سخونه الموتور وريحة شياط من الكبوت (المؤشر تمام)

[roberatef]

السلام عليكم ...

حصل لي مشكله مع عربيتي لانسر 2009 اتوماتيك ... كنت فى مشوار سفر و سخنت جامد و جابت وش سلندر (الحمدلله علي كل شي)... وحصل الاتي:

1- الاول كنت فاكر ان الراديتار هو اللي باظ بس... الراجل فكه و لقينا الوش العلوي مشروخ .. غيره ونضفه وطبعا و هو بيركبه شال ثرموستات الكوعه.

2- للاسف الموضوع متحلش و العربيه مش راضيه تقوم ... قالي دي جابت وش سلندر ... فكه و خرطه و ركبنا جوان اصلي جديد و لحد كده تمامز

من ساعتها و انا حاسس بحاجات غريبه مش متعود عليها:

1-المؤشر طول عمرة كان بيزيد لحد النص و يقف علي كدة ... دلوقتي بيزيد و يقل لما امشي بسرعه في طريق مفتوح ... من اللي قريته فهمت انا ده بسبب انه شال الثرموستات ...

2- النقطه التانيه و ده هو سؤالي .. لما بعمل مشوار في الزحمه و العربيه تسخن بحس بريحه شياط ولما اقف وافتح الكبوت بلاقي صهد طالع و كل حاجه سخنه مولعه (الموتور + الرداتير + الخراطيم اللي مابين الرداتير والموتور) مع العلم ان المؤشر ما بيزدش عن النص والمروحه بتشتغل شويه و تقف اتوماتيكي ... بس ريحه الشياط و الولعه ديه مش عارف سببهها ايه ...


للعلم : الميه مش بتنقص غير كل اسبوع مثلا في حدود بق ميه بس .. يعني مفيش تسريب .... الحل ايه عشان اخوكم ابو جهل في المكانيكا

[مصطفى-حسن]

بالنسبة لموضوع انخفاض مؤشر الحرارة فى الطوالى فدة بسبب ان ترموستات الكوعة اتشال

بالنسبة لموضوع الشياط دة احتمال اولى يكون بسبب الجملكة او بواقى الزيت على جسم المكنة لو منضفهاش بعد ما قفل

لكن لو الموضوع طول معاك اكتر من يوم او اتنين يبقى لما تشم ريحة الشياط انزل وافتح الكبوت وحاول تميز ريحة الشياط عبارة عن اية وحاول تشم مكانها عشان نقلل الاجتهادات

[Abo_Mazen]

لما بتنزل وبتلاقي المكنه عامله معاك هبو جامد وصهد ..الخرطوم العلوي اللي طالع من المكنه بيبقى محجر قوييييييي..فاهم قصدي ..يعني تحس إن الخرطوم ده ناشف لدرجة تحس إنه ماسورة بلاستيك مثلا مش كوع كاوتش ؟؟؟

[roberatef]

بالنسبه لمكان ريحة الشياط اظن انه من عند المكنه والمروحة من كتر الهبو او الصهد اللي طالع.
االهوز اللي فوق اللي واصل بين المكنة والرادياتير بيبقي سخن اوي بس مش محجر يعني اقدر انشف عليه واضغطه شويه. مفيش غليان للميه في القربه ولا المياه بتنقص بوضوح.

اللي انا ملاحظه اني لما بتحرك واجري الريحة بتروح والحرارة بتقل وده معناه ان المروحة مش مبرده الردياتير لما بكون ف زحمه. برده لما بكون مشغل التكييف مبتسخنش خالص ولا حتي الريحه.
هو طبيعي لما اشغل التكييف ان سرعة المروحة تزيد. اصل بحس بعزمها وقوتها لما التكييف يشتغل بس اما لما تشتغل اتوماتيك بتبقي مش قويه اوي.

بالنسبة للثرومستات. ممكن تكون هي السبب. يعني اشتري واحدة واركبها. خايف يكون الثرومستات هي السبب ان المروحة مش قادرة تغطي تبريد حجم المياه كلها

[roberatef]

هو لو محجر يبقي ايه. خلينا نمشي بكل الاحتمالات

[Abo_Mazen]

هو لو محجر يبقي ايه. خلينا نمشي بكل الاحتمالات

يبقى كبس الهوا بتاع المكنه داخل على دورة المياه ..وده بيبقى من وش السلندر


طيب بص ..هقول لحضرتك على إختبار سهل قوووووووووووي وبسيط خالص ..حضرتك تيجي الصبح وهي العربيه بارده تماما ..يعني بايته من بليل ومشتغلتش ..وتقوم فاتح غطا الريداتير ..وتقوم مالي الريداتير مياه لغاية ما تخلي المياه تبقى على فوهة الريداتير بالضبط ..يعني في سوا الفوهه بتاعة الريداتير ..وبعدين تقوم مدور العربيه وغطا الريداتير مفتوح والمياه واقفه على فوهة الريداتير ..لو المياه نطت لفوق وإنت بتدور العربيه يبقى كده في كبس مكنه مهرب على دورة المياه ..خلي بالك ..لو دورت مره ممكن تعيد الإختبار في ساعتها مره كمان عشان تتأكد..لكن بمجرد العربيه ما دارت مره وإتنين يبقى خلاص ..دقة الإختبار ده هتبقى مش قوي ..لازم العربيه تبقى بارده تلاجه ..والمياه تبقى بارده وواخده درجة حرارة الجو المحيط ..شوف كده وقولي لقيت إيه

