نتيجة تغيير الردياتير كما نصحني البعض

[eldeplomasy]

مصدقك والله بس علشان احط ثرموستات اقل يبقى لازم اشيل ثرموستات الكوعه لان المروحة مهما عملت واشتغلت على طول مش هتوطي درجة الحرارة لان ثرموستات الكوعه قافل وبالتالي المروحة هتشتغل فترات اطول بتكتير من الاول مما يؤدي الى تلفها وده الكلام اللى اتقالي في الشركة لكن علشان اشتغل صح يبقى اشيل خالص ثرموستات الكوع واركب ثرموستات اقل كده الحرارة هتبقى افضل لكن في الشتى والجري في الطرق السريعه الحرارة هتقل عن المطلوب بكتير وده اللى مش عايزه ده غير انها هتاخد وقت اطول بكتير في التسخين

[sab3aawy]

ثرموستات الكوعة ثرموستات ميكانيكى بالكامل بيشتغل على درجة الحرارة المرتفعة فى وش السلندر ومالوش دعوه نهائيا بثرموستات المروحة وبالتالى لو هو سليم لازم يكون فاتح على الآخر فى حالتك دى، يعنى درجة الحرارة عند ثرموستات الكوعة هى نفسها درجة حرارة حساس مؤشر التابلوه، وبالتالى عند 90 وطالع لازم يكون فتح على الآخر ، غير كدة يبقى بايظ وعايز يتغير ، لكن ثرموستات المروحة راكب فى قاع الردياتير من تحت عند ابرد حته فى الدورة، يعنى علشان يشغل المروحة عند 75 هتكون درجة الحرارة فوق عند ثرموستات الكوعة وحساس التابلوه مش اقل من 85-90، وبالتالى هكيون فاتح على الآخر لانه بيفتح على الآخر عند 70، اما فى الشتاء فلو العربية باردة فهو هيكون مقفول سواء ثرموستات المروحة عالى او واطى

لو ثرموستات الكوعة بيفضل قافل لحد ما حرارة المؤشر توصل 90 يبقى ببساطة بايظ وعايز يتغير

[Xpert]

سبعاوي هاز اسبوكن ! ههههههههههه فينك كده مختفي يا سبعاوي بيه اليومين دول ليه ؟ خير اللهم اجعله خير ..
المهم يا باشا .. سؤال بقي بيني و بينك شاغلني بقالي مده ..الواحد يجرب الثرموستات ازاي ؟تحطه في مياه مغليه بيفتح ؟ ولا لازم يكون في دايرته ؟ .زز شفت بقي السؤال ده ؟ (ثرموستات الكوعه طبعاُ )

[pointer]

معلش سؤال علي الماشي لل م خالد سبعاوي
معلش لو احنا غيرنا الثرموستات لأوطي او لاغنها خالص دي مش هتأثر علي الموتور لانه المفروض هياخر سخونه الموتور لو اتشالت فهتبقي بتسخنها ساعه والموتور مش بيسخن
في حاله تعدلها برضو مش هتاخر السخونه بتاعه الموتور بردو وهتقلل من سخونته بدرجه كبيره السؤال معلش رخم استحملني
ليه المصنع عملها كده ؟
اسف انا بسال بس لاتفتكر حاحه
والسؤال ده لان ناس بيقولوا شيل ده وحط ده وانا بحس ان المصنع هو ادري واحد في معرفه صنعته و كمان الابحاث بتاعته لو الشركه محترمه ولا اللي عاوز يلغي
انا عاوز افهم بس

[hazem_khidr]

بص علي المروحه ممكن يكون الفيشه بتاعها متركبه غلط
لو المروحه بتلف عكس عقارب الساعه يبقي كده صح
لو المروحه بتلف مع عقارب الساعه يبقي كده غلط و الحل بتفك الفيشه و تقلبها تقوم تشتغل صح.
..................
لو مش كده شوف ترموستات الكوعه و دي تعرفها لما الموتور يبقي سخن و الردياتير بارد جدا و دي لسه حاصله مع واحد صاحبي قريب و بعد دوخه اكتشفها.
..........
لو مش الاتنين دول غير الساعه زي ما سبعاوي باشا قال

[sab3aawy]

معلش سؤال علي الماشي لل م خالد سبعاوي
معلش لو احنا غيرنا الثرموستات لأوطي او لاغنها خالص دي مش هتأثر علي الموتور لانه المفروض هياخر سخونه الموتور لو اتشالت فهتبقي بتسخنها ساعه والموتور مش بيسخن
في حاله تعدلها برضو مش هتاخر السخونه بتاعه الموتور بردو وهتقلل من سخونته بدرجه كبيره السؤال معلش رخم استحملني
ليه المصنع عملها كده ؟
اسف انا بسال بس لاتفتكر حاحه
والسؤال ده لان ناس بيقولوا شيل ده وحط ده وانا بحس ان المصنع هو ادري واحد في معرفه صنعته و كمان الابحاث بتاعته لو الشركه محترمه ولا اللي عاوز يلغي
انا عاوز افهم بس

