شيل الترموستات - حط الترموستات (محتااااااااااار)

[Mohammad Okasha]

من سنه كنت مسافر المنصورة والعربية سخنت. رحت لميكانيكي وجنبة كهربائي عند المحافظة. المهم طلع الترموستات بايظ (قافل على طول).
الميكانيكي قال شيل الترموستات ومتركبوش تاني لانه مش مناسب للجو الحر عندنا. رحا التوكيل وقلت للمهنس الكلام ده، قاللي انه مهم وبيوفر في البنزين علشان بيثبت حرارة العبية على 90. قمت ركبته

الاسبوع ده حصل نفس المشكله وباظ الترموستات تاني مع اني جايبه من التوكيل. رحت لميكانيكي تاني قاللي انا كل عربية بشتغل فيها بشيل الترموستات! حتى لو سليم!!

انا محتار اشيل الترموستات ولا احط الترموستات !!

[Mohammad Okasha]

لو المشكله دي بتفرق من عربية لأخرى، عربيتي بولو 2001

[hazem_khidr]

اوعي تسمع كلامهم سيب الترموستات دي في العربيه اللي صمموال العربيه حاطين الترموستات و عارفين ان العربيه حتشتغل في مناطق حاره .كل موتور ليه درجه حراره معينه بتتفاعل فيها مكوناته و تديها اقصي اداي و مش لازم كل العربيات تبقي درجه حرارتها قليله
الفيات مثلا القديم كان المناسب بتاعه 90 درجه بعكس البيجو اللي انسب حاجه 65 درجه .اسمه كلام المهندس في التوكيل احسن

[AHMAD_EMAD]

السلام عليكم ورحمة الله
للاسف أخي الكريم انتشر في مجال السيارات بعض المصطلحات والشائعات الغريبة زي البيجو اللي وزنها 7 كيلو

والسبب الرئيسي ان محدش بيقول معرفش وكله بيشتغل من غير خلفية علمية او بالاصح لو الميكانيكي فك او شال أي حاجة والعربية مطفطش تبقي ملهاش لزمة وبتاعة اروبا

أنا حكيلك قصة حصلت معايا وبعدين ابين لحضرتك موضوع الترموستات
أنا والدي راجل عظيم بس ملهوش في فتح الكبوت يعني العربية عنده سلك البطارية مهزوز زي جايبة كتينة مبدورش يبقي اركن واركب مواصلات

المهم انا نازل اصلي العصر لقيت العربية ( القديمة شاهين 2005) وديه كانت single point injection
عند الميكانيكي انا قلت ممكن يكون الوالد جه متاخر علي الصلاة سبها جنبه سألته مالها قالي الحاج بيقول بتسخن
أنا: وطلع من ايه؟
هو: فكينا الترموستات
أنا: طب هو الترموستات كان بايظ
هو: أصلا الترموستات ده بيخن العربية علي الفاضي واحنا مش في اروبا

نزلت جبت كوعة ماية تانية وهنا ليه قصة تانية وكنت رايح محل مع واحد صاحبي شغال في قطع الغيار وبتاع محل الشاهين عايز يوجب معايا

أنا: من فضلك كوعة ماية بالترموستات
هو: ديه بـ ( 70 او 65 مش فاكر) متاخد الفاضية ( تقريبا 15 او 20 جنيه )
انا: مالعربية الكوعة فيها سليمة وانا هغيرها علشان الترموستات
هو: ليه كده بس مهو الميكانيكي هيفك الترموستات وهو بيركب الكوعة
( الغريبة اني مع الكلام عرفت انه فاهم لزمة الترموستات )
انا: يعني هتديني الكوعة ولا امشي
هو: تحت امرك بس كنت عايز اخدمك
المهم اخوكم جاب الكوعة وحبة حاجات لزوم الصيانة الدورية وبفالحتي نسيت جوان الكوعة

رحت لواحد ميكانيكي تاني يمكن الاقي عنده جوان بدل ما اروح افصل واحد ( وديه قصة تالتة)
أنا: السلام عليكم
هو: وعليكم السلام ازيك والحوارات ديه
انا : ملاقيش عندك جوان للكوعة ديه
هو: ايه ده انت تفك الترموستات ده ده هيسخنلك العربية
الاسطي بتاعه: ملكش دعوة الراجل جاي طالب حاجة محددة شوفله كده جوان

بعد ما ركبت الكوعة الجديدة بصيت علي دورة المياه العربية فيها مشكلة رحت علي بتاع الردياتيرات علشان يفك الردياتير و ينضفه
هو: أنت ربنا بيحبك ازاي العربية ديه مولعتش ومقلوكش علي اللي طلع من الردياتير ( طبعا كل ده بركة المياه الخضرة المضروبة) يا نااااس اتقوا الله فينا انت علشان تكسب 2 جنيه تحط صابون سايل وتعمل مصيبة وطبعا في الموايتر الانتمونيا الموتور يقفش

