بخصوص زرار الفتيس الاوتوماتيك

[EHAB TAHER]

فى زرار ف الفتيس سالت علية اول ما جبت العربية
قالولى ده اما اكون عايز تسارع
ياريت حد يفهمنى استخدمة امتى وهل لى طريقة

[kamalantivirus]

u mean over drive :?:

[fahd_628]

دة يا باشا زرار الأوفر درايف OVER DRIVE و لما بيبقى شغال بيبقى بيجيب عادى النقلة الرابعة لكن لو انت عاملة OFF مش حينقل على الرابع حينقل تالت بس و دة طبعا تستخدمة لو انت عاوز تحرق على التالت

[Adham]

هل هوة زرار ال Over Drive و للا ال Power Drive و للا ال Hold ????

[TAG_Turbo0]

دة يا باشا زرار الأوفر درايف OVER DRIVE و لما بيبقى شغال بيبقى بيجيب عادى النقلة الرابعة لكن لو انت عاملة OFF مش حينقل على الرابع حينقل تالت بس و دة طبعا تستخدمة لو انت عاوز تحرق على التالت

هو مش المفروض العكس؟

[cyber007]

معنى ال Over Drive هى القيادة على الطرق السريعه ياعنى بيدى 4 نقلات للعربيه عشان تبقى ماشيه براحتها

ومعنى ان ال O/D OFF ياعنى انتا مش سايق على طريق سريع وعاوز النقله يبقى نفسها اطول عشان كده تلاقى ال RPM عالى عن الطبيعى وانتا عامله OFF

ياعنى بمعنى ان ال O/D OFF دا مش الوضع الطبيعى انما ال ON هوا الطبيعى ولو عاوز تجرب ابقى ماشى على 90 مثلا بس مش دايس وماشى واحده واحده وبراحتك وقوم دايس على الزرار هتلاقى العربية نقلت على ال تالت وال RPM على والعربية قامت واقعه ثانيه كده وبعدها قامت سحبه جامد

[EHAB TAHER]

يعنى معرفشى احرق غىر ع ال 3 طب لو شغلتة ع ال 1 و 2
هيعمل اية

[TAG_Turbo0]

شكرا يا سيبر

[fahd_628]

هو مش المفروض العكس؟

لا يا باشا كدة صح :-)

[sab3aawy]

ده رد على نفس السؤال انا كنت جاوبته قبل كدة واعيده هنا للفائدة
-----------------------------------------------------
بالنسبة للفتيس الاوتوماتيك (اللى مهواش CVT)

الأوفر درايف over drive كلمة دارجة فى البلاد المتكلمة بالإنجليزية وتعنى اعلى نقلة فى صندوق سرعات السيارة
يعنى فى اى عربية مانيوال الأوفردرايف هو النقلة الخامسة، يعنى لما بيجيب على الخامس يبقى انا كدة بجيب الأوفردرايف

وفى العربيات الأوتوماتيك بنظام التروس الكوكبية (يعنى النظام المعتاد بتاع الأوتوماتيك مش الستيبترونيك ولا ال cvt ) الأوفردرايف هو النقلة الرابعة

وبالتالى فإن خاصية التحكم فى الأوفردرايف فى العربيات المزودة بهذة الخاصية( سواء عن طريق زرار فى العصاية او حارة فى مسار العصاية) تعنى ببساطة السماح للجير بوكس بأن يستخدم الغيار الرابع او منعه من ذلك، وعادة تصمم السيارة بحيث ان لمبة الأوفردرايف فى التابلوه تضيى عندما تكون خاصية الأوفر درايف مطفية، يعنى معنى ان اللمبة منورة فى التابلوه هو ان الفتيس غير مسموح له يجيب الرابع وبينقل بين الأول والتانى والتالت فقط، ولذلك لو دققت فى اللمبة هتلاقى مكتوب عليها O/D off، يعنى اللمبة بتقول ان الأوفر درايف مطفى

وخاصية الغاء الأوفر درايف مفيدة للقيادة التنافسية على سرعات متوسطة(تحت ال100 كيلومتر فى الساعة) لأانها بتمنع الفتيس من انه يروح على الرابع(المقابل للخامس فى العربيات المانيوال) وبالتالى بتفضل العربية على RPM عالية تمكنها من الإستجابة اللحظية للتسارع، لكن طبعا على حساب استهلاك الوقود وبشكل ما على حساب عمر المحرك على المدى الطويل جدا

الكيك داون هو ببساطة ان الفتيس بياخد غيار تنازلى مع كبس البنزين بشدة علشان يعلى ال RPM ويحسن استجابة السيارة للتسارع

طيب إيه فرق الكيك داون من الاوفر داريف:

الفرق فى المثال البسيط الآتى: لو الجير الاوتوماتيك بتاعك جايب الرابع (الغيارت دى داخل الجير نفسه ومافيش حاجة قدامك تقول الجير بتاعك على انهى غيار غير تعودك على عربيتك ومعرفتك انهى RPM تقابل انهى سرعة على انهى غيار، يعنى مثلا انت بتكون عارف انك لو ماشى 80 والrpm 3000 يبقى الجير على التالت لكن لو انت ماشى 80 والrPM 2000 يبقى كدة الفتيس جايب رابع)، المهم، لو الجير الأوتوماتيك بتاعك جايب رابع وانت رحت دايس زرار الاوفر درايف ، الفتيس هينزل على التالت(هتلاحظها من النتشة وصوت الموتور وعداد ال RPM هينط لفوق) ، وهيفضل على التالث وعمره ماهو رايح للرابع مهام سرعتك عليت لحد ما تدوس زرار الأوفر درايف تانى، لو انت قبل ما تدوس زرار الاوفر درايف كنت على التالى او التانى او الأول فلما تدوس زرار الأوفر درايف مش هيعمل اى حاجة ومش هتحس بأى تأثير له، لكن لما سرعتك تعلى العربية مش هتنقل للرابع وتفضل شغالة اول وتانى وتالت بس لحد ما تدوس الأوفردرايف تانى واللمبة بتاعته تطفى

اما لو انت ماشى رابع ورحت عامل كيك داون الجير هينزل للتالت ، وشوية مع التسارع هيرجع للرابع تانى
ولو انت ماشى تالت وعملت كيك دوان الجير هينزل للتانى وشوية مع التسارع هيطلع للتالت ولو فضلت كابس عليه هيروح للرابع تانى

بالنسبة للفتسي CVT

الفتيس ال CVT يختلف عن الفتيس الاوتوماتيك العادى بشكل كلى وجزئى حيث انه يعتمد على منظومة تسمى continuous variable transmission وهى تعتمد-بدلا من التروس- على منظومة من اسطوانتين مخروطيتين احداهما متصلة بالتغذية من المحرك والأخرى متصلة الكورونا والعجلات وبينهما سير يتم تحريكه للأمام والخلف بواسطه مجموعة هيدروليكية وعن طريق تحريك السير يتم تغيير نسبة التخفيض،
ويقوم التحكم فى الفتيس ال CVT على المحافظة على ال RPM للمحرك فى حدود افضل اداء وتغيير سرعات السيارة عن طريق تحريك السير على الجيربوكس
وهكذا يكون لدينا اختيارين لمدى RPM للمحرك

مدى افضل كفاءة(اقل استهلاك للوقود والمحرك) ومدى افضل اداء(افضل تسارع واستجابة)

ويتم الإختيار بين هذين الإختيارين باستخدام عصا الفتيس التى نختار بواستطها البرنامج الإلكتروميكانيكى المرغوب سواء كان برنامج افضل كفاءة او افضل اداء

فالوضع D (اختصار drive) هو الوضع العادى الذى يعمل على حفظ المحرك فى مدى افضل توفير

والوضع DS (اختصار drive sprot) هو الوضع الرياضى الذى يعمل على حفظ المحرك على مدى RPM عالى يحقق افضل استجابة وتسارع

ببسطة، لو انك سايق relaxed خليها على D

ولو سايق ومتوقع تجرى وتشد وترجع تفرمل وتشد تانى وهكذا (راكبك عفريت الأسفلت يعنى) خليها على Ds بس اول ما العفريت ينصرف ارجع لل D تانى

فى السفر وعلى الطرق السريعة خليك على ال D وليس DS علشان الRPM متعلاش بدون داعى( فى اللانسر على ال DS وصل عداد ال RPM الى اكثر من 6000 على 140 كم/ساعة ، لكن مع D بيكون اقل من4000 )
ولا ينصح بالتغيير من D الى DS على سرعات اكثر من 80 (ممكن تزود على الDS زى ما انت عايز لكن متغيرش من D الى DS لو سرعة العربية اكثر من 80)

[أبو_حمزة]

مليون شكرا يا اخونا سبعاوى على الدرس التخصر المفيد
بارك الله فيك

[cyber007]

(راكبك عفريت الأسفلت يعنى)

اجمد حته فى ال فتيس كله

[EHAB TAHER]

الف شكر يا سبعاوى باشا

[mokhtar]

سؤال يا جماعه .....العربيات اللى الفتيس بتاعها مفيهوش زرار اوفر درايف فى عصايه الفتيس بيبقى فيها نقله زياده فى حاره الفتيس مكتوب قدامها 3 ده بيشتغل ازاى؟....وبعدين لو الزرار على off بيبقى الاوفر درايف شغال وبيسمح للفتيس يدى النقله الرابعه هل الوضع الطبيعى للاوفر درايف انه يبقى off
يعنى مثلا واحد بيسوق عربيه اتوماتيك بس على مهله ومش بتاع جرى ولا شد خالص يبقى الاوفر درايف on / off

..MOKHTAR..

[HESHAM AMIN]

قاموس السيارات الاستاذ سبعـــــــــــــــــــــــــــــــــــــاوى