صوت غريب مع السرعة

[kareem_eg]

بكرر شكري لردودك السريعة
بس معلش مش متخيل ازاي ارفع العجلتين اللي ورا

اظن ان انا كده محتاج كوريك تمساح او كمان حبقي محتاج اتنين عشان ارفع العجلتين اللي ورا (انا عندي الكوريك اللي بيعشق في ماسورة حديد في وسط العربية )

وللا انا مش فاهم المنظر ؟

[smsm_nabawy]

لا شكر على واجب أكيد!! :)

لالا أنا كنت بتكلم على أساس أنك عندك كوريك تمساحة!!

لو عندك الكوريك العادي بتاع الشاهين!!

أرفع بردو عادي!!!

هو كده كده الكارونة حتلف العجلة الي مش على الأرض.. و العجلة الي على الأرض حتفضل ثابته!!

بس أهم حاجة تكون حاطط طوبة كبيرة قدام العجلة الي قدام على الأرض

و كذلك قدام العجلة الي ورا على الآرض

الي هما المفروض يبقو الشمال!! و ترفع الجنب اليمين

علشان ده الي ناحية العلبة بتاعت الجكمان!!

و تخلي حد معاك بيعرف يسوق ... يعشق رابع و ينزل هاند!! حتلاقي العجلة بتلف!!
"الي ورا يمين علشان هي المرفوعة!!
و يخلي باله معاك.. لما تقوله زود سنه و كده!! و يكون نبيه علشان لو لا قدر الله حاجة حصلت غلط و العربية نزلت من على الكوريك ساعتها حتمشي!! فيدوس فرامل هو .. "ده لو لا قدر الله يعني!!"

و قولنا النتيجة أيه.. هل الصوت ظهر ولا؟؟

و حاول تكون العريبة بارده علشان تعرف تمسك الجاكمان و تقربه بأيدك من الكردان و تسمع الصوت بردو و تميز

[kareem_eg]

نمام ..ان شاء الله حعمل كده و اقلك النتيجة .

و انا النهاردة و انا ببص تاني لقيت الحديدة اللي انا مشاور عليها وقعة من نجيت العجلة (.. ووقعة من الحتة اللي بتعشق فيها في المنطقة اللي جوة الدائرة)

http://www.mediafire.com/convkey/6059/ie11gip9pybp1416g.jpg

وانا بحط بنزين سالت الراجل بتاع تربيط العفشة علي الصوت قالي معرفش ..خليتو ربط العفشة و قلتلو علي الحديدة قالي المفروض يبقي فيه حاجة مسكاها ووقعت اسال الميكانيكي بتاعك ..
هل تفتكر الصوت منها

[smsm_nabawy]

يا نهار أبييييض!!
الحديدة الي حضرتك مشاور عليها بالسهم دي أسمها شداد!!!

دي تعمل اكثثثر من كده!!! دي ممكن تقلبلم العربية!! لأن دي بتمنع الكرونة انها تلوي معاك!!

و الدايرة الي حضرتك عاملها دي دايرة على السوست!! السوست بايظة قصدك؟؟؟ ولا أنت قصدك على الشداد الصغير الرأسي الي طالع من الدفرنسيه و رابط في الشاسيه من تحت؟؟؟؟

و الشداد ده يعملي عفشجي يا سيدي الفاضل مش ميكانيكي!!

عامةً... شوف بردوا موضوع لما ترفع العربية دي ده ... و طمننا!! :)

[smsm_nabawy]

أيون الحته دي أسمها شداد.. و حصورلك بتبقى رابطة في أيه في الدفرنسيه!!

