تسقيط موتور ديزل لعربية ملاكي...تساؤلات متعددة...

[M!NA]

من فترة كنت فكرت في تسقيط موتور ديزل لعربيتي و هي فولكس بوينتر 1600cc و الموتور عندي بالطول رغم ان العربية جر أمامي...

فيه عربية نفس شكل البوينتر بالظبط من قدام بس نص نقل من الخلف و هي ديزل 1900cc و برازيلي و برضه موتورها راكب بالطول مع انها جر أمامي اسمها Saviero لو دورتوا عالجوجل هتلاقوها

السؤال... هل فعلا الشاسيه اللي بيكون مجهز للعربيات الديزل بيختلف عن شاسيه عربيات البنزين؟
هل العفشة بتختلف أو تحتاج لتعديل...؟

و لو الاجابة بأيوة... هسأل سؤال تاني.... ازاي العربيات اللاند كروزر بتسقط مواتير بنزين او ديزل بدون أي تغييرات أو تعديلات و مش بتواجه مشاكل في الشاسيه؟؟

أنا عارف ان تويوتا شركة محترمة.. بس اللي أقصده هو مبدأ تصميم شاسيه و عفشه مختلفين مع اختلاف المواتير و عدم وجود هذا المبدأ في اللاند كروزر...

أنا عارف اني توهتكو و دخلت في 100 موضوع مع بعض :) بس هو الموضوع كله مرتبط ببعضه و الغرض منه تعليمي و ليس تطبيقي :)

[Goodle]

اسئلة وجيهة..

بانتظار الردود من الخبراء

[Nile_Storm]

بعض النظر انك صاحب اقتراح منتدي الديزل
و بعض النظر انك اللي كاتب اغلب مواضيعه

احييك يا vw driver بجد بتفتح مواضيع جامده جدا

[M!NA]

بعض النظر انك صاحب اقتراح منتدي الديزل
و بعض النظر انك اللي كاتب اغلب مواضيعه

احييك يا vw driver بجد بتفتح مواضيع جامده جدا

يا باشا دا انتا اللي راجل زي العسل و كلك ذوق والله :)

أصلي بصراحة بعشق حاجة اسمها ديزل...

[link7200]

موضوع جميل خالص و كنت بفكر فيه قلت اركب مكنه 2000 فيما فوق ديزل لهوندا سيفك 93بس يا ترا حلاقى الموتور دا ولا لاء ( فالغالب لاء)مدام نزل بره حعرف اجيبه بس هل المرور هيقبل الموضوع دا فى الترخيصبالنسبه للاند كروزر لو فى منها ديزل كنت اجيبتها بس المشكله ملقتش غير لاند روفر ديزل و العربيه دى حدوووووووخ على قطه غيارهابصراحه مش عارف اعمل ايه

[sab3aawy]

طيب تعالو نفتح مع بعض مجموعة من الأفكار

ايه رأيكم فى البداية نعمل مقارنة سريعة كدة بين محرك البنزين ومحرك الديزل (هذة المقارنة لن تغنى عن موضوع مفصل عن محركات الديزل انا لسة بجهزه)

اولا فأن محرك الديزل يعمل بالديزل اما محرك البنزين فانه يعمل بالبنزين(دى طبعا معروفة )

محرك الديزل يحتاج لضغوط عالية جدا للعمل (يعنى الحريق بيتم على 300 ضغط جوى فى المتوسط مقارنة ب 100 بار تقريبا فى حالة البنزين)

نسب الإنضغاط فى محرك الديزل تتراوح بين 20 و 22 ، وليس 8 الى 11 كما فى محركات البنزين

محرك الديزل يعمل على Rpm اقل من محرك البنزين، نجد مثلا ان اقصى قدرة حصانية للمحرك تكون على 2500 Rpm ونجد الخط الأحمر على 4000 Rpm

محرك الديزل اقل فى القدرة الحصانية من محرك البنزين ذو نفس ال Ccبحوالى 25%

محرك الديزل اكثر وفرا فى استهلاك الوقود من محرك البنزين بنفس الcc بحوالى 10%

محرك الديزل لا يصفع (مش بيسقف) ، نظرا لأان لاسلوب احتراق الديزل يختلف تماما عن اسلوب حرق البنزين

محرك الديزل اثقل وزنا من محرك بنزين بنفس ال Cc بحوالى 20%

محرك الديزل ليس له بوجيهات ، ولا بوبينة ولا اسبراتير ولا يحتاج للكهرباء نهائيا لاستمرار حركته، اللهم الا بالنسبة للمحركات الحديثة التى تعمل بالتحكم الإلكترونى

محرك الديزل اطول عمرا من محرك البنزين واقل احتياجا للصيانة، لكنه يحتاج لغيارات زيت اكثر