بص سؤالك ينقسم لشقين: الشق الأول خاص بتعديل تجهيزات المصنع:

والله الموضع كبير ، ليه بأه؟

لعدة اسباب، فيه عربيات موديلات قديمة قبل انتشار الردياتير الألومنيوم ، وبالتالى دى من يومها بتؤدى كويس فى الشتاء وتسخن الى حد ما فى الصيف، كان ذلك مقبولا فى الماضى ايام كانت كل السيارات تسخن فى الصيف، لكن مع تطور تصميمات السيارات وبقاء بعض الموديلات القديمة على خطوط الإنتاج بدون تطوير على خطوط الأنتاج، اصبحت سمة السخونة صيفا مشكلة بالمقارنة بالسيارات الأحدث
وفيه عربيات تانية اقتصادية مصممة للعمل فى الأجواء الباردة فقط وبالتالى بتسخن فى جونا،

وفيه عربيات تالتة مصممة بشكل جيد لكن التنفيذ فى مصانع خارج الشركة الأم قد يعتمد على مكونات موردة من موردين محليين يتساهل المصنع المحلى فى شروط قبولها مما يؤدى لمشاكل فى السيارة

واللى بيشترى العربية بيشتريها وهو عارف مشكلتها علشان سعرها ، او بيشتريها على عماه

وبعد كدة تبدأ بعض الحلول تظهر لمداواه مشاكل السيارة، احيانا تكون حلول ناجحة لكن مكلفة استرخص المصنع المحلى ومحطهاش مثل تعديل السيات 133 الى نظام كبالن بدلا من الفلانشات الكاوتش، واحيانا تكون حلول رخيصة تحمى من مشكلة ضخمة متوقع ظهورها قريبا مقابل احتمال مشكلة صغيرة قد تظهر بعد مدة طويلة(مثلا ثرموستات واطى يحمى من السخونة وما يتبعها من فساد وش السلندر او التفويت، مقابل قصر عمر مروحة الردياتير مثلا)


اما الشق التانى الخاص بالثرموستات فانا احبب بس اننا نفرقف مابين نوعين من الثرموستات،

ثرموستات الكوعة وده مافيش منه عالى وواطى، ده اداه ميكانيكية مافيهاش كهرباء نهائيا وانما مجرد بلف راكب على سوستة حرارية بتفتحه لما المية تسخن، و هو صنف واحد وبيفتح تدريجيا حسب درجة الحرارة، وانا لا انصح اطلاقا بخلعه، لكن بتغيره بجديد من نفس النوع لو باظ، وهو ده المسئول عن تسخين العربية صباحا، وبالتالى احنا كدة متفقين على ان ما يساعد على تسخين العربية صباحا بسرعه لا يصح ان استغنى عنه

اما الثرموستات الذى انصح بتغييره للواطى فى حالات السخونة المفرطة فهو الثرموستات الكهربائى اللى بيقفل دايرة تشغير مروحة الردياتير فى حالة السخونة المفرضة، وده مالوش اى دور والعربية باردة وبتسخن الصبح، سواء كان عالى او واطى لان حتى الواطى بيشتغل لما العربية توصل فوق 70 درجة وهنا بيكون ثرموستات الكوعة المسئول عن التسخين فتح وخلص دوره نهائيا، لاحظ ان ثرموستات الكوعة بيشتغل على درجة حرارة المية فى وش السلندر، فى حين ان ثرموستات المروحة فى العربيات الىى فيها مشاكل سخونة بيشتغل على حرارة الردياتير، يعنى تغيير ثرموستات المروحة بأخر واطى ليس له ادنى تأثير على اداء ثرموستات الكوعة لأان ثرموستات المروحة بيشتغل بعد ما بيكون ثرموستات الكوعة خلص دوره نهائيا

واى سؤال تانى انا تحت امرك

[eldeplomasy]

طيب لو غيرت الثرموستات بواحد أقل ده مش هيقصر عمر مروحة الردياتير ده اولا؟؟؟



ثانيا العربية وهي جديده كانت بنفس الثرموستات العالى ده وثرموستات الكوع كشفت عليه وتمام والعربية وهي جديده كانت المروحة بتشتغل على ال90 بالضبط حتى بالردياتير القديم ال2 ماسورة وده معناه انه حصل حاجه فيها ومكنش العيب من الردياتير العيب في مكان تاني انا مش قادر اوصله وبالتالي لو غيرت الثرموستات بواحد اقل مع وجود العيب زي ما هو ده اكيد هيبقى حمل اكتر على مروحة التبريد وبالتالي تشغيلها فترات أطول وبالتالي تلفها في اسرع وقت وده اللى خايف منه


