نتيجة تغيير الردياتير كما نصحني البعض

[eldeplomasy]

غيرت الردياتير لواحد نحاس 3 ماسورة والنتيجة أسوا من الاول في الحرارة من حيث ارتفاعها وعدم تحمل الردياتير لحرارة المحرك عند التوقف في الزحمة لمدة دقيقه وافاجئ بارتفاع الحرارة لل110 وخصوصا بالمكيف عكس ما قيل لي عند التغيير

والغريب ان تبريد المكيف اصبح اكتر فعاليه بشكل ملحوظ من الاول


فاين العيب او ما الحل؟؟؟


ارجو المساعده لاني خلاص زهقت من العربية ولو بعتها على حالتها كده هيقل تمنها كتير ده غير طول المدة اللى هقعدها من غير عربيه لحد ما استلم البي ام دبليو

علما بان العربية اللى بتكلم عنها هي الشاهين 1600 سي سي موديل 2006

[nobody]

العيب في المروحة

[Dr_Smart]

انا عايز اوصفلك راجل محترم وفاهم في الردياتيرات اعتقد انه قريب منك

في الشارع اللي بين محطة مترو الانفاق بتاعت فيصل و محطة جامعة القاهرة ... اقرب لناحية محطة فيصل

اسمه الاسطى عاطف ودي نمرته 0101506972

ان شاء الله يفيدك وانا اخر مرة شوفت عنده عربية شاهين صاحبها كان مبسوط اوي من الشغل بتاعه

بس انت جبت الردياتير الماني ولا خليجي ؟

[eldeplomasy]

شكرا جزيلا لسرعه الرد

والف الف شكر ليك يا د/ سمارت بس اتمنى تكون واثق منه لان اللى ركبلي الردياتير عملت معاه مشكلة لان تركيبه زي الزفت خالص وفي عيوب كتير في التركيب منها قرب مروحة الردياتير جدا للموتور وكمان الميه اسبوعيا تنقص وعلبه الفايز تفضى خالص
هروح للراجل ده طالما بتشكر فيه واشوف رأيه وربنا يستر
الردياتير اللى جبته الماني فرز اول على حسب كلام بتاع الردياتير

[Dr_Smart]

ان شاء الله ربنا يكرم والراجل يقوم معاك بالواجب

هو الصراحه راجل فاهم وامين

يا ريت تبلغنا بالاخبار بعد ما تروحله ان شاء الله

[sab3aawy]

على فكرة اللى اللى حاصل ديلوقتى عندك ظاهرة لطيفة جدا ومعناه ان الردياتير كويس مش وحش

اللى بيحصل ديلوقتى ان المية بقت بتبرد افضل فى الردياتير، وبالتالى لما بتوصل لقاع الردياتير بتكون بردت جدا لدرجة انها مش بتشغل ثرموستات المروحة الموجود فى ابرد نقطة فى دورة التبريد كلها فى قاع الردياتير ، فى حين انها لما بتدخل المحرك بتسخن جدا وبتبان لك بالطبع ساخنة جدا عند مؤشر حرارة التابلوه والموجود فى اسخن نقطة فى المحرك فى وش السلندر، وبالتالى الرموحة مش بتشتغل والمية بتسخن جدا لحد ما توصل للدرجة اللى تشغل بيها المروحة بعد برودتها فى الردياتير

ده معناه ببساطة ان دورة المياه بطيئة ، وده غالبا ممكن يكون يسبب تكون رواسب او صدأ فى مسارات المية بتعوق حركة المياه

الحل ببساطة هو الثرموستات الواطى ، وهو لن يشكل حمل اضافى على المروحة فى حالتك لأن بالفعل المروحة لما هتشتغل هتكون المية اللى خارجة من وش السلندر حرارتها مقاربة من 90

[pointer]

القصه دي تعمل ايه
لما تلاقي الحراره عليت خد فوطه وجس ماسوره المياه اللي وصله فوق اذا لقتها طريه يبقي عيب تسريب في الدوره بتاعه التبريد وغالبا بيبقي من غطاء بتاع المبرد خصوصا انك اشتكيت من ان العلبه بتاعه المياه بتفضي
غير الثرومثتات بتاعه المروحه ممكن العيب يكون فيها او اختبرها ازي
المفروض تشتغل لما الحراره توصل ل 97 لو الحراره عدت تبقي عوزه تتغير
لو ما دارتش يبقي فيه حاجه من ثلاثه
1- ان الثرموثتات بايظه وده الاحتمال نسبته 85% وغيرها احسن 20 جنيه وتخلص
2- زي ما قال استاذنا سبعاوي وده بيكون 80 % لو المروحه دارت
3- المشكله لو ماكنتش في الحاجتين دول يبقي الاحتمال الثالث اللي هو ثرموستات كوعه المحرك وده ممكن يخلي المياه ما تدخلش المبرد كويس وتدور جوه المحرك وخلاص
تحياتي والي اللقاء