محرك الديزل اكثر ضجيجا واهتزازا من مثيله الذي يعمل بالبنزين


المهم :

1- بالنسبة للشاسيه انا لا اعتقد ان الموضوع هيحتاج تعديلات ضخمة ، لأن لو قلنا ان محرك البنزين وزنه 350 كيلوجرام ومحرك الديزل وزنه 420 كيلوجرام فهذا الفرق فى الوزن لا يحتاج تعديلات كبيرة لأن اصلا السيارة المصممة للعمل بمحرك بنزين واخر ديزل تكون مصممة بالأساس لتحمل المحرك الأثقل، لكن حقيقة ما سيحتاج للعناية هو العفشة، حيث ستكون الحاجة ماسة لمساعدين رياضية تمتص الصدمات بشكل اكبر، كما سنحتاج الى تعلية السيارة من الأمام لتعويض فارق وزن المحرك ، ويمكن ان يتم ذلك باستخدام علايات ، كما يجب تركيب المحرك على القواعد الخاصة به وليست قواعد محرك البنزين

2- بالنسبة لألات الجر فدى مالهاش حل، لا مكان للجيربوكس القديم مع المحرك الجديد، لابد ان يأتى المحرك الجديد مع الجير بوكس الخاص به(او الجير بوكس والكورونا فى حالة اننا بنتكلم عن سيارة دفع خلفى او رباعى) لأن الجير بوكس المسئول عن تحويل 3000 Rpm الى 100 كيلومتر فى الساعة فى حالة محرك البنزين يختلف تماما عن الجيربوكس المسئول عن تحويل 2000rpm الى 100 كيلومتر فى الساعة فى محرك الديزل، لا مجال للإفتكاس فى هذا الصدد، لازم المحرك الجديد يأتى بآلات الجر الخاصة به

3- خزان الوقود، لو احنا هنغير محرك بتاع عربية حديثة تعمل بالحقن الإلكترونى فغالبا هنحتاج نغير خزان الوقود، لأن خزان وقود البنزين يحوى طلمبة البنزين ، فى حين ان محرك الديزل تكون الطلمبة الخاصة به والتى تدفع الوقود بضغوط عالية جدا جزء من جسم المحرك ولابد من الحصول على عوامة يتم تركيبها فى التانك لحساب مستوى الديزل، وبالتالى من الأفضل الحصول على التانك الأصلى، وان كانت الإفتكاسات ممكنه فى هذا الصدد

4- لوحة الامبيرات : غالبا ستكون معظم قراءاتها خاطئة ، فعداد السرعة المضبوط على قراءات فتيس الديزل ذو نسب التخفيض العالية جدا غير ذلك الخاص بعداد البنزين، عداد ال Rpm نفس الكلام، عداد الحرارة للى بياخد من وش السلندر انت وحظك ممكن يقرا صح وممكن يقرا غلط ، وعداد البنزين شرحنا قصته فى البند السابق، يبقى لازم لوحة الامبيرات تيجى مع الموتور الديزل وتكون هى الخاصة به

6- وحدة الكونترول، دى طبعا مشئ عايزة كلام، لو هجيب محرك حديث بكونترول يونيت وحساسات لازم ييجى ومعاه الكونترول يونيت بتاعته

7- الدواسات وعصاية الفتيس: غالبا يمكن تأييفها ، لكن لا يوجد شئ مضمون سوى بالتجربة

يعنى ده اللى جه فى بالى حاليا بخصوص محرك الديزل

[Karim_Monir]

كلام مفيد وتقيل يا خالد
وبيصعب الموضوع
لاني فكرت في مكنة 1800 او 2000 للكرولا ديزل
بس اللي انت بتقولوة ده هايخليني اهد العربية كلها
طب ممكن بعد ما تخلص الديزل تقولنا عن الغاز الطبيعي وعمرة الافتراضي
على اساس ان مش هاضحي باكتر من نص الشنطة
والموتور لو راح اجيب مكنة 1600 مكانة

[M!NA]

الله ينور عليك يا "دكتور" المنتدى

شرح جميل جدا و ان كان فتح مجال لتساؤلات كتير....

2- بالنسبة لألات الجر فدى مالهاش حل، لا مكان للجيربوكس القديم مع المحرك الجديد، لابد ان يأتى المحرك الجديد مع الجير بوكس الخاص به(او الجير بوكس والكورونا فى حالة اننا بنتكلم عن سيارة دفع خلفى او رباعى) لأن الجير بوكس المسئول عن تحويل 3000 Rpm الى 100 كيلومتر فى الساعة فى حالة محرك البنزين يختلف تماما عن الجيربوكس المسئول عن تحويل 2000rpm الى 100 كيلومتر فى الساعة فى محرك الديزل، لا مجال للإفتكاس فى هذا الصدد، لازم المحرك الجديد يأتى بآلات الجر الخاصة به

معنى الكلام ده انها لو لاند كروزر دفع رباعي بنزين هحتاج:
-موتور ديزل + الفيتيس الخاص به + الكرونة الخلفية و الكرونة الأمامية؟!

