سؤال فعلاً محيرني ... برجاء من م/ خالد ... سبعاوى الرد ؟؟

[Hossam Mounir]

الحقيقة يا باشمهندس عندى سؤال ... مجنني ...

ما هيا العلاقة بين الفرامل ... والتكييف ...؟

الحقيقة أنا راجعت كل المراجع اللى عندى ... وحاولت أعمل search على النت ... بس بلا فائدة ...
و علشان ما لخبطش سيادتك ... أنا متأكد ان فيه علاقة بين الأثنين... على الأقل فى موديل العربية اللى معايا ... وعندى الدلائل ... بس مش عايز أشتت تفكيرك ...
فأرجو من سيادتك الرد ... وبعدين نتناقش ...

أشكرك مقدماً ... على تعبك ...

تحياتى للجميع ...

م / حسام منير

[Hossam_Hassan]

معلش يا أ/ حسام انا هقول رأيى كسواق على قد حاله و ميكانيكى فاشل و يمكن تيجى مع العمى طابات 8) 8) 8) ، أنا بحس انى لما بفرمل عزم التكييف بيقل بسيط و بيتهيألى ده علشان عدد دورات الموتور بتقل هى كمان.

[Hossam Mounir]

أشكرك على ذوقك ... وتواضعك يا أ/ حسام ... بس المشكلة مش زى ما وصلت لسيادتك ... أنا بس مش عايز اشتت م / سبعاوى أثناء شرحة للمضوع ... بس الحقيقة وبأختصار أداء الفرامل ... بيختلف أثناء تشغيل التكييف أو عدمة ... ويا ريت لو حد عنده نفس الموضوع يشاركنا لأنى تقريباً شاكك فى حاجة ...
وكما قلت عندى كل الأدلة على ... كلامي ...
بس نفسي أدى لل م / سبعاوى فرصة لتجميع الموضوع ... ثم ندخل فى نقاش ....

أشكرك مرة أخرى ...و تحياتى للجميع ...

م / حسام منير

[PAYOO]

يااااااااااااااااااااااااااااااااااااااااااااااااا ااااااااااه

دا أنا كنت فاكر نفسي إن الموضوع ده عندي أنا بس

أنا فاهم أنت بتتكلم على أيه يا باشمهندس حسام ، فعلا أنا لما بشغل التكييف الفرامل أدائها بيضعف بس بصراحه مسألتش لأن الأداء مش بيضعف للدرجة التي تمثل خطوره

لكن على كل حال السؤال فعلا عاوز أجابه ليه أداء الفرامل بيتأثر بالتكييف ؟

[Hossam Mounir]

الأداء مش بيضعف للدرجة التي تمثل خطوره

معاك كل الحق ... هو الموضوع كدة ... بس برضة أنا عايز أعرف أيه السبب !!!! لية فيه فرق فى أداء الفرامل أثناء تشغيل التكييف ... من عدم تشغيلة ... فى انتظار رد ... م / سبعاوى ... ولسة أنا مذكرتش الأدلة ...

PAYOO بالمناسبة لو سمحت أنا عايز أعرف تأكيداً لشك عندى ... أنت الماتريكس عندك ... مانيوال ولا اتوماتيك ...؟؟؟!!!

تحياتى للجميع ...

م / حسام منير

[AMIR FAROUK]

لو تسمحولى اشارك برأى متواضع
الفكره كلها ان الموتور بيتحمل عليه اى حمل لأى جهاز بالسيارة
فالمعلوم ان الفرامل بتسحب من قوة الموتور عن طريق السيرفو اللى بيوفر الضغط على الفرامل عن طريق الكبس الخارج من الموتور
وبالتالى عند تشغيل التكييف فيتم تحميل كومبريسور التكييف على الموتور ونتيجه لذلك يكون حجم الكبس الناتج مع التحميل اقل من حجمه بدون تحميل مما يؤدى بدوره الى ضعف ( نسبى ) بالقوة الصادرة من السيرفو الخاص بالفرامل مما يؤثر سلبا عليها

[أبو عبدالله]

كلام استاذ امير مظبوط
وفي حاجه كمان ان الفرامل والنور بتاعها بتستهلك كهربا ملحوظه

[Kisho]

???????????

انا مش فاهم حاجه خالص من الى بتقواوه ده و اول مره اسمع او أقراء شكوى زى كده و عمرى ما شعرت بيها
اما بالنسبه لنور الفرامل فا فعلا الفاتوره الشهر ده جت عاليه شويه :lol: :lol: :lol: :lol: :lol: :lol:

و شكرا

[Eng.Ahmed]

انا بحس بنفس الموضوع ده فى الفيرنا ، بس الفرق فى الاداء بسيط

[Hossam Mounir]

عند تشغيل التكييف فيتم تحميل كومبريسور التكييف على الموتور ونتيجه لذلك يكون حجم الكبس الناتج مع التحميل اقل من حجمه بدون تحميل مما يؤدى بدوره الى ضعف ( نسبى ) بالقوة الصادرة من السيرفو الخاص بالفرامل مما يؤثر سلبا عليها

كلام استاذ امير مظبوط

السادة الأفاضل ... هذا الكلام معاكس تماماً للي بيحصل عندى ... وأعذرونى على عدم تطرقى للتفاصيل ... علشان نفسي أدى فرصة لـ م / سبعاوى بالأشتراك فى الموضوع ... وبعدين صدقوني هأتكلم فى المشكلة مباشرة ... ونتناقش ...

