سؤال بخصوص الزيت ؟؟

[boody2]

أنا موافق على كلام الأخ معاذ و أنا شخصيا من الناس الحسوكة جدا و بغيره على 8 أو 9 ألاف بالكتير :D :D :D
لما الميزانية تسمح طبعا :D وللحفاظ على الموتور لأن الزيت روح الموتور و هو روح العربية .
وتصبحوا على ألف خير و ألقاكم غدا ان شاء الله

صديقي العزيز

انا معا الاستاذ اسلام لان الجو و الطرق المصرية و الشوارع و الاشارات لا يمكن ان يستحمل فيها الزيت ال 10000 كم و انا عن نفسي لو حتسميني محسوك انا بغير الزيت وموبيل وان مع الفلتر في اي بنزينزة موبيل كل 7500 كم لان بصراحة فعلا الزيت روح و قلب العربية و العربية لسة فلوسها ما بردتشي

اخوك مهاب

[Santino]

هو الشل غلي هو كمان ؟!! :shock: بدل ما يستفيدوا من إنهم أرخص من موبيل 1 و يزودوا مبيعاتهم و ينتشروا أكتر , يقوموا يغلوا :x , طيب ماهو في ناس ح تقولك طالما غلي و سعره بقي زي موبيل1 نستخدم موبيل اللي متعودين عليه , يعني بيخسروا نقطة أفضلية عندهم , لأن مش كل الناس عارفه إن شل أحسن من موبيل .

[h_hezzah]

فيه التوتال 9000 برضه كويس
وسعره 175 (على اخر مرة غيرت فيها من شهر ونص تقريبا)
وميزته ان فى محطات توتال بيبعوا الزيت كمان من طرمبة للزيت ويحاسبك على كمية الزيت اللى بيحتاجها موتورك بس.
يعنى لو بتاخد 3.5 تدفع ثمن ال3.5 بس مش ال4 لتر.

حاجة تانية. انا مستغرب قوى على موضوع تغيير الزيت عند 1000 دى :roll:
الموضوع ده بطل من زمان واظن لو راجعت جدول الصيانة فى الكتالوج مش هاتلاقيه جايب سيرة التغيرة دى خالص
وما أظنش انه هايكون قايل اقل من 10000 ,
بس طبعا نظرا للحسوكة والتراب والحر والذى منه ممكن تمشيها 5000 اول مرة بس 1000 دى قليل قوى.

[إسلام شاهين]

يعني يا جماعه موبيل ولا شيل ولا توتال ؟ولا فيه حاجه تانيه ولا هي ديه أذواق هيا كمان ؟؟؟؟؟؟؟؟؟؟؟؟؟؟؟؟؟؟؟

[h_hezzah]

لو مش مقتنع بالتوتال انصحك بالشل
ولو انه لو كان غلى برضه يبقى يخسر نقطة فى نظرى.
بس انا لما حطيته بعد الموبيل حسيت انا فعلا صوت الموتور اهدى.
اما بقى هايحتفظ بلزوحته قد ايه ماعرفش لأنه لسه بقاله كام الف بس.
انما كريم كان بيشكر فيه قوى

[Karim_Monir]

انا ما زلت بشكر فيه والله يا حازم باشا
لانه مفيش حد حطة الا وخلي صوت الموتور هادي
اما موبيل انا سمعت انه وصل ل 240 جنية
عشان كدة شل رخصت سعرهها
شل انا كنت بستعملة في الكيا ريو ودلوقتي بستعملة في كرولا
وغيرت زيتها عند اللاف مخصوص عشان كان صوتها عالي
وهدي لما حطيت شل
ومهندس مركز الخدمة قاللي نفس الكلام
حط شل وبلاش موبيل عشان مضروب وبيتعبي كمان

[h_hezzah]

انا اللى خلانى اغضب على الموبيل (غير انهم بيستهبلوا فى سعره) انى فعلا اخر مرتين حطيته كان بيسود ويسيل بطريقة غير طبيعته خالص.
يعنى انا دايما بغيره على 12500 وبيكون لونه بنى غامق.
اخر مرتين كان بعد ال5000 بيكون بقى اسود جدا وغيرته على 9000 وانا حاسس انى قسيت على العربية.

