أشترى نيسان صنى واللا رينو لوجان

[Egyzizo]

بالرغم ان العربيتين مش من نفس الفئة ، لكن هأقول لكم على ظروفى وأرجو النصيحة علشان أنا عايز أخلص لأنى وصلت لمرحلة شد الشعر فى الحيرة ..


ميزة الصنى بالنسبة لى :
مركز خدمة ومعرض تحت البيت
عربية يابانى قيمة وسيما
أوتوماتيك


عيوب الصنى اللى شفتها حسب قراءاتى:
استهلاك بنزين عالى نسبياً
كنبة خلفية ضيقة

ميزة اللوجان بالنسبة لى:
سعرها مناسب
واسعــــة
اقتصادية فى استهلاك البنزين

عيوب اللوجان:
خايف تبقى شعبية وتقلب تاكسيات
مافيش منها أوتوماتيك
أقرب مركز صيانة ليا محتاج سفر ساعتين

[amr.elsayed]

يا زيزو انت سألت ورديت على نفسك شوف انهى عربية
تلبى احتياجاتك اكتر وطبعا الصنى يشترط الحالة

[Egyzizo]

ما هو عشان أنا محتار ، يا ريت تحطوا نفسكم فى ظروفى وتساعدونى فى الاختيار ..

وأنا باتكلم عن الزيرو سواء فى الصنى أو فى اللوجان.

[CryptonX]

انا افضل الصني و خصوصا بظروف حضرتك الي قلتها .

[amr.elsayed]

انا افضل الصني و خصوصا بظروف حضرتك الي قلتها .

+1
لازم تحدد الاول الفئة السعرية اللى انت عايز تشترى بيها
وتكون اقصى امكانياتك مع العلم تشيل على جنب استوك فلوس
وبعد كدة تشوف العربيات اللى فى الفئة السعرية دى
وبعد كدة تعمل مقارنة بينهم انت متحير عشان انت مش عارف
تحدد الفئة السعرية
اللوجان مقارنة اللوجان بالصنى فى ظلم شوية للوجان
لان الصنى اقل فئة فيها بتزيد عن اعلى فئة للوجان
باكتر من 20 الف جندى
عايز تقارن اللوجان يبقى تقارنها باللى بنفس سعرها
زى اللانوس والفيرنا وبالكتير النيو اكسينت
مع العلم ان اللوجان فى فئتها السعرية جيدة جدا
وبتتفوق على منافسيها فى حاجات كتير
نصيحة منى عيد حساباتك وشوف مقدرتك على شراء
حتكون فى انهى فئة سعرية عشان المقارنة تبقى موضوعية
وربنا يرشدك لما فيه الخير

[Egyzizo]

شكراً كربتون على مساعدتك اللى أكيد هاحطها فى الاعتبار ..

بالنسبة للفئة السعرية فأنا حدى الأقصى الى مش هيقطم وسطى هو 100 ألف جنيه ..

بس أنا لما أعرف ان ست الكل هتكون قاعدة فى الكنبة الخلفية بتاعة اللوجان مستريحة عنها فى الصنى ، فده يخلينى احطها فى الاعتبار ..
هى كنبة الصنى ضيقة قوى؟

[amr.elsayed]

شكراً كربتون على مساعدتك اللى أكيد هاحطها فى الاعتبار ..

بالنسبة للفئة السعرية فأنا حدى الأقصى الى مش هيقطم وسطى هو 100 ألف جنيه ..

بس أنا لما أعرف ان ست الكل هتكون قاعدة فى الكنبة الخلفية بتاعة اللوجان مستريحة عنها فى الصنى ، فده يخلينى احطها فى الاعتبار ..
هى كنبة الصنى ضيقة قوى؟