العربية فيها حاجه مش مضبوطة وانا افتكرت ان المشكلة دي ظهرت بعد ما حطيت ميه خضراء بيها شوائب كتير وسافرت العين السخنه وطول الطريق رايح جاي كنت ماشي على سرعه 150 بس كان في الشتى بعد ما رجعت سلكت الردياتير من الشوائب والحرارة متضبطتش اوي ومن ساعتها المشكلة قائمة فهل تتوقع الرواسب سدت حاجه في الموتور او ترسب في طلمبة الميه وضعفتها ولا الموتور جاب جيوان وش سلندر مع ملاحظة ان اداء الموتور فوق الممتاز ببنزين 90 كمان ولما بحط 92 صوت الموتور بيعلي واداءها بيقل واستهلاكها فيه بيزيد بالهبل ومش عارف اغير ثرموستات الكوع للتاكد ولا اغير طلمبة الميه ولا اغير الردياتير تاني ولا اكشف على جيوان وش السلندر ولا اعمل ايه؟؟؟

انا قلت اقول المعلومة دي يمكن تفيد

وآسف طولت عليكوا بس بجد الموضوع ده خانقني جدا

[sab3aawy]

بالنسبة لحكاية قصر عمر المروحة فده حقيقى وان كان مش بالدرجة اللى انت متخيلها لأن خد بالك ان مشكلة زيادة التحميل على المروحة هى مشكلة 3 شهور الصيف فقط وبالتالى المروحة بيختصر من عمرها شهر ونص الى سهرين بالكتير كل سنة، يعنى لو عمره الأفتراضى مثلا 10 سنوات يبقى هتعيش 9 ، وانا شايف ان ده مقابل مش وحش افدى بيه الموتور بالكامل

اما بالنسبة للسخونة المفرطة ، فلو بعد مراجعة التاكيهات والشكمان وزاوية التقديم ولسة العربية بتسخن يبقى سبب السخونة خارج عن السيطرة، قد يكون اختناق فى المسارات وقد يكون ضعف فى اداء الطلمبة وقد يكون ثرموستات الكوعة ، يمكن الحكم على اداء ثرموستات الكوعة من خلال قياس الفرق فى درجة الحرارة بين الماء فى وش السلندر والماء فى الردياتير، وده عن طريق وضع ترمومتر مئوى فى فتحة غطاء الردياتير ومقارنه قرائتة بقراءة عداد الحرارة، لو عداد الحرارة فارق عشرة درجات مثلا عن فتحة الردياتير العلوية يبقى كدة ثرموستات الكوعة هو المتهم رقم 1


وفى حالة استنناء ثرموستات الكوعة يبقى كدة انت عملت اللى عليك وليس امامك سوى الثرموستات الواطى، او تركيب مروحة تبريد على طنبورة طرمبة المياه

[eldeplomasy]

ثرموستات الكوعه شفته ونظفته وهو تمام وانا فاكر في مرة كنت فاتح غطا الردياتير ولعبت في الكهربا خليت المروحة تاخر ومتشتغلش غير متاخر جدا المهم وجدت ان امبير الحرارة جوه العربية قاري من 100 - 105 والميه بدات في الغليان وده دليل على ان ثرموستات الكوع تمام ده غير ان الصبح وانا بسخن بلاقي الحرارة وصلت قرب التسعين ورجعت نزلت بسرعه جدا لل80 ورجعت عليت لل90 ورجعت نزلت بنفس السرعه لل80 لغايه ما الميه اللى في الردياتير تسخن وده معناه ان الثرموستات لما الموتور بيسخن بيفتح ولما تبرد وتوصل لل80 يقفل حتى على الطرق السريعه بلاقي امبير الحرارة واقف عند ال80 وده معناه ان الثرموستات الكوع قافل وشغال تمام


اللى ميحرني انها كانت كويسه بالثرموستات الكهربا العالى الموجود حاليا لحد السفريه اللى قلتلك عليها فهل مثلا لما مشيت على سرعه عاليه والار بي ام كان على 5000 لفة حصل حاجه في الموتور وكمان كنت مشغل المكيف ولا الطرمبة ولا ايه؟؟؟

[eldeplomasy]

طيب لو حبيت اغير الثرموستات اغيره لاي مقاس اللى هو 80 -85 ولا 70-80؟؟؟

واجيب نوع ايه ومنين؟؟؟

[uhlphp]

المهندس سبعاوى ارجو التكرم بسئوال فى مؤشر الحرارة
المؤشر عندى فى السيارة مازدا 323 يتحرك مسافة قصيرة جداً لدرجة انه لا يتعدى اول التدريج وكشف الميكانيكى علية وقال انه شغال ولا يوجد اى مشكلة ولكنى خائف من ان لا تكون هذه الدرجة الحقيقية وكذلك انا عندى المروحة دائماً تعمل من بداية تشغيل السيارة فهل هذا غلط .