وركبة الكوعة وقفشت علي الميكانيكي والعربية مشيت تمام

ملاحظات:
- قبل تركيب الترموستات كانت العربية علي الطوالي والجري ممكن درجة الحرارة تنزل لحاجة وستين وكانت بتاخد وقت كبير علشان تسخن وطبعا الانجكشن طول ما انت مفهمه ان العربية باردة بيزود بنزين لحد ما تسخن

و إن شاء الله بس مش وعد لو مشروع التخرج ساب لي وقت اكتب عن الترموستات باللي ربنا يوفقني فيه
أخي الكريم لا تنزع الترموستات هذا خطأ قاتل

[sab3aawy]

خلى الرموستات متشيلوش

ببساطة الثرموستات بيوفر عليك البنزين المستهلك فى التسخين واستهلاك البنزين الزائد لما يكون المحرك بارد وتآكل المحرك بسبب برودة الزيت

شيل الثرموستات بيدخلك فى المشاكل الآتية

1- العربية فى الشتاء هتطلع عينك على ما تقبل انها تسخن وتتحرك من مكانها
2- استهلاك البنزين يعلو فى الشتاء فترة اطول لزوم تسخين المحرك
3-استهلاك البنزين اعلى فى الطوالى بسبب برودة المحرك عن معدلها الطبيعى
4-تآكل المحرك اسرع لعدم وصول الزيت لحرارته الطبيعية بسرعة

لذلك متشيلش الثرموستات، مع كامل احترامى لخبرة عم عقلة الميكانيكى فهو لا يملك كم التراكم المعرفى لمهندسى شركات السيارات التى تعمل على تطوير سياراتها وتحسين أدائها منذ ظهر نموذج ديملر الأول منذ اكثر من 130 سنة وحتى سيارات اليومين دول التى لو رآى الخواجة ديملر اى واحدة منها لاعتقد ان المريخيين قد غزوا الأرض ولما صدق ان هذة المركبات المتفوقة تكنولوجيا هى التطور الطبيعى لمركبته الاولى فى خلال 130 سنة

لو تركنا الأمر لعم عقلة الميكانيكى لتصنيع سيارة فربما استطاع فعلا تصنيع وتجميع سيارة تسير، لكنها لن تزيد فى إماكنياتها عن سيارات الخمسينات او الستينات، لأن هذة هى حدود امكانيات عم عقلة، لذلك ثق فى ما وضعته لك شركة السيارت اكثر من ثقتك فى كلمات عم عقلة، وعندما تحدث مشكلة متكررة فى قطعة ما فى السيارة دور على سبب المشكلة قبل التفكير فى إلغاء هذة القطعة

[memoo305]

بالفعل الكلام ده حصل معايا. العربية جابت جوان وش سلندر روحت للميكانيكي عمل الجوان وبعديه لاحظت أن العربية بقت تاخد وقت طويل عقبال ماتسخن بعني تقريبأ بأمش بتاع 15 كم متر عقبال ما المؤشر يأخذ وضعه الطبيعي.واثناء ذلك بيكون السحب زفت والعربية تقريبا بتقطع.
المهم توقعت أن يكون عمل الحركة ال.. دية روحتله قالي فعلاً أنه شاله وانه بيعمل الحركة دية في كل العربيات إلي بتجيلوه.وانا الترموستات ده هو السبب أن العربية جابت جوان وش سلندر.

لغاية دلوقتأنا ماركبتوش بس فعلاً أنا حاسس أن العربية مش مزوبطة وبفكر أروح أرجعة تاني.

[Atef Saleh]

موضوع الترموستات ده موضوع مهم جدا و ياريت محدش يشيل الترموستات لانه مهم جدا فى الحفاظ على درجه حراره الموتور و ده بياثر بدوره على استهلاك البنزين و ان كان بصوره طفيفه لا تلاحظ لكن الاهم انه بياثر على عمر الموتور نفسه فرجاء من الاخوه الافاضل عدم الاستماع لفتاوى اى ميكانيكى لانهم جميعا بيشتغلو بمقوله "عك و ربك يفك " و بالنسبه للعربيه البولو بتاعت الاستاذ محمد عكاشه الترموستات لما بيبوظ بيكسر غطاء الكوعه من جوه و لما بتغيره من غير تغيير الغطاء بيكون الموضوع زى قلته لان الترموستات الجديد مش يشتغل و نصيحه للاستاذ محمد يغير غطاء الكوعه و ان شاء الله المشكله تتحل و على فكره سعر الغطاء 3 جنيه بس ........ و شكرا

[vooooo]

