ازاى اعرف ان الموتور الخفيف

[sab3aawy]

Re: طيب ويا ترى اية العلاج الامثل يا باش مهندس سبعاوى

[quote]
والله انا متهيقلى بردة ان الواحد يدور على موتور استيراد كويس احسن من اى عمرة [quote]

انا شخصيا بافضل العمرة ،

لعدة اسباب:
1-فى العمرة انت بترجع الموتور لحالة قريبة جدا من حالته وهو جديد لكن الإستيراد انت بتشترى موتور هو فى أفضل احواله نص عمر

2- فى العمرة انت بتختار قطعة الغيار اللى انت عايزها، بتصرف على الموتور على مزاجك وعلى حسب ما انت عايزه يكون

3- عمرى ما شفت موتور استيراد ركب ودار بدون مشاكل لازم يحتاج طقم جوان او طرمبة زيت او شنبر او يكون فيه صابا مكسور ، الخ

4- فى بلد الكاتب الفرعونى الجالس القرفصاء حيث ترتع النسور فى اختامها ولا شئ يمكن اثباته بدون نسر ما يجلل سند الإثبات ، فى بلدنا العامر التى لا يزال فيها رقم المحرك جزء من هوية السيارة(مع العلم ان العالم كله تنازل عن كون المحرك جزء اساسى فى السيارة ويمكن استبداله فى اى بلد فى العالم بدون تغيير هوية السيارة)، فى بلدنا العمار فإنك تثبت المحرك الجديد فى السيارة فى ساعة ولكن لكى تثبت رقمه فى رخصة السيارة فإنك تحتاج لسنة، ومئة مشوار لعشرين قسم مرور وشهادات مخالفات وتصريح مؤقت والملف لسة موصلش يا استاذ وواسطة لرئيس قسم المرور لفتح ملف جديد للسيارة رحلة عذا لا بتنتهى سوى بأن تبيع السيارة وتورث المشكلة لمت يليك فى امتلاك السيارة، يا عم بلا وجع قلب، إيه اللى يخلينى ابنى يكون على كتفى واروح ادور عليه؟

[MMamdouh]

انا حضرت تسقيط مواتير فى BMW و كودوبا و نوبيرا و مكنش فيهم مشاكل جوهرية... يعنى طقم جوانات.. حساس عيان و خلافة لكن العمرة اللى حضرتها بدات على خراطة بلوك و انتهت ببستم مشروخ... و لسة العربية بتصرف فلوس... شراء العبد ولا تربيتة

MMamdouh

[Ahmed Hassan]

Re: طيب ويا ترى اية العلاج الامثل يا باش مهندس سبعاوى

[quote="sab3aawy"][quote]
والله انا متهيقلى بردة ان الواحد يدور على موتور استيراد كويس احسن من اى عمرة

انا شخصيا بافضل العمرة ،

لعدة اسباب:
1-فى العمرة انت بترجع الموتور لحالة قريبة جدا من حالته وهو جديد لكن الإستيراد انت بتشترى موتور هو فى أفضل احواله نص عمر

2- فى العمرة انت بتختار قطعة الغيار اللى انت عايزها، بتصرف على الموتور على مزاجك وعلى حسب ما انت عايزه يكون

انا اقصد من الناحيه الفنيه... واضح ان المحركات الحديثه نسبيا و الحديثه فيهم مشكله ام يتعملهم عمره... يعني مش بتنجح. انا مش عارف السبب العلمي... بس عندي ملاحظات يمكن يكون فيه تفسير ليها عندك.

- المواتير اللي البلوك بتاعها المونيوم مش بينفع فيها العمره على عكس البلوك الحديد؟
- المواتير الكبيره (فوق 2000 سي سي) عمراتها انجح؟
- المواتير القديمه عمراتها انجح؟

يا ترى ده صح ولا غلط؟ و هل اي موتور يتعملوا عمره؟ و هل لما اعمل عمره كامله اتوقع ان الموتور يعيش نفس الفتره اللي عاشها و هوه جديد زيرو؟

[sab3aawy]

1-انا معاك فى إن المحركات الانتيمونيا بتكون صعبة جدا فى عمراتها، مش لان المحرك الانتيمونيا مينفعش يتعمل له عمرة، لكن لان المحرك الانتيمونيا محتاج للتناول بشكل احترافى ومتانى حتى لا ينكسر او ينشرخ او تفوت قلاووظاته، وهو نوع من الحس التقنى يفتقر اليه الكثير من صنايعيتنا، ولذلك فانا احرص دائما على ألا اشترى سيارة بمحرك انتيمونيا :lol:

2-كلما كبر المحرك كلما كانت العمرة افضل وذلك لسهولة التناول وكبر اجزاء المحرك وسهولة الخرط

3- المواتير القديمة والجديدة مش فارقة كتير ،

العمرة الناجحة تقوم على 3 عوامل هى كالتالى بترتيب اهميتها

أ-قطعة غيار جيدة

2-خراط دقيق

3- تقفيل مضبوط ومتأنى

فلو راعينا هذة العوامل الثلاث لحصلنا على محرك بحالة تقارب حالة الجديد

بعض الناس يصاب بالإرتباك من اختيار العشرات من القطع للمحرك مع تحرى الدقة فى كل قطعة منها، وبالتالى فهو يفضل المحرك المستعمل ، لكن انا واحد من الناس افضل ان اتعب قلبى كام يوم فى اختيار قطع غيار المحرك ولا اضيع عمرى كله فى محاولة اثبات رقم محرك استراد على سيارتى علما بأن المحرك المذكور مفوت وبيدخن

على فكرة انا عملت 3 عمرات لعربيات سيات و3 عمرات لعربيات 128 و عمرة لعربية 127 ، يعنى 7 عمرات محركات ولم تفشل واحدة منها والحمد لله، ومرة واحدة غيرت محرك لعربية سيات رابعة، وبالرغم من شهادة الجميع انه محرك مافيش اخوه طلع عين اهلى، اول هام كان طرمبة الزيت بتاعته مكسورة، بعدها سخن وجاب وش سلندر وعوج الصبابات، بعد ما عملنا له طقم صباب طلع ان الشمبر اتلسع من السخونية والموتور خف وعايز شنبر، كنت انا اتخنقت من العربية ورحت بايعها بخسارة تفوق الوصف، وبحكم قعدتى مع الميكانيكى شفت كتير جدا مقالب المحركات المستعملة ، وعلى فكرة احدى العربيات ال 128 اللى انا عملتلهم عمرة كنت شاريها من واحد كان لسة شاددها بالكامل وجايبلها موتور استيراد وطلع خفيف واتخنق منها وباعهالى بخسارة ، وانا فبل ما احط رجلى فيها خدتها عملت لها عمرة وعملت بيها حوالى 60 ألف كيلومتر لحد ما بعتها بدون ادنى مشكلة فى المحرك

[sokasoon]

Re: طيب ويا ترى اية العلاج الامثل يا باش مهندس سبعاوى

طيب ويا ترى اية العلاج الامثل للماتور الخفيف يا باش مهندس سبعاوى

فيه مسكنات بتتاخد للمواتير الخفيفة اشهرها زيت الشنبر، كما توجد بعض شركات تنتج مواد مالئة توضع على الزيت وتسد فراغات الموتور شوية، بس كلها مسكنات لا تسمن ولا تغنى من جوع، تمشيك فترة لحد ما تجمع فلوس العمرة

• وفيه زيت اسمو زيت غرغرينة
  
  ده بيتحط علشان الموتور مايطلعش دحان تقدر تقول مضاد حيوى :lol:

[Hady]

بص يا سيدى ، اسهل طريقة تعرف بيها ان الموتور خفيف انك تحطة على الميزان وتشوف وزنه نقص وللا زى ما هو :lol: :lol: :lol: :lol:

ننتقل للكلام الجد

كلمة ان الموتور خفيف تعنى ان اجزاء الموتور الحاكمة لعدم تسرب الحريق الى حيز الزيت وتسرب الزيت الى حيز الحريق اصبحت خلوصاتها واسعة وتسرب الحريق والضغط الى حيز الزيت والزيت الى حيز الحريق وهذا يؤدى الى اضطراب اداء المحرك وضعفه ونلاحظ ظهور الأعراض الآتية

1- تسرب الحريق الى حيز الزيت يضغط على الزيت ويسخنه فيهرب بخار الزيت من خرطوم الفايظ الذى يصل بين غرفة الزيت ووحدة تغذية الوقود، ويسهل الكشف عليه بالفحص النظرى لخرطوم الفايض اثناء دوران المحرك، فعندما تخرج كمية قليلة من البخار الأبيض من الخرطوم عند كبس دواسة البنزين بشدة فلا مشكلة اما لو ان البخار يخرج طوال فترة دوران المحرك وبكميات كبيرة فهذا معناه ان شمبر الضغط خفيف(لدينا 3 شنابر على كل مكبس، الأعلى مسئول عن الحبك على الحريق، والأوسط مسئول عن حبك الضغط داخل غرفة الحريق، اما الثالث فمسئول عن منع دخول الزيت الى غرفة الحريق،)