[sab3aawy]

اللى ميحرني انها كانت كويسه بالثرموستات الكهربا العالى الموجود حاليا لحد السفريه اللى قلتلك عليها فهل مثلا لما مشيت على سرعه عاليه والار بي ام كان على 5000 لفة حصل حاجه في الموتور وكمان كنت مشغل المكيف ولا الطرمبة ولا ايه؟؟؟

انا معتقدش ان حكاية ال 5000 دى عملت فيها حاجة، انا عشت بالشاهين 5 سنوات وكنت كل يوم الصبح وانا رايح الشغل بجيب بيها 140 واحبانا اكتر شوية لمدة دقيقتين الى تلاتة والRPM كانت بتقرب من ال 5000

بس علشان تحيد السبب ده اكشف على تاكيهات العربية، وخلى اللى بيكشف على التاكيهات يراجع لك ركب الكامة ركبة ركبة ، ولو فيهم واحدة متآكلة غير عمود الكامة، ولو العمود سليم تأكد ان خلوصات التاكيهات مظبوطة، وان مافيش تاكيهات محملة

بعد كدة لو برضه مالقيتش حاجة يبقى ابندى بثرموستات واطى 80-85 ، حل معاك المشكلة فبها ونعمت، محلهاش انزل للأق(هو كله ب15 جنيه وممكن تفكه وتركبه بنفسك-مع الحرص انك متفكوش والعربية ساخنة لتفادى الاصابة بالحروق)

[Adham]

مش عارف الموضوع طول معاك قوي بس انا ابتديت اشك ان ممكن تكون عربيتك فيها عيب وش سلندر

يعني سخنت منك جامد و حطيت مياة باردة وللا حاجة فا الجوان ضارب او الوش مقفع

ويكون فية تسريب كبس في المياة وبدون ما ياثر على مجاري الزيت و دة يخللي العربية تسخن كدة و تنقص شوية مياة من غير مايكون فية تسريب و يهرب شوية كبس في المياة عالردياتير و مايبانش من طحينة في الزيت ولا حاجة

اكشف عالموضوع دة و طمننا

[eldeplomasy]

هي كانت سخنت مرة من سنة تقريبا بس كانت كويسه بعدها لمدة سنة برده وظهر عيب السخونة من شهر فبراير اللى فات بس

والله انا شاكك في طرمبة الميه لاني في مرة حطيت ميه وكانت كلها رواسب وبعدها سلكت الردياتير ومن بعدها وهي مش مضبوطة فبفكر اغير او افكها اكشف عليها بس وبصراحه حرام ابيعها كده هخسر فيها كتير ومش عارف اعمل ايه حتى في التوكيل قالولي كله تمام والعربية سليمه بس انا متاكد وهي جديده كانت المروحة بتشتغل بالثرموستات الكهربائي الموجود دلوقتي وكانت تمام وده دليل على وجود عطل وحتى بعد ما غيرت الردياتير العطل مازال موجود بس استبعد جدا جيوان وش السلندر لان مفيش طحينه خااااااااااااااااااااالص ولا حتى تشبه بوجود طحينه ولا سخنت اساسا غير المرة دي وصلت قرب ال130 وكنت وقتها لسه مسلك الردياتير والراجل محطش ميه وبعد ما سخنت حط ميه وبقت تمام لمدة سنة وظهر العيب بقى

عموما قريب ان شاء الله هكشف على طرمبة الميه واطمنكوا وادعولي المشكلة دي تتحل

[eldeplomasy]

وفي حاجه لاحظتها تاني بتحصل معايا وهي اني لما بمشى هادي المروحة بتشتغل عند ال95 ولكن لما اقرص او اشد او اجري بسرعه لمدة اوجي اقف في اشاره بلاحظ ان المروحة بتشتغل عند ال110 او قبلها بشوية فهل ده يدل على ضعف طلمبة الميه؟؟؟

والميه عندي بتنقص بمعدل كل اسبوع ازود حوالي لتر او اكتر ولكن مشكلة نقص الميه دي ظهرت بعد تغيير الردياتير ودي غالبا مشكلة تقفيل ردياتير وانه بينقط

بس قلت اقولكوا على كل حاجه يمكن تساعدكوا في حاجه


وكمان يا باشمهندس سبعاوي انا اللى مجنني ان العربية كانت تمام بالثرموستات العالى اللى فيها ده وطالما هي مش مضبوطة دلوقتي يبقى اكيد حصل فيها حاجه فلو حطيت واحد اقل المشكلة هتفضل زي ما هي ولا ايه؟؟؟

طيب اروح لمين يكشفلي على كل حاجه ويريحني من المشكلة دي نهائيا؟؟؟