انا مش فاهم حاجه خالص

عزيزى Kisho أنتظر رد م / سبعاوى ... والمناقشة ... وأنت هتفهم أن شاء الله ... بس جرب اللى هقولك عليه بالضبط ... أنا عارف أنك معاك الالنترا الجديدة الأتوماتيك ...
- شغل التكييف عادى وأنت ماشي بالعربية ودوس فرامل عادى جداً ... وبعدين أفصل التكييف قرب المكان اللي أنت ذاهب إليه ... وجرب الفرامل مرة أخرى وانت ساير بالعربية بس المرة دى التجربة هتبقى بدون التكييف ... وحاول تقولي فيه فرق ولا لأ ؟؟!!
- ولو أمكن أيضاً تدوس على الفرامل والعربية دايرة ... والتكييف شغال وبعدين أطفئ التكييف ... ولسة رجلك على الفرامل ... وقولي برضة شعرت بأيه ؟؟!!

تحياتى للجميع ...

م / حسام منير

[Kisho]

استاذ حسام

اولا انا عربيتى مانوال
بس ان شاء الله هاجرب و اقولك و اهو يبقى عندنا feedback عن المانوال و الاوتوماتيك و شكرا لاهتمامك

و شكرا

[Dr_Smart]

انا عندي نفس الكلام الفرامل بتضعف مع التكييف بس تقريبا عشان العربية بتعلا والتكيف شغال ( ال rpm بيزيد )

[PAYOO]

PAYOO بالمناسبة لو سمحت أنا عايز أعرف تأكيداً لشك عندى ... أنت الماتريكس عندك ... مانيوال ولا اتوماتيك ...؟؟؟!!!

تحياتى للجميع ...

م / حسام منير[/color][/size]

مانيوال يا هندسه

[sab3aawy]

معلش يا شباب على التأخير لكن انا لسة شايف الموضوع ديلوقتى حالا

انا شخصيا مش عارف الإجابة مسبقا لكن تعالوا نحلل مع بعض علنا نصل لإجابة معقولة:

مصدر القوة التى تستعملها الفرامل هو التفريغ الحادث فى المانيوفولد نتيجة لسحب الهواء و الوقود، يعنى احنا عندنا المكابس بتسحب هواء من مانيفولد الدخول علشان تحرق بيه الوقود، ده بيؤدى ان الضغط فى منطقة المانيفولد بيكون اقل من الضغط الجوى، بنستفيد من فرق الضغط دا فى الحصول على قوة دافعة للفرامل عن طريق ديافرام(رقاقة من الكاوتش) بتتشفط مع الفرملة وتسحب الماستر العمومى

طيب إيه اللى بيحصل لما بنشغل التكييف، بيحصل تحميل إضافى على المحرك، وده بيعوضه المحرك لو كان كاربراتير بفتح صمام الهواء اكتر شوية ( من خلال ما يسمى رافع السرعة الخاص بالتكييف الذى يؤدى الى شد شداد السخان وفتح صمام البنزين قليلا) وبالمثل توجد منظومة مماثلة فى سيارات الحقن الإلكترونى تقوم بزيادة الهواء والبنزين

طيب إيه معنى اننا فتحنا الهواء شوية للمحرك مع ان البساتم شغالة بنفس السرعة (لا تعلو سرعة السلانسيه لأن فرق الطاقة الناتج من كمية الهواء والبنزين الإضافية يضيع فى حمل المكيف) ، معناه ببساطة اننا قللنا الفاكيوم(الضغط السالب او التفريغ) فى منطقة المانيفولد،(تخيل لو انت بتشفط هواء من علبة فيها ثقب صغير جدا الناحية التانية ، ده هيعمل درجة تفريغ جوة العلبة، وفجأة الثقب اللى الناحية التانة ده وسع، هنلاقى التفريغ داخل العلبة قل) يعنى قللنا مصدر الطاقة التى تعتمد عليها الفرامل للأداء ، وده سبب ضعف الفرامل

اما سبب ضعف التكييف لحظة الفرامل فده لأن إضاءات الفرامل بتحمل على البطارية فبتقللل فولطة الباطرية لحظيا وده طبعا يؤثر بالسلب على مروحة التكييف بتاعة الصالون ويخليها تهدأ شوية لحظة الفرملة

ارجو ان الصورة تكون وضحت كدة

[Hossam_Hassan]

والله المفروض نغير اسم الفيلم من (اضحك الصورة تطلع حلوة) ل (اشرح الصورة تطلع حلوة) و يكون بطولة سبعاوى :D :D :D :D