عاوز حد يفيدني

[naser_1978]

السلام عليكم و رحمة الله و بركاته
سيارتي فولفو 940 اوتوماتيك ،،، مرتين و انا ماشي الاقي العربية طفت لوحدها و انوار التابولوه نورت و الموتور فصل لوحدة ،قلت يمكن بطارية قست شحنها و شحن الدينامو طلع زي الفل ،، عرضتها عل مبيكانيكية كتير و كل واحد أفتي بسبب شكل ،،، ممكن حد يفيدني و يقول لي ممكن يكون السبب فين و لكم جزيل الشكر ،،،،

[samirayad]

راجع على توصيلات الكونتاكت ....وعلى تثبيت كتاوت الأشعال الموجود بعلبة الفيوزات.....وده كتاوت تانى غير بتاع تلقيط المارش .......يعنى المشكله كهربيه فى الغالب بسبب سلك شغال بمزاجه وبيفصل ساعات.............وممكن تطمنا برضه على البوبينا ......وتدينا بيانات أكتر لو أردت نحلل العيب بأستفاضه .................

[naser_1978]

الف شكر ليك يا مهندس سمير ،،، بس اعرف حضرتك بانه عندما توقف السيارة بدور الكونتاك يدور ثم بعدها ب30 ثانية تبطل السيارة و لما اضغط بنزين تبطل علي طول ،،،، بعد كام محاولة يعني بعد 1/2 ساعة تدور العربية و تمشي كانه ما فيش حاجة ،،، أما في الصباح تدور و تمشي و توصلني العمل و ما فيش مشكلة ،، المشكلة تظهر لما اكون جاي من مشوار و اريح السيارة شوية ثم ادور تاني و شكراً لكل من ابدي برايه في الموضوع

[samirayad]

أما في الصباح تدور و تمشي و توصلني العمل و ما فيش مشكلة

ياعنى كده ماشى الحال

المشكلة تظهر لما اكون جاي من مشوار و اريح السيارة شوية ثم ادور تاني

كده أصابع الأتهام بتتجه تجاه البوبينا .....أبقى شوفها بتسخن جامد بعد المشوار ده ولا أيه نظامها

[naser_1978]

نعم اليوم شوفت البوبينا لقيتها بتسخن كلامك يا هندسة مظبوط ،، بس أنا بشك بكتاوت الاشتعال لان عندما افتح الكونتاك في صوت بداية التشغيل للكونتاك،،، يا هندسة هو دا صوت ايه ،،، لما بتحصل المشكلة دي الصوت دا بيعلي قوي و بسمعه و انا داخل السيارة و بيكون عالي قوي و لا رايك ايه

[samirayad]

طيب ماتجرب تغيره بكتاوت تانى ....من اللى فى العلبه ويكون زيه ( زى بتاع الفوجات مثلا ) على ماتشوف العيب منين ......ولو تقدر ترفع صورة علبة الفيوزات .......حنفكر معاك برضه .....فى الكتاوت اللى ممكن تبدله بيه......لأن التكه العاليه دى ممكن تكون من الكونتاكت بتاعه ( علشان ملفه ضعف شويه مثلا )

[samirayad]

حاول برضه لما يحصل معاك والعربيه تبطل .....أنك تبرد البوبينا من على جسمها بفوطه مبللوله ( على مانشوف العيب سببه أيه بالضبط )

[aYaBooY]

معلش على التدخل
انت العربية عندك كربراتير ولا انجكشن يعني الموتور عادة ولا اكتروني
علشان المشكلة ديه بالظبط حصلت مع قريب ليا و كانت المشكلة من الموبينة و من حساس الكرنك
كانت برده تدور زي السكر في الصبح و بعد المشوار يريح دقيقيتين مترضاش تدور غير الخناق
و اوقات كانت بتبطل و هيا ماشية

[naser_1978]

ألف شكر ليكم علي الافادة و المداخلة الكريمة ،، و جزااكم الله خيراً ،،،،،،،، السيارة فولفو940 موديل 92 اتوماتيك حقن الكتروني

[naser_1978]