2- تسرب الزيت الى غرفة الحريق يؤدى الى عدة اعراض، اولها ظهورا هو تلف البوجيهات حيث يترسب عليها الزيت ويقلل كفائتها، ويلاحظ دلك بفك البوجيها وملاخظة وجود لمعة زيتية على طرفها المشتعل، وعندا يزيد التسرب يعرقل وجود الزيت بالمحرك سرعة دوران السيارة عندما تكون باردة ونجد انها اصبحت صعبة الدوران صباحا، وعندما يزداد تسرب الزيت نلاحظ عدم احتراق الزيت بالكامل ويخرج من الشكمان فى شكل دخنة بيضاء مائلة للأزرق ذات رائحة محترقة تظهر حصوصا فى بدايات النقلات او مع كبس البنزين، وطبعا تسرب الزيت للمحرك وكذلك تبخره نتيجة لكبس الحريق عليه يؤدى الى نقص الزيت من خزان الزيت ويلحظ ذلك على مقياس الزيت على المدى الطويل(الف كيلومتر متثلا-نقص نصف كيلوجرام من الزيت فى ألف كيلومتر بودن وجود تسرب من الجوانات يعنى مباشر ان المحرك خفيف، ايضا من اعراض تسرب الزيت الى المحرك تدهور خواص الإحتراق نتيجة لاختلاط الوقود بالزيت فنلاحظ ان المتور يصفع(يسقف) بشكل مبالغ فيه مع الحمل او المطالع او الكبس على البنزين وهذا عرض أخر لخفية المحرك

3- تأكل اسطوانات الكراسى (السبيكة) الخاصة بالكرنك والكامة يؤدى الى سرعة مرور الزيت خلالها وتدهور ضغط الزيت ونلاحظ ذلك عندما تضئ لمبة الزيت فى السلانسية

وعلى ذلك يمكن تلخيص اعراض خفية الموتور فى:

1- مشاهدة بخار زيت كثيف من خرطوم الفايظ اثانء دوران المحرك وبدون كبس

2-وجود زيت على البوجيهات

3- وجود آثار زيت بكثرة فى دورة تغدية الوقود (لو كان خرطوم الفايظ متصل بها ولم يقم الميكانيكى بنزعه)

4-صعوبة دوران السيارة فى الصباح( وإن كانت هذة لا تقوم لوحدها دليل على خفية الموتور لأن لها اكثر من سبب هذا احدها)

5-تسقيف الموتور بشكل مبالغ فيه فى المطالع او مع كبس البنزين

6-خروج دخنة بيضاء مائلة للأزرق مع بداية تحريك السيارة او مع كبس البنزين(طبعا لو وصلنا لمرحلة انها بتخرج طوال الوقت يبقى المحرك منتهى)

7- نقص الزيت مع استخدام السيارة(نصف كيلوجام زيت لكل ألف كيلومتر هو معدل بداية القلق)

[thegreatnileman]

خللى بالك تعمل عمرة كاملة مش طاقم شنبر بس لان طاقم الشمبر مش كفاية لان الشمبر بيتاكل ومعاه الشميز كمان والسبيكه والكرنك كله بيحتك مع بعضه فليس من المعقول انك تحكم حته والباقى لسه فيه بوش
مع ملاحظة ان طاقم الشمبر بيمنع حرق الزيت وتفويت الموتور لفترة قليلة لكن مش بيرجع الموتور لقوته الاصلية للاسباب اللى انا قلتها لان الموتور علشان يشد معاك ويبقى قوى لازم كل مناطق الاحتكاك فيه تكون على مقاس واحد وكلها جديده من عمر واحد (ده كلام بالبلدى للايضاح)وبتغير معاك طلمبة الزيت مهم جدا وطلمبة البنزين وتعمل للكربراتير اكس وباب وتغيرله البيكات واذا كان الاسبيراتير العامود والركب بتوعه مبوشين تغيره لان مش كل حاجه فى العربية هى الموتور... الكربراتير والاسبيراتير وكذلك وش الاسبيراتير الفبر مهم جدا يكونوا بحالة ممتازة لانهم هما اللى بيشغلوا الموتور وده راى عن تجربه فعلية

احمد

[Adham]

انا رأيي ان موضوع العمرة يكون بس لو كان شمايز الموتور كويسة مافيهاش عتب لما تحل وش السلندر لان الصلب اللي في بلدنا عند الخراط مش تمام و الشميز الخرط مش حايعيش كتير كبيرة 10000 كيلو او 20000 كيلو