[pointer]

2- زي ما قال استاذنا سبعاوي وده بيكون 80 % لو المروحه دارت
تحياتي والي اللقاء

اقصد ما دارتش او السبب الثالث .
بس السدد بتاع الدوره صعب اوي الا لو في اهمال كبير اوي في العربيه
انما لو عدم عنايه يبقي ممكن اوي الثرموثتات بتاعه الكوعه

[فادى]

دائما أنصح بترك السيارة بحالة المصنع لأطول فترة ممكنة و تجنب أى تعديلات الا فى حالة الضرورة.
على العموم نصيحتى باعادة الرادياتير الأول لأنه الأفضل للسيارة, و "التنفيض" تماما لموضوع السخونة, مادام السيارة لا تصل الى حدود خطرة, المشكلة هى فى "الوسوسة" التى تصاحب عدم الثقة بالسيارة, و هى مشكلة كانت موجودة عندى مع ال128 و انتهت تماما مع الشاهين, عندما قمت بشراء السيارة قمت كعادة أى شخص بسماع نصائح لا حصر لها :
- غير الكاوتش!
- غير المساعدين اللى ادام.
- غير الرادياتير!!
- شيل ثرموستات الكوع!
و فى ال10 ألاف الأولى عانيت من الوسوسة, لكنها انتهت تماما الأن, عندما تأكدت بنفسى من حالة المساعد و لم أواجه مطلقا أى مشاكل مع الحرارة, كل ما كان يحدث هو ارتفاع طفيف فى أمبير الحرارة مع تشغيل الأنوار أو مع تشغيل مروحة التكييف.
و مغيرتش أى حاجة لأن مفيش عربية فى الدنيا بتنزل محتاجة مساعدين و رادياتير حتى لو كانت كورى, و العربية ماشية زى الفل, و الكاوتش كويس ماعدا فردة واحدة اتقطعت البارح و حطيتلها داخلى, ماعدا كده كله تمام.
و على فكرة البرودة الزائدة ضارة للمحرك تماما مثل السخونة الزائدة, لذا فان التبريد الزائد عن الحاجة عيبا و ليس ميزة, و سوف يؤدى الى انخفاض كفاءة المحرك و وجود حمل حرارى اضافى على المحرك, ربما قد يؤدى الى كسر وش السيلندر, السيارة مصممة للعمل عند درجة حرارة معينة, و المشع يتم اختياره بعناية بالتوافق مع مروحة التبريد و مختلف مكونات دورة المياه للحفاظ على هذه الحرارة, لذا فان تغيير الرادياتير او مروحته يجب أن يتم بواحد من نفس النوع تماما فى حالة وجود عطل به أما غير ذلك فلا داعى لتغييره هو أو المروحة.
فهل كان هناك عطلا فى الرادياتير أو خرم مثلا يستدعى تغييره الى أخر؟!
اذا لم يكن هناك فيمكنك اعادة الرادياتير القديم.

[eldeplomasy]

القديم كان مصدى وكانت الاملاح بدات تاكل فيه نفسه والردياتير اللى ركبته 3 ماسورة نحاس

بس اللى لاحظته ان تبريد الردياتير زي الاول حتى مع تشغيل المروحة مستمر مع المكيف والحرارة مش بتنزل وبصراحه احترت معاها

[hefzyhefzy]

يا تري بتستعمل مياة عادية ولا خضرا لإن دة بيفرق جامد

[eldeplomasy]

لا خضراء

بس كنت عايز اعرف هتفرق في ايه؟؟؟

[فادى]

لا خضراء

بس كنت عايز اعرف هتفرق في ايه؟؟؟

مش هتفرق فى التبريد, لكن المياه العادية بتخلى الرادياتير و ثرموستات الكوع يصدوا, و غالبا انت حطيت مياه عادية عشان كده الرادياتير صدى منك.
على العموم حاول تجيب الرادياتير بتاعها عشان العربية تتضبط, و لو انى متشكك فى كون الرادياتير القديم مصدى أو فيه مشكلة, لأنه صعب يصدى بالسرعة دى حتى لو حاطط مياه عادية.

[eldeplomasy]

هحاول اجيبه لكن اكيد ال3 ماسورة افضل بكتير

[sab3aawy]

صدقنى ، جرب حكايا الثرموستات الواطى، 90% هتحل معاك مشكلة السخون نهائيا، لو محلتهاش معاك وهو احتتمال مستبعد جدا ابقى اكشف على ثرموستات الكوعة