[roberatef]

بكرة الصبح هجرب انشالله. وربنا يستر. طيب ما الطرمبه ممكن تنطر الميه برده ولا ملهاش تاثير جامد. وحاجه كمان لو تهريب هوا هو السبب مش المفروض المكنه تفضل سخنه علطول. ليه لما المروحة بتشتغل مع التكييف بيبرد

[amz2011]

متابع

[mbx4e]

هوا قرط او حرق على الجوان ولا لسا ؟
لو لا ..خليه يحرق عليه
اتاكد ان دورة المياه عندك مش واخدا هوا وغطا الراديتير محكم

[amr_naser]

شوف يا سيدى مبدأيا
لما العربية تسخن انزل شوف الخرطوم اللى فوق بتاع الريدراتير لو محجر دا فى الغالب الثرموثتات مش بيفتح ويبقى كدة تلف
ثانى حاجة انزل جمب العربية وشوف المراوح وهى بتشتغل هل كل المراوح بتشغل ولا لا وكمان لاحظ سرعتها عند بداية الدوران ونهايتة ممكن تكون واحدة بطيئة ومحتاجة تتغير
ثالث حاجة احيانا نتيجة الحرارة الزايدة ثرموثتات الحرارة بيبوظ وبيخرف فى القراءة بتاعتة
راجع كل الحجات السابقى دى واحدة واحدة واتأكد لانك الى الان عالجت المشاكل اللى حصلت نتيجة زيادة الحرارة لكن سبب الحرارة نفسة لا فلازم تعرف اية السبب فى الموضوع دا الاول

[Abo_Mazen]

بكرة الصبح هجرب انشالله. وربنا يستر. طيب ما الطرمبه ممكن تنطر الميه برده ولا ملهاش تاثير جامد. وحاجه كمان لو تهريب هوا هو السبب مش المفروض المكنه تفضل سخنه علطول. ليه لما المروحة بتشتغل مع التكييف بيبرد

أنا قلت لحضرتك هتلاقي الميه نطت لفوق..عملت jump لفوق ..طرمبة المياه ما تعملش التأثير ده ..اللي هو نطرة المياه لفوق..الjump اللي المياه هتعمله ده بيبقى تأثير هوا داخل على دورة المياه ..جرب وشوف

[roberatef]

أنا قلت لحضرتك هتلاقي الميه نطت لفوق..عملت jump لفوق ..طرمبة المياه ما تعملش التأثير ده ..اللي هو نطرة المياه لفوق..الjump اللي المياه هتعمله ده بيبقى تأثير هوا داخل على دورة المياه ..جرب وشوف

جربت النهارده الصبح والمياه ما بتنطش... بتتهز اول ما ادور وبعد كده بحس انها بتتسحب لتحت و تمشي مع التيار !!!!!

شوفت موضوع الخرطوم تاني بعد مشوار ساعه و العربيه سخنه جدا .... لقيته عادي مش ناشف يعني اقدر اضغط عليه ويتني بس اكيد كان سخن :)

[roberatef]

بالنسبة لموضوع انخفاض مؤشر الحرارة فى الطوالى فدة بسبب ان ترموستات الكوعة اتشال

بالنسبة لموضوع الشياط دة احتمال اولى يكون بسبب الجملكة او بواقى الزيت على جسم المكنة لو منضفهاش بعد ما قفل

لكن لو الموضوع طول معاك اكتر من يوم او اتنين يبقى لما تشم ريحة الشياط انزل وافتح الكبوت وحاول تميز ريحة الشياط عبارة عن اية وحاول تشم مكانها عشان نقلل الاجتهادات

مكان الهبو والصهد قدام المكينه علطول (درع حديدي ) معلش مش عارف ارفع صور !!! والصراحه مش عارف ده ايه

[roberatef]

هوا قرط او حرق على الجوان ولا لسا ؟
لو لا ..خليه يحرق عليه
اتاكد ان دورة المياه عندك مش واخدا هوا وغطا الراديتير محكم

كذا حد قالي علي موضوع هوا في دورة المياه .... اعرفها او اعلاجها ازاى !!!

[roberatef]

الصراحة عندي شك كبير في المراوح ... هي بتشتغل بعد المؤشر مايجي علي النص بشويه .. بس بلاحظ ان سرعتها مش قد كده ... مقارنة لما افتح التكييف .. سرعتها بتبقي شديده اوي ويعد شويه المؤشر بينزل حبه ....

بما اني مكنتش بفتح الكبوت كتير و خدت درس حلو :) ... عندي كذا سؤال وياريت لو حد عنده خبرة يجاوبني

1-هو طبيعي الاقي الموتور سخن اوي كده ,,,, والصهد ده؟

2- هل فعلا غلطت اني شلت الثرموستات ؟؟ في ناس قالولي علي قد انه ساعات بيسبب حرارة زياده لما يخرب بس مفيد للتبريد برده لانه بيدي فرصه للمياه اللي في الريداتير انها تهدي قبل ما تاخد دورتها في المكينه تاني؟

3-هل في حساس للمراوح او بمعني تاني المروحة بتشتغل و تقف علي اساس درجه حرارة اكيد ... بس من فين ؟؟؟ لو حد عنده لانسر او ملم بيها يرد عليا في النقطه ديه...