[س للأسف موبايلي أتسررررق!! :(((

حسبي الله هو نعم الوكيل في الي أخده!!!
يصرف فلوسه على صحته أن شاء الله!! منه لله!! تنشل أيده!! :(

المهم... ححاول أصورهالك في النهار بأي موبايل من موباايللات صحابي و أبعتهالك

[kareem_eg]

تسلم يا ا/ smsm

و مقصدش السست ..انا اقصد ان في المنطقة ده(تحت العربية) في زي دائرة صغيرة مفتوحة تقدر تعتبرها شكل "c" فواقع منها الحديدة ( او زي ما حضرتك بتقول الشداد )
علي حسب كلام الراجل ان المفروض انها تكون مقفولة "o" ولكن في حتة اتكسرت ...
انا ممكن ادور علي عفشجي بكرة و اشوف الموضوع طالما هو خطير كدة .. ده انا كل يوم 40km من الجامعة للبيت

[kareem_eg]

و حسبي الله و نعم الوكيل في اللي سرق الموبايل .. الواحد ماشي الايام ده عينيه في وسط راسه ..

ربنا يعوض حضرتك خير

و يجازيك خير علي مساعدتك وو قتك اللي مضيعو معايا

[HRH_Sameh]

متابع
وان شاء الله توصل لحل المشكلة

[kareem_eg]

ا/HRH_Sameh
يشرفني تواجدك في الموضوع .. و ان شاء الله نوصل لحل ..

انا معرفتش النهارضة اروح لاي عفشجي .. ده انا وصلت البيت بالعافية ف 3 ساعات عشان قافلين الطريق
ان شاء الله في اقرب فرصة حروح و اكتب النتائج

[kareem_eg]

رحت للراجل النهاردة .
نزل تحت العربية و ثبت العمود (الشداد ) اللي كان فاكك و قالي انا غيرتلك الحتة المكسورة و كده تمام
و بعدين ركب معايا و سمعته الصوت قالي ده ونة فتيس غير الزيت ..قلتلو انا لسه مغير الزيت من اسبوعين
قالي خلاص سيبك من الصوت ده و كدة كده ده واطي اوي و ممنوش خوف

[smsm_nabawy]

ونة فتيس؟؟

أزاي و أنا على ما أتذكر أنك قلت أنك بتسمعه من ورا؟؟؟ مش من تحتك!!!

و ونة الفتيس تبان على زيادة الآر بي أم سواء واقف أو ماشي!!!!!

حاول تغير زيت و تحط مانع للونة المرة الجاية بس بعد متتأكد فعلاً أنه ونة فتيس!!!

أفتح كبود العربية... و حاول تقرب ودنك للجير بوكس.. و خلي حد يدوس بنزين و يزود الآر بي أم!!!

ألا لو كان ده صوت بيظهر على غياار محدد و بسسسسسس

و ساعتها ممكن يكون حاجة في البراميل بتاعت الغيار ده!!

[kareem_eg]

الصوت مش موجود في المور نهائيا
بيبدا زي ماقولت اخر الثالث او اول ما اجيب الرابع و بعديه الخامس

بس برضو حفتح الكبود و حشوف لو سمعت الصوت
و بالنسبة لتغير زيت الفتيس مع مانع الونة دا انا لسة مغير زيت من اسبوعين بس تقريبا :(

[smsm_nabawy]

خلاص كده الحل الوحيد زي مقلتلك!!

توقف العربية على كوريك و تعشق ثالث و تخلي حد يدوس بنزين و ترمي ودنك مع الصوت!!!

انا مش عارف ازاي مفيش مكيانيكي جرب الموضوع ده معاك لحد دلوقتي؟؟؟؟؟!!!!!!!!

[kareem_eg]

اسف جدا علي انقطاعي نظرا لظروف خارجة عن ارادتي .

انا رفعت العربية زي ما قولت يا ا/سمسم .. الصوت مش ظاهر من بره العربية خالص .
بس في حاجه جديدة اخذت بالي منها .. الفتيس طول ما هو مور ما فيش صوت بس اول ما احركه يمين او شمال (قبل ما اجيب الغيار ) يبدا الصوت في الظهور و مجرد ما اسيب الفتيس و يرجه للنصف يضيع الصوت

[smsm_nabawy]

هو صوت كركرة كده؟؟؟

و بيضيع لما تدوس دبرياج؟؟؟
كدهي بقى غوايش جيربوكس