بص يا زيزو من الاخر واللى فهمته من كلامك انك عايز تشترى اللوجان بس خايف منها
عشان هى جديدة ومش معروفة اوى احب اقولك ان العربية كويسة جدا ومريحة جدا
وواسعة وتوكيل محترم جدا وانا نفسى حجزت اللوجان لنفس سبب ست الكل اللى
عايزها تكون قاعدة فى العربية مستريحة اخر حاجة ودة سبب رئيسى فى حجزى للوجان
على فكرة انا من اسكندرية يعنى التوكيل بعيد عنى
بالنسبة للصنى انا معنديش معلومات كتير عنها انا ركبتها يامة مع صديق مقرب جدا ليا
بس معجبتنيش لسبب واحد ان هى مش مريحة شوية + فعلا الكنبة بتاعتها ضيقة
دى حاجة انا استعجبتلها نظرا لطول العربية من الخارج وتحس انها عفشتها ناشفة شوية (الكلام على ex salon)
بالنسبة للفئة السعرية (اقصى امكانياتك 100 الف ) فى حاجات تانية ضميرى يحتم عليا انك
تشوفها زى الكيا سيراتو واسعة فيه فئة اوتو قريبة من امكانياتك
سوزوكى sx4 واسعة 103000 الف مانيول
وربنا يرشدك للاختيار الامثل

[hesham_soaida]

لو انت الاثنين دول بس اللي حتختار بينهم, انا حرشحلك الصني. بالنسبة للكنبة الخلفية الضيق بالنسبة للطول, وليس العرض, يعني حيبقى صعب واحد طويل يقعد ورا.

[Samah AbdAllah]

انا ارشح اللوجان مادامامت عاجباك لان العربية ممتازة من تقارير الزملاء عنها وتوكيل رينو محترم وممكن تفكر فى رينو سيمبول
بس ليه مفكرتش فى ميتسوبيشى او كيا سيراتو

[darkomed]

المقارنه كده مش في محلها لفرق السعر طبعاا انا رايي هات لانسر عربيه جميله جداا والكنبه مش ضيقه و ادامك حاجه من اتنين لو معكش فلوس اوي هات الالف و تلتمايه مانوال سحبها ممتاز و اقتصاديه ف البنزين و التكييف مبياسرش اوي علي السحب انا علي فكره سوقتها عربيه ولا كلمه تحس ان انت مستمتع و انت راكبها , اما باه لو الميزانيه تسمح هات الالف وستمايه اوتوماتيك.و دي نصيحه لوجه الله و متنساش الاستخاره طبعاا و ف الاخر القرار ليك.

[elza7raa]

رايى الشخصى

فعلا لية مش تجيب لانسر

او تويتا كورولا

[Eng.GEMI]

أنا شايف إن اللوجان أحسن علشان بتدي قيمة أحسن بالنسبة لسعرها..وكمان علشان توكيل رينو محترم جداً..و إن كان أعيب على كلا اللوجان والصني جودة التقفيل...بالنسبة لحدود السعر اللي حضرتك بتتكلم فيها في اختيارات تانية كويسة زي الرينو السمبول(مانيوال و أوتوماتيك) وكيا سيراتو(مانيوال)..و ربنا يوفق حضرتك للاختيار الامثل..

[MoHaMed HaMeD]

هو حضرتك ايه الى يعيب تقفيل الوجان

[Eng.GEMI]

هو حضرتك ايه الى يعيب تقفيل الوجان

أنا قرأت قبل ما أشوفها على موقع إن جودة تقفيلها مش عالية..وكمان واحد صاحبي معاه العربية قالي إن مش عجبوا التقفيل من برة ..بس لم شفتها محستش بكدا .. يمكن عشان العربية دي أنا بحبها و مرشحها لوالدي ... و اللوجان فعلاً بتدي أحسن قيمة قصاد سعرها ...و سألت عنها ناس كتير و الكل بيشكر فيها..
ودة رابط الموضوع بتاع اللوجان في الموقع :
ط§ظ„طظ‚ط§ط¦ظ‚ ط§ظ„ظƒط§ظ…ظ„ط© ظˆط±ط§ط، ط¹ط§طµظپط© ط±ظٹظ†ظˆ ظ„ظˆط¬ط§ظ† | Egy Speed

[nour]

الصني طبعا بلا منازع
لا يمكن مقارنة الصني باللوجان
الصني أفضل عربية في حدود التسعين ألف