوق على اختها الصغيرة مازدا 3 .

[Eng.Sameh]

أهي دي المقارنات الجامدة ولا بلاش ...
مبدأياً .. سواء دي ولا دي ... فقد أحسنت الأختيار لأن كلاهما في قمة الروعة ونفس المستوى في معظم الحاجات ... عن نفسي أنا اخترت مازدا3 لتفوقها في نقاط ليست قليلة... وهقولك النقاط دي واسباب أختياري لمعشوقتي مازدا3 بس بالليل لما أفضى إن شاء الله

[okacha]

عندك حق يا درش فى كلامك انا حاسس كده برضه.
و مستنيك يا جستس تقولى (الزتونه)بتاع المقارنه دى عشان تايه بينهم .
و ميرسى على الردود يا شباب.

[Fadi Ezzat]

بصضراحة الاتنين مختلفين فى القيمة السعرية

[okacha]

شكرا على مشاركتك يا فادى بس ياريت توضحلى وجهه نظرك فى اللى قلته لو سمحت.

[Fadi Ezzat]

يعنى مثلا المازدا 3 اعلى فئة ب 155
والسيفيك اعلى فئة ب 180
فرق كبير اوى
بس السيفيك تتفوق فى اجات كتير بصراحة

[okacha]

بس انا شايف ان التكنولوجيا تكسب فى المازدا و لا ايه رأيك؟
و بعدين الصراحه بالنسبه للسعر انا شايف انه حلو على الهوندا بالنسبه للموتور لكن السعر اللى بتقوله انا مش عارف هو صح و لا لاعشان فى سمارت قالى اعلى فئه ب 170الف و الصراحه لو الكلام ده صح هتبقى الهوندا فعلا احسن .

[Eng.Sameh]

أنا جيت .. وهقولك إيه هي الزتونة اللي خليتني فضلت مازدا3
مبدأيا .. أنا حاجز ( وعلى وشك الأستلام ) مازدا3 فولي لوديد 2009 اللي هية أعلى من الأيرو ( بتزيد فرش جلد - مثبت سرعة - بلوتوث - 8 ايرباج - ESP - حساسات ركن - وحجات تانية ان شاء الله اقولهلكم تفصلا لما استلم ) بس مش الشكل الجديد لأن بصراحة الشكل الشكل الجديد أنا شايفه مش احلى من اللي قبله إطلاقا وعلى فكرة ده راي معظم اللي شافوها سواء في مصر أو في الخارج وعموما الشكل ده أذواق والشكلين كعربية واحد .. نفس الموتور والعفشة والشاسية....

نيجي بقه لأسباب تفضيلي للمازدا3 على السيفيك رغم أني بردو معجب جداً بالسيفيك وكنت محتار جدا زيك لحد ما اخدت القرار ...

1 - كشكل عجباني جداً وشايف أن شكلها يجمع بين الرياضي والشياكة والفخامة

2 - فتيسها الأستيبترونيك ناعم جدا ومشهود له بالكفائة العالية - لكن السيفيك رغم أنه بردو فتيسها ممتاز لكن اوتوماتيك فقط

3- تعليق المازدا3 يجمع بين القوة والنعومة وهو من شركة فورد ، وأنا شايف انه يتفوق على نظام التعليق في السيفيك وكمان السيفيك أوطى من المازدا3

4 - الكماليات والتكنولوجيا اللي في المازدا3 أعلى من السيفيك حتى الكاملة

5 - في الخامات الداخلية المازدا3 ( خاصة الفولي لوديد ) اعلى نسبياً من السيفيك الكاملة

6 - موتور المازدا3 ممتاز جداً يجمع بين القوة والهدوء ولكن موتور السيفيك اقوى ، بس أنا شايف أن قوة المازدا3 كفاية قوي وفرق القوة في السيفيك شايفه مش فارق للدرجة

7 - سعر السيفيك بصراحة مبالغ فيه جداً ورغم أن المازدا3 تتفوق عليها من وجهة نظري الا انها أقل في السعر ، يمكن ده راجع إن التوكيل مش حاكم سعرها وكل اللي في السوق خليجي ويمكن لو التوكيل كان مهتم بيها كانت هتكون نفس سعر السيفيك ، بس عموما احنا المستفيدين من غباء التوكيل لأن سعرها كده ممتاز وحتة الصيانة بقت محلولة وبتتعمل في اماكن كتير متخصصة في العربية ، أحس من ان الواحد يدفع 30 أو 40 ألف زيادة عشان التوكيل وفي الىخر ولا ليه لازمة ، ونقطة القيمة مقابل السعر دي من أهم النقاط التي ترجح وبشدة كفة المازدا3

وأخيراً المازدا3 في معظم الدول لها اليد العليا على السيفيك ، وكمان تقييمها أعلى في WhatCar ، المازدا3 واخدة 4/5 والسيفيك 3/5

- دي اسباب تفضيلي للمازدا3 ومع ذلك أنا بحترم السيفيك جداً وزي ما قلتلك أن كنت محتار بينهم لفترة طويلة ، وبردو شوف أنت ميال لمين أكتر نفسياً وأتوكل على الله ، وفي كلا الحالتين فهو أختيار ممتاز وبالتوفيق إن شاء الله

[Samah AbdAllah]

لو زى ما بتقول كده تبقا فعلا المازدا جامدة

[okacha]

ادى الزتونه و لا بلاش يا عم جستس.... انا قعدت مستنيك و قلت انام و اصحى اشوفك قلت ايه ...الصراحه مستعجل على العربيه و فى نفس الوقت محتار.... بس عموما انا من الاول و انا ميال للمازدا اكتر.. بس فعلا موضوع الشكل ده موضوع نسبى يرجع للذوق مش اكتر و مع ذلك انا معاك فعلا انه الشكل القديم احلى فى بعض النقاط الخارجيه بس برضه الجديده تتفوق فى بعض النقاط الداخليه .....بس انا اول مرة اسمع عن الفولى لوديد دى .ياريت بس توضحلى ايه الزيادات اللى فيها و منين و بكام عشان كده انتا رجعتنى بكلامك خطوة لورا و هتخلينى اعيد حساباتى مع القديمه قبل الجديده.... بس عموما كده خلاص السيفيك اتكنسلت .و حاليا استقريت على المازدا ان شاء الله ناقص بس اشوف القديمه و لا الجديده ياريت تفيدنى و شكرا جدا جدا على ردك يا جستس.

[Bossy_Fadl]

هو انا اعرف ان السيفيك احسن بكتير

بس كلام البشمهندس سامح يخليك تفكر مرتين لاني فعلا مكنتش اعرف ان المازدا جامده اوي بهالشكل

بس ياريت فادي يوضحلنا وجهة نظره ليه شايف ان السيفيك بتتفوق في حاجات كتير

[Ahmed Samy]

انا كنت هاقول سيفيك ...

بس بعد الكلمتين بتوع الفلي لودد دول .....


فكر تاني .....وتالت ....

[okacha]

ميرسى لمشاركتك يا بوسى و يا احمد ...و فعلا الموضوع لازم يتفكر فيه تانى و تالت عشان هتفرق جامد و ربنا يستر .

[Fadi Ezzat]

ك وكمان السيفيك أوطى من المازدا3

انا عايز اقولك حاجة ياجستس
ان المازدا 3 اوطى من السيفيك
المازدا 3 ارتفاعها عن الارض 14.5
والسيفيك ارتفاعها 15
بص فى ابروشور بتاعهم