المقصود... هل موضوع تغيير الموتور بكل الات الجر الخاصة به ينطبق على كل العربيات؟ ولا لأ؟ لأني سمعت ان اللاند كروزر series 70 بيتسقطلها موتور بدون تغيير أي شيء, فهل ده مظبوط؟

يعني ممكن يكون فيه أنواع من الجير بوكس تتوافق مع ديزل و بنزين؟ و نفس السؤال عن الكورونة...

[sab3aawy]

المقصود... هل موضوع تغيير الموتور بكل الات الجر الخاصة به ينطبق على كل العربيات؟ ولا لأ؟ لأني سمعت ان اللاند كروزر series 70 بيتسقطلها موتور بدون تغيير أي شيء, فهل ده مظبوط؟

يعني ممكن يكون فيه أنواع من الجير بوكس تتوافق مع ديزل و بنزين؟ و نفس السؤال عن الكورونة...

لازم واحد من الاثنين (الفتيس والكورونا) على الأقل يتغير، ده طبعا لو بنتكلم على دفع خلفى، لكن بالنسبة للجر الامامى فالفتيس والكورونا قطعة واحدة ولازم تتغير كلها مع المحرك

ممكن يكون فى بعض سيارات الجر الخلفى تعويض فرق سرعة البنزين من الديزل يكون فى الكورونا فقط وبالتالى يكفى تغيير الكورونا، بس علشان تقدر تقرر دة لازم تكون عارف بالتجربة او بالكتالوجات او بالفك والفحص ، فرق سرعة الكورونا دى والكورونا التانية

فيه مثال شهير جدا عن شركة تنتج الميكروباصات فى مصر وتملأ منتجاتها كل المناطق العشوائية فى ربوع المحروسة، الشركة دى كانت بتنتج ميكروباص يعمل بالبنزين، وبعد الغزو الرهيب لميكروباصات الديزل لمصر قررت انها تنتج ميكروباص يعمل بالديزل، فما كان منهم سوى ان قاموا باحلال المحرك البنزين بأخر ديزل دون تغيير آلات الجر، والنتيجة ان المحركات تصرخ مع ان السيارة من ابطأ ما يمكن ، عموما فإن كل من يشترى هذة السيارة يبدأ بتغيير الكورونا قبل اى شئ آخر

[Xpert]

انا طبعاُ مافيش كلام اقوله ...
بس في الديزل عامه مطلوب منك تركب الفرامل كبيره تغير اله الجر كامله .. موتور بفتيسه بالكورونه ..بكل بلاويه .. و غير كده موتور الديزل غالي في جماركه و في قطع غياره .. و اي تغير في السيت اب بتاع الكرونه و الفتيس ان مكنش حد عمله قبل كده ماتعملوش انت ..... نصيحه خليك في الغاز الطبيعي احسن !

[zakiali]

يعني تغير العربيه كلها من الأخر كده !

[ahmed1981]

السؤال... هل فعلا الشاسيه اللي بيكون مجهز للعربيات الديزل بيختلف عن شاسيه عربيات البنزين؟
هل العفشة بتختلف أو تحتاج لتعديل...؟

وزن موتور الديزل أكبر من وزن موتور البنزين وبالتالي لابد من مراعاة ذلك في العفشة

أنا عارف ان تويوتا شركة محترمة.. بس اللي أقصده هو مبدأ تصميم شاسيه و عفشه مختلفين مع اختلاف المواتير و عدم وجود هذا المبدأ في اللاند كروزر...

ولا في غير اللاند كروزر
الفكرة هو أني أصمم السيارة وأنا أعلم أني سأقوم بطرحها بموتور بنزين وآخر ديزل
وبذلك سأكون عامل حسابي على وزن الموتور الديزل
ولكن الشاسيه واحد والعفشة واحدة مصممة لأعلى حمل وهو حمل الموتور الديزل

[ahmed1981]

والأفضل هو التحويل للغاز الطبيعي
والموضع التالي عن التحويل للغاز الطبيعي:
http://www.nilemotors.net/Nile/showthread.php?t=7053

[amasis]

الترخيص يشترط ان يكون محرك الديزل من نفس ماركة السيارة يعنى فولكس للفولكس وتيوتا للتويوتا

[ahmed1981]

الترخيص يشترط ان يكون محرك الديزل من نفس ماركة السيارة يعنى فولكس للفولكس وتيوتا للتويوتا

بالفعل هذا شرط أساسي في المرور