او لما تكون عربية فيات او بيجو 504 مثلا بيبقى تعميرها احسن لرخص مكونات العمرة و دراية الميكانيكية بها عالية بالطبع و البيجو بالذات شمايزة بتيجي اصلي بتتباع و بلوكة صلب مش الومنيوم

لكن لو عربية الماني او ياباني يبقى الاحسن موتور استيراد

وانا اشتريت مواتير كتير استيراد من بورسعيد والحمد لله ولا موتور كسفني او طلع منة مشاكل بل بالعكس مواتير شديدة و حالتها زي الجديد
بس اكشف عليها كويس وزي ماالاخوة قالوا في علامات تعرف منها

و كمان خللي بالك ان الموتور الاستيراد بيبقى كامل بكل ادوات التغذية يعني كاربراتير و مارش و دينامو و جير بوكس و كلة يعني لو انت عمرت موتورك عمرك ماحتغير كل ادوات التغذية دي و دة طبعا غير ان قطع الغيار و الشنابرفي بلدنا كلها مضروبة و مش بتعيش

وميزة انك تجيب موتور استيراد و تفكك موتورك القديم و تشيل كل ما يمكن منة و تخلية عندك كقطع غيار تحتاجها و قت اللوزم (مارش -دينامو- اسبراتير- كاربراتير- .......

[Adham]

انا رأيي ان موضوع العمرة يكون بس لو كان شمايز الموتور كويسة مافيهاش عتب لما تحل وش السلندر لان الصلب اللي في بلدنا عند الخراط مش تمام و الشميز الخرط مش حايعيش كتير كبيرة 10000 كيلو او 20000 كيلو

او لما تكون عربية فيات او بيجو 504 مثلا بيبقى تعميرها احسن لرخص مكونات العمرة و دراية الميكانيكية بها عالية بالطبع و البيجو بالذات شمايزة بتيجي اصلي بتتباع و بلوكة صلب مش الومنيوم

لكن لو عربية الماني او ياباني يبقى الاحسن موتور استيراد

وانا اشتريت مواتير كتير استيراد من بورسعيد والحمد لله ولا موتور كسفني او طلع منة مشاكل بل بالعكس مواتير شديدة و حالتها زي الجديد
بس اكشف عليها كويس وزي ماالاخوة قالوا في علامات تعرف منها

و كمان خللي بالك ان الموتور الاستيراد بيبقى كامل بكل ادوات التغذية يعني كاربراتير و مارش و دينامو و جير بوكس و كلة يعني لو انت عمرت موتورك عمرك ماحتغير كل ادوات التغذية دي و دة طبعا غير ان قطع الغيار و الشنابرفي بلدنا كلها مضروبة و مش بتعيش

وميزة انك تجيب موتور استيراد و تفكك موتورك القديم و تشيل كل ما يمكن منة و تخلية عندك كقطع غيار تحتاجها و قت اللوزم (مارش -دينامو- اسبراتير- كاربراتير- .......

[Adham]

إضافة

ماينفعش تعمل طقم شنبر بس
لأن الموتور لازت يتحكم من فوق و تحت كمان

يعني لازم تشوف الصباب لو عاوزة تغيير او اضعف الايمان تعمللها قواعد و دلايل و رودية لو كانت كويسة
وتعمل طقم سبيكة كمان علشان لو الموتور اتحكم كويس من الشنابر لكن كانت الصبابات هلكانة او تعبانة و السبيكة مش كويسة الموتور حايخبط منك او يفوت تاني بسرعه جدا

فيبقى لازم تشتغل عالصبابات و الشنابر و السبايك كمان علشان الموتور يبقى موزون و محكوم فوق و تحت

[michohat]

موضوع جميل و مفيد
الشكر لكل من ساهم فى الموضوع

[SAMEH_FOUAD]

مش كل المواتير تقدر تشتريها استيراد لان فية مواتير تمنها غالى جدا ,وطقم الشنبر طالما اتعمل صح ,ومن ميكانيكى فاهم هو بيعمل اية هيبقى تمام ,ولازم تغير الحاجات اللى عايزة تغيير وماتبخلش علية عشان يريحك بعد كدة وتحس انة فعلا رجع جديد ,
لكن الماتور اللى بيبقى عايز خرط فى الشمايز او يروح للخراط دة انا مش برجحة ,لانى بحس ان كدة الماتور اتلعب فية ومش هايرجع زى الاول وممكن تجيبلة بلوك كامل ,بدل ماتغيبر الماتور هيبقى تمنة غالى طبعا حسب نوع العربية ,بس هيبقى تمام وحاجة الفابريكة من غير لعب