[Santino]

أنا برتاح جداً للشل , و مش بحس خالص إنه إتغير أو تعب مع الإستخدام .

[Karim_Monir]

انا اللى خلانى اغضب على الموبيل (غير انهم بيستهبلوا فى سعره) انى فعلا اخر مرتين حطيته كان بيسود ويسيل بطريقة غير طبيعته خالص.
يعنى انا دايما بغيره على 12500 وبيكون لونه بنى غامق.
اخر مرتين كان بعد ال5000 بيكون بقى اسود جدا وغيرته على 9000 وانا حاسس انى قسيت على العربية.

عشان كدة بقول انه بقي مضروب فعلا
بياخدو الجراكن ويعبوها زيت سايب ويبرشموها ويبيعوها تاني
في محل في العاشر من رمضان بيبيعه ب 140 جنيه
وبيقول انه بيشترية جملة من المصنع وبياخد خصم كميات
وكل بتوع الاقاليم بياخدو منة
خصم 75 جنية
طب ازاي

[h_hezzah]

حسبى الله ونعم الوكيل

طب محل وبيبيعه مغشوش ، ممكن

بس محطات موبيل نفسها برضه بتبيعه مغشوش؟

يعنى الشركة الام هى اللى بتغش

[إسلام شاهين]

طيب أي نوع شل اللي أحطه ؟ اسمه إيه وبكام ؟ وأي محطة شل مضمونه الاقيه عندها ؟؟؟؟؟

[أبو_حمزة]

فى كمان Caltex Havoline formula
نوع زيت مختلك 5-30 و ده ب 100 على ما اذكر وحلو جدا فى الشتاء و سعره حولى 100
كلن بيعقد معايا 8000 و بغيره ولسه اللزوجة كويسه جدا
بس فى الصيف يستحسن يكون الزيت درجته على الأقل 0-40 زى موبيل أو 5-40 زى توتال
و لو 10-50 يبقى أحسن حاجة عندنا

و يا جاعة مفيش عربيه الموتور بتاعها مظبوط تغير زيت على أقل من 5000
شركات الزيت بتحاول تقنعنا ان غير الزيت الكتيى مفيد عشان ندفع
اللى مكتوب فى الكتالوج نعلمه حتى مكتوب نغير على 20000
العربيات الجديدة معظمها extended service interval

[إسلام شاهين]

طيب أي نوع شل اللي أحطه ؟ اسمه إيه وبكام ؟ وأي محطة شل مضمونه الاقيه عندها ؟؟؟؟؟

[szrateb]

في حاجة مهمة انتو ناسينها وهي انة يفضل تغيير الزيت بحد اقصى 6 شهور بغض النظر عند عدد الكيلومترات وذلك لأن الزيت يفقد خواصة بعد فترة وخصوصا لو السيارة بتتركن لفترات
فيجب عند تغيير الزيت أخذ هذة النقطة في الاعتبار وشراء الزيت الذي يتناسب مع السير بالسيارة في فترة 6 شهور
أي إذا كنت تسير كثيرا بالسيارة اشتري زيت 10000 كم وغيرة بعد 8000 كم أو 6 شهور (مثل موبيل1)
لو كانت مشاويرك قليلة اشتري زيت 5000 كم وغيرة بعد 3500 كم أو 6 شهور (مثل موبيل XHP)
والله أعلم

[أبو_حمزة]

كل محطات شل هتلاقى عندها نفس الزيت
اللى انت عيزه Shell Helix Ultra
وسعره كان 185 بس واحد من الأخوه قال انه بقى 215
بس فى حاجتين مهمين
اتأكد و هو بيفتح الزيت أن الجركن مبرشم
و اتأكد انه غير فلتر الزيت
فى نا معندهاش ضمير ممكن ياخد منك الفلتر و يسيب لك القديم زى ما هو