بصراحه الموضوع ده حصل معايا برضه
كنت راجع من القاهره و مؤشر الحراره على العلامه الحمراء و كان ايدى على قلبى لحد لما اوصل
انا قولت اكيد فيه حاجه فى الريدياتير فنضفته و برضه نفس المشكله
روحت للميكانيكى العبقرى و لقيته بيفك الكوع اللى متوصل بالموتور و شال حاجه كده و قالى هى دى اللى عامله مشكله
طيب ايه دى يا عم قالى ترموستات
بصراحه مافهمتش و حاولت افهم منه
طيب ايه اللى جابها فى الكوع ده و وقعت من فين طيب ماتركبها مكانها ( مخى تخين شويه )
فقالى لأ ده مكانها بس هى بايظه فقولتله نجيب غيرها قالى هتبوظ تانى و مالهاش فايده
ازاى يا عمنا مالهاش فايده . قالى نفس الكلام اللى قولتوه و مش هعيده تانى
طيب نعمل ايه يا عم العبقرى . قالى مالكش دعوه بيها و العربيه هتمشى زى الفل
بصراحه مالقتش عداد الحراره بيزيد عن الربع أصلآ و اتبسطت
بس بالنسبه للسحب و الجرى كانت زى الفل
يمكن علشان عربيه قديمه شويه و مابيفرقش معاها حاجه
بس يا جمالع اللى فهمته بعد كده ان الترموستات دى مهمتها انها تفتح دوره المياه بالموتور فى فتره محدده معنى كده انها بتقفل
طيب فيه سؤال مهم
بالنسبالى انا بنضف الريدياتير كل فتره و بغير الميه اللى فيه و كمان بعمل فيها فاهم و بنضف دوره المياه اللى فى الموتور
بس فى وجود الترموستات مش هعرف انضف الموتور
ايه العمل

[شريف]

اولا انا اللى فهمته ان الترموستات دى مبتفتحش دورة تبريد المياة الا عند درجة 90 و بالتالى الموتور مش هيتبرد الا بعد الدرجة دى ..صح كدة :?:
طيب نخليها فى الشتاء بس و بعدين نلغيها فى الصيف ولا اية :?:
ولا مش هتفرق :?:
ارجو التوضيح و شكرا

[FIATBloodline]

قول السلام عليكم علي المروحه لو شيلت الترموستات

[mahmoudfs]

السلام عليكم
اخي الترموستات ضروري جدا للمحرك انته تعتقد انه بون ترموستات تبرد اكتر و لاكن لا.
المحرك بعد و صول درجه الحراره الى 90 يفتح الصمام و يدخل الماء منالمشع بارد الى المحرك و المروحه تعمل لحظه .
اما لو فكيت المحرك دوره الماء مستمره بين المشع و المحرك الى و صول الحراره الى 90 تشتخل المروحه لتبرد المشع و المحرك كامله يعني بتشتغل 10 دقائق بدل نصف دقيقه.
و الميزه الاهم نسبه استهلاك الوقود تزداد بدون ترموستات لانه الحراره غير مستقره.
و حل مشكله خراب الترموستات بسيطه اذا عندك مقدح حديد اثقب الترموستات ثقب صغير 7 ملم من الجوانب في حاله انسداد الترموستات يتم عبور الماء من هذه الفتحات.
تحياتي

[HeMa_LanCeR]

انا علقت عندي مره قبل كده
وبتاع الرداتير قالي هشيلها دي مالهاش لزمه
قولتله معلش بقي الخواجه اللي مصنع العربيه حاطتها يبقي لازم اسيبها
قالي يابيه دي بتاعه عربيات اوروبا
قولتله بقي تصدق ان العربيه دي خليجي وانت راجل بركه
سيب الترموستات ولو العربيه باظط يبقي العيب من الخواجه مش منك انت راجل ميه ميه
وسيبتها زي ماهي ومعلقتش تاني والحمد لله
علي فكره هي عندي ب 70 جنيه ولو كان علقت تاني كنت هشتريها

[kantalub]

سبحان الحي القيوم .. انا الحوار ده حاصل معايا بالظبط كله علي بعضه كده .. بس الغريب ان واحد ميكانيكي نضيف والوحيد اللي قالها سيبها لأنها ممكن بعد فترة تخلي الجوان وش السلندر يضرب تاني .. المشكلة اني مش عارف الاقيها فين ؟! .. انا مسألتش عليها بس حقيقي قطع غيار العربية أصلا جابتلي احباط من ندرتها اولا وسعرها الغبي ثانيا .. يا ريت تاخد بنصيحة الشباب اللي اتكلم وتسيبك من مجمع الميكانيكية .. تحياتي ليك ..

[rabhin]

مشكور كتييييييييييييييييير يا اخي الكريم, كلامك مٌقنع جداً , ونتمنى ان نستفيد منك أكثر ,,,,, لا تبخل علينا

[souzoran]

بص انا هاكلمك بصراحه انك تشيل الثرموستات اللى بيفتح مياه الريداتير بعد الموتور مايسخن او لحد ما يوصل 90 درجه فيه مشكله كبيره وهيه ان الموتور مش هايعمر معاك وهايفوت بدرى اولا فايده الثرموستات ده مش بس كده ده كمان لو انت مشيت بالعربيه الريداتير معرض طبعا للهوا وعلى حسب درجه الهوا اللى بيمر فى الريداتير الثرموستات بيفتح بدرجات معينه وبالتالى ميدخلش مياه من الريداتير بارده على الموتور وهو سخن وده بيخلى الاسطوانه اللى بيمشى فيها البستم بتضيق بفعل التمدد والانكماش والبستم زى ما هو وبالتالى يبتدى يشيل طبقه من جدار الاسطوانه وبعد كده الموتور يفوت