الكربراتير و الانجيكشن

[m_saad80]

يا جماعة اية الفرق بين الكربرتير و النجيكشن و هل فعلا اانجيكشن اوفر جامد فى البنزين
و لو فعلا اوفر هل من الممكن تعديل العربية علشان تبقى انجكشن بدل كاربراتير
و اعذرونى لقلة معلوماتى لانى لسة مبتدأ و الجو الافادة

[Abdallah]

بالتأكيد الانجكشن اوفر من الكابراتير واريح فى الصيانة , انا عندى التويوتا ال 1300 بتستهلك بنزين زى الدايو 1500 شوف انت بقة الفرق عامل ازاى...

للاسف مينفعش تقريبا والافضل انك تشترى موتور انجكشن هيبقا اريح بكتير من انك تعدل موتورك الكاربراتير.

[hazem_khidr]

الانجكشن اوفر في الاستهلاك من الكاربيراتير.
ممكن تغير من كاربيرتير لانجكشن لو كان موتور عربيتك نازل منه انجكشن بتحتاج تششيل وش السلندر كله و تجيب وش سلندر انجكشن برشاشاته بكل حاجته. زي مثلا ال 132 كده فيه منها كاربيراتر و انجكشن و ممكن تغير بينهم و موتور الشاهين برضه نفس الشئ بس ال 1400

[vooooo]

بس يا شباب انا سمعت ان الأنجكشن ليه مشاكله برضه
و لما جيت اشترى موتور للفولفو جديد كل الميكانيكيه قالولى اوعى تجيبت انجكشن علشان مشاكله
هات كاربراتير علشان تريح دماغك
و بصراحه مع الكاربراتير مش مستريح برضه

[hazem_khidr]

المشكله ان الانجكشن مش كل الفنيين بيفهمو فيه غير كده لازم تحط بنزين 90 او 92 كمان غير بقي مشاكله و عدم وجود الخبره في صيانته

[vooooo]

طيب مشاكل الأنجكشن ايه؟
لو مثلآ ظبطت الأنجكشن فى التوكيل مره واحده هل كده هريح دماغى ؟؟
يعنى مثلآ الكاربراتير بصراحه محدش عارف يظبطه و بحط 90 و عمرى مافكرت احط 80 فمش دى هتبقى المشكله لكل الناس
يعنى الكاربراتير كل شويه يتظبطله هوا و سلانسيه و كهربا مقدمه و كهربا مأخره
هل الأنجكشن كده برضه

[hazem_khidr]

لو الموتور نضيف و الانجكشن مافيهوش مشاكل و ظبطه في التوكيل زي ما بتقول يبقي ايه المانع حيبقي كويس اوي طبعا وبالنسبه للفولفو حيوفر معاك جامد انا عارف استهلاكها كويس عامل ازاي ربنا يكون في عونك

[Abdallah]

لا طبعا الانجكشن لو الموتور نظيف هيقلل زياراتك للميكانيكى تماما لانه بيظبط مواضيع الهوا والسلانسيه والبيكات والكلام دة لوحده , بس برضة ليه عيوبة ولكن هو اريح كثيرا من الكاربوراتير.

[أبو_حمزة]

يا جماعة برضة عشان الكلام يبقى واضح
الراجل اساسا عيز يوفر بنزين عشان الفولفو استهلاكها رهيب
عشان يبقى على نور لازم ياخد باله
الانجكشن أو الحقن هايوفر شويه
بس مش بالدرجة
يعنى لو 1 لتر بيعمل معاه 6 كيلومتر
مع الانجكشن ها يبقوا 6.5 أو 7 بالكتير
العربيه اصلا موتورها كبير

[محمد ابراهيم 1]

الانجيكشن مش أوفر فى البنزين والامثله كثيره
ماتريكس استهلاكها عالى جدا
لانوس استهلاكها عالى جدا
ماتيريا استهلاكها عالى
التطور اللى حصل فى محركات السيارات لم يؤثر بدرجه ملحوظه على الاستهلاك فما زالت السيارات تستهلك ارقاما لا تقل كثيرا عن ذى قبل فمثلا تويوتا عيون استهلاكها يعادل تويوتا الجديده حوالى 360 فى الصفيحه بدون تكييف رغم ان العيون كاربراتير والتانيه انجيكشن
مثال آخر بيجو 405 كاربراتير 1600 استهلاكها (والله العظيم ) أقل من لانوس 1500 انجيكشن
على فكره الامثله السابقه عن تجربه شخصيه

[hazem_khidr]

بس حضرتك انا مجرب الكورولا 95 و الكورولا 2004 فرق شاسع في الاستهلاك بصراحه.