اليوم الميكانيكي بيقول ان سبب دا هو طلمبة البنزين
و الصوت دا صوت الطلمبة و هو خشن و لما بتسخن بتعمل صوت جامد و تبطل العربية و أن أفضل حل للمشكلة هو تغيير طلمبة البنزين

[samirayad]

بس اعرف حضرتك بانه عندما توقف السيارة بدور الكونتاك يدور ثم بعدها ب30 ثانية تبطل السيارة

أحتمال يكون بلى موتور الطلمبه .....مظبوط كويس فى مكانه فى لحظة البدايه

ثم بعدها ب30 ثانية تبطل السيارة و لما اضغط بنزين تبطل علي طول ،،

ده أحتماله أن لما البلى بيكون تقيل بعد أول لفات لموتور الطلمبه فى البيت بتاع البلى اللى بايظ .....بتكون لسه الطلمبه تقيله والبنزين قليل على الهواء اللى أنت دخلته لبوابة جسم الخانق بدوسك على الدواسه

بعد كام محاولة يعني بعد 1/2 ساعة تدور العربية و تمشي كانه ما فيش حاجة ،،،

الحاله دى علشان محور الموتور والبلى تقريبا بيكون أنظبط لما البلى بقى بايت كويس فى مكانه .......وبيقضيك مشوارك...وبدون تفاصيل زياده

اليوم الميكانيكي بيقول ان سبب دا هو طلمبة البنزين
و الصوت دا صوت الطلمبة و هو خشن و لما بتسخن بتعمل صوت جامد و تبطل العربية و أن أفضل حل للمشكلة هو تغيير طلمبة البنزين

فكلام الميكانيكى وارد جدا ......وده أنت المفروض تلاحظه لو حسيت بخشونه صادره من صوت الطلمبه ...وتغيير فى الصوت اللى أنت متعود عليها لحظة تحضير البنزين ......ومع فتح الكونتاكت قبل سنة المارش أو حسب ظروف شغل الطلمبه عندك.............

[naser_1978]

صوت الطلمبة و هي باردة طبيعي بس عالي خفيف لا يلاحظ ،،،،،،،،لكن لمل بتحصل المشكلة و افتح الكونتك قبل المارش بيبقي عالي جداً بطريقة صعبة و هل لازم أغيرها و لا ممكن تتصلح و تتظبط

[samirayad]

،،،،،،،،لكن لمل بتحصل المشكلة و افتح الكونتك قبل المارش بيبقي عالي جداً بطريقة صعبة و هل لازم أغيرها و لا ممكن تتصلح و تتظبط

توكل على الله وغيرها وخلاص .....لأننا برضه مانضمنش أجزائها التانيه لو حتى فكرنا فى تغيير الموتور بتاعها.....وكنت قول من الأول يا أخى على ملاحظاتك دى .....بدل مانقعد نضرب أخماس فى أسداس ........................................

[naser_1978]

انا بشكرك يا مهندس سمير و معلش تعبتك معايا بس علي فكرة انا استفدت كتير من الموضوع ده قوي و اغيرها و اسمعك خبر كويس ان شاء الله بس لي استفسار تاني غير دا الموضوع و هو :-
لما بشغل المكيف و انا واقف باشارة و الوضع دي العربية ترعش بسيط و ال ار بي ام يقل و لما اضعها علي ان معقول 500 لفة هل ممكن يتظبط

[samirayad]

انا بشكرك يا مهندس سمير و معلش تعبتك معايا بس علي فكرة انا استفدت كتير من الموضوع ده قوي و اغيرها و اسمعك خبر كويس ان شاء الله

ياباشا لا تعب ولا حاجه ....أحنا أخواتك ولا نبغى الا صالحك

لما بشغل المكيف و انا واقف باشارة و الوضع دي العربية ترعش بسيط و ال ار بي ام يقل و لما اضعها علي ان معقول 500 لفة هل ممكن يتظبط

تغيير الطلمبه ....حيظبطلك كل حاجه .....علشان حمل المكنه حينظبط .....وربنا يقدم مافيه الخير أن شاء الله ..........