[m_saad80]

الف شكر يا جماعة على المعلومات الجامدة دي و انتوا طلعتوا بجد اساتذة

[Abdallah]

الانجيكشن مش أوفر فى البنزين والامثله كثيره
ماتريكس استهلاكها عالى جدا
لانوس استهلاكها عالى جدا
ماتيريا استهلاكها عالى
التطور اللى حصل فى محركات السيارات لم يؤثر بدرجه ملحوظه على الاستهلاك فما زالت السيارات تستهلك ارقاما لا تقل كثيرا عن ذى قبل فمثلا تويوتا عيون استهلاكها يعادل تويوتا الجديده حوالى 360 فى الصفيحه بدون تكييف رغم ان العيون كاربراتير والتانيه انجيكشن
مثال آخر بيجو 405 كاربراتير 1600 استهلاكها (والله العظيم ) أقل من لانوس 1500 انجيكشن
على فكره الامثله السابقه عن تجربه شخصيه

اسمحلى انا كان معايا ال كورولا ال 93 وكان معايا ال 2002 وفرق شاسع فى الاستهلاك بين الاثنين
ال 93 كانت بتعمل 250 فى الصفيحة وال 2002 كانت بتعمل 290 فى الصفيحة بنزين 90 اوكتان.

لما تحب تقارن بين مواتير, قارن بين شركة واحدة, يعنى قارن بين بيجو 504 وبيجو 406 والاثنان 2000 سى سى
قارن بين اللانوس وقارن بين الدايو سليو
لو كان الكلام زى ما حضرتك بتقول مكانش مبيعات السيارات الاسيوية تزيد فى امريكا بالطريقة دى, العالم كله بيتجه للسيارات الموفرة فى الوقود ...
شوف فيات ايام ال 128 وشوف فيات ايام السيينا.

انا شايف ان معدل استهلاك اللانوس هوا تقريبا معدل استهلاك التويوتا 93 1300 سى سى كاربراتير

لانوس معابا بتعمل حوالى 250 كم والتويوتا كانت بتعمل حوالى 250 كم.

[vooooo]

الموضوع يا جماعه ليه دخل فى اطار التوفير و البخل ده
يعنى عربيتى بحط بنزين 90 و لو معايا جديده هعمل زى باقى الناس و هحط 92
فاللى وفرته فى استهلاك البنزين هدفعه فى فرق السعر بين نوعين البنزين
القصه كلها فى ترييح الدماغ
ازاى اريح دماغى فى تظبيط الموتور و مش كل شهر اروح للميكانيكى علشان يظبط الكاربراتير
و المشكله ان عندنا ميكانيكيه عباقره محدش عرف يظبط الكاربراتير و للأسف سمعت كلام الميكانيكى و قالى فكه و انزل بيه القاهره و روح لفلان الفلانى اللى فى شارع الترعه و يعملك الأكس و الباب
سمعت الكلام زى الخايب و اجرت عربه و نزلت
أخصائى الكاربراتير العلامه زى الدكتور بالظيط طوابير و بيديلك ايصال بالكاربراتير ( منظم برضه )
ماعلينا اخد 100 جنيه و ده مش موضوعنا
لما رجعت و ركبت الكاربراتير لقيت الأكسراتير معلق
بصراحه قلبى اتحرق و هزئت الميكانيكى و لو معايا تليفون البروفيسور اخصائى الكاربراتير فى القاهره كنت اديتله كلمتين
رحت لميكانيكى تانى و فك الكاربراتير وظبطلى الموضوع و كانت المشكله ان فيه جلبه اتعملت غلط
و برضه العربيه مارجعتش زى الأول
الحمد لله على كل شئ و الواحد مابيتعلمش ببلاش
بالنسبالى مش توفير فى استهلاك البنزين زى راحه البال
انا من النوع اللى يحب العربيات الكبيره و المواتير القويه و اتعودت على كده فى الفولفو لدرجه انى زهقت اركب عربيات

و بتتكلموا عن التوفير كتير
طيب لاعربيه الجديده بيبقى فيها تكييف و طبعآ هيشتغل فهيزيد استهلاك البنزين فكده مش توفير بس ريحت بالى و مستمتع بالعربيه و التكيييف
العربيه القديمه استهلاكها كبير لكن نادر تلاقى عربيه فيها تكييف فتكون طهقان و عايز تخلص المشوار بتاعك بسرعه علشان تنزل منها

بالنسبه الحته الفلوفو بتعمل 470 كيلو فى 54 لتر
يعنى اللتر بيعمل 8.70 كيلو
ده على طريق سريع مش جوه البلد و السرعه اكتر من 100 و مش هقول كام علشان الحسد
جوه البلد مش عارف احسبها بس بتاكل بنزين كتير جوه البلد كتيييير جدآ

[محمد ابراهيم 1]

التويوتا اللى بتعمل 250 فى الصفيحه ممكن يكون فيها عيب بس اللى انا ملاحظه وقد اكون مخطىء ان السيارات عامه لم تتطور التطور الكافى فى شأن استهلاك البنزين وعلى فكره انا كان عندنا بيجو 504 2000 كانت بتعمل فى السريع حوالى 210 فى الصفيحه بدون تكييف ولو حضرتك سمعت استهلاك البنزين فى السيارات الحديثه ذات المحرك 2000 لن تسمع ارقاما افضل والله اعلم